| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
8. ජානන්‌තාජානන්‌තපාපකරණපඤ්‌හො
8. Jānantājānantapāpakaraṇapañho
8. රාජා ආහ ‘‘භන්‌තෙ නාගසෙන, යො ජානන්‌තො පාපකම්‌මං කරොති, යො අජානන්‌තො පාපකම්‌මං කරොති, කස්‌ස බහුතරං අපුඤ්‌ඤ’’න්‌ති? ථෙරො ආහ ‘‘යො ඛො, මහාරාජ, අජානන්‌තො පාපකම්‌මං කරොති, තස්‌ස බහුතරං අපුඤ්‌ඤ’’න්‌ති. ‘‘තෙන හි, භන්‌තෙ නාගසෙන, යො අම්‌හාකං රාජපුත්‌තො වා රාජමහාමත්‌තො වා අජානන්‌තො පාපකම්‌මං කරොති, තං මයං දිගුණං දණ්‌ඩෙමා’’ති? ‘‘තං කිං මඤ්‌ඤසි, මහාරාජ, තත්‌තං අයොගුළං ආදිත්‌තං සම්‌පජ්‌ජලිතං සජොතිභූතං එකො ජානන්‌තො ගණ්‌හෙය්‍ය, එකො අජානන්‌තො ගණ්‌හෙය්‍ය, කතමො 1 බලවතරං ඩය්‌හෙය්‍යා’’ති. ‘‘යො ඛො, භන්‌තෙ, අජානන්‌තො ගණ්‌හෙය්‍ය, සො 2 බලවතරං ඩය්‌හෙය්‍යා’’ති. ‘‘එවමෙව ඛො, මහාරාජ, යො අජානන්‌තො පාපකම්‌මං කරොති, තස්‌ස බහුතරං අපුඤ්‌ඤ’’න්‌ති.
8. Rājā āha ‘‘bhante nāgasena, yo jānanto pāpakammaṃ karoti, yo ajānanto pāpakammaṃ karoti, kassa bahutaraṃ apuñña’’nti? Thero āha ‘‘yo kho, mahārāja, ajānanto pāpakammaṃ karoti, tassa bahutaraṃ apuñña’’nti. ‘‘Tena hi, bhante nāgasena, yo amhākaṃ rājaputto vā rājamahāmatto vā ajānanto pāpakammaṃ karoti, taṃ mayaṃ diguṇaṃ daṇḍemā’’ti? ‘‘Taṃ kiṃ maññasi, mahārāja, tattaṃ ayoguḷaṃ ādittaṃ sampajjalitaṃ sajotibhūtaṃ eko jānanto gaṇheyya, eko ajānanto gaṇheyya, katamo 3 balavataraṃ ḍayheyyā’’ti. ‘‘Yo kho, bhante, ajānanto gaṇheyya, so 4 balavataraṃ ḍayheyyā’’ti. ‘‘Evameva kho, mahārāja, yo ajānanto pāpakammaṃ karoti, tassa bahutaraṃ apuñña’’nti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
ජානන්‌තාජානන්‌තපාපකරණපඤ්‌හො අට්‌ඨමො.
Jānantājānantapāpakaraṇapañho aṭṭhamo.
Footnotes:
