| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
8. ஜராமரணங் விபாகோதிகதா²வண்ணனா
8. Jarāmaraṇaṃ vipākotikathāvaṇṇanā
495. இதா³னி ஜராமரணங் விபாகோதிகதா² நாம ஹோதி. தத்த² யேஸங் ‘‘அத்தி² து³ப்³ப³ண்ணஸங்வத்தனியங் கம்மங் அப்பாயுகஸங்வத்தனியங் கம்ம’’ந்தி எத்த² து³ப்³ப³ண்ணதா நாம ஜரா. அப்பாயுகதா நாம மரணங். தங்ஸங்வத்தனியஞ்ச கம்மங் அத்தி². தஸ்மா ஜராமரணங் விபாகோதி லத்³தி⁴, ஸெய்யதா²பி அந்த⁴கானங்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. படிலோமபஞ்ஹே அனாரம்மணந்தி ரூபத⁴ம்மானங் தாவ அனாரம்மணமேவ, அரூபானங் பன ஜராமரணங் ஸம்பயோக³லக்க²ணாபா⁴வா அனாரம்மணமேவ.
495. Idāni jarāmaraṇaṃ vipākotikathā nāma hoti. Tattha yesaṃ ‘‘atthi dubbaṇṇasaṃvattaniyaṃ kammaṃ appāyukasaṃvattaniyaṃ kamma’’nti ettha dubbaṇṇatā nāma jarā. Appāyukatā nāma maraṇaṃ. Taṃsaṃvattaniyañca kammaṃ atthi. Tasmā jarāmaraṇaṃ vipākoti laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Paṭilomapañhe anārammaṇanti rūpadhammānaṃ tāva anārammaṇameva, arūpānaṃ pana jarāmaraṇaṃ sampayogalakkhaṇābhāvā anārammaṇameva.
496. அகுஸலானங் த⁴ம்மானங் ஜராமரணங் அகுஸலானங் த⁴ம்மானங் விபாகோதி பஞ்ஹே ஜராமரணேன நாம அனிட்ட²விபாகேன ப⁴விதப்³ப³ந்தி லத்³தி⁴யா படிஜானாதி . தேனேவ காரணேன குஸலானங் த⁴ம்மானங் ஜராமரணஸ்ஸ குஸலவிபாகதங் படிக்கி²பதி. பரதோ சஸ்ஸ அகுஸலவிபாகதஞ்ஞேவ படிஜானாதி.
496. Akusalānaṃ dhammānaṃ jarāmaraṇaṃ akusalānaṃ dhammānaṃ vipākoti pañhe jarāmaraṇena nāma aniṭṭhavipākena bhavitabbanti laddhiyā paṭijānāti . Teneva kāraṇena kusalānaṃ dhammānaṃ jarāmaraṇassa kusalavipākataṃ paṭikkhipati. Parato cassa akusalavipākataññeva paṭijānāti.
குஸலானஞ்ச அகுஸலானஞ்சாதி புச்சா²வஸேன ஏகதோ கதங், ஏகக்க²ணே பன தங் நத்தி². அப்³யாகதானங் அவிபாகானங் ஜராமரணங் விபாகோதி வத்தப்³ப³தாய பரியாயோ நத்தி², தஸ்மா அப்³யாகதவஸேன புச்சா² ந கதா.
Kusalānañca akusalānañcāti pucchāvasena ekato kataṃ, ekakkhaṇe pana taṃ natthi. Abyākatānaṃ avipākānaṃ jarāmaraṇaṃ vipākoti vattabbatāya pariyāyo natthi, tasmā abyākatavasena pucchā na katā.
497. து³ப்³ப³ண்ணஸங்வத்தனியந்தி எத்த² து³ப்³ப³ண்ணியங் நாம அபரிஸுத்³த⁴வண்ணதா. அப்பாயுகதா நாம ஆயுனோ சிரங் பவத்திதுங் அஸமத்த²தா. தத்த² அகுஸலகம்மங் கம்மஸமுட்டா²னஸ்ஸ து³ப்³ப³ண்ணரூபஸ்ஸ கம்மபச்சயோ ஹோதி, அஸதி³ஸத்தா பனஸ்ஸ தங்விபாகோ ந ஹோதி. உதுஸமுட்டா²னாதி³னோ பன தங்படிலாப⁴வஸேன ஆயுனோ ச உபச்சே²த³கவஸேன பச்சயோ ஹோதி. ஏவமேதங் பரியாயேன தங்ஸங்வத்தனிகங் நாம ஹோதி, ந விபாகப²ஸ்ஸாதீ³னங் விய ஜனகவஸேன, தஸ்மா விபாகபா⁴வே அஸாத⁴கங். ஸேஸமெத்த² ஹெட்டா² வுத்தஸதி³ஸமேவாதி.
497. Dubbaṇṇasaṃvattaniyanti ettha dubbaṇṇiyaṃ nāma aparisuddhavaṇṇatā. Appāyukatā nāma āyuno ciraṃ pavattituṃ asamatthatā. Tattha akusalakammaṃ kammasamuṭṭhānassa dubbaṇṇarūpassa kammapaccayo hoti, asadisattā panassa taṃvipāko na hoti. Utusamuṭṭhānādino pana taṃpaṭilābhavasena āyuno ca upacchedakavasena paccayo hoti. Evametaṃ pariyāyena taṃsaṃvattanikaṃ nāma hoti, na vipākaphassādīnaṃ viya janakavasena, tasmā vipākabhāve asādhakaṃ. Sesamettha heṭṭhā vuttasadisamevāti.
ஜராமரணங் விபாகோதிகதா²வண்ணனா.
Jarāmaraṇaṃ vipākotikathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (70) 8. ஜராமரணங் விபாகோதிகதா² • (70) 8. Jarāmaraṇaṃ vipākotikathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 8. ஜராமரணங்விபாகோதிகதா²வண்ணனா • 8. Jarāmaraṇaṃvipākotikathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 8. ஜராமரணங்விபாகோதிகதா²வண்ணனா • 8. Jarāmaraṇaṃvipākotikathāvaṇṇanā
