| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. ජරාමරණසුත්‌තං
3. Jarāmaraṇasuttaṃ
114. සාවත්‌ථිනිදානං . එකමන්‌තං නිසින්‌නො ඛො රාජා පසෙනදි කොසලො භගවන්‌තං එතදවොච – ‘‘අත්‌ථි නු ඛො, භන්‌තෙ, ජාතස්‌ස අඤ්‌ඤත්‍ර ජරාමරණා’’ති? ‘‘නත්‌ථි ඛො, මහාරාජ, ජාතස්‌ස අඤ්‌ඤත්‍ර ජරාමරණා. යෙපි තෙ, මහාරාජ, ඛත්‌තියමහාසාලා අඩ්‌ඪා මහද්‌ධනා මහාභොගා පහූතජාතරූපරජතා පහූතවිත්‌තූපකරණා පහූතධනධඤ්‌ඤා, තෙසම්‌පි ජාතානං නත්‌ථි අඤ්‌ඤත්‍ර ජරාමරණා. යෙපි තෙ, මහාරාජ, බ්‍රාහ්‌මණමහාසාලා…පෙ.… ගහපතිමහාසාලා අඩ්‌ඪා මහද්‌ධනා මහාභොගා පහූතජාතරූපරජතා පහූතවිත්‌තූපකරණා පහූතධනධඤ්‌ඤා, තෙසම්‌පි ජාතානං නත්‌ථි අඤ්‌ඤත්‍ර ජරාමරණා. යෙපි තෙ, මහාරාජ, භික්‌ඛූ අරහන්‌තො ඛීණාසවා වුසිතවන්‌තො කතකරණීයා ඔහිතභාරා අනුප්‌පත්‌තසදත්‌ථා පරික්‌ඛීණභවසංයොජනා සම්‌මදඤ්‌ඤාවිමුත්‌තා, තෙසං පායං කායො භෙදනධම්‌මො නික්‌ඛෙපනධම්‌මො’’ති. ඉදමවොච…පෙ.…
114. Sāvatthinidānaṃ . Ekamantaṃ nisinno kho rājā pasenadi kosalo bhagavantaṃ etadavoca – ‘‘atthi nu kho, bhante, jātassa aññatra jarāmaraṇā’’ti? ‘‘Natthi kho, mahārāja, jātassa aññatra jarāmaraṇā. Yepi te, mahārāja, khattiyamahāsālā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā, tesampi jātānaṃ natthi aññatra jarāmaraṇā. Yepi te, mahārāja, brāhmaṇamahāsālā…pe… gahapatimahāsālā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā, tesampi jātānaṃ natthi aññatra jarāmaraṇā. Yepi te, mahārāja, bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṃyojanā sammadaññāvimuttā, tesaṃ pāyaṃ kāyo bhedanadhammo nikkhepanadhammo’’ti. Idamavoca…pe…
‘‘ජීරන්‌ති වෙ රාජරථා සුචිත්‌තා,
‘‘Jīranti ve rājarathā sucittā,
අථො සරීරම්‌පි ජරං උපෙති;
Atho sarīrampi jaraṃ upeti;
සතඤ්‌ච ධම්‌මො න ජරං උපෙති,
Satañca dhammo na jaraṃ upeti,
සන්‌තො හවෙ සබ්‌භි පවෙදයන්‌තී’’ති.
Santo have sabbhi pavedayantī’’ti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3. ජරාමරණසුත්‌තවණ්‌ණනා • 3. Jarāmaraṇasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3. ජරාමරණසුත්‌තවණ්‌ණනා • 3. Jarāmaraṇasuttavaṇṇanā
