| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༦. ཛརཱཝགྒོ
6. Jarāvaggo
༡. ཛརཱསུཏྟཝཎྞནཱ
1. Jarāsuttavaṇṇanā
༥༡. ཧིཏསྶ སཱདྷནཏོ སཱདྷུ, ཡཾ ཀིཉྩི ཨཏྠཛཱཏཾ། ཏཾ པན ཨཏྠཀཱམེན ལབྷིཏབྦཏོ ཨུཔསེཝིཏབྦཏོ ལདྡྷཀཾ, ཀལྱཱཎཊྛེན བྷདྡཀནྟི ཝུཙྩཏཱིཏི ཨཱཧ ‘‘སཱདྷཱུཏི ལདྡྷཀཾ བྷདྡཀ’’ནྟི། ‘‘སཱིལཾ ཡཱཝ ཛརཱ སཱདྷཱུ’’ཏི ཝུཏྟམཏྠཾ བྱཏིརེཀཏོ ཝིབྷཱཝེཏུཾ ‘‘ཨིམིནཱ ཨིདཾ དསྶེཏཱི’’ཏི ཝུཏྟཾ། ཨིདནྟི ཨིདཾ ཨཏྠཛཱཏཾ།
51. Hitassa sādhanato sādhu, yaṃ kiñci atthajātaṃ. Taṃ pana atthakāmena labhitabbato upasevitabbato laddhakaṃ, kalyāṇaṭṭhena bhaddakanti vuccatīti āha ‘‘sādhūti laddhakaṃ bhaddaka’’nti. ‘‘Sīlaṃ yāva jarā sādhū’’ti vuttamatthaṃ byatirekato vibhāvetuṃ ‘‘iminā idaṃ dassetī’’ti vuttaṃ. Idanti idaṃ atthajātaṃ.
པཏིཊྛིཏཱཏི ཙིཏྟསནྟཱནེ ལདྡྷཔཏིཊྛཱ, ཀེནཙི ཨསཾཧཱརིཡཱ། ཏེནཱཧ ‘‘མགྒེན ཨཱགཏཱ’’ཏི། ཙིཏྟཱིཀཏཊྛཱདཱིཧཱིཏི པཱུཛནཱིཡབྷཱཝཱདཱིཧི། ཝུཏྟཾ ཧེཏཾ པོརཱཎཊྛཀཐཱཡཾ། ཙིཏྟཱིཀཏནྟི རཏནནྟི ཨིདཾ རཏནཾ ནཱམ ལོཀེ ཙིཏྟཱིཀཏཾ ཝཏྠཱུནཾ སཧསྶགྒྷནཏཱདིཝསེན། ཡེཔི ལོཀེ ཙིཏྟཱིཀཏཱ ཁཏྟིཡཔཎྜིཏ-ཙཏུམཧཱརཱཛ-སཀྐ-སུཡཱམ-མཧཱབྲཧྨཱདཡོ, ཏེསཾ ཙིཏྟཱིཀཏོ ཏེཧི སརཎནྟི ཨུཔགནྟབྦཏཱདིཝསེན། རཏིཀརནྟི པཱིཏིསུཁཱཝཧཾ། ཛྷཱནརཏིསུཁེནཱཏི དུཝིདྷེནཔི ཛྷཱནརཏིསུཁེན། ཏུལེཏུནྟི པརིཙྪིནྡིཏུཾ། གུཎཔཱརམིནྟི གུཎཱནཾ ཨུཀྐཾསཔཱརམིཾ། དུལླབྷོ ཨནེཀཱནི ཨསངྑྱེཡྻཱནི ཨཏིདྷཱཝིཏྭཱཔི ལདྡྷུཾ ཨསཀྐུཎེཡྻཏྟཱ། ཨནོམོཏི ཨནཱུནོ པརིཔུཎྞོ། ཏཏྠ ཝིསེསཏོ ཨནོམསཏྟཔརིབྷོགཏོ ཏེཧི ‘‘སམྨཱསམྦུདྡྷོ བྷགཝཱ’’ཏི ཨནུསྶརིཏབྦཏོཏི ཨཱཧ ‘‘བྷགཝཱ ཨནོམོ སཱིལེནཱ’’ཏིཨཱདི།
Patiṭṭhitāti cittasantāne laddhapatiṭṭhā, kenaci asaṃhāriyā. Tenāha ‘‘maggena āgatā’’ti. Cittīkataṭṭhādīhīti pūjanīyabhāvādīhi. Vuttaṃ hetaṃ porāṇaṭṭhakathāyaṃ. Cittīkatanti ratananti idaṃ ratanaṃ nāma loke cittīkataṃ vatthūnaṃ sahassagghanatādivasena. Yepi loke cittīkatā khattiyapaṇḍita-catumahārāja-sakka-suyāma-mahābrahmādayo, tesaṃ cittīkato tehi saraṇanti upagantabbatādivasena. Ratikaranti pītisukhāvahaṃ. Jhānaratisukhenāti duvidhenapi jhānaratisukhena. Tuletunti paricchindituṃ. Guṇapāraminti guṇānaṃ ukkaṃsapāramiṃ. Dullabho anekāni asaṅkhyeyyāni atidhāvitvāpi laddhuṃ asakkuṇeyyattā. Anomoti anūno paripuṇṇo. Tattha visesato anomasattaparibhogato tehi ‘‘sammāsambuddho bhagavā’’ti anussaritabbatoti āha ‘‘bhagavā anomo sīlenā’’tiādi.
ཨརིཡམགྒཔཉྙཱཡེཝ ཨིདྷ ཨདྷིཔྤེཏཱཏི ‘‘ཨིདྷ པན དུལླབྷཔཱཏུབྷཱཝཊྛེན པཉྙཱ ‘རཏན’ནྟི ཝུཏྟ’’ནྟི ཨཱཧ། པུཛྫཕལནིབྦཏྟནཏོ, ཨཏྟནོ སནྟཱནཾ པུནཱཏཱིཏི ཙ པུཉྙཙེཏནཱ པུཉྙཾ, སཱ པན ཡསྶ ཨུཔྤནྣཱ, ཏསྶེཝ ཨཱཝེཎིཀཏཱཡ ཨནཉྙསཱདྷཱརཎཏྟཱ ཀེནཙིཔི ཨནཱཧཊཱ, ཨཊྛཀཐཱཡཾ པན ‘‘ཨརཱུཔཏྟཱ’’ཏི ཝུཏྟཾ།
Ariyamaggapaññāyeva idha adhippetāti ‘‘idha pana dullabhapātubhāvaṭṭhena paññā ‘ratana’nti vutta’’nti āha. Pujjaphalanibbattanato, attano santānaṃ punātīti ca puññacetanā puññaṃ, sā pana yassa uppannā, tasseva āveṇikatāya anaññasādhāraṇattā kenacipi anāhaṭā, aṭṭhakathāyaṃ pana ‘‘arūpattā’’ti vuttaṃ.
ཛརཱསུཏྟཝཎྞནཱ ནིཊྛིཏཱ།
Jarāsuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༡. ཛརཱསུཏྟཾ • 1. Jarāsuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡. ཛརཱསུཏྟཝཎྞནཱ • 1. Jarāsuttavaṇṇanā
