| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. ஜராமரணஸுத்தவண்ணனா
3. Jarāmaraṇasuttavaṇṇanā
114. ததியே அஞ்ஞத்ர ஜராமரணாதி ஜராமரணதோ முத்தோ நாம அத்தீ²தி வுச்சதி. க²த்தியமஹாஸாலாதி க²த்தியமஹாஸாலா நாம மஹாஸாரப்பத்தா க²த்தியா. யேஸங் ஹி க²த்தியானங் ஹெட்டி²மந்தேன கோடிஸதங் நிதா⁴னக³தங் ஹோதி, தயோ கஹாபணகும்பா⁴ வலஞ்ஜனத்தா²ய கே³ஹமஜ்ஜே² ராஸிங் கத்வா ட²பிதா ஹொந்தி, தே க²த்தியமஹாஸாலா நாம. யேஸங் ப்³ராஹ்மணானங் அஸீதிகோடித⁴னங் நிஹிதங் ஹோதி, தி³யட்³டோ⁴ கஹாபணகும்போ⁴ வலஞ்ஜனத்தா²ய கே³ஹமஜ்ஜே² ராஸிங் கத்வா ட²பிதோ ஹோதி, தே ப்³ராஹ்மணமஹாஸாலா நாம. யேஸங் க³ஹபதீனங் சத்தாலீஸகோடித⁴னங் நிஹிதங் ஹோதி, கஹாபணகும்போ⁴ வலஞ்ஜனத்தா²ய கே³ஹமஜ்ஜே² ராஸிங் கத்வா ட²பிதோ ஹோதி, தே க³ஹபதிமஹாஸாலா நாம.
114. Tatiye aññatra jarāmaraṇāti jarāmaraṇato mutto nāma atthīti vuccati. Khattiyamahāsālāti khattiyamahāsālā nāma mahāsārappattā khattiyā. Yesaṃ hi khattiyānaṃ heṭṭhimantena koṭisataṃ nidhānagataṃ hoti, tayo kahāpaṇakumbhā valañjanatthāya gehamajjhe rāsiṃ katvā ṭhapitā honti, te khattiyamahāsālā nāma. Yesaṃ brāhmaṇānaṃ asītikoṭidhanaṃ nihitaṃ hoti, diyaḍḍho kahāpaṇakumbho valañjanatthāya gehamajjhe rāsiṃ katvā ṭhapito hoti, te brāhmaṇamahāsālā nāma. Yesaṃ gahapatīnaṃ cattālīsakoṭidhanaṃ nihitaṃ hoti, kahāpaṇakumbho valañjanatthāya gehamajjhe rāsiṃ katvā ṭhapito hoti, te gahapatimahāsālā nāma.
அட்³டா⁴தி இஸ்ஸரா. நிதா⁴னக³தத⁴னஸ்ஸ மஹந்ததாய மஹத்³த⁴னா. ஸுவண்ணரஜதபா⁴ஜனாதீ³னங் உபபோ⁴க³ப⁴ண்டா³னங் மஹந்ததாய மஹாபோ⁴கா³. அனிதா⁴னக³தஸ்ஸ ஜாதரூபரஜதஸ்ஸ பஹூததாய, பஹூதஜாதரூபரஜதா . வித்தூபகரணஸ்ஸ துட்டி²கரணஸ்ஸ பஹூததாய பஹூதவித்தூபகரணா. கோ³த⁴னாதீ³னஞ்ச ஸத்தவித⁴த⁴ஞ்ஞானஞ்ச பஹூததாய பஹூதத⁴னத⁴ஞ்ஞா. தேஸம்பி ஜாதானங் நத்தி² அஞ்ஞத்ர ஜராமரணாதி தேஸம்பி ஏவங் இஸ்ஸரானங் ஜாதானங் நிப்³ப³த்தானங் நத்தி² அஞ்ஞத்ர ஜராமரணா, ஜாதத்தாயேவ ஜராமரணதோ மொக்கோ² நாம நத்தி², அந்தோஜராமரணேயேவ ஹோதி.
Aḍḍhāti issarā. Nidhānagatadhanassa mahantatāya mahaddhanā. Suvaṇṇarajatabhājanādīnaṃ upabhogabhaṇḍānaṃ mahantatāya mahābhogā. Anidhānagatassa jātarūparajatassa pahūtatāya, pahūtajātarūparajatā. Vittūpakaraṇassa tuṭṭhikaraṇassa pahūtatāya pahūtavittūpakaraṇā. Godhanādīnañca sattavidhadhaññānañca pahūtatāya pahūtadhanadhaññā. Tesampi jātānaṃ natthi aññatra jarāmaraṇāti tesampi evaṃ issarānaṃ jātānaṃ nibbattānaṃ natthi aññatra jarāmaraṇā, jātattāyeva jarāmaraṇato mokkho nāma natthi, antojarāmaraṇeyeva hoti.
அரஹந்தோதிஆதீ³ஸு ஆரகா கிலேஸேஹீதி அரஹந்தோ. கீ²ணா ஏதேஸங் சத்தாரோ ஆஸவாதி கீ²ணாஸவா. ப்³ரஹ்மசரியவாஸங் வுட்டா² பரினிட்டி²தவாஸாதி வுஸிதவந்தோ. சதூஹி மக்³கே³ஹி கரணீயங் ஏதேஸங் கதந்தி கதகரணீயா. க²ந்த⁴பா⁴ரோ கிலேஸபா⁴ரோ அபி⁴ஸங்கா²ரபா⁴ரோ காமகு³ணபா⁴ரோதி, இமே ஓஹிதா பா⁴ரா ஏதேஸந்தி ஓஹிதபா⁴ரா. அனுப்பத்தோ அரஹத்தஸங்கா²தோ ஸகோ அத்தோ² ஏதேஸந்தி அனுப்பத்தஸத³த்தா². த³ஸவித⁴ம்பி பரிக்கீ²ணங் ப⁴வஸங்யோஜனங் ஏதேஸந்தி பரிக்கீ²ணப⁴வஸங்யோஜனா. ஸம்மா காரணேஹி ஜானித்வா விமுத்தாதி ஸம்மத³ஞ்ஞாவிமுத்தா. மக்³க³பஞ்ஞாய சதுஸச்சத⁴ம்மங் ஞத்வா ப²லவிமுத்தியா விமுத்தாதி அத்தோ². பே⁴த³னத⁴ம்மோதி பி⁴ஜ்ஜனஸபா⁴வோ. நிக்கே²பனத⁴ம்மோதி நிக்கி²பிதப்³ப³ஸபா⁴வோ. கீ²ணாஸவஸ்ஸ ஹி அஜீரணத⁴ம்மோபி அத்தி², ஆரம்மணதோ படிவித்³த⁴ங் நிப்³பா³னங், தங் ஹி ந ஜீரதி. இத⁴ பனஸ்ஸ ஜீரணத⁴ம்மங் த³ஸ்ஸெந்தோ ஏவமாஹ. அத்து²ப்பத்திகோ கிரஸ்ஸ ஸுத்தஸ்ஸ நிக்கே²போ. ஸிவிகஸாலாய நிஸீதி³த்வா கதி²தந்தி வத³ந்தி. தத்த² ப⁴க³வா சித்ரானி ரத²யானாதீ³னி தி³ஸ்வா தி³ட்ட²மேவ உபமங் கத்வா, ‘‘ஜீரந்தி வே ராஜரதா²’’தி கா³த²மாஹ.
Arahantotiādīsu ārakā kilesehīti arahanto. Khīṇā etesaṃ cattāro āsavāti khīṇāsavā. Brahmacariyavāsaṃ vuṭṭhā pariniṭṭhitavāsāti vusitavanto. Catūhi maggehi karaṇīyaṃ etesaṃ katanti katakaraṇīyā. Khandhabhāro kilesabhāro abhisaṅkhārabhāro kāmaguṇabhāroti, ime ohitā bhārā etesanti ohitabhārā. Anuppatto arahattasaṅkhāto sako attho etesanti anuppattasadatthā. Dasavidhampi parikkhīṇaṃ bhavasaṃyojanaṃ etesanti parikkhīṇabhavasaṃyojanā. Sammā kāraṇehi jānitvā vimuttāti sammadaññāvimuttā. Maggapaññāya catusaccadhammaṃ ñatvā phalavimuttiyā vimuttāti attho. Bhedanadhammoti bhijjanasabhāvo. Nikkhepanadhammoti nikkhipitabbasabhāvo. Khīṇāsavassa hi ajīraṇadhammopi atthi, ārammaṇato paṭividdhaṃ nibbānaṃ, taṃ hi na jīrati. Idha panassa jīraṇadhammaṃ dassento evamāha. Atthuppattiko kirassa suttassa nikkhepo. Sivikasālāya nisīditvā kathitanti vadanti. Tattha bhagavā citrāni rathayānādīni disvā diṭṭhameva upamaṃ katvā, ‘‘jīranti ve rājarathā’’ti gāthamāha.
தத்த² ஜீரந்தீதி ஜரங் பாபுணந்தி. ராஜரதா²தி ரஞ்ஞோ அபி⁴ரூஹனரதா². ஸுசித்தாதி ஸுவண்ணரஜதாதீ³ஹி ஸுட்டு² சித்திதா. அதோ² ஸரீரம்பி ஜரங் உபேதீதி ஏவரூபேஸு அனுபாதி³ண்ணகேஸு ஸாரதா³ருமயேஸு ரதே²ஸு ஜீரந்தேஸு இமஸ்மிங் அஜ்ஜ²த்திகே உபாதி³ண்ணகே மங்ஸலோஹிதாதி³மயே ஸரீரே கிங் வத்தப்³ப³ங்? ஸரீரம்பி ஜரங் உபேதியேவாதி அத்தோ². ஸந்தோ ஹவே ஸப்³பி⁴ பவேத³யந்தீதி ஸந்தோ ஸப்³பீ⁴ஹி ஸத்³தி⁴ங் ஸதங் த⁴ம்மோ ந ஜரங் உபேதீதி ஏவங் பவேத³யந்தி. ‘‘ஸதங் த⁴ம்மோ நாம நிப்³பா³னங், தங் ந ஜீரதி, அஜரங் அமதந்தி ஏவங் கதெ²ந்தீ’’தி அத்தோ². யஸ்மா வா நிப்³பா³னங் ஆக³ம்ம ஸீத³னஸபா⁴வா கிலேஸா பி⁴ஜ்ஜந்தி, தஸ்மா தங் ஸப்³பீ⁴தி வுச்சதி. இதி புரிமபத³ஸ்ஸ காரணங் த³ஸ்ஸெந்தோ ‘‘ஸந்தோ ஹவே ஸப்³பி⁴ பவேத³யந்தீ’’தி ஆஹ. இத³ங் ஹி வுத்தங் ஹோதி – ஸதங் த⁴ம்மோ ந ஜரங் உபேதி, தஸ்மா ஸந்தோ ஸப்³பி⁴ பவேத³யந்தி. அஜரங் நிப்³பா³னங் ஸதங் த⁴ம்மோதி ஆசிக்க²ந்தீதி அத்தோ². ஸுந்த³ராதி⁴வசனங் வா ஏதங் ஸப்³பீ⁴தி. யங் ஸப்³பி⁴த⁴ம்மபூ⁴தங் நிப்³பா³னங் ஸந்தோ பவேத³யந்தி கத²யந்தி, ஸோ ஸதங் த⁴ம்மோ ந ஜரங் உபேதீதிபி அத்தோ². ததியங்.
Tattha jīrantīti jaraṃ pāpuṇanti. Rājarathāti rañño abhirūhanarathā. Sucittāti suvaṇṇarajatādīhi suṭṭhu cittitā. Atho sarīrampi jaraṃ upetīti evarūpesu anupādiṇṇakesu sāradārumayesu rathesu jīrantesu imasmiṃ ajjhattike upādiṇṇake maṃsalohitādimaye sarīre kiṃ vattabbaṃ? Sarīrampi jaraṃ upetiyevāti attho. Santo have sabbhi pavedayantīti santo sabbhīhi saddhiṃ sataṃ dhammo na jaraṃ upetīti evaṃ pavedayanti. ‘‘Sataṃ dhammo nāma nibbānaṃ, taṃ na jīrati, ajaraṃ amatanti evaṃ kathentī’’ti attho. Yasmā vā nibbānaṃ āgamma sīdanasabhāvā kilesā bhijjanti, tasmā taṃ sabbhīti vuccati. Iti purimapadassa kāraṇaṃ dassento ‘‘santo have sabbhi pavedayantī’’ti āha. Idaṃ hi vuttaṃ hoti – sataṃ dhammo na jaraṃ upeti, tasmā santo sabbhi pavedayanti. Ajaraṃ nibbānaṃ sataṃ dhammoti ācikkhantīti attho. Sundarādhivacanaṃ vā etaṃ sabbhīti. Yaṃ sabbhidhammabhūtaṃ nibbānaṃ santo pavedayanti kathayanti, so sataṃ dhammo na jaraṃ upetītipi attho. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. ஜராமரணஸுத்தங் • 3. Jarāmaraṇasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. ஜராமரணஸுத்தவண்ணனா • 3. Jarāmaraṇasuttavaṇṇanā
