| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. ஜனபத³கல்யாணீஸுத்தங்
10. Janapadakalyāṇīsuttaṃ
386. ஏவங் மே ஸுதங் – ஏகங் ஸமயங் ப⁴க³வா ஸும்பே⁴ஸு விஹரதி ஸேத³கங் நாம ஸும்பா⁴னங் நிக³மோ. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
386. Evaṃ me sutaṃ – ekaṃ samayaṃ bhagavā sumbhesu viharati sedakaṃ nāma sumbhānaṃ nigamo. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ஸெய்யதா²பி, பி⁴க்க²வே, ‘ஜனபத³கல்யாணீ, ஜனபத³கல்யாணீ’தி கோ², பி⁴க்க²வே, மஹாஜனகாயோ ஸன்னிபதெய்ய. ‘ஸா கோ² பனஸ்ஸ ஜனபத³கல்யாணீ பரமபாஸாவினீ நச்சே, பரமபாஸாவினீ கீ³தே. ஜனபத³கல்யாணீ நச்சதி கா³யதீ’தி கோ², பி⁴க்க²வே, பி⁴ய்யோஸோமத்தாய மஹாஜனகாயோ ஸன்னிபதெய்ய. அத² புரிஸோ ஆக³ச்செ²ய்ய ஜீவிதுகாமோ அமரிதுகாமோ ஸுக²காமோ து³க்க²ப்படிகூலோ. தமேனங் ஏவங் வதெ³ய்ய – ‘அயங் தே, அம்போ⁴ புரிஸ, ஸமதித்திகோ தேலபத்தோ அந்தரேன ச மஹாஸமஜ்ஜங் அந்தரேன ச ஜனபத³கல்யாணியா பரிஹரிதப்³போ³. புரிஸோ ச தே உக்கி²த்தாஸிகோ பிட்டி²தோ பிட்டி²தோ அனுப³ந்தி⁴ஸ்ஸதி. யத்தே²வ நங் தோ²கம்பி ச²ட்³டெ³ஸ்ஸதி தத்தே²வ தே ஸிரோ பாதெஸ்ஸதீ’தி. தங் கிங் மஞ்ஞத², பி⁴க்க²வே, அபி நு ஸோ புரிஸோ அமுங் தேலபத்தங் அமனஸிகரித்வா ப³ஹித்³தா⁴ பமாத³ங் ஆஹரெய்யா’’தி? ‘‘நோ ஹேதங், ப⁴ந்தே’’.
‘‘Seyyathāpi, bhikkhave, ‘janapadakalyāṇī, janapadakalyāṇī’ti kho, bhikkhave, mahājanakāyo sannipateyya. ‘Sā kho panassa janapadakalyāṇī paramapāsāvinī nacce, paramapāsāvinī gīte. Janapadakalyāṇī naccati gāyatī’ti kho, bhikkhave, bhiyyosomattāya mahājanakāyo sannipateyya. Atha puriso āgaccheyya jīvitukāmo amaritukāmo sukhakāmo dukkhappaṭikūlo. Tamenaṃ evaṃ vadeyya – ‘ayaṃ te, ambho purisa, samatittiko telapatto antarena ca mahāsamajjaṃ antarena ca janapadakalyāṇiyā pariharitabbo. Puriso ca te ukkhittāsiko piṭṭhito piṭṭhito anubandhissati. Yattheva naṃ thokampi chaḍḍessati tattheva te siro pātessatī’ti. Taṃ kiṃ maññatha, bhikkhave, api nu so puriso amuṃ telapattaṃ amanasikaritvā bahiddhā pamādaṃ āhareyyā’’ti? ‘‘No hetaṃ, bhante’’.
‘‘உபமா கோ² ம்யாயங், பி⁴க்க²வே, கதா அத்த²ஸ்ஸ விஞ்ஞாபனாய. அயங் சேவெத்த² அத்தோ² – ஸமதித்திகோ தேலபத்தோதி கோ², பி⁴க்க²வே, காயக³தாய ஏதங் ஸதியா அதி⁴வசனங். தஸ்மாதிஹ, பி⁴க்க²வே, ஏவங் ஸிக்கி²தப்³ப³ங் – ‘காயக³தா ஸதி நோ பா⁴விதா ப⁴விஸ்ஸதி ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴’தி. ஏவஞ்ஹி கோ², பி⁴க்க²வே, ஸிக்கி²தப்³ப³’’ந்தி. த³ஸமங்.
‘‘Upamā kho myāyaṃ, bhikkhave, katā atthassa viññāpanāya. Ayaṃ cevettha attho – samatittiko telapattoti kho, bhikkhave, kāyagatāya etaṃ satiyā adhivacanaṃ. Tasmātiha, bhikkhave, evaṃ sikkhitabbaṃ – ‘kāyagatā sati no bhāvitā bhavissati bahulīkatā yānīkatā vatthukatā anuṭṭhitā paricitā susamāraddhā’ti. Evañhi kho, bhikkhave, sikkhitabba’’nti. Dasamaṃ.
நாலந்த³வக்³கோ³ து³தியோ.
Nālandavaggo dutiyo.
தஸ்ஸுத்³தா³னங் –
Tassuddānaṃ –
மஹாபுரிஸோ நாலந்த³ங், சுந்தோ³ சேலஞ்ச பா³ஹியோ;
Mahāpuriso nālandaṃ, cundo celañca bāhiyo;
உத்தியோ அரியோ ப்³ரஹ்மா, ஸேத³கங் ஜனபதே³ன சாதி.
Uttiyo ariyo brahmā, sedakaṃ janapadena cāti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. ஜனபத³கல்யாணீஸுத்தவண்ணனா • 10. Janapadakalyāṇīsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. ஜனபத³கல்யாணீஸுத்தவண்ணனா • 10. Janapadakalyāṇīsuttavaṇṇanā
