| Library / Tipiṭaka / တိပိဋက • Tipiṭaka / စူဠဝဂ္ဂပာဠိ • Cūḷavaggapāḷi |
၉. ဇန္တာဃရဝတ္တကထာ
9. Jantāgharavattakathā
၃၇၁. တေန ခော ပန သမယေန ဆဗ္ဗဂ္ဂိယာ ဘိက္ခူ ဇန္တာဃရေ ထေရေဟိ ဘိက္ခူဟိ နိဝာရိယမာနာ အနာဒရိယံ ပဋိစ္စ ပဟူတံ ကဋ္ဌံ အာရောပေတ္ဝာ အဂ္ဂိံ ဒတ္ဝာ ဒ္ဝာရံ ထကေတ္ဝာ ဒ္ဝာရေ နိသီဒန္တိ။ ဘိက္ခူ 1 ဥဏ္ဟာဘိတတ္တာ ဒ္ဝာရံ အလဘမာနာ မုစ္ဆိတာ ပပတန္တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဆဗ္ဗဂ္ဂိယာ ဘိက္ခူ ဇန္တာဃရေ ထေရေဟိ ဘိက္ခူဟိ နိဝာရိယမာနာ အနာဒရိယံ ပဋိစ္စ ပဟူတံ ကဋ္ဌံ အာရောပေတ္ဝာ အဂ္ဂိံ ဒတ္ဝာ ဒ္ဝာရံ ထကေတ္ဝာ ဒ္ဝာရေ နိသီဒိသ္သန္တိ! ဘိက္ခူ ဥဏ္ဟာဘိတတ္တာ ဒ္ဝာရံ အလဘမာနာ မုစ္ဆိတာ ပပတန္တီ’’တိ။ အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခူ ဇန္တာဃရေ ထေရေဟိ ဘိက္ခူဟိ နိဝာရိယမာနာ အနာဒရိယံ ပဋိစ္စ ပဟူတံ ကဋ္ဌံ အာရောပေတ္ဝာ အဂ္ဂိံ ဒတ္ဝာ ဒ္ဝာရံ ထကေတ္ဝာ ဒ္ဝာရေ နိသီဒန္တိ; ဘိက္ခူ ဥဏ္ဟာဘိတတ္တာ ဒ္ဝာရံ အလဘမာနာ မုစ္ဆိတာ ပပတန္တီ’’တိ? ‘‘သစ္စံ ဘဂဝာ’’တိ။ပေ.။ ဝိဂရဟိတ္ဝာ။ပေ.။ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘န , ဘိက္ခဝေ, ဇန္တာဃရေ ထေရေန ဘိက္ခုနာ နိဝာရိယမာနေန အနာဒရိယံ ပဋိစ္စ ပဟူတံ ကဋ္ဌံ အာရောပေတ္ဝာ အဂ္ဂိ ဒာတဗ္ဗော။ ယော ဒဒေယ္ယ, အာပတ္တိ ဒုက္ကဋသ္သ။ န, ဘိက္ခဝေ, ဒ္ဝာရံ ထကေတ္ဝာ ဒ္ဝာရေ နိသီဒိတဗ္ဗံ။ ယော နိသီဒေယ္ယ, အာပတ္တိ ဒုက္ကဋသ္သ။
371. Tena kho pana samayena chabbaggiyā bhikkhū jantāghare therehi bhikkhūhi nivāriyamānā anādariyaṃ paṭicca pahūtaṃ kaṭṭhaṃ āropetvā aggiṃ datvā dvāraṃ thaketvā dvāre nisīdanti. Bhikkhū 2 uṇhābhitattā dvāraṃ alabhamānā mucchitā papatanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū jantāghare therehi bhikkhūhi nivāriyamānā anādariyaṃ paṭicca pahūtaṃ kaṭṭhaṃ āropetvā aggiṃ datvā dvāraṃ thaketvā dvāre nisīdissanti! Bhikkhū uṇhābhitattā dvāraṃ alabhamānā mucchitā papatantī’’ti. Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, chabbaggiyā bhikkhū jantāghare therehi bhikkhūhi nivāriyamānā anādariyaṃ paṭicca pahūtaṃ kaṭṭhaṃ āropetvā aggiṃ datvā dvāraṃ thaketvā dvāre nisīdanti; bhikkhū uṇhābhitattā dvāraṃ alabhamānā mucchitā papatantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi – ‘‘na , bhikkhave, jantāghare therena bhikkhunā nivāriyamānena anādariyaṃ paṭicca pahūtaṃ kaṭṭhaṃ āropetvā aggi dātabbo. Yo dadeyya, āpatti dukkaṭassa. Na, bhikkhave, dvāraṃ thaketvā dvāre nisīditabbaṃ. Yo nisīdeyya, āpatti dukkaṭassa.
၃၇၂. ‘‘တေန ဟိ, ဘိက္ခဝေ, ဘိက္ခူနံ ဇန္တာဃရဝတ္တံ ပညပေသ္သာမိ ယထာ ဘိက္ခူဟိ ဇန္တာဃရေ သမ္မာ ဝတ္တိတဗ္ဗံ။ ယော ပဌမံ ဇန္တာဃရံ ဂစ္ဆတိ, သစေ ဆာရိကာ ဥသ္သန္နာ ဟောတိ, ဆာရိကာ ဆဍ္ဍေတဗ္ဗာ။ သစေ ဇန္တာဃရံ ဥက္လာပံ ဟောတိ, ဇန္တာဃရံ သမ္မဇ္ဇိတဗ္ဗံ။ သစေ ပရိဘဏ္ဍံ ဥက္လာပံ ဟောတိ, ပရိဘဏ္ဍံ သမ္မဇ္ဇိတဗ္ဗံ။ သစေ ပရိဝေဏံ ဥက္လာပံ ဟောတိ, ပရိဝေဏံ သမ္မဇ္ဇိတဗ္ဗံ။ သစေ ကောဋ္ဌကော ဥက္လာပော ဟောတိ, ကောဋ္ဌကော သမ္မဇ္ဇိတဗ္ဗော ။ သစေ ဇန္တာဃရသာလာ ဥက္လာပာ ဟောတိ, ဇန္တာဃရသာလာ သမ္မဇ္ဇိတဗ္ဗာ။
372. ‘‘Tena hi, bhikkhave, bhikkhūnaṃ jantāgharavattaṃ paññapessāmi yathā bhikkhūhi jantāghare sammā vattitabbaṃ. Yo paṭhamaṃ jantāgharaṃ gacchati, sace chārikā ussannā hoti, chārikā chaḍḍetabbā. Sace jantāgharaṃ uklāpaṃ hoti, jantāgharaṃ sammajjitabbaṃ. Sace paribhaṇḍaṃ uklāpaṃ hoti, paribhaṇḍaṃ sammajjitabbaṃ. Sace pariveṇaṃ uklāpaṃ hoti, pariveṇaṃ sammajjitabbaṃ. Sace koṭṭhako uklāpo hoti, koṭṭhako sammajjitabbo . Sace jantāgharasālā uklāpā hoti, jantāgharasālā sammajjitabbā.
‘‘စုဏ္ဏံ သန္နေတဗ္ဗံ, မတ္တိကာ တေမေတဗ္ဗာ, ဥဒကဒောဏိကာယ ဥဒကံ အာသိဉ္စိတဗ္ဗံ။ ဇန္တာဃရံ ပဝိသန္တေန မတ္တိကာယ မုခံ မက္ခေတ္ဝာ ပုရတော စ ပစ္ဆတော စ ပဋိစ္ဆာဒေတ္ဝာ ဇန္တာဃရံ ပဝိသိတဗ္ဗံ။ န ထေရေ ဘိက္ခူ အနုပခဇ္ဇ နိသီဒိတဗ္ဗံ။ န နဝာ ဘိက္ခူ အာသနေန ပဋိဗာဟိတဗ္ဗာ။ သစေ ဥသ္သဟတိ, ဇန္တာဃရေ ထေရာနံ ဘိက္ခူနံ ပရိကမ္မံ ကာတဗ္ဗံ။ ဇန္တာဃရာ နိက္ခမန္တေန ဇန္တာဃရပီဌံ အာဒာယ ပုရတော စ ပစ္ဆတော စ ပဋိစ္ဆာဒေတ္ဝာ ဇန္တာဃရာ နိက္ခမိတဗ္ဗံ။ သစေ ဥသ္သဟတိ, ဥဒကေပိ ထေရာနံ ဘိက္ခူနံ ပရိကမ္မံ ကာတဗ္ဗံ။ န ထေရာနံ ဘိက္ခူနံ ပုရတောပိ နဟာယိတဗ္ဗံ, န ဥပရိတောပိ နဟာယိတဗ္ဗံ။ နဟာတေန ဥတ္တရန္တေန ဩတရန္တာနံ မဂ္ဂော ဒာတဗ္ဗော။ ယော ပစ္ဆာ ဇန္တာဃရာ နိက္ခမတိ, သစေ ဇန္တာဃရံ စိက္ခလ္လံ ဟောတိ, ဓောဝိတဗ္ဗံ။ မတ္တိကာဒောဏိကံ ဓောဝိတ္ဝာ ဇန္တာဃရပီဌံ ပဋိသာမေတ္ဝာ အဂ္ဂိံ ဝိဇ္ဈာပေတ္ဝာ ဒ္ဝာရံ ထကေတ္ဝာ ပက္ကမိတဗ္ဗံ။ ဣဒံ ခော, ဘိက္ခဝေ, ဘိက္ခူနံ ဇန္တာဃရဝတ္တံ ယထာ ဘိက္ခူဟိ ဇန္တာဃရေ သမ္မာ ဝတ္တိတဗ္ဗ’’န္တိ။
‘‘Cuṇṇaṃ sannetabbaṃ, mattikā temetabbā, udakadoṇikāya udakaṃ āsiñcitabbaṃ. Jantāgharaṃ pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā. Sace ussahati, jantāghare therānaṃ bhikkhūnaṃ parikammaṃ kātabbaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ. Sace ussahati, udakepi therānaṃ bhikkhūnaṃ parikammaṃ kātabbaṃ. Na therānaṃ bhikkhūnaṃ puratopi nahāyitabbaṃ, na uparitopi nahāyitabbaṃ. Nahātena uttarantena otarantānaṃ maggo dātabbo. Yo pacchā jantāgharā nikkhamati, sace jantāgharaṃ cikkhallaṃ hoti, dhovitabbaṃ. Mattikādoṇikaṃ dhovitvā jantāgharapīṭhaṃ paṭisāmetvā aggiṃ vijjhāpetvā dvāraṃ thaketvā pakkamitabbaṃ. Idaṃ kho, bhikkhave, bhikkhūnaṃ jantāgharavattaṃ yathā bhikkhūhi jantāghare sammā vattitabba’’nti.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / စူဠဝဂ္ဂ-အဋ္ဌကထာ • Cūḷavagga-aṭṭhakathā / ဇန္တာဃရဝတ္တာဒိကထာ • Jantāgharavattādikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၉. ဇန္တာဃရဝတ္တာဒိကထာ • 9. Jantāgharavattādikathā
