| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. ஜராவக்³கோ³
5. Jarāvaggo
1. ஜராத⁴ம்மஸுத்தவண்ணனா
1. Jarādhammasuttavaṇṇanā
511. பஞ்சமவக்³க³ஸ்ஸ பட²மே பச்சா²தபேதி பாஸாத³ச்சா²யாய புரத்தி²மதி³ஸங் படிச்ச²ன்னத்தா பாஸாத³ஸ்ஸ பச்சி²மதி³ஸாபா⁴கே³ ஆதபோ ஹோதி, தஸ்மிங் டா²னே பஞ்ஞத்தவரபு³த்³தா⁴ஸனே நிஸின்னோதி அத்தோ² . பிட்டி²ங் ஓதாபயமானோதி யஸ்மா ஸம்மாஸம்பு³த்³த⁴ஸ்ஸபி உபாதி³ன்னகஸரீரே உண்ஹகாலே உண்ஹங் ஹோதி, ஸீதகாலே ஸீதங், அயஞ்ச ஹிமபாதஸீதஸமயோ. தஸ்மா மஹாசீவரங் ஓதாரெத்வா ஸூரியரஸ்மீஹி பிட்டி²ங் ஓதாபயமானோ நிஸீதி³.
511. Pañcamavaggassa paṭhame pacchātapeti pāsādacchāyāya puratthimadisaṃ paṭicchannattā pāsādassa pacchimadisābhāge ātapo hoti, tasmiṃ ṭhāne paññattavarabuddhāsane nisinnoti attho . Piṭṭhiṃ otāpayamānoti yasmā sammāsambuddhassapi upādinnakasarīre uṇhakāle uṇhaṃ hoti, sītakāle sītaṃ, ayañca himapātasītasamayo. Tasmā mahācīvaraṃ otāretvā sūriyarasmīhi piṭṭhiṃ otāpayamāno nisīdi.
கிங் பன பு³த்³த⁴ரஸ்மியோ மத்³தி³த்வா ஸூரியரஸ்மி அந்தோ பவிஸிதுங் ஸக்கோதீதி? ந ஸக்கோதி. ஏவங் ஸந்தே கிங் தாபேதீதி? ரஸ்மிதேஜங். யதே²வ ஹி டி²தமஜ்ஜ²ன்ஹிகே பரிமண்ட³லாய சா²யாய ருக்க²மூலே நிஸின்னஸ்ஸ கிஞ்சாபி ஸூரியரஸ்மியோ ஸரீரங் ந பு²ஸந்தி, ஸப்³ப³தி³ஸாஸு பன தேஜோ ப²ரதி, அக்³கி³ஜாலாஹி பரிக்கி²த்தோ விய ஹோதி, ஏவங் ஸூரியரஸ்மீஸு பு³த்³த⁴ரஸ்மியோ மத்³தி³த்வா அந்தோ பவிஸிதுங் அஸக்குணந்தீஸுபி ஸத்தா² தேஜங் தாபெந்தோ நிஸின்னோதி வேதி³தப்³போ³.
Kiṃ pana buddharasmiyo madditvā sūriyarasmi anto pavisituṃ sakkotīti? Na sakkoti. Evaṃ sante kiṃ tāpetīti? Rasmitejaṃ. Yatheva hi ṭhitamajjhanhike parimaṇḍalāya chāyāya rukkhamūle nisinnassa kiñcāpi sūriyarasmiyo sarīraṃ na phusanti, sabbadisāsu pana tejo pharati, aggijālāhi parikkhitto viya hoti, evaṃ sūriyarasmīsu buddharasmiyo madditvā anto pavisituṃ asakkuṇantīsupi satthā tejaṃ tāpento nisinnoti veditabbo.
அனோமஜ்ஜந்தோதி பிட்டி²பரிகம்மகரணவஸேன அனுமஜ்ஜந்தோ. அச்ச²ரியங் ப⁴ந்தேதி தே²ரோ ப⁴க³வதோ பிட்டி²தோ மஹாசீவரங் ஓதாரெத்வா நிஸின்னஸ்ஸ த்³வின்னங் அங்ஸகூடானங் அந்தரே ஸுவண்ணாவட்டங் விய கேஸக்³க³ப்பமாணங் வலியாவட்டங் தி³ஸ்வா – ‘‘ஏவரூபேபி நாம ஸரீரே ஜரா பஞ்ஞாயதீ’’தி ஸஞ்ஜாதஸங்வேகோ³ ஜரங் க³ரஹந்தோ ஏவமாஹ. க³ரஹனச்ச²ரியங் நாம கிரேதங்.
Anomajjantoti piṭṭhiparikammakaraṇavasena anumajjanto. Acchariyaṃ bhanteti thero bhagavato piṭṭhito mahācīvaraṃ otāretvā nisinnassa dvinnaṃ aṃsakūṭānaṃ antare suvaṇṇāvaṭṭaṃ viya kesaggappamāṇaṃ valiyāvaṭṭaṃ disvā – ‘‘evarūpepi nāma sarīre jarā paññāyatī’’ti sañjātasaṃvego jaraṃ garahanto evamāha. Garahanacchariyaṃ nāma kiretaṃ.
ந சேவங் தா³னி, ப⁴ந்தே, ப⁴க³வதோ தாவ பரிஸுத்³தோ⁴தி யதா² பகதியா ச²விவண்ணோ பரிஸுத்³தோ⁴, ந ஏவமேதரஹீதி தீ³பெந்தோ ஏவமாஹ. ததா²க³தஸ்ஸ ஹி த³ஹரகாலே ஸங்குஸதஸமப்³பா⁴ஹதங் உஸப⁴சம்மங் விய விஹதவலிகோ காயோ ஹோதி, தஸ்மிங் ட²பிதோ ஹத்தோ² ப⁴ஸ்ஸதேவ, ந ஸந்திட்ட²தி, தேலபுஞ்ச²னாகாரப்பத்தோ விய ஹோதி. மஹல்லககாலே பன ஸிராஜாலா மிலாயந்தி, ஸந்தி⁴பப்³பா³னி ஸிதி²லானி ஹொந்தி, மங்ஸங் அட்டி²தோ முச்சித்வா ஸிதி²லபா⁴வங் ஆபஜ்ஜித்வா தத்த² தத்த² ஓலம்ப³தி. பு³த்³தா⁴னங் பன ஏவரூபங் ந ஹோதி. அஞ்ஞேஸங் அபாகடங், ஸந்திகாவசரத்தா ஆனந்த³த்தே²ரஸ்ஸேவ பாகடங் ஹோதி, தஸ்மா ஏவமாஹ.
Na cevaṃ dāni, bhante, bhagavato tāva parisuddhoti yathā pakatiyā chavivaṇṇo parisuddho, na evametarahīti dīpento evamāha. Tathāgatassa hi daharakāle saṅkusatasamabbhāhataṃ usabhacammaṃ viya vihatavaliko kāyo hoti, tasmiṃ ṭhapito hattho bhassateva, na santiṭṭhati, telapuñchanākārappatto viya hoti. Mahallakakāle pana sirājālā milāyanti, sandhipabbāni sithilāni honti, maṃsaṃ aṭṭhito muccitvā sithilabhāvaṃ āpajjitvā tattha tattha olambati. Buddhānaṃ pana evarūpaṃ na hoti. Aññesaṃ apākaṭaṃ, santikāvacarattā ānandattherasseva pākaṭaṃ hoti, tasmā evamāha.
ஸிதி²லானி ச க³த்தானீதி அஞ்ஞேஸங் முகே² அங்ஸகூடந்தரேஹி தேஸு தேஸு டா²னேஸு வலியோ ஸந்திட்ட²ந்தி, ஸத்து² பனேதங் நத்தி², தே²ரோ ச த்³வின்னங் அங்ஸகூடானங் அந்தரே வலியாவட்டகங் தி³ஸ்வா ஏவமாஹ. ஸப்³பா³னி வலியஜாதானீதி இத³ம்பி அத்தனோ பாகடவஸேன ஏவமாஹ – ஸத்து² பன அஞ்ஞேஸங் விய வலியோ நாம நத்தி². புரதோ பப்³பா⁴ரோ ச காயோதி ஸத்தா² ப்³ரஹ்முஜுக³த்தோ, தே³வனக³ரே ஸமுஸ்ஸிதஸுவண்ணதோரணங் வியஸ்ஸ காயோ உஜுகமேவ உக்³க³தோ. மஹல்லககாலே பன காயோ புரதோ வங்கோ ஹோதி, ஸ்வாயங் அஞ்ஞேஸங் அபாகடோ, ஸந்திகாவசரத்தா பன தே²ரஸ்ஸேவ பாகடோ, தஸ்மா ஏவமாஹ. தி³ஸ்ஸதி ச இந்த்³ரியானங் அஞ்ஞத²த்தந்தி இந்த்³ரியானி நாம ந சக்கு²விஞ்ஞெய்யானி. யதோ பன பகதியா பரிஸுத்³தோ⁴ ச²விவண்ணோ, இதா³னி ந ததா² பரிஸுத்³தோ⁴, அங்ஸகூடந்தரே வலி பஞ்ஞாயதி , ப்³ரஹ்முஜுகாயோ புரதோ வங்கோ, இமினாவ காரணேன சக்கா²தீ³னஞ்ச இந்த்³ரியானங் அஞ்ஞத²த்தேன ப⁴விதப்³ப³ந்தி நயக்³கா³ஹதோ ஏவமாஹ. தீ⁴ தங் ஜம்மி ஜரே அத்தூ²தி லாமகே ஜரே தீ⁴ தங் துய்ஹங் ஹோது, தி⁴க்காரோ தங் பு²ஸது. பி³ம்ப³ந்தி அத்தபா⁴வோ.
Sithilāni ca gattānīti aññesaṃ mukhe aṃsakūṭantarehi tesu tesu ṭhānesu valiyo santiṭṭhanti, satthu panetaṃ natthi, thero ca dvinnaṃ aṃsakūṭānaṃ antare valiyāvaṭṭakaṃ disvā evamāha. Sabbāni valiyajātānīti idampi attano pākaṭavasena evamāha – satthu pana aññesaṃ viya valiyo nāma natthi. Purato pabbhāro ca kāyoti satthā brahmujugatto, devanagare samussitasuvaṇṇatoraṇaṃ viyassa kāyo ujukameva uggato. Mahallakakāle pana kāyo purato vaṅko hoti, svāyaṃ aññesaṃ apākaṭo, santikāvacarattā pana therasseva pākaṭo, tasmā evamāha. Dissati ca indriyānaṃ aññathattanti indriyāni nāma na cakkhuviññeyyāni. Yato pana pakatiyā parisuddho chavivaṇṇo, idāni na tathā parisuddho, aṃsakūṭantare vali paññāyati , brahmujukāyo purato vaṅko, imināva kāraṇena cakkhādīnañca indriyānaṃ aññathattena bhavitabbanti nayaggāhato evamāha. Dhī taṃ jammi jare atthūti lāmake jare dhī taṃ tuyhaṃ hotu, dhikkāro taṃ phusatu. Bimbanti attabhāvo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஜராத⁴ம்மஸுத்தங் • 1. Jarādhammasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ஜராத⁴ம்மஸுத்தவண்ணனா • 1. Jarādhammasuttavaṇṇanā
