| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৫. জন্তুসুত্তৰণ্ণনা
5. Jantusuttavaṇṇanā
১০৬. যে ৰিনযে অপকতঞ্ঞুনো সংকিলেসিকেসু ৰোদানিযেসু ধম্মেসু ন কুসলা যং কিঞ্চি ন কারিনো ৰিপ্পটিসারবহুলা। তেসং অনুপ্পন্নঞ্চ উদ্ধচ্চং উপ্পজ্জতি, উপ্পন্নঞ্চ ভিয্যোভাৰং ৰেপুল্লং আপজ্জতীতি আহ ‘‘অকপ্পিযে কপ্পিযসঞ্ঞিতায…পে॰… উদ্ধচ্চপকতিকা’’তি। সারাভাৰেন তুচ্ছত্তা চ নল়ো ৰিযাতি নল়ো, মানোতি আহ ‘‘উন্নল়াতি উগ্গতনল়া’’তি। তেনাহ ‘‘উট্ঠিততুচ্ছমানা’’তি। মানো হি সেয্যস্স সেয্যোতি সদিসোতি চ পৰত্তিযা ৰিসেসতো তুচ্ছো। চাপল্লেনাতি চপলভাৰেন, তণ্হালোলুপ্পেনাতি অত্থো। মুখখরাতি মুখেন ফরুসা, ফরুসৰাদিনোতি অত্থো। ৰিকিণ্ণৰাচাতি ৰিসটৰচনা, সম্ফপ্পলাপতায অপরিযন্তৰচনা। তেনাহ ‘‘অসংযতৰচনা’’তিআদি। চণ্ডসোতে বদ্ধনাৰাসদিসাতি এতেন অনৰট্ঠিতকিরিযতং দস্সেতি। যেন সমন্নাগতা সত্তা একস্মিং ঠানে ঠাতুং ৰা নিসীদিতুং ৰা ন সক্কোন্তি, ইতো চিতো চ ৰিচরন্তি। অনৰট্ঠিতচিত্তাতি একস্মিং আরম্মণে ন অৰট্ঠিতচিত্তা। ৰিৰটইন্দ্রিযাতি অসংৰুতচক্খাদিইন্দ্রিযা।
106. Ye vinaye apakataññuno saṃkilesikesu vodāniyesu dhammesu na kusalā yaṃ kiñci na kārino vippaṭisārabahulā. Tesaṃ anuppannañca uddhaccaṃ uppajjati, uppannañca bhiyyobhāvaṃ vepullaṃ āpajjatīti āha ‘‘akappiye kappiyasaññitāya…pe… uddhaccapakatikā’’ti. Sārābhāvena tucchattā ca naḷo viyāti naḷo, mānoti āha ‘‘unnaḷāti uggatanaḷā’’ti. Tenāha ‘‘uṭṭhitatucchamānā’’ti. Māno hi seyyassa seyyoti sadisoti ca pavattiyā visesato tuccho. Cāpallenāti capalabhāvena, taṇhāloluppenāti attho. Mukhakharāti mukhena pharusā, pharusavādinoti attho. Vikiṇṇavācāti visaṭavacanā, samphappalāpatāya apariyantavacanā. Tenāha ‘‘asaṃyatavacanā’’tiādi. Caṇḍasote baddhanāvāsadisāti etena anavaṭṭhitakiriyataṃ dasseti. Yena samannāgatā sattā ekasmiṃ ṭhāne ṭhātuṃ vā nisīdituṃ vā na sakkonti, ito cito ca vicaranti. Anavaṭṭhitacittāti ekasmiṃ ārammaṇe na avaṭṭhitacittā. Vivaṭaindriyāti asaṃvutacakkhādiindriyā.
গুণকথায সদ্ধিং কথিযমানো নিগ্গুণস্স অগুণো পাকটো হোতি জাতিমণিসমীপে ঠিতস্স ৰিয কাচমণিনো দোসো। সুখজীৰিনোতি সুখে ঠিতা। যথা দাযকানং সুভরং হোতি, এৰং সুখেন অকিচ্ছেন পৰত্তজীৰিকা। তেনাহ ‘‘পুব্বে ভিক্খূ’’তিআদি।
Guṇakathāya saddhiṃ kathiyamāno nigguṇassa aguṇo pākaṭo hoti jātimaṇisamīpe ṭhitassa viya kācamaṇino doso. Sukhajīvinoti sukhe ṭhitā. Yathā dāyakānaṃ subharaṃ hoti, evaṃ sukhena akicchena pavattajīvikā. Tenāha ‘‘pubbe bhikkhū’’tiādi.
অত্তনো রুচিৰসেন গামকিচ্চং নেতীতি গামণি, তে পন হীল়েন্তো ৰদতি ‘‘গামণিকা’’তি। ৰিস্সজ্জেত্ৰাতি সতিৰোস্সগ্গৰসেন ৰিস্সজ্জেত্ৰা কিলেসমুচ্ছাযাতি মহিচ্ছাসঙ্খাতায তণ্হামুচ্ছায। সীলৰন্তানংযেৰ হি দুপ্পটিপত্তিং সন্ধায দেৰপুত্তো ৰদতি। ৰত্তব্বযুত্তকেযেৰাতি ওৰাদেন মযা অনুগ্গহেতব্বমেৰ। ছড্ডিতকাতি পরিচ্চত্তা আচরিযুপজ্ঝাযাদীহি। ততো এৰ অনাথা অপ্পতিট্ঠা। পেতাতি ৰিগতজীৰিতা মতা। যথা পেতা, তথেৰ হোন্তি অত্তহিতাসমত্থতায ৰিঞ্ঞূনং জিগুচ্ছিতব্বতায চ।
Attano rucivasena gāmakiccaṃ netīti gāmaṇi, te pana hīḷento vadati ‘‘gāmaṇikā’’ti. Vissajjetvāti sativossaggavasena vissajjetvā kilesamucchāyāti mahicchāsaṅkhātāya taṇhāmucchāya. Sīlavantānaṃyeva hi duppaṭipattiṃ sandhāya devaputto vadati. Vattabbayuttakeyevāti ovādena mayā anuggahetabbameva. Chaḍḍitakāti pariccattā ācariyupajjhāyādīhi. Tato eva anāthā appatiṭṭhā. Petāti vigatajīvitā matā. Yathā petā, tatheva honti attahitāsamatthatāya viññūnaṃ jigucchitabbatāya ca.
জন্তুসুত্তৰণ্ণনা নিট্ঠিতা।
Jantusuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. জন্তুসুত্তং • 5. Jantusuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. জন্তুসুত্তৰণ্ণনা • 5. Jantusuttavaṇṇanā
