| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. জরামরণসুত্তং
3. Jarāmaraṇasuttaṃ
১১৪. সাৰত্থিনিদানং । একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘অত্থি নু খো, ভন্তে, জাতস্স অঞ্ঞত্র জরামরণা’’তি? ‘‘নত্থি খো, মহারাজ, জাতস্স অঞ্ঞত্র জরামরণা। যেপি তে, মহারাজ, খত্তিযমহাসালা অড্ঢা মহদ্ধনা মহাভোগা পহূতজাতরূপরজতা পহূতৰিত্তূপকরণা পহূতধনধঞ্ঞা, তেসম্পি জাতানং নত্থি অঞ্ঞত্র জরামরণা। যেপি তে, মহারাজ, ব্রাহ্মণমহাসালা…পে॰… গহপতিমহাসালা অড্ঢা মহদ্ধনা মহাভোগা পহূতজাতরূপরজতা পহূতৰিত্তূপকরণা পহূতধনধঞ্ঞা, তেসম্পি জাতানং নত্থি অঞ্ঞত্র জরামরণা। যেপি তে, মহারাজ, ভিক্খূ অরহন্তো খীণাসৰা ৰুসিতৰন্তো কতকরণীযা ওহিতভারা অনুপ্পত্তসদত্থা পরিক্খীণভৰসংযোজনা সম্মদঞ্ঞাৰিমুত্তা, তেসং পাযং কাযো ভেদনধম্মো নিক্খেপনধম্মো’’তি। ইদমৰোচ…পে॰…
114. Sāvatthinidānaṃ . Ekamantaṃ nisinno kho rājā pasenadi kosalo bhagavantaṃ etadavoca – ‘‘atthi nu kho, bhante, jātassa aññatra jarāmaraṇā’’ti? ‘‘Natthi kho, mahārāja, jātassa aññatra jarāmaraṇā. Yepi te, mahārāja, khattiyamahāsālā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā, tesampi jātānaṃ natthi aññatra jarāmaraṇā. Yepi te, mahārāja, brāhmaṇamahāsālā…pe… gahapatimahāsālā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā, tesampi jātānaṃ natthi aññatra jarāmaraṇā. Yepi te, mahārāja, bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṃyojanā sammadaññāvimuttā, tesaṃ pāyaṃ kāyo bhedanadhammo nikkhepanadhammo’’ti. Idamavoca…pe…
‘‘জীরন্তি ৰে রাজরথা সুচিত্তা,
‘‘Jīranti ve rājarathā sucittā,
অথো সরীরম্পি জরং উপেতি।
Atho sarīrampi jaraṃ upeti;
সতঞ্চ ধম্মো ন জরং উপেতি,
Satañca dhammo na jaraṃ upeti,
সন্তো হৰে সব্ভি পৰেদযন্তী’’তি॥
Santo have sabbhi pavedayantī’’ti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. জরামরণসুত্তৰণ্ণনা • 3. Jarāmaraṇasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. জরামরণসুত্তৰণ্ণনা • 3. Jarāmaraṇasuttavaṇṇanā
