| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৯. জন্তাঘরৰত্তাদিকথা
9. Jantāgharavattādikathā
৩৭১. জন্তাঘরৰত্তে এৰং ৰিনিচ্ছযো ৰেদিতব্বোতি যোজনা। বহিজগতীতি বহিআলিন্দো।
371. Jantāgharavatte evaṃ vinicchayo veditabboti yojanā. Bahijagatīti bahiālindo.
৩৭৩. আচমনৰত্থুস্মিং এৰমত্থো ৰেদিতব্বোতি যোজনা। নীহরিত্ৰাতি উদকং নীহরিত্ৰা। আচমিতব্বন্তি ধোৰিতব্বং। ‘‘আপুব্বো চমু ধোৰনে’’তি হি ধাতুপাঠেসু ৰুত্তং। ইদং অতিৰিৰটন্তি ইদং ঠানং অতিৰিৰটং, ন কেনচি পটিচ্ছন্নন্তি অত্থো। উদকং অলভন্তস্সেৰাতি উদকং অলভন্তেযেৰ।
373. Ācamanavatthusmiṃ evamattho veditabboti yojanā. Nīharitvāti udakaṃ nīharitvā. Ācamitabbanti dhovitabbaṃ. ‘‘Āpubbo camu dhovane’’ti hi dhātupāṭhesu vuttaṃ. Idaṃ ativivaṭanti idaṃ ṭhānaṃ ativivaṭaṃ, na kenaci paṭicchannanti attho. Udakaṃ alabhantassevāti udakaṃ alabhanteyeva.
৩৭৪. ৰচ্চকুটিৰত্তে এৰং ৰিনিচ্ছযো ৰেদিতব্বোতি যোজনা। অযন্তি দন্তকট্ঠং খাদতো ৰচ্চকরণং। সব্বত্থেৰাতি সব্বস্মিং এৰ ঠানে। ‘‘ন ফরুসেন কট্ঠেনা’’তি এত্থ ন কেৰলং খরকট্ঠমেৰ, ফালিতকট্ঠাদযোপি ছৰিঅৰলেখনকট্ঠা ফরুসাযেৰ নামাতি দস্সেন্তো আহ ‘‘ফালিতকট্ঠেন ৰা’’তিআদি। পৰিট্ঠস্সাতি ৰচ্চকুটিং পৰিট্ঠস্স।
374. Vaccakuṭivatte evaṃ vinicchayo veditabboti yojanā. Ayanti dantakaṭṭhaṃ khādato vaccakaraṇaṃ. Sabbatthevāti sabbasmiṃ eva ṭhāne. ‘‘Na pharusena kaṭṭhenā’’ti ettha na kevalaṃ kharakaṭṭhameva, phālitakaṭṭhādayopi chaviavalekhanakaṭṭhā pharusāyeva nāmāti dassento āha ‘‘phālitakaṭṭhena vā’’tiādi. Paviṭṭhassāti vaccakuṭiṃ paviṭṭhassa.
সব্বসাধারণট্ঠানন্তি সব্বেসং ভিক্খূনং, সব্বেহি ৰা সাধারণং ৰচ্চকুটিসঙ্খাতং ঠানং। তত্রাতি তস্মিং সব্বসাধারণে ঠানে। নিবদ্ধগমনত্থাযাতি অত্তনো নিবদ্ধগমনত্থায কতং যং ঠানং ৰা যং পুগ্গলিকট্ঠানং ৰা হোতীতি যোজনা।
Sabbasādhāraṇaṭṭhānanti sabbesaṃ bhikkhūnaṃ, sabbehi vā sādhāraṇaṃ vaccakuṭisaṅkhātaṃ ṭhānaṃ. Tatrāti tasmiṃ sabbasādhāraṇe ṭhāne. Nibaddhagamanatthāyāti attano nibaddhagamanatthāya kataṃ yaṃ ṭhānaṃ vā yaṃ puggalikaṭṭhānaṃ vā hotīti yojanā.
উহতাতি এত্থ উপুব্বো হদধাতূতি দস্সেন্তো আহ ‘‘উহদিতা’’তি। ‘‘হদ করীসোস্সগ্গে’’তি ধাতুপাঠেসু (পাণিনী ৯৭৭ ধাতুপাঠে; সদ্দনীতিধাতুমালাযং ১৫ দকারন্তধাতু) ৰুত্তত্তা ৰচ্চকূপতো বহি করীসস্স ওস্সজ্জনন্তি আহ ‘‘বহি ৰচ্চমক্খিতা’’তি। ধোৰিতব্বাতি উদকেন ধোৰিতব্বা। এতম্পীতি উদকস্স অৰিজ্জমানম্পি। সব্বত্থাতি সব্বস্মিং ৰত্তক্খন্ধকে।
Uhatāti ettha upubbo hadadhātūti dassento āha ‘‘uhaditā’’ti. ‘‘Hada karīsossagge’’ti dhātupāṭhesu (pāṇinī 977 dhātupāṭhe; saddanītidhātumālāyaṃ 15 dakārantadhātu) vuttattā vaccakūpato bahi karīsassa ossajjananti āha ‘‘bahi vaccamakkhitā’’ti. Dhovitabbāti udakena dhovitabbā. Etampīti udakassa avijjamānampi. Sabbatthāti sabbasmiṃ vattakkhandhake.
ইতি ৰত্তক্খন্ধকৰণ্ণনায যোজনা সমত্তা।
Iti vattakkhandhakavaṇṇanāya yojanā samattā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
৯. জন্তাঘরৰত্তকথা • 9. Jantāgharavattakathā
১০. ৰচ্চকুটিৰত্তকথা • 10. Vaccakuṭivattakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / জন্তাঘরৰত্তাদিকথা • Jantāgharavattādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৰচ্চকুটিৰত্তকথাৰণ্ণনা • Vaccakuṭivattakathāvaṇṇanā
