| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၅. ဇရာဝဂ္ဂော
5. Jarāvaggo
၁. ဇရာဓမ္မသုတ္တဝဏ္ဏနာ
1. Jarādhammasuttavaṇṇanā
၅၁၁. ပဉ္စမဝဂ္ဂသ္သ ပဌမေ ပစ္ဆာတပေတိ ပာသာဒစ္ဆာယာယ ပုရတ္ထိမဒိသံ ပဋိစ္ဆန္နတ္တာ ပာသာဒသ္သ ပစ္ဆိမဒိသာဘာဂေ အာတပော ဟောတိ, တသ္မိံ ဌာနေ ပညတ္တဝရဗုဒ္ဓာသနေ နိသိန္နောတိ အတ္ထော ။ ပိဋ္ဌိံ ဩတာပယမာနောတိ ယသ္မာ သမ္မာသမ္ဗုဒ္ဓသ္သပိ ဥပာဒိန္နကသရီရေ ဥဏ္ဟကာလေ ဥဏ္ဟံ ဟောတိ, သီတကာလေ သီတံ, အယဉ္စ ဟိမပာတသီတသမယော။ တသ္မာ မဟာစီဝရံ ဩတာရေတ္ဝာ သူရိယရသ္မီဟိ ပိဋ္ဌိံ ဩတာပယမာနော နိသီဒိ။
511. Pañcamavaggassa paṭhame pacchātapeti pāsādacchāyāya puratthimadisaṃ paṭicchannattā pāsādassa pacchimadisābhāge ātapo hoti, tasmiṃ ṭhāne paññattavarabuddhāsane nisinnoti attho . Piṭṭhiṃ otāpayamānoti yasmā sammāsambuddhassapi upādinnakasarīre uṇhakāle uṇhaṃ hoti, sītakāle sītaṃ, ayañca himapātasītasamayo. Tasmā mahācīvaraṃ otāretvā sūriyarasmīhi piṭṭhiṃ otāpayamāno nisīdi.
ကိံ ပန ဗုဒ္ဓရသ္မိယော မဒ္ဒိတ္ဝာ သူရိယရသ္မိ အန္တော ပဝိသိတုံ သက္ကောတီတိ? န သက္ကောတိ။ ဧဝံ သန္တေ ကိံ တာပေတီတိ? ရသ္မိတေဇံ။ ယထေဝ ဟိ ဌိတမဇ္ဈန္ဟိကေ ပရိမဏ္ဍလာယ ဆာယာယ ရုက္ခမူလေ နိသိန္နသ္သ ကိဉ္စာပိ သူရိယရသ္မိယော သရီရံ န ဖုသန္တိ, သဗ္ဗဒိသာသု ပန တေဇော ဖရတိ, အဂ္ဂိဇာလာဟိ ပရိက္ခိတ္တော ဝိယ ဟောတိ, ဧဝံ သူရိယရသ္မီသု ဗုဒ္ဓရသ္မိယော မဒ္ဒိတ္ဝာ အန္တော ပဝိသိတုံ အသက္ကုဏန္တီသုပိ သတ္ထာ တေဇံ တာပေန္တော နိသိန္နောတိ ဝေဒိတဗ္ဗော။
Kiṃ pana buddharasmiyo madditvā sūriyarasmi anto pavisituṃ sakkotīti? Na sakkoti. Evaṃ sante kiṃ tāpetīti? Rasmitejaṃ. Yatheva hi ṭhitamajjhanhike parimaṇḍalāya chāyāya rukkhamūle nisinnassa kiñcāpi sūriyarasmiyo sarīraṃ na phusanti, sabbadisāsu pana tejo pharati, aggijālāhi parikkhitto viya hoti, evaṃ sūriyarasmīsu buddharasmiyo madditvā anto pavisituṃ asakkuṇantīsupi satthā tejaṃ tāpento nisinnoti veditabbo.
အနောမဇ္ဇန္တောတိ ပိဋ္ဌိပရိကမ္မကရဏဝသေန အနုမဇ္ဇန္တော။ အစ္ဆရိယံ ဘန္တေတိ ထေရော ဘဂဝတော ပိဋ္ဌိတော မဟာစီဝရံ ဩတာရေတ္ဝာ နိသိန္နသ္သ ဒ္ဝိန္နံ အံသကူဋာနံ အန္တရေ သုဝဏ္ဏာဝဋ္ဋံ ဝိယ ကေသဂ္ဂပ္ပမာဏံ ဝလိယာဝဋ္ဋံ ဒိသ္ဝာ – ‘‘ဧဝရူပေပိ နာမ သရီရေ ဇရာ ပညာယတီ’’တိ သဉ္ဇာတသံဝေဂော ဇရံ ဂရဟန္တော ဧဝမာဟ။ ဂရဟနစ္ဆရိယံ နာမ ကိရေတံ။
Anomajjantoti piṭṭhiparikammakaraṇavasena anumajjanto. Acchariyaṃ bhanteti thero bhagavato piṭṭhito mahācīvaraṃ otāretvā nisinnassa dvinnaṃ aṃsakūṭānaṃ antare suvaṇṇāvaṭṭaṃ viya kesaggappamāṇaṃ valiyāvaṭṭaṃ disvā – ‘‘evarūpepi nāma sarīre jarā paññāyatī’’ti sañjātasaṃvego jaraṃ garahanto evamāha. Garahanacchariyaṃ nāma kiretaṃ.
န စေဝံ ဒာနိ, ဘန္တေ, ဘဂဝတော တာဝ ပရိသုဒ္ဓောတိ ယထာ ပကတိယာ ဆဝိဝဏ္ဏော ပရိသုဒ္ဓော, န ဧဝမေတရဟီတိ ဒီပေန္တော ဧဝမာဟ။ တထာဂတသ္သ ဟိ ဒဟရကာလေ သင္ကုသတသမဗ္ဘာဟတံ ဥသဘစမ္မံ ဝိယ ဝိဟတဝလိကော ကာယော ဟောတိ, တသ္မိံ ဌပိတော ဟတ္ထော ဘသ္သတေဝ, န သန္တိဋ္ဌတိ, တေလပုဉ္ဆနာကာရပ္ပတ္တော ဝိယ ဟောတိ။ မဟလ္လကကာလေ ပန သိရာဇာလာ မိလာယန္တိ, သန္ဓိပဗ္ဗာနိ သိထိလာနိ ဟောန္တိ, မံသံ အဋ္ဌိတော မုစ္စိတ္ဝာ သိထိလဘာဝံ အာပဇ္ဇိတ္ဝာ တတ္ထ တတ္ထ ဩလမ္ဗတိ။ ဗုဒ္ဓာနံ ပန ဧဝရူပံ န ဟောတိ။ အညေသံ အပာကဋံ, သန္တိကာဝစရတ္တာ အာနန္ဒတ္ထေရသ္သေဝ ပာကဋံ ဟောတိ, တသ္မာ ဧဝမာဟ။
Na cevaṃ dāni, bhante, bhagavato tāva parisuddhoti yathā pakatiyā chavivaṇṇo parisuddho, na evametarahīti dīpento evamāha. Tathāgatassa hi daharakāle saṅkusatasamabbhāhataṃ usabhacammaṃ viya vihatavaliko kāyo hoti, tasmiṃ ṭhapito hattho bhassateva, na santiṭṭhati, telapuñchanākārappatto viya hoti. Mahallakakāle pana sirājālā milāyanti, sandhipabbāni sithilāni honti, maṃsaṃ aṭṭhito muccitvā sithilabhāvaṃ āpajjitvā tattha tattha olambati. Buddhānaṃ pana evarūpaṃ na hoti. Aññesaṃ apākaṭaṃ, santikāvacarattā ānandattherasseva pākaṭaṃ hoti, tasmā evamāha.
သိထိလာနိ စ ဂတ္တာနီတိ အညေသံ မုခေ အံသကူဋန္တရေဟိ တေသု တေသု ဌာနေသု ဝလိယော သန္တိဋ္ဌန္တိ, သတ္ထု ပနေတံ နတ္ထိ, ထေရော စ ဒ္ဝိန္နံ အံသကူဋာနံ အန္တရေ ဝလိယာဝဋ္ဋကံ ဒိသ္ဝာ ဧဝမာဟ။ သဗ္ဗာနိ ဝလိယဇာတာနီတိ ဣဒမ္ပိ အတ္တနော ပာကဋဝသေန ဧဝမာဟ – သတ္ထု ပန အညေသံ ဝိယ ဝလိယော နာမ နတ္ထိ။ ပုရတော ပဗ္ဘာရော စ ကာယောတိ သတ္ထာ ဗ္ရဟ္မုဇုဂတ္တော, ဒေဝနဂရေ သမုသ္သိတသုဝဏ္ဏတောရဏံ ဝိယသ္သ ကာယော ဥဇုကမေဝ ဥဂ္ဂတော။ မဟလ္လကကာလေ ပန ကာယော ပုရတော ဝင္ကော ဟောတိ, သ္ဝာယံ အညေသံ အပာကဋော, သန္တိကာဝစရတ္တာ ပန ထေရသ္သေဝ ပာကဋော, တသ္မာ ဧဝမာဟ။ ဒိသ္သတိ စ ဣန္ဒ္ရိယာနံ အညထတ္တန္တိ ဣန္ဒ္ရိယာနိ နာမ န စက္ခုဝိညေယ္ယာနိ။ ယတော ပန ပကတိယာ ပရိသုဒ္ဓော ဆဝိဝဏ္ဏော, ဣဒာနိ န တထာ ပရိသုဒ္ဓော, အံသကူဋန္တရေ ဝလိ ပညာယတိ , ဗ္ရဟ္မုဇုကာယော ပုရတော ဝင္ကော, ဣမိနာဝ ကာရဏေန စက္ခာဒီနဉ္စ ဣန္ဒ္ရိယာနံ အညထတ္တေန ဘဝိတဗ္ဗန္တိ နယဂ္ဂာဟတော ဧဝမာဟ။ ဓီ တံ ဇမ္မိ ဇရေ အတ္ထူတိ လာမကေ ဇရေ ဓီ တံ တုယ္ဟံ ဟောတု, ဓိက္ကာရော တံ ဖုသတု။ ဗိမ္ဗန္တိ အတ္တဘာဝော။
Sithilāni ca gattānīti aññesaṃ mukhe aṃsakūṭantarehi tesu tesu ṭhānesu valiyo santiṭṭhanti, satthu panetaṃ natthi, thero ca dvinnaṃ aṃsakūṭānaṃ antare valiyāvaṭṭakaṃ disvā evamāha. Sabbāni valiyajātānīti idampi attano pākaṭavasena evamāha – satthu pana aññesaṃ viya valiyo nāma natthi. Purato pabbhāro ca kāyoti satthā brahmujugatto, devanagare samussitasuvaṇṇatoraṇaṃ viyassa kāyo ujukameva uggato. Mahallakakāle pana kāyo purato vaṅko hoti, svāyaṃ aññesaṃ apākaṭo, santikāvacarattā pana therasseva pākaṭo, tasmā evamāha. Dissati ca indriyānaṃ aññathattanti indriyāni nāma na cakkhuviññeyyāni. Yato pana pakatiyā parisuddho chavivaṇṇo, idāni na tathā parisuddho, aṃsakūṭantare vali paññāyati , brahmujukāyo purato vaṅko, imināva kāraṇena cakkhādīnañca indriyānaṃ aññathattena bhavitabbanti nayaggāhato evamāha. Dhī taṃ jammi jare atthūti lāmake jare dhī taṃ tuyhaṃ hotu, dhikkāro taṃ phusatu. Bimbanti attabhāvo.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. ဇရာဓမ္မသုတ္တံ • 1. Jarādhammasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. ဇရာဓမ္မသုတ္တဝဏ္ဏနာ • 1. Jarādhammasuttavaṇṇanā
