| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೧೧. ಜಾಣುಸ್ಸೋಣಿಸುತ್ತವಣ್ಣನಾ
11. Jāṇussoṇisuttavaṇṇanā
೧೭೭. ಏಕಾದಸಮೇ ಉಪಕಪ್ಪತೂತಿ ಪಾಪುಣಾತು। ಠಾನೇತಿ ಓಕಾಸೇ। ನೋ ಅಟ್ಠಾನೇತಿ ನೋ ಅನೋಕಾಸೇ। ನೇರಯಿಕಾನಂ ಆಹಾರೋ ನಾಮ ತತ್ಥ ನಿಬ್ಬತ್ತನಕಮ್ಮಮೇವ। ತೇನೇವ ಹಿ ತೇ ತತ್ಥ ಯಾಪೇನ್ತಿ। ತಿರಚ್ಛಾನಯೋನಿಕಾನಂ ಪನ ತಿಣಪಣ್ಣಾದಿವಸೇನ ಆಹಾರೋ ವೇದಿತಬ್ಬೋ। ಮನುಸ್ಸಾನಂ ಓದನಕುಮ್ಮಾಸಾದಿವಸೇನ , ದೇವಾನಂ ಸುಧಾಭೋಜನಾದಿವಸೇನ, ಪೇತ್ತಿವೇಸಯಿಕಾನಂ ಖೇಳಸಿಙ್ಘಾಣಿಕಾದಿವಸೇನ। ಯಂ ವಾ ಪನಸ್ಸ ಇತೋ ಅನುಪ್ಪವೇಚ್ಛನ್ತೀತಿ ಯಂ ತಸ್ಸ ಮಿತ್ತಾದಯೋ ಇತೋ ದದನ್ತಾ ಅನುಪವೇಸೇನ್ತಿ। ಪೇತ್ತಿವೇಸಯಿಕಾ ಏವ ಹಿ ಪರದತ್ತೂಪಜೀವಿನೋ ಹೋನ್ತಿ, ನ ಅಞ್ಞೇಸಂ ಪರೇಹಿ ದಿನ್ನಂ ಉಪಕಪ್ಪತಿ। ದಾಯಕೋಪಿ ಅನಿಪ್ಫಲೋತಿ ಯಂ ಸನ್ಧಾಯ ತಂ ದಾನಂ ದಿನ್ನಂ, ತಸ್ಸ ಉಪಕಪ್ಪತು ವಾ ಮಾ ವಾ, ದಾಯಕೇನ ಪನ ನ ಸಕ್ಕಾ ನಿಪ್ಫಲೇನ ಭವಿತುಂ, ದಾಯಕೋ ತಸ್ಸ ದಾನಸ್ಸ ವಿಪಾಕಂ ಲಭತಿಯೇವ।
177. Ekādasame upakappatūti pāpuṇātu. Ṭhāneti okāse. No aṭṭhāneti no anokāse. Nerayikānaṃāhāro nāma tattha nibbattanakammameva. Teneva hi te tattha yāpenti. Tiracchānayonikānaṃ pana tiṇapaṇṇādivasena āhāro veditabbo. Manussānaṃ odanakummāsādivasena , devānaṃ sudhābhojanādivasena, pettivesayikānaṃ kheḷasiṅghāṇikādivasena. Yaṃ vā panassa ito anuppavecchantīti yaṃ tassa mittādayo ito dadantā anupavesenti. Pettivesayikā eva hi paradattūpajīvino honti, na aññesaṃ parehi dinnaṃ upakappati. Dāyakopi anipphaloti yaṃ sandhāya taṃ dānaṃ dinnaṃ, tassa upakappatu vā mā vā, dāyakena pana na sakkā nipphalena bhavituṃ, dāyako tassa dānassa vipākaṃ labhatiyeva.
ಅಟ್ಠಾನೇಪಿ ಭವಂ ಗೋತಮೋ ಪರಿಕಪ್ಪಂ ವದತೀತಿ ಅನೋಕಾಸೇ ಉಪ್ಪನ್ನೇಪಿ ತಸ್ಮಿಂ ಞಾತಕೇ ಭವಂ ಗೋತಮೋ ದಾನಸ್ಸ ಫಲಂ ಪರಿಕಪ್ಪೇತಿಯೇವ ಪಞ್ಞಾಪೇತಿಯೇವಾತಿ ಪುಚ್ಛತಿ। ಬ್ರಾಹ್ಮಣಸ್ಸ ಹಿ ‘‘ಏವಂ ದಿನ್ನಸ್ಸ ದಾನಸ್ಸ ಫಲಂ ದಾಯಕೋ ನ ಲಭತೀ’’ತಿ ಲದ್ಧಿ। ಅಥಸ್ಸ ಭಗವಾ ಪಞ್ಹಂ ಪಟಿಜಾನಿತ್ವಾ ‘‘ದಾಯಕೋ ನಾಮ ಯತ್ಥ ಕತ್ಥಚಿ ಪುಞ್ಞಫಲೂಪಜೀವಿಟ್ಠಾನೇ ನಿಬ್ಬತ್ತೋ ದಾನಸ್ಸ ಫಲಂ ಲಭತಿಯೇವಾ’’ತಿ ದಸ್ಸೇತುಂ ಇಧ ಬ್ರಾಹ್ಮಣಾತಿಆದಿಮಾಹ। ಸೋ ತತ್ಥ ಲಾಭೀ ಹೋತೀತಿ ಸೋ ತತ್ಥ ಹತ್ಥಿಯೋನಿಯಂ ನಿಬ್ಬತ್ತೋಪಿ ಮಙ್ಗಲಹತ್ಥಿಟ್ಠಾನಂ ಪತ್ವಾ ಲಾಭೀ ಹೋತಿ। ಅಸ್ಸಾದೀಸುಪಿ ಏಸೇವ ನಯೋ। ಸಾಧುವಗ್ಗೋ ಉತ್ತಾನತ್ಥೋಯೇವಾತಿ।
Aṭṭhānepi bhavaṃ gotamo parikappaṃ vadatīti anokāse uppannepi tasmiṃ ñātake bhavaṃ gotamo dānassa phalaṃ parikappetiyeva paññāpetiyevāti pucchati. Brāhmaṇassa hi ‘‘evaṃ dinnassa dānassa phalaṃ dāyako na labhatī’’ti laddhi. Athassa bhagavā pañhaṃ paṭijānitvā ‘‘dāyako nāma yattha katthaci puññaphalūpajīviṭṭhāne nibbatto dānassa phalaṃ labhatiyevā’’ti dassetuṃ idha brāhmaṇātiādimāha. So tattha lābhī hotīti so tattha hatthiyoniyaṃ nibbattopi maṅgalahatthiṭṭhānaṃ patvā lābhī hoti. Assādīsupi eseva nayo. Sādhuvaggo uttānatthoyevāti.
ಜಾಣುಸ್ಸೋಣಿವಗ್ಗೋ ದುತಿಯೋ।
Jāṇussoṇivaggo dutiyo.
ಚತುತ್ಥಪಣ್ಣಾಸಕಂ ನಿಟ್ಠಿತಂ।
Catutthapaṇṇāsakaṃ niṭṭhitaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೧೧. ಜಾಣುಸ್ಸೋಣಿಸುತ್ತಂ • 11. Jāṇussoṇisuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೪೪. ಬ್ರಾಹ್ಮಣಪಚ್ಚೋರೋಹಣೀಸುತ್ತಾದಿವಣ್ಣನಾ • 1-44. Brāhmaṇapaccorohaṇīsuttādivaṇṇanā
