| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೫. ಜನ್ತುಸುತ್ತವಣ್ಣನಾ
5. Jantusuttavaṇṇanā
೧೦೬. ಪಞ್ಚಮೇ ಕೋಸಲೇಸು ವಿಹರನ್ತೀತಿ ಭಗವತೋ ಸನ್ತಿಕೇ ಕಮ್ಮಟ್ಠಾನಂ ಗಹೇತ್ವಾ ತತ್ಥ ಗನ್ತ್ವಾ ವಿಹರನ್ತಿ। ಉದ್ಧತಾತಿ ಅಕಪ್ಪಿಯೇ ಕಪ್ಪಿಯಸಞ್ಞಿತಾಯ ಚ ಕಪ್ಪಿಯೇ ಅಕಪ್ಪಿಯಸಞ್ಞಿತಾಯ ಚ ಅನವಜ್ಜೇ ಸಾವಜ್ಜಸಞ್ಞಿತಾಯ ಚ ಸಾವಜ್ಜೇ ಅನವಜ್ಜಸಞ್ಞಿತಾಯ ಚ ಉದ್ಧಚ್ಚಪಕತಿಕಾ ಹುತ್ವಾ। ಉನ್ನಳಾತಿ ಉಗ್ಗತನಳಾ, ಉಟ್ಠಿತತುಚ್ಛಮಾನಾತಿ ವುತ್ತಂ ಹೋತಿ। ಚಪಲಾತಿ ಪತ್ತಚೀವರಮಣ್ಡನಾದಿನಾ ಚಾಪಲ್ಲೇನ ಯುತ್ತಾ। ಮುಖರಾತಿ ಮುಖಖರಾ, ಖರವಚನಾತಿ ವುತ್ತಂ ಹೋತಿ। ವಿಕಿಣ್ಣವಾಚಾತಿ ಅಸಂಯತವಚನಾ, ದಿವಸಮ್ಪಿ ನಿರತ್ಥಕವಚನಪಲಾಪಿನೋ। ಮುಟ್ಠಸ್ಸತಿನೋತಿ ನಟ್ಠಸ್ಸತಿನೋ ಸತಿವಿರಹಿತಾ, ಇಧ ಕತಂ ಏತ್ಥ ಪಮುಸ್ಸನ್ತಿ। ಅಸಮ್ಪಜಾನಾತಿ ನಿಪ್ಪಞ್ಞಾ। ಅಸಮಾಹಿತಾತಿ ಅಪ್ಪನಾಉಪಚಾರಸಮಾಧಿರಹಿತಾ, ಚಣ್ಡಸೋತೇ ಬದ್ಧನಾವಾಸದಿಸಾ। ವಿಬ್ಭನ್ತಚಿತ್ತಾತಿ ಅನವಟ್ಠಿತಚಿತ್ತಾ, ಪನ್ಥಾರುಳ್ಹಬಾಲಮಿಗಸದಿಸಾ। ಪಾಕತಿನ್ದ್ರಿಯಾತಿ ಸಂವರಾಭಾವೇನ ಗಿಹಿಕಾಲೇ ವಿಯ ವಿವಟಇನ್ದ್ರಿಯಾ।
106. Pañcame kosalesu viharantīti bhagavato santike kammaṭṭhānaṃ gahetvā tattha gantvā viharanti. Uddhatāti akappiye kappiyasaññitāya ca kappiye akappiyasaññitāya ca anavajje sāvajjasaññitāya ca sāvajje anavajjasaññitāya ca uddhaccapakatikā hutvā. Unnaḷāti uggatanaḷā, uṭṭhitatucchamānāti vuttaṃ hoti. Capalāti pattacīvaramaṇḍanādinā cāpallena yuttā. Mukharāti mukhakharā, kharavacanāti vuttaṃ hoti. Vikiṇṇavācāti asaṃyatavacanā, divasampi niratthakavacanapalāpino. Muṭṭhassatinoti naṭṭhassatino sativirahitā, idha kataṃ ettha pamussanti. Asampajānāti nippaññā. Asamāhitāti appanāupacārasamādhirahitā, caṇḍasote baddhanāvāsadisā. Vibbhantacittāti anavaṭṭhitacittā, panthāruḷhabālamigasadisā. Pākatindriyāti saṃvarābhāvena gihikāle viya vivaṭaindriyā.
ಜನ್ತೂತಿ ಏವಂನಾಮಕೋ ದೇವಪುತ್ತೋ। ತದಹುಪೋಸಥೇತಿ ತಸ್ಮಿಂ ಅಹು ಉಪೋಸಥೇ, ಉಪೋಸಥದಿವಸೇತಿ ಅತ್ಥೋ। ಪನ್ನರಸೇತಿ ಚಾತುದ್ದಸಿಕಾದಿಪಟಿಕ್ಖೇಪೋ। ಉಪಸಙ್ಕಮೀತಿ ಚೋದನತ್ಥಾಯ ಉಪಗತೋ। ಸೋ ಕಿರ ಚಿನ್ತೇಸಿ – ‘‘ಇಮೇ ಭಿಕ್ಖೂ ಸತ್ಥು ಸನ್ತಿಕೇ ಕಮ್ಮಟ್ಠಾನಂ ಗಹೇತ್ವಾ ನಿಕ್ಖನ್ತಾ, ಇದಾನಿ ಪಮತ್ತಾ ವಿಹರನ್ತಿ, ನ ಖೋ ಪನೇತೇ ಪಾಟಿಯೇಕ್ಕಂ ನಿಸಿನ್ನಟ್ಠಾನೇ ಚೋದಿಯಮಾನಾ ಕಥಂ ಗಣ್ಹಿಸ್ಸನ್ತಿ, ಸಮಾಗಮನಕಾಲೇ ಚೋದಿಸ್ಸಾಮೀ’’ತಿ ಉಪೋಸಥದಿವಸೇ ತೇಸಂ ಸನ್ನಿಪತಿತಭಾವಂ ಞತ್ವಾ ಉಪಸಙ್ಕಮಿ। ಗಾಥಾಹಿ ಅಜ್ಝಭಾಸೀತಿ ಸಬ್ಬೇಸಂ ಮಜ್ಝೇ ಠತ್ವಾ ಗಾಥಾ ಅಭಾಸಿ।
Jantūti evaṃnāmako devaputto. Tadahuposatheti tasmiṃ ahu uposathe, uposathadivaseti attho. Pannaraseti cātuddasikādipaṭikkhepo. Upasaṅkamīti codanatthāya upagato. So kira cintesi – ‘‘ime bhikkhū satthu santike kammaṭṭhānaṃ gahetvā nikkhantā, idāni pamattā viharanti, na kho panete pāṭiyekkaṃ nisinnaṭṭhāne codiyamānā kathaṃ gaṇhissanti, samāgamanakāle codissāmī’’ti uposathadivase tesaṃ sannipatitabhāvaṃ ñatvā upasaṅkami. Gāthāhi ajjhabhāsīti sabbesaṃ majjhe ṭhatvā gāthā abhāsi.
ತತ್ಥ ಯಸ್ಮಾ ಗುಣಕಥಾಯ ಸದ್ಧಿಂ ನಿಗ್ಗುಣಸ್ಸ ಅಗುಣೋ ಪಾಕಟೋ ಹೋತಿ, ತಸ್ಮಾ ಗುಣಂ ತಾವ ಕಥೇನ್ತೋ ಸುಖಜೀವಿನೋ ಪುರೇ ಆಸುನ್ತಿಆದಿಮಾಹ। ತತ್ಥ ಸುಖಜೀವಿನೋ ಪುರೇ ಆಸುನ್ತಿ ಪುಬ್ಬೇ ಭಿಕ್ಖೂ ಸುಪ್ಪೋಸಾ ಸುಭರಾ ಅಹೇಸುಂ, ಉಚ್ಚನೀಚಕುಲೇಸು ಸಪದಾನಂ ಚರಿತ್ವಾ ಲದ್ಧೇನ ಮಿಸ್ಸಕಪಿಣ್ಡೇನ ಯಾಪೇಸುನ್ತಿ ಅಧಿಪ್ಪಾಯೇನ ಏವಮಾಹ। ಅನಿಚ್ಛಾತಿ ನಿತ್ತಣ್ಹಾ ಹುತ್ವಾ।
Tattha yasmā guṇakathāya saddhiṃ nigguṇassa aguṇo pākaṭo hoti, tasmā guṇaṃ tāva kathento sukhajīvino pure āsuntiādimāha. Tattha sukhajīvino pure āsunti pubbe bhikkhū supposā subharā ahesuṃ, uccanīcakulesu sapadānaṃ caritvā laddhena missakapiṇḍena yāpesunti adhippāyena evamāha. Anicchāti nittaṇhā hutvā.
ಏವಂ ಪೋರಾಣಕಭಿಕ್ಖೂನಂ ವಣ್ಣಂ ಕಥೇತ್ವಾ ಇದಾನಿ ತೇಸಂ ಅವಣ್ಣಂ ಕಥೇನ್ತೋ ದುಪ್ಪೋಸನ್ತಿಆದಿಮಾಹ। ತತ್ಥ ಗಾಮೇ ಗಾಮಣಿಕಾ ವಿಯಾತಿ ಯಥಾ ಗಾಮೇ ಗಾಮಕುಟಾ ನಾನಪ್ಪಕಾರೇನ ಜನಂ ಪೀಳೇತ್ವಾ ಖೀರದಧಿತಣ್ಡುಲಾದೀನಿ ಆಹರಾಪೇತ್ವಾ ಭುಞ್ಜನ್ತಿ, ಏವಂ ತುಮ್ಹೇಪಿ ಅನೇಸನಾಯ ಠಿತಾ ತುಮ್ಹಾಕಂ ಜೀವಿಕಂ ಕಪ್ಪೇಥಾತಿ ಅಧಿಪ್ಪಾಯೇನ ವದತಿ। ನಿಪಜ್ಜನ್ತೀತಿ ಉದ್ದೇಸಪರಿಪುಚ್ಛಾಮನಸಿಕಾರೇಹಿ ಅನತ್ಥಿಕಾ ಹುತ್ವಾ ಸಯನಮ್ಹಿ ಹತ್ಥಪಾದೇ ವಿಸ್ಸಜ್ಜೇತ್ವಾ ನಿಪಜ್ಜನ್ತಿ। ಪರಾಗಾರೇಸೂತಿ ಪರಗೇಹೇಸು, ಕುಲಸುಣ್ಹಾದೀಸೂತಿ ಅತ್ಥೋ। ಮುಚ್ಛಿತಾತಿ ಕಿಲೇಸಮುಚ್ಛಾಯ ಮುಚ್ಛಿತಾ।
Evaṃ porāṇakabhikkhūnaṃ vaṇṇaṃ kathetvā idāni tesaṃ avaṇṇaṃ kathento dupposantiādimāha. Tattha gāme gāmaṇikā viyāti yathā gāme gāmakuṭā nānappakārena janaṃ pīḷetvā khīradadhitaṇḍulādīni āharāpetvā bhuñjanti, evaṃ tumhepi anesanāya ṭhitā tumhākaṃ jīvikaṃ kappethāti adhippāyena vadati. Nipajjantīti uddesaparipucchāmanasikārehi anatthikā hutvā sayanamhi hatthapāde vissajjetvā nipajjanti. Parāgāresūti paragehesu, kulasuṇhādīsūti attho. Mucchitāti kilesamucchāya mucchitā.
ಏಕಚ್ಚೇತಿ ವತ್ತಬ್ಬಯುತ್ತಕೇಯೇವ। ಅಪವಿದ್ಧಾತಿ ಛಡ್ಡಿತಕಾ। ಅನಾಥಾತಿ ಅಪತಿಟ್ಠಾ। ಪೇತಾತಿ ಸುಸಾನೇ ಛಡ್ಡಿತಾ ಕಾಲಙ್ಕತಮನುಸ್ಸಾ। ಯಥಾ ಹಿ ಸುಸಾನೇ ಛಡ್ಡಿತಾ ನಾನಾಸಕುಣಾದೀಹಿ ಖಜ್ಜನ್ತಿ, ಞಾತಕಾಪಿ ನೇಸಂ ನಾಥಕಿಚ್ಚಂ ನ ಕರೋನ್ತಿ, ನ ರಕ್ಖನ್ತಿ, ನ ಗೋಪಯನ್ತಿ, ಏವಮೇವಂ ಏವರೂಪಾಪಿ ಆಚರಿಯುಪಜ್ಝಾಯಾದೀನಂ ಸನ್ತಿಕಾ ಓವಾದಾನುಸಾಸನಿಂ ನ ಲಭನ್ತೀತಿ ಅಪವಿದ್ಧಾ ಅನಾಥಾ, ಯಥಾ ಪೇತಾ, ತಥೇವ ಹೋನ್ತಿ। ಪಞ್ಚಮಂ।
Ekacceti vattabbayuttakeyeva. Apaviddhāti chaḍḍitakā. Anāthāti apatiṭṭhā. Petāti susāne chaḍḍitā kālaṅkatamanussā. Yathā hi susāne chaḍḍitā nānāsakuṇādīhi khajjanti, ñātakāpi nesaṃ nāthakiccaṃ na karonti, na rakkhanti, na gopayanti, evamevaṃ evarūpāpi ācariyupajjhāyādīnaṃ santikā ovādānusāsaniṃ na labhantīti apaviddhā anāthā, yathā petā, tatheva honti. Pañcamaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೫. ಜನ್ತುಸುತ್ತಂ • 5. Jantusuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೫. ಜನ್ತುಸುತ್ತವಣ್ಣನಾ • 5. Jantusuttavaṇṇanā
