| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
༩. ཛནྟཱགྷརཝཏྟཀཐཱ
9. Jantāgharavattakathā
༣༧༡. ཏེན ཁོ པན སམཡེན ཚབྦགྒིཡཱ བྷིཀྑཱུ ཛནྟཱགྷརེ ཐེརེཧི བྷིཀྑཱུཧི ནིཝཱརིཡམཱནཱ ཨནཱདརིཡཾ པཊིཙྩ པཧཱུཏཾ ཀཊྛཾ ཨཱརོཔེཏྭཱ ཨགྒིཾ དཏྭཱ དྭཱརཾ ཐཀེཏྭཱ དྭཱརེ ནིསཱིདནྟི། བྷིཀྑཱུ 1 ཨུཎྷཱབྷིཏཏྟཱ དྭཱརཾ ཨལབྷམཱནཱ མུཙྪིཏཱ པཔཏནྟི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ ཛནྟཱགྷརེ ཐེརེཧི བྷིཀྑཱུཧི ནིཝཱརིཡམཱནཱ ཨནཱདརིཡཾ པཊིཙྩ པཧཱུཏཾ ཀཊྛཾ ཨཱརོཔེཏྭཱ ཨགྒིཾ དཏྭཱ དྭཱརཾ ཐཀེཏྭཱ དྭཱརེ ནིསཱིདིསྶནྟི! བྷིཀྑཱུ ཨུཎྷཱབྷིཏཏྟཱ དྭཱརཾ ཨལབྷམཱནཱ མུཙྪིཏཱ པཔཏནྟཱི’’ཏི། ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར, བྷིཀྑཝེ, ཚབྦགྒིཡཱ བྷིཀྑཱུ ཛནྟཱགྷརེ ཐེརེཧི བྷིཀྑཱུཧི ནིཝཱརིཡམཱནཱ ཨནཱདརིཡཾ པཊིཙྩ པཧཱུཏཾ ཀཊྛཾ ཨཱརོཔེཏྭཱ ཨགྒིཾ དཏྭཱ དྭཱརཾ ཐཀེཏྭཱ དྭཱརེ ནིསཱིདནྟི; བྷིཀྑཱུ ཨུཎྷཱབྷིཏཏྟཱ དྭཱརཾ ཨལབྷམཱནཱ མུཙྪིཏཱ པཔཏནྟཱི’’ཏི? ‘‘སཙྩཾ བྷགཝཱ’’ཏི…པེ॰… ཝིགརཧིཏྭཱ…པེ॰… དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ན , བྷིཀྑཝེ, ཛནྟཱགྷརེ ཐེརེན བྷིཀྑུནཱ ནིཝཱརིཡམཱནེན ཨནཱདརིཡཾ པཊིཙྩ པཧཱུཏཾ ཀཊྛཾ ཨཱརོཔེཏྭཱ ཨགྒི དཱཏབྦོ། ཡོ དདེཡྻ, ཨཱཔཏྟི དུཀྐཊསྶ། ན, བྷིཀྑཝེ, དྭཱརཾ ཐཀེཏྭཱ དྭཱརེ ནིསཱིདིཏབྦཾ། ཡོ ནིསཱིདེཡྻ, ཨཱཔཏྟི དུཀྐཊསྶ།
371. Tena kho pana samayena chabbaggiyā bhikkhū jantāghare therehi bhikkhūhi nivāriyamānā anādariyaṃ paṭicca pahūtaṃ kaṭṭhaṃ āropetvā aggiṃ datvā dvāraṃ thaketvā dvāre nisīdanti. Bhikkhū 2 uṇhābhitattā dvāraṃ alabhamānā mucchitā papatanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū jantāghare therehi bhikkhūhi nivāriyamānā anādariyaṃ paṭicca pahūtaṃ kaṭṭhaṃ āropetvā aggiṃ datvā dvāraṃ thaketvā dvāre nisīdissanti! Bhikkhū uṇhābhitattā dvāraṃ alabhamānā mucchitā papatantī’’ti. Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, chabbaggiyā bhikkhū jantāghare therehi bhikkhūhi nivāriyamānā anādariyaṃ paṭicca pahūtaṃ kaṭṭhaṃ āropetvā aggiṃ datvā dvāraṃ thaketvā dvāre nisīdanti; bhikkhū uṇhābhitattā dvāraṃ alabhamānā mucchitā papatantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi – ‘‘na , bhikkhave, jantāghare therena bhikkhunā nivāriyamānena anādariyaṃ paṭicca pahūtaṃ kaṭṭhaṃ āropetvā aggi dātabbo. Yo dadeyya, āpatti dukkaṭassa. Na, bhikkhave, dvāraṃ thaketvā dvāre nisīditabbaṃ. Yo nisīdeyya, āpatti dukkaṭassa.
༣༧༢. ‘‘ཏེན ཧི, བྷིཀྑཝེ, བྷིཀྑཱུནཾ ཛནྟཱགྷརཝཏྟཾ པཉྙཔེསྶཱམི ཡཐཱ བྷིཀྑཱུཧི ཛནྟཱགྷརེ སམྨཱ ཝཏྟིཏབྦཾ། ཡོ པཋམཾ ཛནྟཱགྷརཾ གཙྪཏི, སཙེ ཚཱརིཀཱ ཨུསྶནྣཱ ཧོཏི, ཚཱརིཀཱ ཚཌྜེཏབྦཱ། སཙེ ཛནྟཱགྷརཾ ཨུཀླཱཔཾ ཧོཏི, ཛནྟཱགྷརཾ སམྨཛྫིཏབྦཾ། སཙེ པརིབྷཎྜཾ ཨུཀླཱཔཾ ཧོཏི, པརིབྷཎྜཾ སམྨཛྫིཏབྦཾ། སཙེ པརིཝེཎཾ ཨུཀླཱཔཾ ཧོཏི, པརིཝེཎཾ སམྨཛྫིཏབྦཾ། སཙེ ཀོཊྛཀོ ཨུཀླཱཔོ ཧོཏི, ཀོཊྛཀོ སམྨཛྫིཏབྦོ ། སཙེ ཛནྟཱགྷརསཱལཱ ཨུཀླཱཔཱ ཧོཏི, ཛནྟཱགྷརསཱལཱ སམྨཛྫིཏབྦཱ།
372. ‘‘Tena hi, bhikkhave, bhikkhūnaṃ jantāgharavattaṃ paññapessāmi yathā bhikkhūhi jantāghare sammā vattitabbaṃ. Yo paṭhamaṃ jantāgharaṃ gacchati, sace chārikā ussannā hoti, chārikā chaḍḍetabbā. Sace jantāgharaṃ uklāpaṃ hoti, jantāgharaṃ sammajjitabbaṃ. Sace paribhaṇḍaṃ uklāpaṃ hoti, paribhaṇḍaṃ sammajjitabbaṃ. Sace pariveṇaṃ uklāpaṃ hoti, pariveṇaṃ sammajjitabbaṃ. Sace koṭṭhako uklāpo hoti, koṭṭhako sammajjitabbo . Sace jantāgharasālā uklāpā hoti, jantāgharasālā sammajjitabbā.
‘‘ཙུཎྞཾ སནྣེཏབྦཾ, མཏྟིཀཱ ཏེམེཏབྦཱ, ཨུདཀདོཎིཀཱཡ ཨུདཀཾ ཨཱསིཉྩིཏབྦཾ། ཛནྟཱགྷརཾ པཝིསནྟེན མཏྟིཀཱཡ མུཁཾ མཀྑེཏྭཱ པུརཏོ ཙ པཙྪཏོ ཙ པཊིཙྪཱདེཏྭཱ ཛནྟཱགྷརཾ པཝིསིཏབྦཾ། ན ཐེརེ བྷིཀྑཱུ ཨནུཔཁཛྫ ནིསཱིདིཏབྦཾ། ན ནཝཱ བྷིཀྑཱུ ཨཱསནེན པཊིབཱཧིཏབྦཱ། སཙེ ཨུསྶཧཏི, ཛནྟཱགྷརེ ཐེརཱནཾ བྷིཀྑཱུནཾ པརིཀམྨཾ ཀཱཏབྦཾ། ཛནྟཱགྷརཱ ནིཀྑམནྟེན ཛནྟཱགྷརཔཱིཋཾ ཨཱདཱཡ པུརཏོ ཙ པཙྪཏོ ཙ པཊིཙྪཱདེཏྭཱ ཛནྟཱགྷརཱ ནིཀྑམིཏབྦཾ། སཙེ ཨུསྶཧཏི, ཨུདཀེཔི ཐེརཱནཾ བྷིཀྑཱུནཾ པརིཀམྨཾ ཀཱཏབྦཾ། ན ཐེརཱནཾ བྷིཀྑཱུནཾ པུརཏོཔི ནཧཱཡིཏབྦཾ, ན ཨུཔརིཏོཔི ནཧཱཡིཏབྦཾ། ནཧཱཏེན ཨུཏྟརནྟེན ཨོཏརནྟཱནཾ མགྒོ དཱཏབྦོ། ཡོ པཙྪཱ ཛནྟཱགྷརཱ ནིཀྑམཏི, སཙེ ཛནྟཱགྷརཾ ཙིཀྑལླཾ ཧོཏི, དྷོཝིཏབྦཾ། མཏྟིཀཱདོཎིཀཾ དྷོཝིཏྭཱ ཛནྟཱགྷརཔཱིཋཾ པཊིསཱམེཏྭཱ ཨགྒིཾ ཝིཛ྄ཛྷཱཔེཏྭཱ དྭཱརཾ ཐཀེཏྭཱ པཀྐམིཏབྦཾ། ཨིདཾ ཁོ, བྷིཀྑཝེ, བྷིཀྑཱུནཾ ཛནྟཱགྷརཝཏྟཾ ཡཐཱ བྷིཀྑཱུཧི ཛནྟཱགྷརེ སམྨཱ ཝཏྟིཏབྦ’’ནྟི།
‘‘Cuṇṇaṃ sannetabbaṃ, mattikā temetabbā, udakadoṇikāya udakaṃ āsiñcitabbaṃ. Jantāgharaṃ pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā. Sace ussahati, jantāghare therānaṃ bhikkhūnaṃ parikammaṃ kātabbaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ. Sace ussahati, udakepi therānaṃ bhikkhūnaṃ parikammaṃ kātabbaṃ. Na therānaṃ bhikkhūnaṃ puratopi nahāyitabbaṃ, na uparitopi nahāyitabbaṃ. Nahātena uttarantena otarantānaṃ maggo dātabbo. Yo pacchā jantāgharā nikkhamati, sace jantāgharaṃ cikkhallaṃ hoti, dhovitabbaṃ. Mattikādoṇikaṃ dhovitvā jantāgharapīṭhaṃ paṭisāmetvā aggiṃ vijjhāpetvā dvāraṃ thaketvā pakkamitabbaṃ. Idaṃ kho, bhikkhave, bhikkhūnaṃ jantāgharavattaṃ yathā bhikkhūhi jantāghare sammā vattitabba’’nti.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / ཛནྟཱགྷརཝཏྟཱདིཀཐཱ • Jantāgharavattādikathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༩. ཛནྟཱགྷརཝཏྟཱདིཀཐཱ • 9. Jantāgharavattādikathā
