| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[335] 5. ж̇амб̣угаж̇аад̇агаван̣н̣анаа
[335] 5. Jambukajātakavaṇṇanā
б̣рахаа бавад̣дхагааяо сод̇и ид̣̇ам̣ сад̇т̇аа взл̣уванз вихаранд̇о д̣̇звад̣̇ад̇д̇асса суг̇ад̇аалаяагаран̣ам̣ аараб̣бха гат̇зси. вад̇т̇у хздтаа вид̇т̇аарид̇амзва, аяам̣ банзд̇т̇а сан̇кзбо. сад̇т̇аараа ‘‘саарибуд̇д̇а, д̣̇звад̣̇ад̇д̇о д̇умхз д̣̇исваа гим̣ агаасий’’д̇и вуд̇д̇о т̇зро ааха ‘‘бханд̇з, со д̇умхаагам̣ анугаронд̇о мама хад̇т̇з б̣ийж̇аним̣ д̣̇ад̇ваа нибаж̇ж̇и. ат̇а нам̣ гогаалиго урз ж̇ан̣н̣унаа бахари, ид̇и со д̇умхаагам̣ анугаронд̇о д̣̇угкам̣ анубхавий’’д̇и. д̇ам̣ суд̇ваа сад̇т̇аа ‘‘на ко, саарибуд̇д̇а, д̣̇звад̣̇ад̇д̇о ид̣̇аанзва мама анугаронд̇о д̣̇угкам̣ анубход̇и, буб̣б̣збзса анубхосиязваа’’д̇и вад̇ваа д̇зна яаажид̇о ад̇ийд̇ам̣ аахари.
Brahā pavaḍḍhakāyo soti idaṃ satthā veḷuvane viharanto devadattassa sugatālayakaraṇaṃ ārabbha kathesi. Vatthu heṭṭhā vitthāritameva, ayaṃ panettha saṅkhepo. Satthārā ‘‘sāriputta, devadatto tumhe disvā kiṃ akāsī’’ti vutto thero āha ‘‘bhante, so tumhākaṃ anukaronto mama hatthe bījaniṃ datvā nipajji. Atha naṃ kokāliko ure jaṇṇunā pahari, iti so tumhākaṃ anukaronto dukkhaṃ anubhavī’’ti. Taṃ sutvā satthā ‘‘na kho, sāriputta, devadatto idāneva mama anukaronto dukkhaṃ anubhoti, pubbepesa anubhosiyevā’’ti vatvā tena yācito atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о сийхаяонияам̣ ниб̣б̣ад̇д̇ид̇ваа химаванд̇з г̇ухааяам̣ васанд̇о згад̣̇ивасам̣ махим̣сам̣ вад̇хид̇ваа мам̣сам̣ каад̣̇ид̇ваа баанийяам̣ бивид̇ваа г̇ухам̣ ааг̇ажчад̇и. зго син̇г̇аало д̇ам̣ д̣̇исваа балааяид̇ум̣ асаггонд̇о урзна нибаж̇ж̇и, ‘‘гим̣ ж̇амб̣угаа’’д̇и жа вуд̇д̇з ‘‘убадтахиссаами д̇ам̣, бхад̣̇д̣̇анд̇з’’д̇и ааха. сийхо ‘‘д̇зна хи зхий’’д̇и д̇ам̣ ад̇д̇ано васанадтаанам̣ нзд̇ваа д̣̇ивасз д̣̇ивасз мам̣сам̣ аахарид̇ваа босзси. д̇асса сийхавигхаасзна т̇ууласарийрад̇ам̣ бад̇д̇асса згад̣̇ивасам̣ маано уббаж̇ж̇и. со сийхам̣ убасан̇гамид̇ваа ааха ‘‘ахам̣, саами, нижжагаалам̣ д̇умхаагам̣ балиб̣од̇хо, д̇умхз нижжам̣ мам̣сам̣ аахарид̇ваа мам̣ босзт̇а, аж̇ж̇а д̇умхз ид̇хзва хот̇а, ахам̣ згам̣ вааран̣ам̣ вад̇хид̇ваа мам̣сам̣ каад̣̇ид̇ваа д̇умхаагамби аахариссаамий’’д̇и. сийхо ‘‘маа д̇з , ж̇амб̣уга, зд̇ам̣ ружжи, на д̇вам̣ вааран̣ам̣ вад̇хид̇ваа мам̣сакаад̣̇агаяонияам̣ ниб̣б̣ад̇д̇о, ахам̣ д̇з вааран̣ам̣ вад̇хид̇ваа д̣̇ассаами, вааран̣о наама махаагааяо бавад̣дхагааяо, маа вааран̣ам̣ г̇ан̣хи, мама важанам̣ гарохий’’д̇и вад̇ваа батамам̣ г̇аат̇амааха.
Atīte bārāṇasiyaṃ brahmadatte rajjaṃ kārente bodhisatto sīhayoniyaṃ nibbattitvā himavante guhāyaṃ vasanto ekadivasaṃ mahiṃsaṃ vadhitvā maṃsaṃ khāditvā pānīyaṃ pivitvā guhaṃ āgacchati. Eko siṅgālo taṃ disvā palāyituṃ asakkonto urena nipajji, ‘‘kiṃ jambukā’’ti ca vutte ‘‘upaṭṭhahissāmi taṃ, bhaddante’’ti āha. Sīho ‘‘tena hi ehī’’ti taṃ attano vasanaṭṭhānaṃ netvā divase divase maṃsaṃ āharitvā posesi. Tassa sīhavighāsena thūlasarīrataṃ pattassa ekadivasaṃ māno uppajji. So sīhaṃ upasaṅkamitvā āha ‘‘ahaṃ, sāmi, niccakālaṃ tumhākaṃ palibodho, tumhe niccaṃ maṃsaṃ āharitvā maṃ posetha, ajja tumhe idheva hotha, ahaṃ ekaṃ vāraṇaṃ vadhitvā maṃsaṃ khāditvā tumhākampi āharissāmī’’ti. Sīho ‘‘mā te , jambuka, etaṃ rucci, na tvaṃ vāraṇaṃ vadhitvā maṃsakhādakayoniyaṃ nibbatto, ahaṃ te vāraṇaṃ vadhitvā dassāmi, vāraṇo nāma mahākāyo pavaḍḍhakāyo, mā vāraṇaṃ gaṇhi, mama vacanaṃ karohī’’ti vatvā paṭhamaṃ gāthamāha.
137.
137.
‘‘б̣рахаа бавад̣дхагааяо со, д̣̇ийгхад̣̇аато жа ж̇амб̣уга;
‘‘Brahā pavaḍḍhakāyo so, dīghadāṭho ca jambuka;
на д̇вам̣ д̇ад̇т̇а гулз ж̇аад̇о, яад̇т̇а г̇ан̣ханд̇и гун̃ж̇ара’’нд̇и.
Na tvaṃ tattha kule jāto, yattha gaṇhanti kuñjara’’nti.
д̇ад̇т̇а б̣рахаад̇и маханд̇о. бавад̣дхагааяод̇и уд̣̇д̇хам̣ уг̇г̇ад̇агааяо. д̣̇ийгхад̣̇аатод̇и д̣̇ийгхад̣̇анд̇о д̇зхи д̣̇анд̇зхи д̇умхаад̣̇исз бахарид̇ваа ж̇ийвид̇агкаяз баабзд̇и. яад̇т̇аад̇и яасмим̣ сийхагулз ж̇аад̇аа мад̇д̇авааран̣ам̣ г̇ан̣ханд̇и, д̇вам̣ на д̇ад̇т̇а ж̇аад̇о, син̇г̇аалагулз бана ж̇аад̇осийд̇и ад̇т̇о.
Tattha brahāti mahanto. Pavaḍḍhakāyoti uddhaṃ uggatakāyo. Dīghadāṭhoti dīghadanto tehi dantehi tumhādise paharitvā jīvitakkhaye pāpeti. Yatthāti yasmiṃ sīhakule jātā mattavāraṇaṃ gaṇhanti, tvaṃ na tattha jāto, siṅgālakule pana jātosīti attho.
син̇г̇аало сийхзна ваарид̇оязва г̇ухаа нигкамид̇ваа д̇игкад̇д̇ум̣ ‘‘б̣угга б̣уггаа’’д̇и син̇г̇аалигам̣ над̣̇ам̣ над̣̇ид̇ваа баб̣б̣ад̇агуудз тид̇о баб̣б̣ад̇абаад̣̇ам̣ ологзнд̇о згам̣ гаал̣авааран̣ам̣ баб̣б̣ад̇абаад̣̇зна ааг̇ажчанд̇ам̣ д̣̇исваа уллан̇гхид̇ваа ‘‘д̇асса гумбхз бад̇иссаамий’’д̇и баривад̇д̇ид̇ваа баад̣̇амуулз бад̇и. вааран̣о буримабаад̣̇ам̣ угкибид̇ваа д̇асса мад̇т̇агз бад̇идтаабзси, сийсам̣ бхиж̇ж̇ид̇ваа жун̣н̣авижун̣н̣ам̣ ж̇аад̇ам̣ . со д̇ад̇т̇зва ануд̇т̇унанд̇о саяи, вааран̣о гон̃жанаад̣̇ам̣ гаронд̇о баггаами. б̣од̇хисад̇д̇о г̇анд̇ваа баб̣б̣ад̇амад̇т̇агз тид̇о д̇ам̣ винаасаббад̇д̇ам̣ д̣̇исваа ‘‘ад̇д̇ано маанам̣ ниссааяа надто син̇г̇аало’’д̇и д̇иссо г̇аат̇аа абхааси –
Siṅgālo sīhena vāritoyeva guhā nikkhamitvā tikkhattuṃ ‘‘bukka bukkā’’ti siṅgālikaṃ nadaṃ naditvā pabbatakūṭe ṭhito pabbatapādaṃ olokento ekaṃ kāḷavāraṇaṃ pabbatapādena āgacchantaṃ disvā ullaṅghitvā ‘‘tassa kumbhe patissāmī’’ti parivattitvā pādamūle pati. Vāraṇo purimapādaṃ ukkhipitvā tassa matthake patiṭṭhāpesi, sīsaṃ bhijjitvā cuṇṇavicuṇṇaṃ jātaṃ . So tattheva anutthunanto sayi, vāraṇo koñcanādaṃ karonto pakkāmi. Bodhisatto gantvā pabbatamatthake ṭhito taṃ vināsappattaṃ disvā ‘‘attano mānaṃ nissāya naṭṭho siṅgālo’’ti tisso gāthā abhāsi –
138.
138.
‘‘асийхо сийхамаанзна, яо ад̇д̇аанам̣ вигуб̣б̣ад̇и;
‘‘Asīho sīhamānena, yo attānaṃ vikubbati;
год̇т̇уува г̇аж̇амаасаж̇ж̇а, сзд̇и бхуумяаа ануд̇т̇унам̣.
Kotthūva gajamāsajja, seti bhūmyā anutthunaṃ.
139.
139.
‘‘яасассино уд̇д̇амабуг̇г̇аласса, сан̃ж̇аад̇аканд̇хасса махаб̣б̣аласса;
‘‘Yasassino uttamapuggalassa, sañjātakhandhassa mahabbalassa;
асамзгкияа т̇аамаб̣алуубабад̇д̇им̣, са сзд̇и нааг̇зна хад̇ояам̣ ж̇амб̣уго.
Asamekkhiya thāmabalūpapattiṃ, sa seti nāgena hatoyaṃ jambuko.
140.
140.
‘‘яо жийд̇ха гаммам̣ гуруд̇з бамааяа, т̇аамаб̣б̣алам̣ ад̇д̇ани сам̣вид̣̇ид̇ваа;
‘‘Yo cīdha kammaṃ kurute pamāya, thāmabbalaṃ attani saṃviditvā;
ж̇аббзна манд̇зна субхаасид̇зна, баригкаваа со вибулам̣ ж̇инаад̇ий’’д̇и.
Jappena mantena subhāsitena, parikkhavā so vipulaṃ jinātī’’ti.
д̇ад̇т̇а вигуб̣б̣ад̇ийд̇и баривад̇д̇зд̇и. год̇т̇ууваад̇и син̇г̇аало вияа. ануд̇т̇унанд̇и ануд̇т̇унанд̇о. ид̣̇ам̣ вуд̇д̇ам̣ ход̇и – яат̇аа аяам̣ год̇т̇у маханд̇ам̣ г̇аж̇ам̣ бад̇ваа ануд̇т̇унанд̇о бхуумияам̣ сзд̇и, звам̣ яо ан̃н̃о д̣̇уб̣б̣ало б̣алавад̇аа виг̇г̇ахам̣ гарод̇и, соби зваруубова ход̇ийд̇и.
Tattha vikubbatīti parivatteti. Kotthūvāti siṅgālo viya. Anutthunanti anutthunanto. Idaṃ vuttaṃ hoti – yathā ayaṃ kotthu mahantaṃ gajaṃ patvā anutthunanto bhūmiyaṃ seti, evaṃ yo añño dubbalo balavatā viggahaṃ karoti, sopi evarūpova hotīti.
яасассинод̇и иссарияавад̇о. уд̇д̇амабуг̇г̇алассаад̇и гааяаб̣алзна жа н̃аан̣аб̣алзна жа уд̇д̇амабуг̇г̇аласса. сан̃ж̇аад̇аканд̇хассаад̇и сусан̣тид̇амахааканд̇хасса. махаб̣б̣алассаад̇из махаат̇аамасса. т̇аамаб̣алуубабад̇д̇инд̇и зваруубасса сийхасса т̇аамасан̇каад̇ам̣ б̣алан̃жзва сийхаж̇аад̇исан̇каад̇ам̣ убабад̇д̇ин̃жа аж̇аанид̇ваа, гааяат̇ааман̃жа н̃аан̣аб̣алан̃жа сийхаубабад̇д̇ин̃жа аж̇аанид̇ваад̇и ад̇т̇о. са сзд̇ийд̇и ад̇д̇аанамби сийхзна сад̣̇исам̣ ман̃н̃амаано, со аяам̣ ж̇амб̣уго нааг̇зна хад̇о мад̇асаяанам̣ сзд̇и.
Yasassinoti issariyavato. Uttamapuggalassāti kāyabalena ca ñāṇabalena ca uttamapuggalassa. Sañjātakhandhassāti susaṇṭhitamahākhandhassa. Mahabbalassātie mahāthāmassa. Thāmabalūpapattinti evarūpassa sīhassa thāmasaṅkhātaṃ balañceva sīhajātisaṅkhātaṃ upapattiñca ajānitvā, kāyathāmañca ñāṇabalañca sīhaupapattiñca ajānitvāti attho. Sa setīti attānampi sīhena sadisaṃ maññamāno, so ayaṃ jambuko nāgena hato matasayanaṃ seti.
бамааяаад̇и баминид̇ваа убабаригкид̇ваа. ‘‘бамаан̣аа’’д̇иби баато, ад̇д̇ано бамаан̣ам̣ г̇ахзд̇ваа яо ад̇д̇ано бамаан̣зна гаммам̣ гуруд̇зд̇и ад̇т̇о. т̇аамаб̣б̣аланд̇и т̇аамасан̇каад̇ам̣ б̣алам̣, гааяат̇ааман̃жа н̃аан̣аб̣алан̃жаад̇иби ад̇т̇о. ж̇аббзнаад̇и ж̇абзна, аж̇жхзнзнаад̇и ад̇т̇о. манд̇знаад̇и ан̃н̃зхи бан̣д̣ид̇зхи сад̣̇д̇хим̣ манд̇зд̇ваа гаран̣зна. субхаасид̇знаад̇и сажжаад̣̇иг̇ун̣аяуд̇д̇зна анаваж̇ж̇аважанзна. баригкаваад̇и баригкаасамбанно. со вибулам̣ ж̇инаад̇ийд̇и яо зваруубо ход̇и, яам̣ гин̃жи гаммам̣ гурумаано ад̇д̇ано т̇ааман̃жа б̣алан̃жа н̃ад̇ваа ж̇аббаманд̇авасзна барижчинд̣̇ид̇ваа субхаасид̇ам̣ бхаасанд̇о гарод̇и, со вибулам̣ маханд̇ам̣ ад̇т̇ам̣ ж̇инаад̇и на барихааяад̇ийд̇и.
Pamāyāti paminitvā upaparikkhitvā. ‘‘Pamāṇā’’tipi pāṭho, attano pamāṇaṃ gahetvā yo attano pamāṇena kammaṃ kuruteti attho. Thāmabbalanti thāmasaṅkhātaṃ balaṃ, kāyathāmañca ñāṇabalañcātipi attho. Jappenāti japena, ajjhenenāti attho. Mantenāti aññehi paṇḍitehi saddhiṃ mantetvā karaṇena. Subhāsitenāti saccādiguṇayuttena anavajjavacanena. Parikkhavāti parikkhāsampanno. So vipulaṃ jinātīti yo evarūpo hoti, yaṃ kiñci kammaṃ kurumāno attano thāmañca balañca ñatvā jappamantavasena paricchinditvā subhāsitaṃ bhāsanto karoti, so vipulaṃ mahantaṃ atthaṃ jināti na parihāyatīti.
звам̣ б̣од̇хисад̇д̇о имаахи д̇ийхи г̇аат̇аахи имасмим̣ логз гад̇д̇аб̣б̣аяуд̇д̇агам̣ гаммам̣ гат̇зси.
Evaṃ bodhisatto imāhi tīhi gāthāhi imasmiṃ loke kattabbayuttakaṃ kammaṃ kathesi.
сад̇т̇аа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси – ‘‘д̇ад̣̇аа син̇г̇аало д̣̇звад̣̇ад̇д̇о ахоси, сийхо бана ахамзва ахоси’’нд̇и.
Satthā imaṃ dhammadesanaṃ āharitvā jātakaṃ samodhānesi – ‘‘tadā siṅgālo devadatto ahosi, sīho pana ahameva ahosi’’nti.
ж̇амб̣угаж̇аад̇агаван̣н̣анаа бан̃жамаа.
Jambukajātakavaṇṇanā pañcamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 335. ж̇амб̣угаж̇аад̇агам̣ • 335. Jambukajātakaṃ
