| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. ஜந்துஸுத்தவண்ணனா
5. Jantusuttavaṇṇanā
106. பஞ்சமே கோஸலேஸு விஹரந்தீதி ப⁴க³வதோ ஸந்திகே கம்மட்டா²னங் க³ஹெத்வா தத்த² க³ந்த்வா விஹரந்தி. உத்³த⁴தாதி அகப்பியே கப்பியஸஞ்ஞிதாய ச கப்பியே அகப்பியஸஞ்ஞிதாய ச அனவஜ்ஜே ஸாவஜ்ஜஸஞ்ஞிதாய ச ஸாவஜ்ஜே அனவஜ்ஜஸஞ்ஞிதாய ச உத்³த⁴ச்சபகதிகா ஹுத்வா. உன்னளாதி உக்³க³தனளா, உட்டி²ததுச்ச²மானாதி வுத்தங் ஹோதி. சபலாதி பத்தசீவரமண்ட³னாதி³னா சாபல்லேன யுத்தா. முக²ராதி முக²க²ரா, க²ரவசனாதி வுத்தங் ஹோதி. விகிண்ணவாசாதி அஸங்யதவசனா, தி³வஸம்பி நிரத்த²கவசனபலாபினோ. முட்ட²ஸ்ஸதினோதி நட்ட²ஸ்ஸதினோ ஸதிவிரஹிதா, இத⁴ கதங் எத்த² பமுஸ்ஸந்தி. அஸம்பஜானாதி நிப்பஞ்ஞா. அஸமாஹிதாதி அப்பனாஉபசாரஸமாதி⁴ரஹிதா, சண்ட³ஸோதே ப³த்³த⁴னாவாஸதி³ஸா. விப்³ப⁴ந்தசித்தாதி அனவட்டி²தசித்தா, பந்தா²ருள்ஹபா³லமிக³ஸதி³ஸா. பாகதிந்த்³ரியாதி ஸங்வராபா⁴வேன கி³ஹிகாலே விய விவடஇந்த்³ரியா.
106. Pañcame kosalesu viharantīti bhagavato santike kammaṭṭhānaṃ gahetvā tattha gantvā viharanti. Uddhatāti akappiye kappiyasaññitāya ca kappiye akappiyasaññitāya ca anavajje sāvajjasaññitāya ca sāvajje anavajjasaññitāya ca uddhaccapakatikā hutvā. Unnaḷāti uggatanaḷā, uṭṭhitatucchamānāti vuttaṃ hoti. Capalāti pattacīvaramaṇḍanādinā cāpallena yuttā. Mukharāti mukhakharā, kharavacanāti vuttaṃ hoti. Vikiṇṇavācāti asaṃyatavacanā, divasampi niratthakavacanapalāpino. Muṭṭhassatinoti naṭṭhassatino sativirahitā, idha kataṃ ettha pamussanti. Asampajānāti nippaññā. Asamāhitāti appanāupacārasamādhirahitā, caṇḍasote baddhanāvāsadisā. Vibbhantacittāti anavaṭṭhitacittā, panthāruḷhabālamigasadisā. Pākatindriyāti saṃvarābhāvena gihikāle viya vivaṭaindriyā.
ஜந்தூதி ஏவங்னாமகோ தே³வபுத்தோ. தத³ஹுபோஸதே²தி தஸ்மிங் அஹு உபோஸதே², உபோஸத²தி³வஸேதி அத்தோ². பன்னரஸேதி சாதுத்³த³ஸிகாதி³படிக்கே²போ. உபஸங்கமீதி சோத³னத்தா²ய உபக³தோ. ஸோ கிர சிந்தேஸி – ‘‘இமே பி⁴க்கூ² ஸத்து² ஸந்திகே கம்மட்டா²னங் க³ஹெத்வா நிக்க²ந்தா, இதா³னி பமத்தா விஹரந்தி, ந கோ² பனேதே பாடியேக்கங் நிஸின்னட்டா²னே சோதி³யமானா கத²ங் க³ண்ஹிஸ்ஸந்தி, ஸமாக³மனகாலே சோதி³ஸ்ஸாமீ’’தி உபோஸத²தி³வஸே தேஸங் ஸன்னிபதிதபா⁴வங் ஞத்வா உபஸங்கமி. கா³தா²ஹி அஜ்ஜ²பா⁴ஸீதி ஸப்³பே³ஸங் மஜ்ஜே² ட²த்வா கா³தா² அபா⁴ஸி.
Jantūti evaṃnāmako devaputto. Tadahuposatheti tasmiṃ ahu uposathe, uposathadivaseti attho. Pannaraseti cātuddasikādipaṭikkhepo. Upasaṅkamīti codanatthāya upagato. So kira cintesi – ‘‘ime bhikkhū satthu santike kammaṭṭhānaṃ gahetvā nikkhantā, idāni pamattā viharanti, na kho panete pāṭiyekkaṃ nisinnaṭṭhāne codiyamānā kathaṃ gaṇhissanti, samāgamanakāle codissāmī’’ti uposathadivase tesaṃ sannipatitabhāvaṃ ñatvā upasaṅkami. Gāthāhi ajjhabhāsīti sabbesaṃ majjhe ṭhatvā gāthā abhāsi.
தத்த² யஸ்மா கு³ணகதா²ய ஸத்³தி⁴ங் நிக்³கு³ணஸ்ஸ அகு³ணோ பாகடோ ஹோதி, தஸ்மா கு³ணங் தாவ கதெ²ந்தோ ஸுக²ஜீவினோ புரே ஆஸுந்திஆதி³மாஹ. தத்த² ஸுக²ஜீவினோ புரே ஆஸுந்தி புப்³பே³ பி⁴க்கூ² ஸுப்போஸா ஸுப⁴ரா அஹேஸுங், உச்சனீசகுலேஸு ஸபதா³னங் சரித்வா லத்³தே⁴ன மிஸ்ஸகபிண்டே³ன யாபேஸுந்தி அதி⁴ப்பாயேன ஏவமாஹ. அனிச்சா²தி நித்தண்ஹா ஹுத்வா.
Tattha yasmā guṇakathāya saddhiṃ nigguṇassa aguṇo pākaṭo hoti, tasmā guṇaṃ tāva kathento sukhajīvino pure āsuntiādimāha. Tattha sukhajīvino pure āsunti pubbe bhikkhū supposā subharā ahesuṃ, uccanīcakulesu sapadānaṃ caritvā laddhena missakapiṇḍena yāpesunti adhippāyena evamāha. Anicchāti nittaṇhā hutvā.
ஏவங் போராணகபி⁴க்கூ²னங் வண்ணங் கதெ²த்வா இதா³னி தேஸங் அவண்ணங் கதெ²ந்தோ து³ப்போஸந்திஆதி³மாஹ. தத்த² கா³மே கா³மணிகா வியாதி யதா² கா³மே கா³மகுடா நானப்பகாரேன ஜனங் பீளெத்வா கீ²ரத³தி⁴தண்டு³லாதீ³னி ஆஹராபெத்வா பு⁴ஞ்ஜந்தி, ஏவங் தும்ஹேபி அனேஸனாய டி²தா தும்ஹாகங் ஜீவிகங் கப்பேதா²தி அதி⁴ப்பாயேன வத³தி. நிபஜ்ஜந்தீதி உத்³தே³ஸபரிபுச்சா²மனஸிகாரேஹி அனத்தி²கா ஹுத்வா ஸயனம்ஹி ஹத்த²பாதே³ விஸ்ஸஜ்ஜெத்வா நிபஜ்ஜந்தி. பராகா³ரேஸூதி பரகே³ஹேஸு, குலஸுண்ஹாதீ³ஸூதி அத்தோ². முச்சி²தாதி கிலேஸமுச்சா²ய முச்சி²தா.
Evaṃ porāṇakabhikkhūnaṃ vaṇṇaṃ kathetvā idāni tesaṃ avaṇṇaṃ kathento dupposantiādimāha. Tattha gāme gāmaṇikā viyāti yathā gāme gāmakuṭā nānappakārena janaṃ pīḷetvā khīradadhitaṇḍulādīni āharāpetvā bhuñjanti, evaṃ tumhepi anesanāya ṭhitā tumhākaṃ jīvikaṃ kappethāti adhippāyena vadati. Nipajjantīti uddesaparipucchāmanasikārehi anatthikā hutvā sayanamhi hatthapāde vissajjetvā nipajjanti. Parāgāresūti paragehesu, kulasuṇhādīsūti attho. Mucchitāti kilesamucchāya mucchitā.
ஏகச்சேதி வத்தப்³ப³யுத்தகேயேவ. அபவித்³தா⁴தி ச²ட்³டி³தகா. அனாதா²தி அபதிட்டா². பேதாதி ஸுஸானே ச²ட்³டி³தா காலங்கதமனுஸ்ஸா. யதா² ஹி ஸுஸானே ச²ட்³டி³தா நானாஸகுணாதீ³ஹி க²ஜ்ஜந்தி, ஞாதகாபி நேஸங் நாத²கிச்சங் ந கரொந்தி, ந ரக்க²ந்தி, ந கோ³பயந்தி, ஏவமேவங் ஏவரூபாபி ஆசரியுபஜ்ஜா²யாதீ³னங் ஸந்திகா ஓவாதா³னுஸாஸனிங் ந லப⁴ந்தீதி அபவித்³தா⁴ அனாதா², யதா² பேதா, ததே²வ ஹொந்தி. பஞ்சமங்.
Ekacceti vattabbayuttakeyeva. Apaviddhāti chaḍḍitakā. Anāthāti apatiṭṭhā. Petāti susāne chaḍḍitā kālaṅkatamanussā. Yathā hi susāne chaḍḍitā nānāsakuṇādīhi khajjanti, ñātakāpi nesaṃ nāthakiccaṃ na karonti, na rakkhanti, na gopayanti, evamevaṃ evarūpāpi ācariyupajjhāyādīnaṃ santikā ovādānusāsaniṃ na labhantīti apaviddhā anāthā, yathā petā, tatheva honti. Pañcamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. ஜந்துஸுத்தங் • 5. Jantusuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. ஜந்துஸுத்தவண்ணனா • 5. Jantusuttavaṇṇanā
