| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၈. ဇာနန္တာဇာနန္တပာပကရဏပဉ္ဟော
8. Jānantājānantapāpakaraṇapañho
၈. ရာဇာ အာဟ ‘‘ဘန္တေ နာဂသေန, ယော ဇာနန္တော ပာပကမ္မံ ကရောတိ, ယော အဇာနန္တော ပာပကမ္မံ ကရောတိ, ကသ္သ ဗဟုတရံ အပုည’’န္တိ? ထေရော အာဟ ‘‘ယော ခော, မဟာရာဇ, အဇာနန္တော ပာပကမ္မံ ကရောတိ, တသ္သ ဗဟုတရံ အပုည’’န္တိ။ ‘‘တေန ဟိ, ဘန္တေ နာဂသေန, ယော အမ္ဟာကံ ရာဇပုတ္တော ဝာ ရာဇမဟာမတ္တော ဝာ အဇာနန္တော ပာပကမ္မံ ကရောတိ, တံ မယံ ဒိဂုဏံ ဒဏ္ဍေမာ’’တိ? ‘‘တံ ကိံ မညသိ, မဟာရာဇ, တတ္တံ အယောဂုဠံ အာဒိတ္တံ သမ္ပဇ္ဇလိတံ သဇောတိဘူတံ ဧကော ဇာနန္တော ဂဏ္ဟေယ္ယ, ဧကော အဇာနန္တော ဂဏ္ဟေယ္ယ, ကတမော 1 ဗလဝတရံ ဍယ္ဟေယ္ယာ’’တိ။ ‘‘ယော ခော, ဘန္တေ, အဇာနန္တော ဂဏ္ဟေယ္ယ, သော 2 ဗလဝတရံ ဍယ္ဟေယ္ယာ’’တိ။ ‘‘ဧဝမေဝ ခော, မဟာရာဇ, ယော အဇာနန္တော ပာပကမ္မံ ကရောတိ, တသ္သ ဗဟုတရံ အပုည’’န္တိ။
8. Rājā āha ‘‘bhante nāgasena, yo jānanto pāpakammaṃ karoti, yo ajānanto pāpakammaṃ karoti, kassa bahutaraṃ apuñña’’nti? Thero āha ‘‘yo kho, mahārāja, ajānanto pāpakammaṃ karoti, tassa bahutaraṃ apuñña’’nti. ‘‘Tena hi, bhante nāgasena, yo amhākaṃ rājaputto vā rājamahāmatto vā ajānanto pāpakammaṃ karoti, taṃ mayaṃ diguṇaṃ daṇḍemā’’ti? ‘‘Taṃ kiṃ maññasi, mahārāja, tattaṃ ayoguḷaṃ ādittaṃ sampajjalitaṃ sajotibhūtaṃ eko jānanto gaṇheyya, eko ajānanto gaṇheyya, katamo 3 balavataraṃ ḍayheyyā’’ti. ‘‘Yo kho, bhante, ajānanto gaṇheyya, so 4 balavataraṃ ḍayheyyā’’ti. ‘‘Evameva kho, mahārāja, yo ajānanto pāpakammaṃ karoti, tassa bahutaraṃ apuñña’’nti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
ဇာနန္တာဇာနန္တပာပကရဏပဉ္ဟော အဋ္ဌမော။
Jānantājānantapāpakaraṇapañho aṭṭhamo.
Footnotes:
