| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৬. জরাৰগ্গো
6. Jarāvaggo
১. জরাসুত্তৰণ্ণনা
1. Jarāsuttavaṇṇanā
৫১. জরাৰগ্গস্স পঠমে সাধূতি লদ্ধকং ভদ্দকং। সীলং যাৰ জরাতি ইমিনা ইদং দস্সেতি – যথা মুত্তামণিরত্তৰত্থাদীনি আভরণানি তরুণকালেযেৰ সোভন্তি, জরাজিণ্ণকালে তানি ধারেন্তো ‘‘অযং অজ্জাপি বালভাৰং পত্থেতি, উম্মত্তকো মঞ্ঞে’’তি ৰত্তব্বতং আপজ্জতি , ন এৰং সীলং। সীলঞ্হি নিচ্চকালং সোভতি। বালকালেপি হি সীলং রক্খন্তং ‘‘কিং ইমস্স সীলেনা’’তি? ৰত্তারো নত্থি। মজ্ঝিমকালেপি মহল্লককালেপীতি।
51. Jarāvaggassa paṭhame sādhūti laddhakaṃ bhaddakaṃ. Sīlaṃ yāva jarāti iminā idaṃ dasseti – yathā muttāmaṇirattavatthādīni ābharaṇāni taruṇakāleyeva sobhanti, jarājiṇṇakāle tāni dhārento ‘‘ayaṃ ajjāpi bālabhāvaṃ pattheti, ummattako maññe’’ti vattabbataṃ āpajjati , na evaṃ sīlaṃ. Sīlañhi niccakālaṃ sobhati. Bālakālepi hi sīlaṃ rakkhantaṃ ‘‘kiṃ imassa sīlenā’’ti? Vattāro natthi. Majjhimakālepi mahallakakālepīti.
সদ্ধা সাধু পতিট্ঠিতাতি হত্থাল়ৰকচিত্তগহপতিআদীনং ৰিয মগ্গেন আগতা পতিট্ঠিতসদ্ধা নাম সাধু। পঞ্ঞা নরানং রতনন্তি এত্থ চিত্তীকতট্ঠাদীহি রতনং ৰেদিতব্বং। ৰুত্তঞ্হেতং –
Saddhāsādhu patiṭṭhitāti hatthāḷavakacittagahapatiādīnaṃ viya maggena āgatā patiṭṭhitasaddhā nāma sādhu. Paññā narānaṃ ratananti ettha cittīkataṭṭhādīhi ratanaṃ veditabbaṃ. Vuttañhetaṃ –
‘‘যদি চিত্তীকতন্তি রতনং, ননু ভগৰা চিত্তীকতো পুরিসসীহো, যে চ লোকে চিত্তীকতা, তেসং চিত্তীকতো ভগৰা। যদি রতিকরন্তি রতনং, ননু ভগৰা রতিকরো পুরিসসীহো, তস্স ৰচনেন চরন্তা ঝানরতিসুখেন অভিরমন্তি। যদি অতুল্যন্তি রতনং, ননু ভগৰা অতুলো পুরিসসীহো। ন হি সক্কা তুলেতুং গুণেহি গুণপারমিং গতো। যদি দুল্লভন্তি রতনং, ননু ভগৰা দুল্লভো পুরিসসীহো। যদি অনোমসত্তপরিভোগন্তি রতনং, ননু ভগৰা অনোমো সীলেন সমাধিনা পঞ্ঞায ৰিমুত্তিযা ৰিমুত্তিঞাণদস্সনেনা’’তি।
‘‘Yadi cittīkatanti ratanaṃ, nanu bhagavā cittīkato purisasīho, ye ca loke cittīkatā, tesaṃ cittīkato bhagavā. Yadi ratikaranti ratanaṃ, nanu bhagavā ratikaro purisasīho, tassa vacanena carantā jhānaratisukhena abhiramanti. Yadi atulyanti ratanaṃ, nanu bhagavā atulo purisasīho. Na hi sakkā tuletuṃ guṇehi guṇapāramiṃ gato. Yadi dullabhanti ratanaṃ, nanu bhagavā dullabho purisasīho. Yadi anomasattaparibhoganti ratanaṃ, nanu bhagavā anomo sīlena samādhinā paññāya vimuttiyā vimuttiñāṇadassanenā’’ti.
ইধ পন দুল্লভপাতুভাৰট্ঠেন পঞ্ঞা ‘‘রতন’’ন্তি ৰুত্তং। পুঞ্ঞন্তি পুঞ্ঞচেতনা, সা হি অরূপত্তা পরিহরিতুং ন সক্কাতি। পঠমং।
Idha pana dullabhapātubhāvaṭṭhena paññā ‘‘ratana’’nti vuttaṃ. Puññanti puññacetanā, sā hi arūpattā pariharituṃ na sakkāti. Paṭhamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. জরাসুত্তং • 1. Jarāsuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. জরাসুত্তৰণ্ণনা • 1. Jarāsuttavaṇṇanā
