| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༥. ཛནྟུསུཏྟཝཎྞནཱ
5. Jantusuttavaṇṇanā
༡༠༦. ཡེ ཝིནཡེ ཨཔཀཏཉྙུནོ སཾཀིལེསིཀེསུ ཝོདཱནིཡེསུ དྷམྨེསུ ན ཀུསལཱ ཡཾ ཀིཉྩི ན ཀཱརིནོ ཝིཔྤཊིསཱརབཧུལཱ། ཏེསཾ ཨནུཔྤནྣཉྩ ཨུདྡྷཙྩཾ ཨུཔྤཛྫཏི, ཨུཔྤནྣཉྩ བྷིཡྻོབྷཱཝཾ ཝེཔུལླཾ ཨཱཔཛྫཏཱིཏི ཨཱཧ ‘‘ཨཀཔྤིཡེ ཀཔྤིཡསཉྙིཏཱཡ…པེ॰… ཨུདྡྷཙྩཔཀཏིཀཱ’’ཏི། སཱརཱབྷཱཝེན ཏུཙྪཏྟཱ ཙ ནལོ༹ ཝིཡཱཏི ནལོ༹, མཱནོཏི ཨཱཧ ‘‘ཨུནྣལཱ༹ཏི ཨུགྒཏནལཱ༹’’ཏི། ཏེནཱཧ ‘‘ཨུཊྛིཏཏུཙྪམཱནཱ’’ཏི། མཱནོ ཧི སེཡྻསྶ སེཡྻོཏི སདིསོཏི ཙ པཝཏྟིཡཱ ཝིསེསཏོ ཏུཙྪོ། ཙཱཔལླེནཱཏི ཙཔལབྷཱཝེན, ཏཎྷཱལོལུཔྤེནཱཏི ཨཏྠོ། མུཁཁརཱཏི མུཁེན ཕརུསཱ, ཕརུསཝཱདིནོཏི ཨཏྠོ། ཝིཀིཎྞཝཱཙཱཏི ཝིསཊཝཙནཱ, སམྥཔྤལཱཔཏཱཡ ཨཔརིཡནྟཝཙནཱ། ཏེནཱཧ ‘‘ཨསཾཡཏཝཙནཱ’’ཏིཨཱདི། ཙཎྜསོཏེ བདྡྷནཱཝཱསདིསཱཏི ཨེཏེན ཨནཝཊྛིཏཀིརིཡཏཾ དསྶེཏི། ཡེན སམནྣཱགཏཱ སཏྟཱ ཨེཀསྨིཾ ཋཱནེ ཋཱཏུཾ ཝཱ ནིསཱིདིཏུཾ ཝཱ ན སཀྐོནྟི, ཨིཏོ ཙིཏོ ཙ ཝིཙརནྟི། ཨནཝཊྛིཏཙིཏྟཱཏི ཨེཀསྨིཾ ཨཱརམྨཎེ ན ཨཝཊྛིཏཙིཏྟཱ། ཝིཝཊཨིནྡྲིཡཱཏི ཨསཾཝུཏཙཀྑཱདིཨིནྡྲིཡཱ།
106. Ye vinaye apakataññuno saṃkilesikesu vodāniyesu dhammesu na kusalā yaṃ kiñci na kārino vippaṭisārabahulā. Tesaṃ anuppannañca uddhaccaṃ uppajjati, uppannañca bhiyyobhāvaṃ vepullaṃ āpajjatīti āha ‘‘akappiye kappiyasaññitāya…pe… uddhaccapakatikā’’ti. Sārābhāvena tucchattā ca naḷo viyāti naḷo, mānoti āha ‘‘unnaḷāti uggatanaḷā’’ti. Tenāha ‘‘uṭṭhitatucchamānā’’ti. Māno hi seyyassa seyyoti sadisoti ca pavattiyā visesato tuccho. Cāpallenāti capalabhāvena, taṇhāloluppenāti attho. Mukhakharāti mukhena pharusā, pharusavādinoti attho. Vikiṇṇavācāti visaṭavacanā, samphappalāpatāya apariyantavacanā. Tenāha ‘‘asaṃyatavacanā’’tiādi. Caṇḍasote baddhanāvāsadisāti etena anavaṭṭhitakiriyataṃ dasseti. Yena samannāgatā sattā ekasmiṃ ṭhāne ṭhātuṃ vā nisīdituṃ vā na sakkonti, ito cito ca vicaranti. Anavaṭṭhitacittāti ekasmiṃ ārammaṇe na avaṭṭhitacittā. Vivaṭaindriyāti asaṃvutacakkhādiindriyā.
གུཎཀཐཱཡ སདྡྷིཾ ཀཐིཡམཱནོ ནིགྒུཎསྶ ཨགུཎོ པཱཀཊོ ཧོཏི ཛཱཏིམཎིསམཱིཔེ ཋིཏསྶ ཝིཡ ཀཱཙམཎིནོ དོསོ། སུཁཛཱིཝིནོཏི སུཁེ ཋིཏཱ། ཡཐཱ དཱཡཀཱནཾ སུབྷརཾ ཧོཏི, ཨེཝཾ སུཁེན ཨཀིཙྪེན པཝཏྟཛཱིཝིཀཱ། ཏེནཱཧ ‘‘པུབྦེ བྷིཀྑཱུ’’ཏིཨཱདི།
Guṇakathāya saddhiṃ kathiyamāno nigguṇassa aguṇo pākaṭo hoti jātimaṇisamīpe ṭhitassa viya kācamaṇino doso. Sukhajīvinoti sukhe ṭhitā. Yathā dāyakānaṃ subharaṃ hoti, evaṃ sukhena akicchena pavattajīvikā. Tenāha ‘‘pubbe bhikkhū’’tiādi.
ཨཏྟནོ རུཙིཝསེན གཱམཀིཙྩཾ ནེཏཱིཏི གཱམཎི, ཏེ པན ཧཱིལེ༹ནྟོ ཝདཏི ‘‘གཱམཎིཀཱ’’ཏི། ཝིསྶཛྫེཏྭཱཏི སཏིཝོསྶགྒཝསེན ཝིསྶཛྫེཏྭཱ ཀིལེསམུཙྪཱཡཱཏི མཧིཙྪཱསངྑཱཏཱཡ ཏཎྷཱམུཙྪཱཡ། སཱིལཝནྟཱནཾཡེཝ ཧི དུཔྤཊིཔཏྟིཾ སནྡྷཱཡ དེཝཔུཏྟོ ཝདཏི། ཝཏྟབྦཡུཏྟཀེཡེཝཱཏི ཨོཝཱདེན མཡཱ ཨནུགྒཧེཏབྦམེཝ། ཚཌྜིཏཀཱཏི པརིཙྩཏྟཱ ཨཱཙརིཡུཔཛ྄ཛྷཱཡཱདཱིཧི། ཏཏོ ཨེཝ ཨནཱཐཱ ཨཔྤཏིཊྛཱ། པེཏཱཏི ཝིགཏཛཱིཝིཏཱ མཏཱ། ཡཐཱ པེཏཱ, ཏཐེཝ ཧོནྟི ཨཏྟཧིཏཱསམཏྠཏཱཡ ཝིཉྙཱུནཾ ཛིགུཙྪིཏབྦཏཱཡ ཙ།
Attano rucivasena gāmakiccaṃ netīti gāmaṇi, te pana hīḷento vadati ‘‘gāmaṇikā’’ti. Vissajjetvāti sativossaggavasena vissajjetvā kilesamucchāyāti mahicchāsaṅkhātāya taṇhāmucchāya. Sīlavantānaṃyeva hi duppaṭipattiṃ sandhāya devaputto vadati. Vattabbayuttakeyevāti ovādena mayā anuggahetabbameva. Chaḍḍitakāti pariccattā ācariyupajjhāyādīhi. Tato eva anāthā appatiṭṭhā. Petāti vigatajīvitā matā. Yathā petā, tatheva honti attahitāsamatthatāya viññūnaṃ jigucchitabbatāya ca.
ཛནྟུསུཏྟཝཎྞནཱ ནིཊྛིཏཱ།
Jantusuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༥. ཛནྟུསུཏྟཾ • 5. Jantusuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༥. ཛནྟུསུཏྟཝཎྞནཱ • 5. Jantusuttavaṇṇanā
