| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੧੦. ਜਨਪਦਕਲ੍ਯਾਣੀਸੁਤ੍ਤવਣ੍ਣਨਾ
10. Janapadakalyāṇīsuttavaṇṇanā
੩੮੬. ਦਸਮੇ ਜਨਪਦਕਲ੍ਯਾਣੀਤਿ ਜਨਪਦਮ੍ਹਿ ਕਲ੍ਯਾਣੀ ਉਤ੍ਤਮਾ ਛਸਰੀਰਦੋਸਰਹਿਤਾ ਪਞ੍ਚਕਲ੍ਯਾਣਸਮਨ੍ਨਾਗਤਾ। ਸਾ ਹਿ ਯਸ੍ਮਾ ਨਾਤਿਦੀਘਾ ਨਾਤਿਰਸ੍ਸਾ, ਨਾਤਿਕਿਸਾ ਨਾਤਿਥੂਲਾ, ਨਾਤਿਕਾਲ਼ਾ ਨਾਚ੍ਚੋਦਾਤਾ, ਅਤਿਕ੍ਕਨ੍ਤਾ, ਮਾਨੁਸવਣ੍ਣਂ ਅਪ੍ਪਤ੍ਤਾ ਦਿਬ੍ਬવਣ੍ਣਂ, ਤਸ੍ਮਾ ਛਸਰੀਰਦੋਸਰਹਿਤਾ। ਛવਿਕਲ੍ਯਾਣਂ, ਮਂਸਕਲ੍ਯਾਣਂ, ਨ੍ਹਾਰੁਕਲ੍ਯਾਣਂ, ਅਟ੍ਠਿਕਲ੍ਯਾਣਂ, વਯਕਲ੍ਯਾਣਨ੍ਤਿ ਇਮੇਹਿ ਪਨ ਕਲ੍ਯਾਣੇਹਿ ਸਮਨ੍ਨਾਗਤਤ੍ਤਾ ਪਞ੍ਚਕਲ੍ਯਾਣੇਹਿ ਸਮਨ੍ਨਾਗਤਾ ਨਾਮ। ਤਸ੍ਸਾ ਹਿ ਆਗਨ੍ਤੁਕੋਭਾਸਕਿਚ੍ਚਂ ਨਤ੍ਥਿ, ਅਤ੍ਤਨੋ ਸਰੀਰੋਭਾਸੇਨੇવ ਦ੍વਾਦਸਹਤ੍ਥਟ੍ਠਾਨੇ ਆਲੋਕਂ ਕਰੋਤਿ, ਪਿਯਙ੍ਗੁਸਾਮਾ વਾ ਹੋਤਿ, ਸੁવਣ੍ਣਸਾਮਾ વਾ, ਅਯਮਸ੍ਸਾ ਛવਿਕਲ੍ਯਾਣਤਾ। ਚਤ੍ਤਾਰੋ ਪਨਸ੍ਸਾ ਹਤ੍ਥਪਾਦਾ ਮੁਖਪਰਿਯੋਸਾਨਞ੍ਚ ਲਾਖਾਰਸਪਰਿਕਮ੍ਮਕਤਂ વਿਯ ਰਤ੍ਤਪવਾਲ਼ਰਤ੍ਤਕਮ੍ਬਲਸਦਿਸਂ ਹੋਤਿ, ਅਯਮਸ੍ਸਾ ਮਂਸਕਲ੍ਯਾਣਤਾ। વੀਸਤਿ ਪਨ ਨਖਪਤ੍ਤਾਨਿ ਮਂਸਤੋ ਅਮੁਤ੍ਤਟ੍ਠਾਨੇ ਲਾਖਾਰਸਪੂਰਿਤਾਨਿ વਿਯ, ਮੁਤ੍ਤਟ੍ਠਾਨੇ ਖੀਰਧਾਰਾਸਦਿਸਾਨਿ, ਹੋਨ੍ਤਿ ਅਯਮਸ੍ਸਾ ਨ੍ਹਾਰੁਕਲ੍ਯਾਣਕਤਾ। ਦ੍વਤ੍ਤਿਂਸ ਦਨ੍ਤਾ ਸੁਫੁਸਿਤਾ ਸੁਧੋਤવਜਿਰਪਨ੍ਤਿ વਿਯ ਖਾਯਨ੍ਤਿ, ਅਯਮਸ੍ਸਾ ਅਟ੍ਠਿਕਲ੍ਯਾਣਤਾ। વੀਸਤਿવਸ੍ਸਸਤਿਕਾਪਿ ਪਨ ਸਮਾਨਾ ਸੋਲ਼ਸવਸ੍ਸੁਦ੍ਦੇਸਿਕਾ વਿਯ ਹੋਤਿ ਨਿਪ੍ਪਲਿਤਾ, ਅਯਮਸ੍ਸਾ વਯਕਲ੍ਯਾਣਤਾ।
386. Dasame janapadakalyāṇīti janapadamhi kalyāṇī uttamā chasarīradosarahitā pañcakalyāṇasamannāgatā. Sā hi yasmā nātidīghā nātirassā, nātikisā nātithūlā, nātikāḷā nāccodātā, atikkantā, mānusavaṇṇaṃ appattā dibbavaṇṇaṃ, tasmā chasarīradosarahitā. Chavikalyāṇaṃ, maṃsakalyāṇaṃ, nhārukalyāṇaṃ, aṭṭhikalyāṇaṃ, vayakalyāṇanti imehi pana kalyāṇehi samannāgatattā pañcakalyāṇehi samannāgatā nāma. Tassā hi āgantukobhāsakiccaṃ natthi, attano sarīrobhāseneva dvādasahatthaṭṭhāne ālokaṃ karoti, piyaṅgusāmā vā hoti, suvaṇṇasāmā vā, ayamassā chavikalyāṇatā. Cattāro panassā hatthapādā mukhapariyosānañca lākhārasaparikammakataṃ viya rattapavāḷarattakambalasadisaṃ hoti, ayamassā maṃsakalyāṇatā. Vīsati pana nakhapattāni maṃsato amuttaṭṭhāne lākhārasapūritāni viya, muttaṭṭhāne khīradhārāsadisāni, honti ayamassā nhārukalyāṇakatā. Dvattiṃsa dantā suphusitā sudhotavajirapanti viya khāyanti, ayamassā aṭṭhikalyāṇatā. Vīsativassasatikāpi pana samānā soḷasavassuddesikā viya hoti nippalitā, ayamassā vayakalyāṇatā.
ਪਰਮਪਾਸਾવਿਨੀਤਿ ਏਤ੍ਥ ਪਸવਨਂ ਪਸਾવੋ, ਪવਤ੍ਤੀਤਿ ਅਤ੍ਥੋ। ਪਸਾવੋ ਏવ ਪਾਸਾવੋ। ਪਰਮੋ ਪਾਸਾવੋ ਪਰਮਪਾਸਾવੋ, ਸੋ ਅਸ੍ਸਾ ਅਤ੍ਥੀਤਿ ਪਰਮਪਾਸਾવਿਨੀ। ਨਚ੍ਚੇ ਚ ਗੀਤੇ ਚ ਉਤ੍ਤਮਪવਤ੍ਤਿ ਸੇਟ੍ਠਕਿਰਿਯਾ, ਉਤ੍ਤਮਮੇવ ਨਚ੍ਚਂ ਨਚ੍ਚਤਿ, ਗੀਤਂ વਾ ਗਾਯਤੀਤਿ વੁਤ੍ਤਂ ਹੋਤਿ। ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇવ। ਇਮੇਸੁ ਪਨ ਦ੍વੀਸੁ ਸੁਤ੍ਤੇਸੁ ਪੁਬ੍ਬਭਾਗવਿਪਸ੍ਸਨਾવ ਕਥਿਤਾਤਿ।
Paramapāsāvinīti ettha pasavanaṃ pasāvo, pavattīti attho. Pasāvo eva pāsāvo. Paramo pāsāvo paramapāsāvo, so assā atthīti paramapāsāvinī. Nacce ca gīte ca uttamapavatti seṭṭhakiriyā, uttamameva naccaṃ naccati, gītaṃ vā gāyatīti vuttaṃ hoti. Sesaṃ sabbattha uttānatthameva. Imesu pana dvīsu suttesu pubbabhāgavipassanāva kathitāti.
ਨਾਲਨ੍ਦવਗ੍ਗੋ ਦੁਤਿਯੋ।
Nālandavaggo dutiyo.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧੦. ਜਨਪਦਕਲ੍ਯਾਣੀਸੁਤ੍ਤਂ • 10. Janapadakalyāṇīsuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੧੦. ਜਨਪਦਕਲ੍ਯਾਣੀਸੁਤ੍ਤવਣ੍ਣਨਾ • 10. Janapadakalyāṇīsuttavaṇṇanā
