| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
6. ජටාසුත්‌තං
6. Jaṭāsuttaṃ
192. සාවත්‌ථිනිදානං . අථ ඛො ජටාභාරද්‌වාජො බ්‍රාහ්‌මණො යෙන භගවා තෙනුපසඞ්‌කමි; උපසඞ්‌කමිත්‌වා භගවතා සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො ජටාභාරද්‌වාජො බ්‍රාහ්‌මණො භගවන්‌තං ගාථාය අජ්‌ඣභාසි –
192. Sāvatthinidānaṃ . Atha kho jaṭābhāradvājo brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho jaṭābhāradvājo brāhmaṇo bhagavantaṃ gāthāya ajjhabhāsi –
‘‘අන්‌තොජටා බහිජටා, ජටාය ජටිතා පජා;
‘‘Antojaṭā bahijaṭā, jaṭāya jaṭitā pajā;
තං තං ගොතම පුච්‌ඡාමි, කො ඉමං විජටයෙ ජට’’න්‌ති.
Taṃ taṃ gotama pucchāmi, ko imaṃ vijaṭaye jaṭa’’nti.
‘‘සීලෙ පතිට්‌ඨාය නරො සපඤ්‌ඤො, චිත්‌තං පඤ්‌ඤඤ්‌ච භාවයං;
‘‘Sīle patiṭṭhāya naro sapañño, cittaṃ paññañca bhāvayaṃ;
ආතාපී නිපකො භික්‌ඛු, සො ඉමං විජටයෙ ජටං.
Ātāpī nipako bhikkhu, so imaṃ vijaṭaye jaṭaṃ.
‘‘යෙසං රාගො ච දොසො ච, අවිජ්‌ජා ච විරාජිතා;
‘‘Yesaṃ rāgo ca doso ca, avijjā ca virājitā;
ඛීණාසවා අරහන්‌තො, තෙසං විජටිතා ජටා.
Khīṇāsavā arahanto, tesaṃ vijaṭitā jaṭā.
‘‘යත්‌ථ නාමඤ්‌ච රූපඤ්‌ච, අසෙසං උපරුජ්‌ඣති;
‘‘Yattha nāmañca rūpañca, asesaṃ uparujjhati;
පටිඝං රූපසඤ්‌ඤා ච, එත්‌ථෙසා ඡිජ්‌ජතෙ ජටා’’ති.
Paṭighaṃ rūpasaññā ca, etthesā chijjate jaṭā’’ti.
එවං වුත්‌තෙ, ජටාභාරද්‌වාජො භගවන්‌තං එතදවොච – ‘‘අභික්‌කන්‌තං, භො ගොතම…පෙ.… අඤ්‌ඤතරො ච පනායස්‌මා භාරද්‌වාජො අරහතං අහොසී’’ති.
Evaṃ vutte, jaṭābhāradvājo bhagavantaṃ etadavoca – ‘‘abhikkantaṃ, bho gotama…pe… aññataro ca panāyasmā bhāradvājo arahataṃ ahosī’’ti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6. ජටාසුත්‌තවණ්‌ණනා • 6. Jaṭāsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 6. ජටාසුත්‌තවණ්‌ණනා • 6. Jaṭāsuttavaṇṇanā
