| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. ජනපදකල්‍යාණීසුත්‌තං
10. Janapadakalyāṇīsuttaṃ
386. එවං මෙ සුතං – එකං සමයං භගවා සුම්‌භෙසු විහරති සෙදකං නාම සුම්‌භානං නිගමො. තත්‍ර ඛො භගවා භික්‌ඛූ ආමන්‌තෙසි – ‘‘භික්‌ඛවො’’ති. ‘‘භදන්‌තෙ’’ති තෙ භික්‌ඛූ භගවතො පච්‌චස්‌සොසුං. භගවා එතදවොච –
386. Evaṃ me sutaṃ – ekaṃ samayaṃ bhagavā sumbhesu viharati sedakaṃ nāma sumbhānaṃ nigamo. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘සෙය්‍යථාපි, භික්‌ඛවෙ, ‘ජනපදකල්‍යාණී, ජනපදකල්‍යාණී’ති ඛො, භික්‌ඛවෙ, මහාජනකායො සන්‌නිපතෙය්‍ය. ‘සා ඛො පනස්‌ස ජනපදකල්‍යාණී පරමපාසාවිනී නච්‌චෙ, පරමපාසාවිනී ගීතෙ. ජනපදකල්‍යාණී නච්‌චති ගායතී’ති ඛො, භික්‌ඛවෙ, භිය්‍යොසොමත්‌තාය මහාජනකායො සන්‌නිපතෙය්‍ය. අථ පුරිසො ආගච්‌ඡෙය්‍ය ජීවිතුකාමො අමරිතුකාමො සුඛකාමො දුක්‌ඛප්‌පටිකූලො. තමෙනං එවං වදෙය්‍ය – ‘අයං තෙ, අම්‌භො පුරිස, සමතිත්‌තිකො තෙලපත්‌තො අන්‌තරෙන ච මහාසමජ්‌ජං අන්‌තරෙන ච ජනපදකල්‍යාණියා පරිහරිතබ්‌බො. පුරිසො ච තෙ උක්‌ඛිත්‌තාසිකො පිට්‌ඨිතො පිට්‌ඨිතො අනුබන්‌ධිස්‌සති. යත්‌ථෙව නං ථොකම්‌පි ඡඩ්‌ඩෙස්‌සති තත්‌ථෙව තෙ සිරො පාතෙස්‌සතී’ති. තං කිං මඤ්‌ඤථ, භික්‌ඛවෙ, අපි නු සො පුරිසො අමුං තෙලපත්‌තං අමනසිකරිත්‌වා බහිද්‌ධා පමාදං ආහරෙය්‍යා’’ති? ‘‘නො හෙතං, භන්‌තෙ’’.
‘‘Seyyathāpi, bhikkhave, ‘janapadakalyāṇī, janapadakalyāṇī’ti kho, bhikkhave, mahājanakāyo sannipateyya. ‘Sā kho panassa janapadakalyāṇī paramapāsāvinī nacce, paramapāsāvinī gīte. Janapadakalyāṇī naccati gāyatī’ti kho, bhikkhave, bhiyyosomattāya mahājanakāyo sannipateyya. Atha puriso āgaccheyya jīvitukāmo amaritukāmo sukhakāmo dukkhappaṭikūlo. Tamenaṃ evaṃ vadeyya – ‘ayaṃ te, ambho purisa, samatittiko telapatto antarena ca mahāsamajjaṃ antarena ca janapadakalyāṇiyā pariharitabbo. Puriso ca te ukkhittāsiko piṭṭhito piṭṭhito anubandhissati. Yattheva naṃ thokampi chaḍḍessati tattheva te siro pātessatī’ti. Taṃ kiṃ maññatha, bhikkhave, api nu so puriso amuṃ telapattaṃ amanasikaritvā bahiddhā pamādaṃ āhareyyā’’ti? ‘‘No hetaṃ, bhante’’.
‘‘උපමා ඛො ම්‍යායං, භික්‌ඛවෙ, කතා අත්‌ථස්‌ස විඤ්‌ඤාපනාය. අයං චෙවෙත්‌ථ අත්‌ථො – සමතිත්‌තිකො තෙලපත්‌තොති ඛො, භික්‌ඛවෙ, කායගතාය එතං සතියා අධිවචනං. තස්‌මාතිහ, භික්‌ඛවෙ, එවං සික්‌ඛිතබ්‌බං – ‘කායගතා සති නො භාවිතා භවිස්‌සති බහුලීකතා යානීකතා වත්‌ථුකතා අනුට්‌ඨිතා පරිචිතා සුසමාරද්‌ධා’ති. එවඤ්‌හි ඛො, භික්‌ඛවෙ, සික්‌ඛිතබ්‌බ’’න්‌ති. දසමං.
‘‘Upamā kho myāyaṃ, bhikkhave, katā atthassa viññāpanāya. Ayaṃ cevettha attho – samatittiko telapattoti kho, bhikkhave, kāyagatāya etaṃ satiyā adhivacanaṃ. Tasmātiha, bhikkhave, evaṃ sikkhitabbaṃ – ‘kāyagatā sati no bhāvitā bhavissati bahulīkatā yānīkatā vatthukatā anuṭṭhitā paricitā susamāraddhā’ti. Evañhi kho, bhikkhave, sikkhitabba’’nti. Dasamaṃ.
නාලන්‌දවග්‌ගො දුතියො.
Nālandavaggo dutiyo.
තස්‌සුද්‌දානං –
Tassuddānaṃ –
මහාපුරිසො නාලන්‌දං, චුන්‌දො චෙලඤ්‌ච බාහියො;
Mahāpuriso nālandaṃ, cundo celañca bāhiyo;
උත්‌තියො අරියො බ්‍රහ්‌මා, සෙදකං ජනපදෙන චාති.
Uttiyo ariyo brahmā, sedakaṃ janapadena cāti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. ජනපදකල්‍යාණීසුත්‌තවණ්‌ණනා • 10. Janapadakalyāṇīsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 10. ජනපදකල්‍යාණීසුත්‌තවණ්‌ණනා • 10. Janapadakalyāṇīsuttavaṇṇanā
