| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৮. জরামরণং ৰিপাকোতিকথাৰণ্ণনা
8. Jarāmaraṇaṃ vipākotikathāvaṇṇanā
৪৯৫. ইদানি জরামরণং ৰিপাকোতিকথা নাম হোতি। তত্থ যেসং ‘‘অত্থি দুব্বণ্ণসংৰত্তনিযং কম্মং অপ্পাযুকসংৰত্তনিযং কম্ম’’ন্তি এত্থ দুব্বণ্ণতা নাম জরা। অপ্পাযুকতা নাম মরণং। তংসংৰত্তনিযঞ্চ কম্মং অত্থি। তস্মা জরামরণং ৰিপাকোতি লদ্ধি, সেয্যথাপি অন্ধকানং; তে সন্ধায পুচ্ছা সকৰাদিস্স, পটিঞ্ঞা ইতরস্স। পটিলোমপঞ্হে অনারম্মণন্তি রূপধম্মানং তাৰ অনারম্মণমেৰ, অরূপানং পন জরামরণং সম্পযোগলক্খণাভাৰা অনারম্মণমেৰ।
495. Idāni jarāmaraṇaṃ vipākotikathā nāma hoti. Tattha yesaṃ ‘‘atthi dubbaṇṇasaṃvattaniyaṃ kammaṃ appāyukasaṃvattaniyaṃ kamma’’nti ettha dubbaṇṇatā nāma jarā. Appāyukatā nāma maraṇaṃ. Taṃsaṃvattaniyañca kammaṃ atthi. Tasmā jarāmaraṇaṃ vipākoti laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Paṭilomapañhe anārammaṇanti rūpadhammānaṃ tāva anārammaṇameva, arūpānaṃ pana jarāmaraṇaṃ sampayogalakkhaṇābhāvā anārammaṇameva.
৪৯৬. অকুসলানং ধম্মানং জরামরণং অকুসলানং ধম্মানং ৰিপাকোতি পঞ্হে জরামরণেন নাম অনিট্ঠৰিপাকেন ভৰিতব্বন্তি লদ্ধিযা পটিজানাতি । তেনেৰ কারণেন কুসলানং ধম্মানং জরামরণস্স কুসলৰিপাকতং পটিক্খিপতি। পরতো চস্স অকুসলৰিপাকতঞ্ঞেৰ পটিজানাতি।
496. Akusalānaṃ dhammānaṃ jarāmaraṇaṃ akusalānaṃ dhammānaṃ vipākoti pañhe jarāmaraṇena nāma aniṭṭhavipākena bhavitabbanti laddhiyā paṭijānāti . Teneva kāraṇena kusalānaṃ dhammānaṃ jarāmaraṇassa kusalavipākataṃ paṭikkhipati. Parato cassa akusalavipākataññeva paṭijānāti.
কুসলানঞ্চ অকুসলানঞ্চাতি পুচ্ছাৰসেন একতো কতং, একক্খণে পন তং নত্থি। অব্যাকতানং অৰিপাকানং জরামরণং ৰিপাকোতি ৰত্তব্বতায পরিযাযো নত্থি, তস্মা অব্যাকতৰসেন পুচ্ছা ন কতা।
Kusalānañca akusalānañcāti pucchāvasena ekato kataṃ, ekakkhaṇe pana taṃ natthi. Abyākatānaṃ avipākānaṃ jarāmaraṇaṃ vipākoti vattabbatāya pariyāyo natthi, tasmā abyākatavasena pucchā na katā.
৪৯৭. দুব্বণ্ণসংৰত্তনিযন্তি এত্থ দুব্বণ্ণিযং নাম অপরিসুদ্ধৰণ্ণতা। অপ্পাযুকতা নাম আযুনো চিরং পৰত্তিতুং অসমত্থতা। তত্থ অকুসলকম্মং কম্মসমুট্ঠানস্স দুব্বণ্ণরূপস্স কম্মপচ্চযো হোতি, অসদিসত্তা পনস্স তংৰিপাকো ন হোতি। উতুসমুট্ঠানাদিনো পন তংপটিলাভৰসেন আযুনো চ উপচ্ছেদকৰসেন পচ্চযো হোতি। এৰমেতং পরিযাযেন তংসংৰত্তনিকং নাম হোতি, ন ৰিপাকফস্সাদীনং ৰিয জনকৰসেন, তস্মা ৰিপাকভাৰে অসাধকং। সেসমেত্থ হেট্ঠা ৰুত্তসদিসমেৰাতি।
497. Dubbaṇṇasaṃvattaniyanti ettha dubbaṇṇiyaṃ nāma aparisuddhavaṇṇatā. Appāyukatā nāma āyuno ciraṃ pavattituṃ asamatthatā. Tattha akusalakammaṃ kammasamuṭṭhānassa dubbaṇṇarūpassa kammapaccayo hoti, asadisattā panassa taṃvipāko na hoti. Utusamuṭṭhānādino pana taṃpaṭilābhavasena āyuno ca upacchedakavasena paccayo hoti. Evametaṃ pariyāyena taṃsaṃvattanikaṃ nāma hoti, na vipākaphassādīnaṃ viya janakavasena, tasmā vipākabhāve asādhakaṃ. Sesamettha heṭṭhā vuttasadisamevāti.
জরামরণং ৰিপাকোতিকথাৰণ্ণনা।
Jarāmaraṇaṃ vipākotikathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৭০) ৮. জরামরণং ৰিপাকোতিকথা • (70) 8. Jarāmaraṇaṃ vipākotikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৮. জরামরণংৰিপাকোতিকথাৰণ্ণনা • 8. Jarāmaraṇaṃvipākotikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৮. জরামরণংৰিপাকোতিকথাৰণ্ণনা • 8. Jarāmaraṇaṃvipākotikathāvaṇṇanā
