| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೯. ಜನ್ತಾಘರವತ್ತಾದಿಕಥಾ
9. Jantāgharavattādikathā
೩೭೧. ಜನ್ತಾಘರವತ್ತೇ ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ। ಬಹಿಜಗತೀತಿ ಬಹಿಆಲಿನ್ದೋ।
371. Jantāgharavatte evaṃ vinicchayo veditabboti yojanā. Bahijagatīti bahiālindo.
೩೭೩. ಆಚಮನವತ್ಥುಸ್ಮಿಂ ಏವಮತ್ಥೋ ವೇದಿತಬ್ಬೋತಿ ಯೋಜನಾ। ನೀಹರಿತ್ವಾತಿ ಉದಕಂ ನೀಹರಿತ್ವಾ। ಆಚಮಿತಬ್ಬನ್ತಿ ಧೋವಿತಬ್ಬಂ। ‘‘ಆಪುಬ್ಬೋ ಚಮು ಧೋವನೇ’’ತಿ ಹಿ ಧಾತುಪಾಠೇಸು ವುತ್ತಂ। ಇದಂ ಅತಿವಿವಟನ್ತಿ ಇದಂ ಠಾನಂ ಅತಿವಿವಟಂ, ನ ಕೇನಚಿ ಪಟಿಚ್ಛನ್ನನ್ತಿ ಅತ್ಥೋ। ಉದಕಂ ಅಲಭನ್ತಸ್ಸೇವಾತಿ ಉದಕಂ ಅಲಭನ್ತೇಯೇವ।
373. Ācamanavatthusmiṃ evamattho veditabboti yojanā. Nīharitvāti udakaṃ nīharitvā. Ācamitabbanti dhovitabbaṃ. ‘‘Āpubbo camu dhovane’’ti hi dhātupāṭhesu vuttaṃ. Idaṃ ativivaṭanti idaṃ ṭhānaṃ ativivaṭaṃ, na kenaci paṭicchannanti attho. Udakaṃ alabhantassevāti udakaṃ alabhanteyeva.
೩೭೪. ವಚ್ಚಕುಟಿವತ್ತೇ ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ। ಅಯನ್ತಿ ದನ್ತಕಟ್ಠಂ ಖಾದತೋ ವಚ್ಚಕರಣಂ। ಸಬ್ಬತ್ಥೇವಾತಿ ಸಬ್ಬಸ್ಮಿಂ ಏವ ಠಾನೇ। ‘‘ನ ಫರುಸೇನ ಕಟ್ಠೇನಾ’’ತಿ ಏತ್ಥ ನ ಕೇವಲಂ ಖರಕಟ್ಠಮೇವ, ಫಾಲಿತಕಟ್ಠಾದಯೋಪಿ ಛವಿಅವಲೇಖನಕಟ್ಠಾ ಫರುಸಾಯೇವ ನಾಮಾತಿ ದಸ್ಸೇನ್ತೋ ಆಹ ‘‘ಫಾಲಿತಕಟ್ಠೇನ ವಾ’’ತಿಆದಿ। ಪವಿಟ್ಠಸ್ಸಾತಿ ವಚ್ಚಕುಟಿಂ ಪವಿಟ್ಠಸ್ಸ।
374. Vaccakuṭivatte evaṃ vinicchayo veditabboti yojanā. Ayanti dantakaṭṭhaṃ khādato vaccakaraṇaṃ. Sabbatthevāti sabbasmiṃ eva ṭhāne. ‘‘Na pharusena kaṭṭhenā’’ti ettha na kevalaṃ kharakaṭṭhameva, phālitakaṭṭhādayopi chaviavalekhanakaṭṭhā pharusāyeva nāmāti dassento āha ‘‘phālitakaṭṭhena vā’’tiādi. Paviṭṭhassāti vaccakuṭiṃ paviṭṭhassa.
ಸಬ್ಬಸಾಧಾರಣಟ್ಠಾನನ್ತಿ ಸಬ್ಬೇಸಂ ಭಿಕ್ಖೂನಂ, ಸಬ್ಬೇಹಿ ವಾ ಸಾಧಾರಣಂ ವಚ್ಚಕುಟಿಸಙ್ಖಾತಂ ಠಾನಂ। ತತ್ರಾತಿ ತಸ್ಮಿಂ ಸಬ್ಬಸಾಧಾರಣೇ ಠಾನೇ। ನಿಬದ್ಧಗಮನತ್ಥಾಯಾತಿ ಅತ್ತನೋ ನಿಬದ್ಧಗಮನತ್ಥಾಯ ಕತಂ ಯಂ ಠಾನಂ ವಾ ಯಂ ಪುಗ್ಗಲಿಕಟ್ಠಾನಂ ವಾ ಹೋತೀತಿ ಯೋಜನಾ।
Sabbasādhāraṇaṭṭhānanti sabbesaṃ bhikkhūnaṃ, sabbehi vā sādhāraṇaṃ vaccakuṭisaṅkhātaṃ ṭhānaṃ. Tatrāti tasmiṃ sabbasādhāraṇe ṭhāne. Nibaddhagamanatthāyāti attano nibaddhagamanatthāya kataṃ yaṃ ṭhānaṃ vā yaṃ puggalikaṭṭhānaṃ vā hotīti yojanā.
ಉಹತಾತಿ ಏತ್ಥ ಉಪುಬ್ಬೋ ಹದಧಾತೂತಿ ದಸ್ಸೇನ್ತೋ ಆಹ ‘‘ಉಹದಿತಾ’’ತಿ। ‘‘ಹದ ಕರೀಸೋಸ್ಸಗ್ಗೇ’’ತಿ ಧಾತುಪಾಠೇಸು (ಪಾಣಿನೀ ೯೭೭ ಧಾತುಪಾಠೇ; ಸದ್ದನೀತಿಧಾತುಮಾಲಾಯಂ ೧೫ ದಕಾರನ್ತಧಾತು) ವುತ್ತತ್ತಾ ವಚ್ಚಕೂಪತೋ ಬಹಿ ಕರೀಸಸ್ಸ ಓಸ್ಸಜ್ಜನನ್ತಿ ಆಹ ‘‘ಬಹಿ ವಚ್ಚಮಕ್ಖಿತಾ’’ತಿ। ಧೋವಿತಬ್ಬಾತಿ ಉದಕೇನ ಧೋವಿತಬ್ಬಾ। ಏತಮ್ಪೀತಿ ಉದಕಸ್ಸ ಅವಿಜ್ಜಮಾನಮ್ಪಿ। ಸಬ್ಬತ್ಥಾತಿ ಸಬ್ಬಸ್ಮಿಂ ವತ್ತಕ್ಖನ್ಧಕೇ।
Uhatāti ettha upubbo hadadhātūti dassento āha ‘‘uhaditā’’ti. ‘‘Hada karīsossagge’’ti dhātupāṭhesu (pāṇinī 977 dhātupāṭhe; saddanītidhātumālāyaṃ 15 dakārantadhātu) vuttattā vaccakūpato bahi karīsassa ossajjananti āha ‘‘bahi vaccamakkhitā’’ti. Dhovitabbāti udakena dhovitabbā. Etampīti udakassa avijjamānampi. Sabbatthāti sabbasmiṃ vattakkhandhake.
ಇತಿ ವತ್ತಕ್ಖನ್ಧಕವಣ್ಣನಾಯ ಯೋಜನಾ ಸಮತ್ತಾ।
Iti vattakkhandhakavaṇṇanāya yojanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi
೯. ಜನ್ತಾಘರವತ್ತಕಥಾ • 9. Jantāgharavattakathā
೧೦. ವಚ್ಚಕುಟಿವತ್ತಕಥಾ • 10. Vaccakuṭivattakathā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ಜನ್ತಾಘರವತ್ತಾದಿಕಥಾ • Jantāgharavattādikathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ವಚ್ಚಕುಟಿವತ್ತಕಥಾವಣ್ಣನಾ • Vaccakuṭivattakathāvaṇṇanā
