| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೮. ಜರಾಮರಣಂ ವಿಪಾಕೋತಿಕಥಾವಣ್ಣನಾ
8. Jarāmaraṇaṃ vipākotikathāvaṇṇanā
೪೯೫. ಇದಾನಿ ಜರಾಮರಣಂ ವಿಪಾಕೋತಿಕಥಾ ನಾಮ ಹೋತಿ। ತತ್ಥ ಯೇಸಂ ‘‘ಅತ್ಥಿ ದುಬ್ಬಣ್ಣಸಂವತ್ತನಿಯಂ ಕಮ್ಮಂ ಅಪ್ಪಾಯುಕಸಂವತ್ತನಿಯಂ ಕಮ್ಮ’’ನ್ತಿ ಏತ್ಥ ದುಬ್ಬಣ್ಣತಾ ನಾಮ ಜರಾ। ಅಪ್ಪಾಯುಕತಾ ನಾಮ ಮರಣಂ। ತಂಸಂವತ್ತನಿಯಞ್ಚ ಕಮ್ಮಂ ಅತ್ಥಿ। ತಸ್ಮಾ ಜರಾಮರಣಂ ವಿಪಾಕೋತಿ ಲದ್ಧಿ, ಸೇಯ್ಯಥಾಪಿ ಅನ್ಧಕಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ಪಟಿಲೋಮಪಞ್ಹೇ ಅನಾರಮ್ಮಣನ್ತಿ ರೂಪಧಮ್ಮಾನಂ ತಾವ ಅನಾರಮ್ಮಣಮೇವ, ಅರೂಪಾನಂ ಪನ ಜರಾಮರಣಂ ಸಮ್ಪಯೋಗಲಕ್ಖಣಾಭಾವಾ ಅನಾರಮ್ಮಣಮೇವ।
495. Idāni jarāmaraṇaṃ vipākotikathā nāma hoti. Tattha yesaṃ ‘‘atthi dubbaṇṇasaṃvattaniyaṃ kammaṃ appāyukasaṃvattaniyaṃ kamma’’nti ettha dubbaṇṇatā nāma jarā. Appāyukatā nāma maraṇaṃ. Taṃsaṃvattaniyañca kammaṃ atthi. Tasmā jarāmaraṇaṃ vipākoti laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Paṭilomapañhe anārammaṇanti rūpadhammānaṃ tāva anārammaṇameva, arūpānaṃ pana jarāmaraṇaṃ sampayogalakkhaṇābhāvā anārammaṇameva.
೪೯೬. ಅಕುಸಲಾನಂ ಧಮ್ಮಾನಂ ಜರಾಮರಣಂ ಅಕುಸಲಾನಂ ಧಮ್ಮಾನಂ ವಿಪಾಕೋತಿ ಪಞ್ಹೇ ಜರಾಮರಣೇನ ನಾಮ ಅನಿಟ್ಠವಿಪಾಕೇನ ಭವಿತಬ್ಬನ್ತಿ ಲದ್ಧಿಯಾ ಪಟಿಜಾನಾತಿ । ತೇನೇವ ಕಾರಣೇನ ಕುಸಲಾನಂ ಧಮ್ಮಾನಂ ಜರಾಮರಣಸ್ಸ ಕುಸಲವಿಪಾಕತಂ ಪಟಿಕ್ಖಿಪತಿ। ಪರತೋ ಚಸ್ಸ ಅಕುಸಲವಿಪಾಕತಞ್ಞೇವ ಪಟಿಜಾನಾತಿ।
496. Akusalānaṃ dhammānaṃ jarāmaraṇaṃ akusalānaṃ dhammānaṃ vipākoti pañhe jarāmaraṇena nāma aniṭṭhavipākena bhavitabbanti laddhiyā paṭijānāti . Teneva kāraṇena kusalānaṃ dhammānaṃ jarāmaraṇassa kusalavipākataṃ paṭikkhipati. Parato cassa akusalavipākataññeva paṭijānāti.
ಕುಸಲಾನಞ್ಚ ಅಕುಸಲಾನಞ್ಚಾತಿ ಪುಚ್ಛಾವಸೇನ ಏಕತೋ ಕತಂ, ಏಕಕ್ಖಣೇ ಪನ ತಂ ನತ್ಥಿ। ಅಬ್ಯಾಕತಾನಂ ಅವಿಪಾಕಾನಂ ಜರಾಮರಣಂ ವಿಪಾಕೋತಿ ವತ್ತಬ್ಬತಾಯ ಪರಿಯಾಯೋ ನತ್ಥಿ, ತಸ್ಮಾ ಅಬ್ಯಾಕತವಸೇನ ಪುಚ್ಛಾ ನ ಕತಾ।
Kusalānañca akusalānañcāti pucchāvasena ekato kataṃ, ekakkhaṇe pana taṃ natthi. Abyākatānaṃ avipākānaṃ jarāmaraṇaṃ vipākoti vattabbatāya pariyāyo natthi, tasmā abyākatavasena pucchā na katā.
೪೯೭. ದುಬ್ಬಣ್ಣಸಂವತ್ತನಿಯನ್ತಿ ಏತ್ಥ ದುಬ್ಬಣ್ಣಿಯಂ ನಾಮ ಅಪರಿಸುದ್ಧವಣ್ಣತಾ। ಅಪ್ಪಾಯುಕತಾ ನಾಮ ಆಯುನೋ ಚಿರಂ ಪವತ್ತಿತುಂ ಅಸಮತ್ಥತಾ। ತತ್ಥ ಅಕುಸಲಕಮ್ಮಂ ಕಮ್ಮಸಮುಟ್ಠಾನಸ್ಸ ದುಬ್ಬಣ್ಣರೂಪಸ್ಸ ಕಮ್ಮಪಚ್ಚಯೋ ಹೋತಿ, ಅಸದಿಸತ್ತಾ ಪನಸ್ಸ ತಂವಿಪಾಕೋ ನ ಹೋತಿ। ಉತುಸಮುಟ್ಠಾನಾದಿನೋ ಪನ ತಂಪಟಿಲಾಭವಸೇನ ಆಯುನೋ ಚ ಉಪಚ್ಛೇದಕವಸೇನ ಪಚ್ಚಯೋ ಹೋತಿ। ಏವಮೇತಂ ಪರಿಯಾಯೇನ ತಂಸಂವತ್ತನಿಕಂ ನಾಮ ಹೋತಿ, ನ ವಿಪಾಕಫಸ್ಸಾದೀನಂ ವಿಯ ಜನಕವಸೇನ, ತಸ್ಮಾ ವಿಪಾಕಭಾವೇ ಅಸಾಧಕಂ। ಸೇಸಮೇತ್ಥ ಹೇಟ್ಠಾ ವುತ್ತಸದಿಸಮೇವಾತಿ।
497. Dubbaṇṇasaṃvattaniyanti ettha dubbaṇṇiyaṃ nāma aparisuddhavaṇṇatā. Appāyukatā nāma āyuno ciraṃ pavattituṃ asamatthatā. Tattha akusalakammaṃ kammasamuṭṭhānassa dubbaṇṇarūpassa kammapaccayo hoti, asadisattā panassa taṃvipāko na hoti. Utusamuṭṭhānādino pana taṃpaṭilābhavasena āyuno ca upacchedakavasena paccayo hoti. Evametaṃ pariyāyena taṃsaṃvattanikaṃ nāma hoti, na vipākaphassādīnaṃ viya janakavasena, tasmā vipākabhāve asādhakaṃ. Sesamettha heṭṭhā vuttasadisamevāti.
ಜರಾಮರಣಂ ವಿಪಾಕೋತಿಕಥಾವಣ್ಣನಾ।
Jarāmaraṇaṃ vipākotikathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೭೦) ೮. ಜರಾಮರಣಂ ವಿಪಾಕೋತಿಕಥಾ • (70) 8. Jarāmaraṇaṃ vipākotikathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೮. ಜರಾಮರಣಂವಿಪಾಕೋತಿಕಥಾವಣ್ಣನಾ • 8. Jarāmaraṇaṃvipākotikathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೮. ಜರಾಮರಣಂವಿಪಾಕೋತಿಕಥಾವಣ್ಣನಾ • 8. Jarāmaraṇaṃvipākotikathāvaṇṇanā
