| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๘. ชานนฺตาชานนฺตปาปกรณปโญฺห
8. Jānantājānantapāpakaraṇapañho
๘. ราชา อาห ‘‘ภเนฺต นาคเสน, โย ชานโนฺต ปาปกมฺมํ กโรติ, โย อชานโนฺต ปาปกมฺมํ กโรติ, กสฺส พหุตรํ อปุญฺญ’’นฺติ? เถโร อาห ‘‘โย โข, มหาราช, อชานโนฺต ปาปกมฺมํ กโรติ, ตสฺส พหุตรํ อปุญฺญ’’นฺติฯ ‘‘เตน หิ, ภเนฺต นาคเสน, โย อมฺหากํ ราชปุโตฺต วา ราชมหามโตฺต วา อชานโนฺต ปาปกมฺมํ กโรติ, ตํ มยํ ทิคุณํ ทเณฺฑมา’’ติ? ‘‘ตํ กิํ มญฺญสิ, มหาราช, ตตฺตํ อโยคุฬํ อาทิตฺตํ สมฺปชฺชลิตํ สโชติภูตํ เอโก ชานโนฺต คเณฺหยฺย, เอโก อชานโนฺต คเณฺหยฺย, กตโม 1 พลวตรํ ฑเยฺหยฺยา’’ติฯ ‘‘โย โข, ภเนฺต, อชานโนฺต คเณฺหยฺย, โส 2 พลวตรํ ฑเยฺหยฺยา’’ติฯ ‘‘เอวเมว โข, มหาราช, โย อชานโนฺต ปาปกมฺมํ กโรติ, ตสฺส พหุตรํ อปุญฺญ’’นฺติฯ
8. Rājā āha ‘‘bhante nāgasena, yo jānanto pāpakammaṃ karoti, yo ajānanto pāpakammaṃ karoti, kassa bahutaraṃ apuñña’’nti? Thero āha ‘‘yo kho, mahārāja, ajānanto pāpakammaṃ karoti, tassa bahutaraṃ apuñña’’nti. ‘‘Tena hi, bhante nāgasena, yo amhākaṃ rājaputto vā rājamahāmatto vā ajānanto pāpakammaṃ karoti, taṃ mayaṃ diguṇaṃ daṇḍemā’’ti? ‘‘Taṃ kiṃ maññasi, mahārāja, tattaṃ ayoguḷaṃ ādittaṃ sampajjalitaṃ sajotibhūtaṃ eko jānanto gaṇheyya, eko ajānanto gaṇheyya, katamo 3 balavataraṃ ḍayheyyā’’ti. ‘‘Yo kho, bhante, ajānanto gaṇheyya, so 4 balavataraṃ ḍayheyyā’’ti. ‘‘Evameva kho, mahārāja, yo ajānanto pāpakammaṃ karoti, tassa bahutaraṃ apuñña’’nti.
‘‘กโลฺลสิ, ภเนฺต นาคเสนา’’ติฯ
‘‘Kallosi, bhante nāgasenā’’ti.
ชานนฺตาชานนฺตปาปกรณปโญฺห อฎฺฐโมฯ
Jānantājānantapāpakaraṇapañho aṭṭhamo.
Footnotes:
