| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༣. ཛརཱམརཎསུཏྟཾ
3. Jarāmaraṇasuttaṃ
༡༡༤. སཱཝཏྠིནིདཱནཾ ། ཨེཀམནྟཾ ནིསིནྣོ ཁོ རཱཛཱ པསེནདི ཀོསལོ བྷགཝནྟཾ ཨེཏདཝོཙ – ‘‘ཨཏྠི ནུ ཁོ, བྷནྟེ, ཛཱཏསྶ ཨཉྙཏྲ ཛརཱམརཎཱ’’ཏི? ‘‘ནཏྠི ཁོ, མཧཱརཱཛ, ཛཱཏསྶ ཨཉྙཏྲ ཛརཱམརཎཱ། ཡེཔི ཏེ, མཧཱརཱཛ, ཁཏྟིཡམཧཱསཱལཱ ཨཌྜྷཱ མཧདྡྷནཱ མཧཱབྷོགཱ པཧཱུཏཛཱཏརཱུཔརཛཏཱ པཧཱུཏཝིཏྟཱུཔཀརཎཱ པཧཱུཏདྷནདྷཉྙཱ, ཏེསམྤི ཛཱཏཱནཾ ནཏྠི ཨཉྙཏྲ ཛརཱམརཎཱ། ཡེཔི ཏེ, མཧཱརཱཛ, བྲཱཧྨཎམཧཱསཱལཱ…པེ॰… གཧཔཏིམཧཱསཱལཱ ཨཌྜྷཱ མཧདྡྷནཱ མཧཱབྷོགཱ པཧཱུཏཛཱཏརཱུཔརཛཏཱ པཧཱུཏཝིཏྟཱུཔཀརཎཱ པཧཱུཏདྷནདྷཉྙཱ, ཏེསམྤི ཛཱཏཱནཾ ནཏྠི ཨཉྙཏྲ ཛརཱམརཎཱ། ཡེཔི ཏེ, མཧཱརཱཛ, བྷིཀྑཱུ ཨརཧནྟོ ཁཱིཎཱསཝཱ ཝུསིཏཝནྟོ ཀཏཀརཎཱིཡཱ ཨོཧིཏབྷཱརཱ ཨནུཔྤཏྟསདཏྠཱ པརིཀྑཱིཎབྷཝསཾཡོཛནཱ སམྨདཉྙཱཝིམུཏྟཱ, ཏེསཾ པཱཡཾ ཀཱཡོ བྷེདནདྷམྨོ ནིཀྑེཔནདྷམྨོ’’ཏི། ཨིདམཝོཙ…པེ॰…
114. Sāvatthinidānaṃ . Ekamantaṃ nisinno kho rājā pasenadi kosalo bhagavantaṃ etadavoca – ‘‘atthi nu kho, bhante, jātassa aññatra jarāmaraṇā’’ti? ‘‘Natthi kho, mahārāja, jātassa aññatra jarāmaraṇā. Yepi te, mahārāja, khattiyamahāsālā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā, tesampi jātānaṃ natthi aññatra jarāmaraṇā. Yepi te, mahārāja, brāhmaṇamahāsālā…pe… gahapatimahāsālā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā, tesampi jātānaṃ natthi aññatra jarāmaraṇā. Yepi te, mahārāja, bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṃyojanā sammadaññāvimuttā, tesaṃ pāyaṃ kāyo bhedanadhammo nikkhepanadhammo’’ti. Idamavoca…pe…
‘‘ཛཱིརནྟི ཝེ རཱཛརཐཱ སུཙིཏྟཱ,
‘‘Jīranti ve rājarathā sucittā,
ཨཐོ སརཱིརམྤི ཛརཾ ཨུཔེཏི།
Atho sarīrampi jaraṃ upeti;
སཏཉྩ དྷམྨོ ན ཛརཾ ཨུཔེཏི,
Satañca dhammo na jaraṃ upeti,
སནྟོ ཧཝེ སབྦྷི པཝེདཡནྟཱི’’ཏི༎
Santo have sabbhi pavedayantī’’ti.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༣. ཛརཱམརཎསུཏྟཝཎྞནཱ • 3. Jarāmaraṇasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༣. ཛརཱམརཎསུཏྟཝཎྞནཱ • 3. Jarāmaraṇasuttavaṇṇanā
