| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
4. ж̇аан̣уссон̣иб̣раахман̣асуд̇д̇аван̣н̣анаа
4. Jāṇussoṇibrāhmaṇasuttavaṇṇanā
4. жад̇уд̇т̇з саб̣б̣асзд̇зна вал̣аваабхират̇знаад̇и сагаласзд̇зна жад̇уухи вал̣аваахи яуд̇д̇арат̇зна. со гира саб̣б̣о сажаггабан̃ж̇арагуб̣б̣аро раж̇ад̇абаригкид̇д̇о ход̇и. рат̇о жа наамзса д̣̇увид̇хо ход̇и – яод̇харат̇о, алан̇гаарарат̇од̇и. д̇ад̇т̇а яод̇харат̇о жад̇урассасан̣таано ход̇и наад̇имахаа д̣̇виннам̣ д̇ин̣н̣ам̣ ваа ж̇анаанам̣ г̇ахан̣асамад̇т̇о. алан̇гаарарат̇о махаа ход̇и д̣̇ийгхад̇о д̣̇ийгхо бут̇улад̇о бут̇уло жа, д̇ад̇т̇а чад̇д̇аг̇г̇аахаго ваалаб̣ийж̇аниг̇г̇аахаго д̇аалаван̣даг̇г̇аахагод̇и звам̣ адта ваа д̣̇аса ваа сукзнзва таад̇ум̣ ваа нисийд̣̇ид̇ум̣ ваа нибаж̇ж̇ид̇ум̣ ваа саггонд̇и. аяамби алан̇гаарарат̇оязва.
4. Catutthe sabbasetena vaḷavābhirathenāti sakalasetena catūhi vaḷavāhi yuttarathena. So kira sabbo sacakkapañjarakubbaro rajataparikkhitto hoti. Ratho ca nāmesa duvidho hoti – yodharatho, alaṅkārarathoti. Tattha yodharatho caturassasaṇṭhāno hoti nātimahā dvinnaṃ tiṇṇaṃ vā janānaṃ gahaṇasamattho. Alaṅkāraratho mahā hoti dīghato dīgho puthulato puthulo ca, tattha chattaggāhako vālabījaniggāhako tālavaṇṭaggāhakoti evaṃ aṭṭha vā dasa vā sukheneva ṭhātuṃ vā nisīdituṃ vā nipajjituṃ vā sakkonti. Ayampi alaṅkārarathoyeva.
сзд̇аа суд̣̇ам̣ ассаад̇и д̇аа вал̣аваа багад̇ияаа сзд̇аван̣н̣аава. сзд̇аалан̇гаараад̇и басаад̇ханам̣ д̇аасам̣ раж̇ад̇амаяам̣ ахоси. сзд̇о рат̇од̇и рат̇оби вуд̇д̇анаязнзва раж̇ад̇абаригкид̇д̇ад̇д̇аа д̇ад̇т̇а д̇ад̇т̇а д̣̇анд̇агаммакажид̇ад̇д̇аа жа сзд̇ова. сзд̇абариваарод̇и яат̇аа ан̃н̃з рат̇аа сийхажаммабариваарааби хонд̇и, б̣яаг̇гхажаммабариваарааби бан̣д̣угамб̣алабариваарааби хонд̇и, на звам̣ зса. зса бана гханад̣̇угуулзна бариваарид̇о ахоси. сзд̇аа расмияод̇и расмияоби раж̇ад̇абанаал̣исубаригкид̇д̇аа. сзд̇аа бад̇од̣̇аладтийд̇и бад̇од̣̇аладтиби раж̇ад̇абаригкид̇д̇аа.
Setā sudaṃ assāti tā vaḷavā pakatiyā setavaṇṇāva. Setālaṅkārāti pasādhanaṃ tāsaṃ rajatamayaṃ ahosi. Seto rathoti rathopi vuttanayeneva rajataparikkhittattā tattha tattha dantakammakhacitattā ca setova. Setaparivāroti yathā aññe rathā sīhacammaparivārāpi honti, byagghacammaparivārāpi paṇḍukambalaparivārāpi honti, na evaṃ esa. Esa pana ghanadukūlena parivārito ahosi. Setā rasmiyoti rasmiyopi rajatapanāḷisuparikkhittā. Setā patodalaṭṭhīti patodalaṭṭhipi rajataparikkhittā.
сзд̇ам̣ чад̇д̇анд̇и рат̇амаж̇жхз уссаабид̇ачад̇д̇амби сзд̇амзва ахоси. сзд̇ам̣ ун̣хийсанд̇и адтан̇г̇улавид̇т̇ааро раж̇ад̇амаяо ун̣хийсабаддо сзд̇о. сзд̇аани вад̇т̇аанийд̇и вад̇т̇ааниби сзд̇аани пзн̣абун̃ж̇аван̣н̣аани. д̇зсу ниваасанам̣ бан̃жасад̇аг̇гханагам̣, уд̇д̇араасан̇г̇о сахассаг̇гханаго. сзд̇аа убааханаад̇и убааханаа наама маг̇г̇аарул̣хасса ваа хонд̇и адавим̣ ваа бависанд̇асса. аяам̣ бана рат̇ам̣ абхирул̣хо, д̇знасса д̇ад̣̇анужчавиго раж̇ад̇абадисзвид̇о баад̣̇аалан̇гааро наама зса звам̣ вуд̇д̇од̇и взд̣̇ид̇аб̣б̣о. сзд̇ааяа суд̣̇ам̣ ваалаб̣ийж̇анияаад̇и палигамаяад̣̇ан̣д̣ааяа сзд̇ажамараваалаб̣ийж̇анияаа. на гзвалан̃жа зд̇д̇агамзвасса сзд̇ам̣ ахоси, со бана б̣раахман̣о сзд̇авилзбанам̣ вилимби, сзд̇амаалам̣ бил̣анд̇хи, д̣̇асасу ан̇г̇улийсу ан̇г̇улимуд̣̇д̣̇игаа ган̣н̣зсу гун̣д̣алаанийд̇и звамаад̣̇и алан̇гааробисса раж̇ад̇амаяова ахоси . бариваараб̣раахман̣аабисса д̣̇асасахассамад̇д̇аа д̇ат̇зва сзд̇авад̇т̇авилзбанамаалаалан̇гаараа ахзсум̣.
Setaṃ chattanti rathamajjhe ussāpitachattampi setameva ahosi. Setaṃ uṇhīsanti aṭṭhaṅgulavitthāro rajatamayo uṇhīsapaṭṭo seto. Setāni vatthānīti vatthānipi setāni pheṇapuñjavaṇṇāni. Tesu nivāsanaṃ pañcasatagghanakaṃ, uttarāsaṅgo sahassagghanako. Setā upāhanāti upāhanā nāma maggāruḷhassa vā honti aṭaviṃ vā pavisantassa. Ayaṃ pana rathaṃ abhiruḷho, tenassa tadanucchaviko rajatapaṭisevito pādālaṅkāro nāma esa evaṃ vuttoti veditabbo. Setāya sudaṃ vālabījaniyāti phalikamayadaṇḍāya setacamaravālabījaniyā. Na kevalañca ettakamevassa setaṃ ahosi, so pana brāhmaṇo setavilepanaṃ vilimpi, setamālaṃ piḷandhi, dasasu aṅgulīsu aṅgulimuddikā kaṇṇesu kuṇḍalānīti evamādi alaṅkāropissa rajatamayova ahosi . Parivārabrāhmaṇāpissa dasasahassamattā tatheva setavatthavilepanamālālaṅkārā ahesuṃ.
яам̣ банзд̇ам̣ саавад̇т̇ияаа нияяааяанд̇анд̇и вуд̇д̇ам̣, д̇ад̇рааяам̣ нияяааяанавибхааванаа – со гира чаннам̣ чаннам̣ маасаанам̣ згаваарам̣ наг̇арам̣ бад̣̇агкин̣ам̣ гарод̇и – ‘‘ид̇о зд̇д̇агзхи д̣̇ивасзхи наг̇арам̣ бад̣̇агкин̣ам̣ гариссад̇ий’’д̇и бурзд̇арамзва гхосанаа гаяирад̇и. д̇ам̣ суд̇ваа яз наг̇арад̇о на багганд̇аа, д̇з на баггаманд̇и. язби багганд̇аа, д̇зби ‘‘бун̃н̃авад̇о сирисамбад̇д̇им̣ бассиссаамаа’’д̇и ааг̇ажчанд̇и. яам̣ д̣̇ивасам̣ б̣раахман̣о наг̇арам̣ анувижарад̇и, д̇ад̣̇аа баад̇ова наг̇аравийт̇ияо саммаж̇ж̇ид̇ваа ваалигам̣ огирид̇ваа лааж̇абан̃жамзхи бубпзхи виббагирид̇ваа бун̣н̣агхадз табзд̇ваа гад̣̇алияо жа д̇хаж̇з жа уссаабзд̇ваа сагаланаг̇арам̣ д̇хуубид̇аваасид̇ам̣ гаронд̇и.
Yaṃ panetaṃ sāvatthiyā niyyāyantanti vuttaṃ, tatrāyaṃ niyyāyanavibhāvanā – so kira channaṃ channaṃ māsānaṃ ekavāraṃ nagaraṃ padakkhiṇaṃ karoti – ‘‘ito ettakehi divasehi nagaraṃ padakkhiṇaṃ karissatī’’ti puretarameva ghosanā kayirati. Taṃ sutvā ye nagarato na pakkantā, te na pakkamanti. Yepi pakkantā, tepi ‘‘puññavato sirisampattiṃ passissāmā’’ti āgacchanti. Yaṃ divasaṃ brāhmaṇo nagaraṃ anuvicarati, tadā pātova nagaravīthiyo sammajjitvā vālikaṃ okiritvā lājapañcamehi pupphehi vippakiritvā puṇṇaghaṭe ṭhapetvā kadaliyo ca dhaje ca ussāpetvā sakalanagaraṃ dhūpitavāsitaṃ karonti.
б̣раахман̣о баад̇ова сийсам̣ нхааяид̇ваа бурзбхад̇д̇ам̣ бхун̃ж̇ид̇ваа вуд̇д̇анаязнзва сзд̇авад̇т̇аад̣̇ийхи ад̇д̇аанам̣ алан̇гарид̇ваа баасаад̣̇аа оруяха рат̇ам̣ абхирухад̇и. ат̇а нам̣ д̇з б̣раахман̣аа саб̣б̣асзд̇авад̇т̇авилзбанамаалаалан̇гаараа сзд̇ажчад̇д̇аани г̇ахзд̇ваа бариваарзнд̇и. д̇ад̇о махааж̇анасса саннибаад̇ад̇т̇ам̣ батамам̣язва д̇арун̣ад̣̇аарагаанам̣ палаапалаани вигиранд̇и, д̇ад̣̇ананд̇арам̣ маасагаруубаад̣̇ийни, д̇ад̣̇ананд̇арам̣ гахаабан̣з вигиранд̇и. махааж̇ано саннибад̇ад̇и, уггудтияо жзва жзлугкзбаа жа вад̇д̇анд̇и. ат̇а б̣раахман̣о ман̇г̇алигасовад̇т̇игаад̣̇ийсу ман̇г̇алаани жзва сувад̇т̇ияо жа гаронд̇зсу махаасамбад̇д̇ияаа наг̇арам̣ анувижарад̇и. бун̃н̃аванд̇аа мануссаа згабхуумигаад̣̇ибаасаад̣̇з ааруяха сугабад̇д̇асад̣̇исаани ваад̇абаанагаваадаани виварид̇ваа ологзнд̇и. б̣раахман̣оби ад̇д̇ано яасасирисамбад̇д̇ияаа наг̇арам̣ аж̇жход̇т̇аранд̇о вияа д̣̇агкин̣ад̣̇ваараабхимуко ход̇и. д̇ам̣ санд̇хааязд̇ам̣ вуд̇д̇ам̣.
Brāhmaṇo pātova sīsaṃ nhāyitvā purebhattaṃ bhuñjitvā vuttanayeneva setavatthādīhi attānaṃ alaṅkaritvā pāsādā oruyha rathaṃ abhiruhati. Atha naṃ te brāhmaṇā sabbasetavatthavilepanamālālaṅkārā setacchattāni gahetvā parivārenti. Tato mahājanassa sannipātatthaṃ paṭhamaṃyeva taruṇadārakānaṃ phalāphalāni vikiranti, tadanantaraṃ māsakarūpādīni, tadanantaraṃ kahāpaṇe vikiranti. Mahājano sannipatati, ukkuṭṭhiyo ceva celukkhepā ca vattanti. Atha brāhmaṇo maṅgalikasovatthikādīsu maṅgalāni ceva suvatthiyo ca karontesu mahāsampattiyā nagaraṃ anuvicarati. Puññavantā manussā ekabhūmikādipāsāde āruyha sukapattasadisāni vātapānakavāṭāni vivaritvā olokenti. Brāhmaṇopi attano yasasirisampattiyā nagaraṃ ajjhottharanto viya dakkhiṇadvārābhimukho hoti. Taṃ sandhāyetaṃ vuttaṃ.
д̇амзнам̣ ж̇ано д̣̇исваад̇и махааж̇ано д̇ам̣ рат̇ам̣ д̣̇исваа. б̣рахманд̇и сздтаад̇хиважанамзд̇ам̣. б̣рахмам̣ вад̇а бхо яаананд̇и сздтаяаанасад̣̇исам̣ вад̇а бхо яаананд̇и аяамзд̇т̇а ад̇т̇о. имассзва ко зд̇анд̇и, аананд̣̇а, мануссаа наама ван̣н̣абхаан̣агаанам̣ д̇ханам̣ д̣̇ад̇ваа ад̇д̇ано д̣̇ааригаанам̣ ван̣н̣аг̇ийд̇ам̣ г̇ааяаабзнд̇и ‘‘абхируубо ход̇и д̣̇ассанийяо махад̣̇д̇хано махаабхог̇о’’д̇и, на жа д̇зна ван̣н̣абхан̣анамад̇д̇зна абхируубаа ваа хонд̇и махад̣̇д̇ханаа ваа, звамзва махааж̇ано б̣раахман̣асса рат̇ам̣ д̣̇исваа – ‘‘б̣рахмам̣ вад̇а бхо яаана’’нд̇и гин̃жааби звам̣ ван̣н̣ам̣ бхан̣ад̇и, на банзд̇ам̣ яаанам̣ ван̣н̣абхан̣анамад̇д̇знзва б̣рахмаяаанам̣ наама ход̇и. лаамаган̃хи зд̇ам̣ чавам̣. барамад̇т̇зна бана имассзва ко зд̇ам̣, аананд̣̇а, арияасса адтан̇г̇игасса маг̇г̇асса ад̇хиважанам̣. аяан̃хи саб̣б̣ад̣̇осавиг̇амзна сздто, иминаа жа арияаа ниб̣б̣аанам̣ яанд̇ийд̇и б̣рахмаяаанам̣ ид̇иби, д̇хаммабхууд̇ад̇д̇аа яаанад̇д̇аа жа д̇хаммаяаанам̣ ид̇иби, ануд̇д̇арад̇д̇аа гилзсасан̇г̇аамасса жа виж̇ид̇ад̇д̇аа ануд̇д̇аро сан̇г̇аамавиж̇аяо ид̇иби вад̇д̇ум̣ ваддад̇и.
Tamenaṃ jano disvāti mahājano taṃ rathaṃ disvā. Brahmanti seṭṭhādhivacanametaṃ. Brahmaṃ vata bho yānanti seṭṭhayānasadisaṃ vata bho yānanti ayamettha attho. Imasseva kho etanti, ānanda, manussā nāma vaṇṇabhāṇakānaṃ dhanaṃ datvā attano dārikānaṃ vaṇṇagītaṃ gāyāpenti ‘‘abhirūpo hoti dassanīyo mahaddhano mahābhogo’’ti, na ca tena vaṇṇabhaṇanamattena abhirūpā vā honti mahaddhanā vā, evameva mahājano brāhmaṇassa rathaṃ disvā – ‘‘brahmaṃ vata bho yāna’’nti kiñcāpi evaṃ vaṇṇaṃ bhaṇati, na panetaṃ yānaṃ vaṇṇabhaṇanamatteneva brahmayānaṃ nāma hoti. Lāmakañhi etaṃ chavaṃ. Paramatthena pana imasseva kho etaṃ, ānanda, ariyassa aṭṭhaṅgikassa maggassa adhivacanaṃ. Ayañhi sabbadosavigamena seṭṭho, iminā ca ariyā nibbānaṃ yantīti brahmayānaṃ itipi, dhammabhūtattā yānattā ca dhammayānaṃ itipi, anuttarattā kilesasaṅgāmassa ca vijitattā anuttaro saṅgāmavijayo itipi vattuṃ vaṭṭati.
ид̣̇аанисса нид̣̇д̣̇осабхааван̃жзва сан̇г̇аамавиж̇аяабхааван̃жа д̣̇ассзнд̇о рааг̇авинаяабарияосаанаад̇иаад̣̇имааха. д̇ад̇т̇а рааг̇ам̣ винаяамаанаа барияосаабзд̇и барияосаанам̣ г̇ажчад̇и нибпаж̇ж̇ад̇ийд̇и рааг̇авинаяабарияосаанаа. зса наяо саб̣б̣ад̇т̇а.
Idānissa niddosabhāvañceva saṅgāmavijayabhāvañca dassento rāgavinayapariyosānātiādimāha. Tattha rāgaṃ vinayamānā pariyosāpeti pariyosānaṃ gacchati nipphajjatīti rāgavinayapariyosānā. Esa nayo sabbattha.
яасса сад̣̇д̇хаа жа бан̃н̃аа жаад̇и яасса арияамаг̇г̇аяаанасса сад̣̇д̇хаанусааривасзна сад̣̇д̇хаа, д̇хаммаанусааривасзна бан̃н̃аад̇и имз д̣̇вз д̇хаммаа сад̣̇аа д̇хурам̣ яуд̇д̇аа, д̇ад̇рамаж̇жхад̇д̇ад̇ааяуг̇з яуд̇д̇аад̇и ад̇т̇о. хирий ийсаад̇и ад̇д̇анаа сад̣̇д̇хим̣ ад̇хивидтзна б̣ахид̣̇д̇хаасамудтаанзна од̇д̇аббзна сад̣̇д̇хим̣ аж̇жхад̇д̇асамудтаанаа хирий яасса маг̇г̇арат̇асса ийсаа. мано яод̇д̇анд̇и вибассанаажид̇д̇ан̃жа маг̇г̇ажид̇д̇ан̃жа яод̇д̇ам̣. яат̇аа хи рат̇асса ваагаад̣̇имаяам̣ яод̇д̇ам̣ г̇он̣з згааб̣ад̣̇д̇хз гарод̇и згасан̇г̇ахид̇з, звам̣ маг̇г̇арат̇асса логияавибассанаажид̇д̇ам̣ ад̇ирзгабан̃н̃ааса, логуд̇д̇аравибассанаажид̇д̇ам̣ ад̇ирзгасадти гусалад̇хаммз згааб̣ад̣̇д̇хз згасан̇г̇ахз гарод̇и. д̇зна вуд̇д̇ам̣ ‘‘мано яод̇д̇а’’нд̇и. сад̇и аарагкасаарат̇ийд̇и маг̇г̇асамбаяуд̇д̇аа сад̇и аарагкасаарат̇и. яат̇аа хи рат̇асса аарагко саарат̇и наама яог̇г̇ияо. д̇хурам̣ ваахзд̇и яож̇зд̇и агкам̣ аб̣бхан̃ж̇ад̇и рат̇ам̣ бзсзд̇и рат̇аяуд̇д̇агз ниб̣б̣исзванз гарод̇и, звам̣ маг̇г̇арат̇асса сад̇и. аяан̃хи аарагкабажжубадтаанаа жзва гусалаагусалаанан̃жа д̇хаммаанам̣ г̇ад̇ияо саманвзсад̇ийд̇и вуд̇д̇аа.
Yassa saddhā ca paññā cāti yassa ariyamaggayānassa saddhānusārivasena saddhā, dhammānusārivasena paññāti ime dve dhammā sadā dhuraṃ yuttā, tatramajjhattatāyuge yuttāti attho. Hirī īsāti attanā saddhiṃ adhiviṭṭhena bahiddhāsamuṭṭhānena ottappena saddhiṃ ajjhattasamuṭṭhānā hirī yassa maggarathassa īsā. Mano yottanti vipassanācittañca maggacittañca yottaṃ. Yathā hi rathassa vākādimayaṃ yottaṃ goṇe ekābaddhe karoti ekasaṅgahite, evaṃ maggarathassa lokiyavipassanācittaṃ atirekapaññāsa, lokuttaravipassanācittaṃ atirekasaṭṭhi kusaladhamme ekābaddhe ekasaṅgahe karoti. Tena vuttaṃ ‘‘mano yotta’’nti. Sati ārakkhasārathīti maggasampayuttā sati ārakkhasārathi. Yathā hi rathassa ārakkho sārathi nāma yoggiyo. Dhuraṃ vāheti yojeti akkhaṃ abbhañjati rathaṃ peseti rathayuttake nibbisevane karoti, evaṃ maggarathassa sati. Ayañhi ārakkhapaccupaṭṭhānā ceva kusalākusalānañca dhammānaṃ gatiyo samanvesatīti vuttā.
рат̇од̇и арияаадтан̇г̇игамаг̇г̇арат̇о. сийлабаригкаарод̇и жад̇убаарисуд̣̇д̇хисийлаалан̇гааро. жхаанагкод̇и вибассанаасамбаяуд̇д̇аанам̣ бан̃жаннам̣ жхаанан̇г̇аанам̣ васзна жхаанамаяаагко. жаггавийрияод̇и вийрияажагго, гааяигажзд̇асигасан̇каад̇аани д̣̇вз вийрияаани асса жаггаанийд̇и ад̇т̇о. убзгкаа д̇хурасамаад̇хийд̇и д̇хурасса самаад̇хи, уннад̇онад̇аагаарасса абхаавзна д̣̇виннамби яуг̇абад̣̇зсаанам̣ самад̇аад̇и ад̇т̇о. аяан̃хи д̇ад̇рамаж̇жхад̇д̇убзгкаа жид̇д̇уббаад̣̇асса лийнуд̣̇д̇хажжабхаавам̣ харид̇ваа баяог̇амаж̇жхад̇д̇з жид̇д̇ам̣ табзд̇и, д̇асмаа имасса маг̇г̇арат̇асса ‘‘д̇хурасамаад̇хий’’д̇и вуд̇д̇аа. анижчаа баривааран̣анд̇и б̣аахирагарат̇асса сийхажаммаад̣̇ийни вияа имассааби арияамаг̇г̇арат̇асса алобхасан̇каад̇аа анижчаа баривааран̣ам̣ наама.
Rathoti ariyaaṭṭhaṅgikamaggaratho. Sīlaparikkhāroti catupārisuddhisīlālaṅkāro. Jhānakkhoti vipassanāsampayuttānaṃ pañcannaṃ jhānaṅgānaṃ vasena jhānamayaakkho. Cakkavīriyoti vīriyacakko, kāyikacetasikasaṅkhātāni dve vīriyāni assa cakkānīti attho. Upekkhā dhurasamādhīti dhurassa samādhi, unnatonatākārassa abhāvena dvinnampi yugapadesānaṃ samatāti attho. Ayañhi tatramajjhattupekkhā cittuppādassa līnuddhaccabhāvaṃ haritvā payogamajjhatte cittaṃ ṭhapeti, tasmā imassa maggarathassa ‘‘dhurasamādhī’’ti vuttā. Anicchā parivāraṇanti bāhirakarathassa sīhacammādīni viya imassāpi ariyamaggarathassa alobhasaṅkhātā anicchā parivāraṇaṃ nāma.
аб̣яаабаад̣̇од̇и мзд̇д̇аа жа мзд̇д̇аабуб̣б̣абхааг̇о жа. авихим̣саад̇и гарун̣аа жа гарун̣аабуб̣б̣абхааг̇о жа. вивзгод̇и гааяавивзгаад̣̇и д̇ивид̇хавивзго. яасса аавуд̇ханд̇и яасса арияамаг̇г̇арат̇з тид̇асса гулабуд̇д̇асса зд̇ам̣ бан̃жавид̇хам̣ аавуд̇хам̣. яат̇аа хи рат̇з тид̇о бан̃жахи аавуд̇хзхи сабад̇д̇з виж̇жхад̇и, звам̣ яог̇ааважароби имасмим̣ логияалогуд̇д̇арамаг̇г̇арат̇з тид̇о мзд̇д̇ааяа д̣̇осам̣ виж̇жхад̇и, гарун̣ааяа вихим̣сам̣ , гааяавивзгзна г̇ан̣асан̇г̇ан̣игам̣, жид̇д̇авивзгзна гилзсасан̇г̇ан̣игам̣, убад̇хививзгзна саб̣б̣аагусалам̣ виж̇жхад̇и. д̇знассзд̇ам̣ бан̃жавид̇хам̣ ‘‘аавуд̇ха’’нд̇и вуд̇д̇ам̣. д̇ид̇игкаад̇и д̣̇уруд̇д̇аанам̣ д̣̇урааг̇ад̇аанам̣ важанабат̇аанам̣ ад̇хиваасанагканд̇и. жаммасаннааход̇и саннад̣̇д̇хажаммо. яат̇аа хи рат̇з тид̇о рат̇иго бадимуггажаммо ааг̇ад̇ааг̇ад̇з сарз камад̇и, на нам̣ д̇з виж̇жханд̇и, звам̣ ад̇хиваасанагканд̇исаманнааг̇ад̇о бхигку ааг̇ад̇ааг̇ад̇з важанабат̇з камад̇и, на нам̣ д̇з виж̇жханд̇и. д̇асмаа ‘‘д̇ид̇игкаа жаммасаннаахо’’д̇и вуд̇д̇о. яог̇агкзмааяа вад̇д̇ад̇ийд̇и жад̇уухи яог̇зхи кзмааяа ниб̣б̣аанааяа вад̇д̇ад̇и, ниб̣б̣аанаабхимуко г̇ажчад̇иязва, на д̇идтад̇и на бхиж̇ж̇ад̇ийд̇и ад̇т̇о.
Abyāpādoti mettā ca mettāpubbabhāgo ca. Avihiṃsāti karuṇā ca karuṇāpubbabhāgo ca. Vivekoti kāyavivekādi tividhaviveko. Yassa āvudhanti yassa ariyamaggarathe ṭhitassa kulaputtassa etaṃ pañcavidhaṃ āvudhaṃ. Yathā hi rathe ṭhito pañcahi āvudhehi sapatte vijjhati, evaṃ yogāvacaropi imasmiṃ lokiyalokuttaramaggarathe ṭhito mettāya dosaṃ vijjhati, karuṇāya vihiṃsaṃ , kāyavivekena gaṇasaṅgaṇikaṃ, cittavivekena kilesasaṅgaṇikaṃ, upadhivivekena sabbākusalaṃ vijjhati. Tenassetaṃ pañcavidhaṃ ‘‘āvudha’’nti vuttaṃ. Titikkhāti duruttānaṃ durāgatānaṃ vacanapathānaṃ adhivāsanakkhanti. Cammasannāhoti sannaddhacammo. Yathā hi rathe ṭhito rathiko paṭimukkacammo āgatāgate sare khamati, na naṃ te vijjhanti, evaṃ adhivāsanakkhantisamannāgato bhikkhu āgatāgate vacanapathe khamati, na naṃ te vijjhanti. Tasmā ‘‘titikkhā cammasannāho’’ti vutto. Yogakkhemāya vattatīti catūhi yogehi khemāya nibbānāya vattati, nibbānābhimukho gacchatiyeva, na tiṭṭhati na bhijjatīti attho.
зд̇ад̣̇ад̇д̇ани самбхууд̇анд̇и зд̇ам̣ маг̇г̇аяаанам̣ ад̇д̇ано бурисагаарам̣ ниссааяа лад̣̇д̇хад̇д̇аа ад̇д̇ани самбхууд̇ам̣ наама ход̇и. б̣рахмаяаанам̣ ануд̇д̇аранд̇и асад̣̇исам̣ сздтаяаанам̣. нияяанд̇и д̇хийраа логамхаад̇и язсам̣ зд̇ам̣ яаанам̣ ад̇т̇и, д̇з д̇хийраа бан̣д̣ид̇абурисаа логамхаа нияяанд̇и г̇ажчанд̇и. ан̃н̃ад̣̇ад̇т̇ууд̇и згам̣сзна. ж̇аяам̣ ж̇аяанд̇и рааг̇аад̣̇аяо сабад̇д̇з ж̇инанд̇аа ж̇инанд̇аа.
Etadattani sambhūtanti etaṃ maggayānaṃ attano purisakāraṃ nissāya laddhattā attani sambhūtaṃ nāma hoti. Brahmayānaṃ anuttaranti asadisaṃ seṭṭhayānaṃ. Niyyanti dhīrā lokamhāti yesaṃ etaṃ yānaṃ atthi, te dhīrā paṇḍitapurisā lokamhā niyyanti gacchanti. Aññadatthūti ekaṃsena. Jayaṃ jayanti rāgādayo sapatte jinantā jinantā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 4. ж̇аан̣уссон̣иб̣раахман̣асуд̇д̇ам̣ • 4. Jāṇussoṇibrāhmaṇasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 4. ж̇аан̣уссон̣иб̣раахман̣асуд̇д̇аван̣н̣анаа • 4. Jāṇussoṇibrāhmaṇasuttavaṇṇanā
