| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
9. ஜந்தாக⁴ரவத்தகதா²
9. Jantāgharavattakathā
371. தேன கோ² பன ஸமயேன ச²ப்³ப³க்³கி³யா பி⁴க்கூ² ஜந்தாக⁴ரே தே²ரேஹி பி⁴க்கூ²ஹி நிவாரியமானா அனாத³ரியங் படிச்ச பஹூதங் கட்ட²ங் ஆரோபெத்வா அக்³கி³ங் த³த்வா த்³வாரங் த²கெத்வா த்³வாரே நிஸீத³ந்தி. பி⁴க்கூ² 1 உண்ஹாபி⁴தத்தா த்³வாரங் அலப⁴மானா முச்சி²தா பபதந்தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² ஜந்தாக⁴ரே தே²ரேஹி பி⁴க்கூ²ஹி நிவாரியமானா அனாத³ரியங் படிச்ச பஹூதங் கட்ட²ங் ஆரோபெத்வா அக்³கி³ங் த³த்வா த்³வாரங் த²கெத்வா த்³வாரே நிஸீதி³ஸ்ஸந்தி! பி⁴க்கூ² உண்ஹாபி⁴தத்தா த்³வாரங் அலப⁴மானா முச்சி²தா பபதந்தீ’’தி. அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர, பி⁴க்க²வே, ச²ப்³ப³க்³கி³யா பி⁴க்கூ² ஜந்தாக⁴ரே தே²ரேஹி பி⁴க்கூ²ஹி நிவாரியமானா அனாத³ரியங் படிச்ச பஹூதங் கட்ட²ங் ஆரோபெத்வா அக்³கி³ங் த³த்வா த்³வாரங் த²கெத்வா த்³வாரே நிஸீத³ந்தி; பி⁴க்கூ² உண்ஹாபி⁴தத்தா த்³வாரங் அலப⁴மானா முச்சி²தா பபதந்தீ’’தி? ‘‘ஸச்சங் ப⁴க³வா’’தி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந , பி⁴க்க²வே, ஜந்தாக⁴ரே தே²ரேன பி⁴க்கு²னா நிவாரியமானேன அனாத³ரியங் படிச்ச பஹூதங் கட்ட²ங் ஆரோபெத்வா அக்³கி³ தா³தப்³போ³. யோ த³தெ³ய்ய, ஆபத்தி து³க்கடஸ்ஸ. ந, பி⁴க்க²வே, த்³வாரங் த²கெத்வா த்³வாரே நிஸீதி³தப்³ப³ங். யோ நிஸீதெ³ய்ய, ஆபத்தி து³க்கடஸ்ஸ.
371. Tena kho pana samayena chabbaggiyā bhikkhū jantāghare therehi bhikkhūhi nivāriyamānā anādariyaṃ paṭicca pahūtaṃ kaṭṭhaṃ āropetvā aggiṃ datvā dvāraṃ thaketvā dvāre nisīdanti. Bhikkhū 2 uṇhābhitattā dvāraṃ alabhamānā mucchitā papatanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū jantāghare therehi bhikkhūhi nivāriyamānā anādariyaṃ paṭicca pahūtaṃ kaṭṭhaṃ āropetvā aggiṃ datvā dvāraṃ thaketvā dvāre nisīdissanti! Bhikkhū uṇhābhitattā dvāraṃ alabhamānā mucchitā papatantī’’ti. Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, chabbaggiyā bhikkhū jantāghare therehi bhikkhūhi nivāriyamānā anādariyaṃ paṭicca pahūtaṃ kaṭṭhaṃ āropetvā aggiṃ datvā dvāraṃ thaketvā dvāre nisīdanti; bhikkhū uṇhābhitattā dvāraṃ alabhamānā mucchitā papatantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi – ‘‘na , bhikkhave, jantāghare therena bhikkhunā nivāriyamānena anādariyaṃ paṭicca pahūtaṃ kaṭṭhaṃ āropetvā aggi dātabbo. Yo dadeyya, āpatti dukkaṭassa. Na, bhikkhave, dvāraṃ thaketvā dvāre nisīditabbaṃ. Yo nisīdeyya, āpatti dukkaṭassa.
372. ‘‘தேன ஹி, பி⁴க்க²வே, பி⁴க்கூ²னங் ஜந்தாக⁴ரவத்தங் பஞ்ஞபெஸ்ஸாமி யதா² பி⁴க்கூ²ஹி ஜந்தாக⁴ரே ஸம்மா வத்திதப்³ப³ங். யோ பட²மங் ஜந்தாக⁴ரங் க³ச்ச²தி, ஸசே சா²ரிகா உஸ்ஸன்னா ஹோதி, சா²ரிகா ச²ட்³டே³தப்³பா³. ஸசே ஜந்தாக⁴ரங் உக்லாபங் ஹோதி, ஜந்தாக⁴ரங் ஸம்மஜ்ஜிதப்³ப³ங். ஸசே பரிப⁴ண்ட³ங் உக்லாபங் ஹோதி, பரிப⁴ண்ட³ங் ஸம்மஜ்ஜிதப்³ப³ங். ஸசே பரிவேணங் உக்லாபங் ஹோதி, பரிவேணங் ஸம்மஜ்ஜிதப்³ப³ங். ஸசே கொட்ட²கோ உக்லாபோ ஹோதி, கொட்ட²கோ ஸம்மஜ்ஜிதப்³போ³ . ஸசே ஜந்தாக⁴ரஸாலா உக்லாபா ஹோதி, ஜந்தாக⁴ரஸாலா ஸம்மஜ்ஜிதப்³பா³.
372. ‘‘Tena hi, bhikkhave, bhikkhūnaṃ jantāgharavattaṃ paññapessāmi yathā bhikkhūhi jantāghare sammā vattitabbaṃ. Yo paṭhamaṃ jantāgharaṃ gacchati, sace chārikā ussannā hoti, chārikā chaḍḍetabbā. Sace jantāgharaṃ uklāpaṃ hoti, jantāgharaṃ sammajjitabbaṃ. Sace paribhaṇḍaṃ uklāpaṃ hoti, paribhaṇḍaṃ sammajjitabbaṃ. Sace pariveṇaṃ uklāpaṃ hoti, pariveṇaṃ sammajjitabbaṃ. Sace koṭṭhako uklāpo hoti, koṭṭhako sammajjitabbo . Sace jantāgharasālā uklāpā hoti, jantāgharasālā sammajjitabbā.
‘‘சுண்ணங் ஸன்னேதப்³ப³ங், மத்திகா தேமேதப்³பா³, உத³கதோ³ணிகாய உத³கங் ஆஸிஞ்சிதப்³ப³ங். ஜந்தாக⁴ரங் பவிஸந்தேன மத்திகாய முக²ங் மக்கெ²த்வா புரதோ ச பச்ச²தோ ச படிச்சா²தெ³த்வா ஜந்தாக⁴ரங் பவிஸிதப்³ப³ங். ந தே²ரே பி⁴க்கூ² அனுபக²ஜ்ஜ நிஸீதி³தப்³ப³ங். ந நவா பி⁴க்கூ² ஆஸனேன படிபா³ஹிதப்³பா³. ஸசே உஸ்ஸஹதி, ஜந்தாக⁴ரே தே²ரானங் பி⁴க்கூ²னங் பரிகம்மங் காதப்³ப³ங். ஜந்தாக⁴ரா நிக்க²மந்தேன ஜந்தாக⁴ரபீட²ங் ஆதா³ய புரதோ ச பச்ச²தோ ச படிச்சா²தெ³த்வா ஜந்தாக⁴ரா நிக்க²மிதப்³ப³ங். ஸசே உஸ்ஸஹதி, உத³கேபி தே²ரானங் பி⁴க்கூ²னங் பரிகம்மங் காதப்³ப³ங். ந தே²ரானங் பி⁴க்கூ²னங் புரதோபி நஹாயிதப்³ப³ங், ந உபரிதோபி நஹாயிதப்³ப³ங். நஹாதேன உத்தரந்தேன ஓதரந்தானங் மக்³கோ³ தா³தப்³போ³. யோ பச்சா² ஜந்தாக⁴ரா நிக்க²மதி, ஸசே ஜந்தாக⁴ரங் சிக்க²ல்லங் ஹோதி, தோ⁴விதப்³ப³ங். மத்திகாதோ³ணிகங் தோ⁴வித்வா ஜந்தாக⁴ரபீட²ங் படிஸாமெத்வா அக்³கி³ங் விஜ்ஜா²பெத்வா த்³வாரங் த²கெத்வா பக்கமிதப்³ப³ங். இத³ங் கோ², பி⁴க்க²வே, பி⁴க்கூ²னங் ஜந்தாக⁴ரவத்தங் யதா² பி⁴க்கூ²ஹி ஜந்தாக⁴ரே ஸம்மா வத்திதப்³ப³’’ந்தி.
‘‘Cuṇṇaṃ sannetabbaṃ, mattikā temetabbā, udakadoṇikāya udakaṃ āsiñcitabbaṃ. Jantāgharaṃ pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā. Sace ussahati, jantāghare therānaṃ bhikkhūnaṃ parikammaṃ kātabbaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ. Sace ussahati, udakepi therānaṃ bhikkhūnaṃ parikammaṃ kātabbaṃ. Na therānaṃ bhikkhūnaṃ puratopi nahāyitabbaṃ, na uparitopi nahāyitabbaṃ. Nahātena uttarantena otarantānaṃ maggo dātabbo. Yo pacchā jantāgharā nikkhamati, sace jantāgharaṃ cikkhallaṃ hoti, dhovitabbaṃ. Mattikādoṇikaṃ dhovitvā jantāgharapīṭhaṃ paṭisāmetvā aggiṃ vijjhāpetvā dvāraṃ thaketvā pakkamitabbaṃ. Idaṃ kho, bhikkhave, bhikkhūnaṃ jantāgharavattaṃ yathā bhikkhūhi jantāghare sammā vattitabba’’nti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / ஜந்தாக⁴ரவத்தாதி³கதா² • Jantāgharavattādikathā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 9. ஜந்தாக⁴ரவத்தாதி³கதா² • 9. Jantāgharavattādikathā
