| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೪. ಜಾಣುಸ್ಸೋಣಿಬ್ರಾಹ್ಮಣಸುತ್ತಂ
4. Jāṇussoṇibrāhmaṇasuttaṃ
೪. ಸಾವತ್ಥಿನಿದಾನಂ। ಅಥ ಖೋ ಆಯಸ್ಮಾ ಆನನ್ದೋ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಸಾವತ್ಥಿಂ ಪಿಣ್ಡಾಯ ಪಾವಿಸಿ। ಅದ್ದಸಾ ಖೋ ಆಯಸ್ಮಾ ಆನನ್ದೋ ಜಾಣುಸ್ಸೋಣಿಂ ಬ್ರಾಹ್ಮಣಂ ಸಬ್ಬಸೇತೇನ ವಳವಾಭಿರಥೇನ 1 ಸಾವತ್ಥಿಯಾ ನಿಯ್ಯಾಯನ್ತಂ। ಸೇತಾ ಸುದಂ ಅಸ್ಸಾ ಯುತ್ತಾ ಹೋನ್ತಿ ಸೇತಾಲಙ್ಕಾರಾ, ಸೇತೋ ರಥೋ, ಸೇತಪರಿವಾರೋ, ಸೇತಾ ರಸ್ಮಿಯೋ, ಸೇತಾ ಪತೋದಲಟ್ಠಿ, ಸೇತಂ ಛತ್ತಂ, ಸೇತಂ ಉಣ್ಹೀಸಂ , ಸೇತಾನಿ ವತ್ಥಾನಿ, ಸೇತಾ ಉಪಾಹನಾ, ಸೇತಾಯ ಸುದಂ ವಾಲಬೀಜನಿಯಾ ಬೀಜೀಯತಿ। ತಮೇನಂ ಜನೋ ದಿಸ್ವಾ ಏವಮಾಹ – ‘‘ಬ್ರಹ್ಮಂ ವತ, ಭೋ, ಯಾನಂ! ಬ್ರಹ್ಮಯಾನರೂಪಂ ವತ, ಭೋ’’ತಿ!!
4. Sāvatthinidānaṃ. Atha kho āyasmā ānando pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi. Addasā kho āyasmā ānando jāṇussoṇiṃ brāhmaṇaṃ sabbasetena vaḷavābhirathena 2 sāvatthiyā niyyāyantaṃ. Setā sudaṃ assā yuttā honti setālaṅkārā, seto ratho, setaparivāro, setā rasmiyo, setā patodalaṭṭhi, setaṃ chattaṃ, setaṃ uṇhīsaṃ , setāni vatthāni, setā upāhanā, setāya sudaṃ vālabījaniyā bījīyati. Tamenaṃ jano disvā evamāha – ‘‘brahmaṃ vata, bho, yānaṃ! Brahmayānarūpaṃ vata, bho’’ti!!
ಅಥ ಖೋ ಆಯಸ್ಮಾ ಆನನ್ದೋ ಸಾವತ್ಥಿಯಂ ಪಿಣ್ಡಾಯ ಚರಿತ್ವಾ ಪಚ್ಛಾಭತ್ತಂ ಪಿಣ್ಡಪಾತಪಟಿಕ್ಕನ್ತೋ ಯೇನ ಭಗವಾ ತೇನುಪಸಙ್ಕಮಿ ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನೋ ಖೋ ಆಯಸ್ಮಾ ಆನನ್ದೋ ಭಗವನ್ತಂ ಏತದವೋಚ –
Atha kho āyasmā ānando sāvatthiyaṃ piṇḍāya caritvā pacchābhattaṃ piṇḍapātapaṭikkanto yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca –
‘‘ಇಧಾಹಂ, ಭನ್ತೇ, ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಸಾವತ್ಥಿಂ ಪಿಣ್ಡಾಯ ಪಾವಿಸಿಂ। ಅದ್ದಸಂ ಖ್ವಾಹಂ, ಭನ್ತೇ, ಜಾಣುಸ್ಸೋಣಿಂ ಬ್ರಾಹ್ಮಣಂ ಸಬ್ಬಸೇತೇನ ವಳವಾಭಿರಥೇನ ಸಾವತ್ಥಿಯಾ ನಿಯ್ಯಾಯನ್ತಂ। ಸೇತಾ ಸುದಂ ಅಸ್ಸಾ ಯುತ್ತಾ ಹೋನ್ತಿ ಸೇತಾಲಙ್ಕಾರಾ, ಸೇತೋ ರಥೋ, ಸೇತಪರಿವಾರೋ, ಸೇತಾ ರಸ್ಮಿಯೋ, ಸೇತಾ ಪತೋದಲಟ್ಠಿ, ಸೇತಂ ಛತ್ತಂ, ಸೇತಂ ಉಣ್ಹೀಸಂ, ಸೇತಾನಿ ವತ್ಥಾನಿ, ಸೇತಾ ಉಪಾಹನಾ, ಸೇತಾಯ ಸುದಂ ವಾಲಬೀಜನಿಯಾ ಬೀಜೀಯತಿ। ತಮೇನಂ ಜನೋ ದಿಸ್ವಾ ಏವಮಾಹ – ‘ಬ್ರಹ್ಮಂ ವತ, ಭೋ, ಯಾನಂ! ಬ್ರಹ್ಮಯಾನರೂಪಂ ವತ, ಭೋ’ತಿ!! ಸಕ್ಕಾ ನು ಖೋ, ಭನ್ತೇ, ಇಮಸ್ಮಿಂ ಧಮ್ಮವಿನಯೇ ಬ್ರಹ್ಮಯಾನಂ ಪಞ್ಞಾಪೇತು’’ನ್ತಿ?
‘‘Idhāhaṃ, bhante, pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisiṃ. Addasaṃ khvāhaṃ, bhante, jāṇussoṇiṃ brāhmaṇaṃ sabbasetena vaḷavābhirathena sāvatthiyā niyyāyantaṃ. Setā sudaṃ assā yuttā honti setālaṅkārā, seto ratho, setaparivāro, setā rasmiyo, setā patodalaṭṭhi, setaṃ chattaṃ, setaṃ uṇhīsaṃ, setāni vatthāni, setā upāhanā, setāya sudaṃ vālabījaniyā bījīyati. Tamenaṃ jano disvā evamāha – ‘brahmaṃ vata, bho, yānaṃ! Brahmayānarūpaṃ vata, bho’ti!! Sakkā nu kho, bhante, imasmiṃ dhammavinaye brahmayānaṃ paññāpetu’’nti?
‘‘ಸಕ್ಕಾ , ಆನನ್ದಾ’’ತಿ ಭಗವಾ ಅವೋಚ – ‘‘ಇಮಸ್ಸೇವ ಖೋ ಏತಂ, ಆನನ್ದ, ಅರಿಯಸ್ಸ ಅಟ್ಠಙ್ಗಿಕಸ್ಸ ಮಗ್ಗಸ್ಸ ಅಧಿವಚನಂ – ‘ಬ್ರಹ್ಮಯಾನಂ’ ಇತಿಪಿ, ‘ಧಮ್ಮಯಾನಂ’ ಇತಿಪಿ, ‘ಅನುತ್ತರೋ ಸಙ್ಗಾಮವಿಜಯೋ’ ಇತಿಪೀ’’ತಿ।
‘‘Sakkā , ānandā’’ti bhagavā avoca – ‘‘imasseva kho etaṃ, ānanda, ariyassa aṭṭhaṅgikassa maggassa adhivacanaṃ – ‘brahmayānaṃ’ itipi, ‘dhammayānaṃ’ itipi, ‘anuttaro saṅgāmavijayo’ itipī’’ti.
‘‘ಸಮ್ಮಾದಿಟ್ಠಿ, ಆನನ್ದ, ಭಾವಿತಾ ಬಹುಲೀಕತಾ ರಾಗವಿನಯಪರಿಯೋಸಾನಾ ಹೋತಿ, ದೋಸವಿನಯಪರಿಯೋಸಾನಾ ಹೋತಿ, ಮೋಹವಿನಯಪರಿಯೋಸಾನಾ ಹೋತಿ। ಸಮ್ಮಾಸಙ್ಕಪ್ಪೋ, ಆನನ್ದ, ಭಾವಿತೋ ಬಹುಲೀಕತೋ ರಾಗವಿನಯಪರಿಯೋಸಾನೋ ಹೋತಿ, ದೋಸವಿನಯಪರಿಯೋಸಾನೋ ಹೋತಿ, ಮೋಹವಿನಯಪರಿಯೋಸಾನೋ ಹೋತಿ। ಸಮ್ಮಾವಾಚಾ, ಆನನ್ದ, ಭಾವಿತಾ ಬಹುಲೀಕತಾ ರಾಗವಿನಯಪರಿಯೋಸಾನಾ ಹೋತಿ, ದೋಸ…ಪೇ॰… ಮೋಹವಿನಯಪರಿಯೋಸಾನಾ ಹೋತಿ। ಸಮ್ಮಾಕಮ್ಮನ್ತೋ, ಆನನ್ದ, ಭಾವಿತೋ ಬಹುಲೀಕತೋ ರಾಗವಿನಯಪರಿಯೋಸಾನೋ ಹೋತಿ, ದೋಸ… ಮೋಹವಿನಯಪರಿಯೋಸಾನೋ ಹೋತಿ। ಸಮ್ಮಾಆಜೀವೋ, ಆನನ್ದ, ಭಾವಿತೋ ಬಹುಲೀಕತೋ ರಾಗವಿನಯಪರಿಯೋಸಾನೋ ಹೋತಿ, ದೋಸ… ಮೋಹವಿನಯಪರಿಯೋಸಾನೋ ಹೋತಿ । ಸಮ್ಮಾವಾಯಾಮೋ, ಆನನ್ದ, ಭಾವಿತೋ ಬಹುಲೀಕತೋ ರಾಗವಿನಯಪರಿಯೋಸಾನೋ ಹೋತಿ, ದೋಸ… ಮೋಹವಿನಯಪರಿಯೋಸಾನೋ ಹೋತಿ। ಸಮ್ಮಾಸತಿ, ಆನನ್ದ, ಭಾವಿತಾ ಬಹುಲೀಕತಾ ರಾಗವಿನಯಪರಿಯೋಸಾನಾ ಹೋತಿ, ದೋಸ… ಮೋಹವಿನಯಪರಿಯೋಸಾನಾ ಹೋತಿ। ಸಮ್ಮಾಸಮಾಧಿ, ಆನನ್ದ, ಭಾವಿತೋ ಬಹುಲೀಕತೋ ರಾಗವಿನಯಪರಿಯೋಸಾನೋ ಹೋತಿ, ದೋಸ… ಮೋಹವಿನಯಪರಿಯೋಸಾನೋ ಹೋತಿ।
‘‘Sammādiṭṭhi, ānanda, bhāvitā bahulīkatā rāgavinayapariyosānā hoti, dosavinayapariyosānā hoti, mohavinayapariyosānā hoti. Sammāsaṅkappo, ānanda, bhāvito bahulīkato rāgavinayapariyosāno hoti, dosavinayapariyosāno hoti, mohavinayapariyosāno hoti. Sammāvācā, ānanda, bhāvitā bahulīkatā rāgavinayapariyosānā hoti, dosa…pe… mohavinayapariyosānā hoti. Sammākammanto, ānanda, bhāvito bahulīkato rāgavinayapariyosāno hoti, dosa… mohavinayapariyosāno hoti. Sammāājīvo, ānanda, bhāvito bahulīkato rāgavinayapariyosāno hoti, dosa… mohavinayapariyosāno hoti . Sammāvāyāmo, ānanda, bhāvito bahulīkato rāgavinayapariyosāno hoti, dosa… mohavinayapariyosāno hoti. Sammāsati, ānanda, bhāvitā bahulīkatā rāgavinayapariyosānā hoti, dosa… mohavinayapariyosānā hoti. Sammāsamādhi, ānanda, bhāvito bahulīkato rāgavinayapariyosāno hoti, dosa… mohavinayapariyosāno hoti.
‘‘ಇಮಿನಾ ಖೋ ಏತಂ, ಆನನ್ದ, ಪರಿಯಾಯೇನ ವೇದಿತಬ್ಬಂ ಯಥಾ ಇಮಸ್ಸೇವೇತಂ ಅರಿಯಸ್ಸ ಅಟ್ಠಙ್ಗಿಕಸ್ಸ ಮಗ್ಗಸ್ಸ ಅಧಿವಚನಂ – ‘ಬ್ರಹ್ಮಯಾನಂ’ ಇತಿಪಿ, ‘ಧಮ್ಮಯಾನಂ’ ಇತಿಪಿ, ‘ಅನುತ್ತರೋ ಸಙ್ಗಾಮವಿಜಯೋ’ ಇತಿಪೀ’’ತಿ। ಇದಮವೋಚ ಭಗವಾ। ಇದಂ ವತ್ವಾನ ಸುಗತೋ ಅಥಾಪರಂ ಏತದವೋಚ ಸತ್ಥಾ –
‘‘Iminā kho etaṃ, ānanda, pariyāyena veditabbaṃ yathā imassevetaṃ ariyassa aṭṭhaṅgikassa maggassa adhivacanaṃ – ‘brahmayānaṃ’ itipi, ‘dhammayānaṃ’ itipi, ‘anuttaro saṅgāmavijayo’ itipī’’ti. Idamavoca bhagavā. Idaṃ vatvāna sugato athāparaṃ etadavoca satthā –
‘‘ಯಸ್ಸ ಸದ್ಧಾ ಚ ಪಞ್ಞಾ ಚ, ಧಮ್ಮಾ ಯುತ್ತಾ ಸದಾ ಧುರಂ।
‘‘Yassa saddhā ca paññā ca, dhammā yuttā sadā dhuraṃ;
ಹಿರೀ ಈಸಾ ಮನೋ ಯೋತ್ತಂ, ಸತಿ ಆರಕ್ಖಸಾರಥಿ॥
Hirī īsā mano yottaṃ, sati ārakkhasārathi.
‘‘ರಥೋ ಸೀಲಪರಿಕ್ಖಾರೋ, ಝಾನಕ್ಖೋ ಚಕ್ಕವೀರಿಯೋ।
‘‘Ratho sīlaparikkhāro, jhānakkho cakkavīriyo;
ಉಪೇಕ್ಖಾ ಧುರಸಮಾಧಿ, ಅನಿಚ್ಛಾ ಪರಿವಾರಣಂ॥
Upekkhā dhurasamādhi, anicchā parivāraṇaṃ.
‘‘ಅಬ್ಯಾಪಾದೋ ಅವಿಹಿಂಸಾ, ವಿವೇಕೋ ಯಸ್ಸ ಆವುಧಂ।
‘‘Abyāpādo avihiṃsā, viveko yassa āvudhaṃ;
‘‘ಏತದತ್ತನಿ ಸಮ್ಭೂತಂ, ಬ್ರಹ್ಮಯಾನಂ ಅನುತ್ತರಂ।
‘‘Etadattani sambhūtaṃ, brahmayānaṃ anuttaraṃ;
ನಿಯ್ಯನ್ತಿ ಧೀರಾ ಲೋಕಮ್ಹಾ, ಅಞ್ಞದತ್ಥು ಜಯಂ ಜಯ’’ನ್ತಿ॥ ಚತುತ್ಥಂ।
Niyyanti dhīrā lokamhā, aññadatthu jayaṃ jaya’’nti. catutthaṃ;
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೪. ಜಾಣುಸ್ಸೋಣಿಬ್ರಾಹ್ಮಣಸುತ್ತವಣ್ಣನಾ • 4. Jāṇussoṇibrāhmaṇasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೪. ಜಾಣುಸ್ಸೋಣಿಬ್ರಾಹ್ಮಣಸುತ್ತವಣ್ಣನಾ • 4. Jāṇussoṇibrāhmaṇasuttavaṇṇanā
