| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. ஜடாஸுத்தவண்ணனா
3. Jaṭāsuttavaṇṇanā
23. ததியே அந்தோஜடாதி கா³தா²யங் ஜடாதி தண்ஹாய ஜாலினியா அதி⁴வசனங். ஸா ஹி ரூபாதீ³ஸு ஆரம்மணேஸு ஹெட்டு²பரியவஸேன புனப்புனங் உப்பஜ்ஜனதோ ஸங்ஸிப்³ப³னட்டே²ன வேளுகு³ம்பா³தீ³னங் ஸாகா²ஜாலஸங்கா²தா ஜடா வியாதி ஜடா. ஸா பனேஸா ஸகபரிக்கா²ரபரபரிக்கா²ரேஸு ஸகஅத்தபா⁴வ-பரஅத்தபா⁴வேஸு அஜ்ஜ²த்திகாயதன-பா³ஹிராயதனேஸு ச உப்பஜ்ஜனதோ அந்தோஜடா ப³ஹிஜடாதி வுச்சதி. தாய ஏவங் உப்பஜ்ஜமானாய ஜடாய ஜடிதா பஜா. யதா² நாம வேளுஜடாதீ³ஹி வேளுஆத³யோ, ஏவங் தாய தண்ஹாஜடாய ஸப்³பா³பி அயங் ஸத்தனிகாயஸங்கா²தா பஜா ஜடிதா வினத்³தா⁴, ஸங்ஸிப்³பி³தாதி அத்தோ². யஸ்மா ச ஏவங் ஜடிதா, தங் தங் கோ³தம புச்சா²மீதி தஸ்மா தங் புச்சா²மி. கோ³தமாதி ப⁴க³வந்தங் கொ³த்தேன ஆலபதி. கோ இமங் விஜடயே ஜடந்தி இமங் ஏவங் தேதா⁴துகங் ஜடெத்வா டி²தங் ஜடங் கோ விஜடெய்ய, விஜடேதுங் கோ ஸமத்தோ²தி புச்ச²தி.
23. Tatiye antojaṭāti gāthāyaṃ jaṭāti taṇhāya jāliniyā adhivacanaṃ. Sā hi rūpādīsu ārammaṇesu heṭṭhupariyavasena punappunaṃ uppajjanato saṃsibbanaṭṭhena veḷugumbādīnaṃ sākhājālasaṅkhātā jaṭā viyāti jaṭā. Sā panesā sakaparikkhāraparaparikkhāresu sakaattabhāva-paraattabhāvesu ajjhattikāyatana-bāhirāyatanesu ca uppajjanato antojaṭā bahijaṭāti vuccati. Tāya evaṃ uppajjamānāya jaṭāya jaṭitā pajā. Yathā nāma veḷujaṭādīhi veḷuādayo, evaṃ tāya taṇhājaṭāya sabbāpi ayaṃ sattanikāyasaṅkhātā pajā jaṭitā vinaddhā, saṃsibbitāti attho. Yasmā ca evaṃ jaṭitā, taṃ taṃ gotama pucchāmīti tasmā taṃ pucchāmi. Gotamāti bhagavantaṃ gottena ālapati. Ko imaṃ vijaṭaye jaṭanti imaṃ evaṃ tedhātukaṃ jaṭetvā ṭhitaṃ jaṭaṃ ko vijaṭeyya, vijaṭetuṃ ko samatthoti pucchati.
அத²ஸ்ஸ ப⁴க³வா தமத்த²ங் விஸ்ஸஜ்ஜெந்தோ ஸீலே பதிட்டா²யாதிஆதி³மாஹ. தத்த² ஸீலே பதிட்டா²யாதி சதுபாரிஸுத்³தி⁴ஸீலே ட²த்வா. எத்த² ச ப⁴க³வா ஜடாவிஜடனங் புச்சி²தோ ஸீலங் ஆரப⁴ந்தோ ந ‘‘அஞ்ஞங் புட்டோ² அஞ்ஞங் கதே²தீ’’தி வேதி³தப்³போ³. ஜடாவிஜடகஸ்ஸ ஹி பதிட்டா²த³ஸ்ஸனத்த²மெத்த² ஸீலங் கதி²தங்.
Athassa bhagavā tamatthaṃ vissajjento sīle patiṭṭhāyātiādimāha. Tattha sīle patiṭṭhāyāti catupārisuddhisīle ṭhatvā. Ettha ca bhagavā jaṭāvijaṭanaṃ pucchito sīlaṃ ārabhanto na ‘‘aññaṃ puṭṭho aññaṃ kathetī’’ti veditabbo. Jaṭāvijaṭakassa hi patiṭṭhādassanatthamettha sīlaṃ kathitaṃ.
நரோதி ஸத்தோ. ஸபஞ்ஞோதி கம்மஜதிஹேதுகபடிஸந்தி⁴பஞ்ஞாய பஞ்ஞவா. சித்தங் பஞ்ஞஞ்ச பா⁴வயந்தி ஸமாதி⁴ஞ்சேவ விபஸ்ஸனஞ்ச பா⁴வயமானோ. சித்தஸீஸேன ஹெத்த² அட்ட² ஸமாபத்தியோ கதி²தா, பஞ்ஞானாமேன விபஸ்ஸனா. ஆதாபீதி வீரியவா. வீரியஞ்ஹி கிலேஸானங் ஆதாபனபரிதாபனட்டே²ன ‘‘ஆதாபோ’’தி வுச்சதி, தத³ஸ்ஸ அத்தீ²தி ஆதாபீ. நிபகோதி நேபக்கங் வுச்சதி பஞ்ஞா, தாய ஸமன்னாக³தோதி அத்தோ². இமினா பதே³ன பாரிஹாரியபஞ்ஞங் த³ஸ்ஸேதி. பாரிஹாரியபஞ்ஞா நாம ‘‘அயங் காலோ உத்³தே³ஸஸ்ஸ, அயங் காலோ பரிபுச்சா²யா’’திஆதி³னா நயேன ஸப்³ப³த்த² காராபிதா பரிஹரிதப்³ப³பஞ்ஞா. இமஸ்மிஞ்ஹி பஞ்ஹாப்³யாகரணே திக்க²த்துங் பஞ்ஞா ஆக³தா. தத்த² பட²மா ஜாதிபஞ்ஞா, து³தியா விபஸ்ஸனாபஞ்ஞா, ததியா ஸப்³ப³கிச்சபரிணாயிகா பாரிஹாரியபஞ்ஞா.
Naroti satto. Sapaññoti kammajatihetukapaṭisandhipaññāya paññavā. Cittaṃ paññañca bhāvayanti samādhiñceva vipassanañca bhāvayamāno. Cittasīsena hettha aṭṭha samāpattiyo kathitā, paññānāmena vipassanā. Ātāpīti vīriyavā. Vīriyañhi kilesānaṃ ātāpanaparitāpanaṭṭhena ‘‘ātāpo’’ti vuccati, tadassa atthīti ātāpī. Nipakoti nepakkaṃ vuccati paññā, tāya samannāgatoti attho. Iminā padena pārihāriyapaññaṃ dasseti. Pārihāriyapaññā nāma ‘‘ayaṃ kālo uddesassa, ayaṃ kālo paripucchāyā’’tiādinā nayena sabbattha kārāpitā pariharitabbapaññā. Imasmiñhi pañhābyākaraṇe tikkhattuṃ paññā āgatā. Tattha paṭhamā jātipaññā, dutiyā vipassanāpaññā, tatiyā sabbakiccapariṇāyikā pārihāriyapaññā.
ஸோ இமங் விஜடயே ஜடந்தி ஸோ இமேஹி ஸீலாதீ³ஹி ஸமன்னாக³தோ பி⁴க்கு². யதா² நாம புரிஸோ பத²வியங் பதிட்டா²ய ஸுனிஸிதங் ஸத்த²ங் உக்கி²பித்வா மஹந்தங் வேளுகு³ம்ப³ங் விஜடெய்ய, ஏவமேவங் ஸீலே பதிட்டா²ய ஸமாதி⁴ஸிலாயங் ஸுனிஸிதங் விபஸ்ஸனாபஞ்ஞாஸத்த²ங் வீரியப³லபக்³க³ஹிதேன பாரிஹாரியபஞ்ஞாஹத்தே²ன உக்கி²பித்வா ஸப்³ப³ம்பி தங் அத்தனோ ஸந்தானே பதிதங் தண்ஹாஜடங் விஜடெய்ய ஸஞ்சி²ந்தெ³ய்ய ஸம்பதா³லெய்யாதி.
Soimaṃ vijaṭaye jaṭanti so imehi sīlādīhi samannāgato bhikkhu. Yathā nāma puriso pathaviyaṃ patiṭṭhāya sunisitaṃ satthaṃ ukkhipitvā mahantaṃ veḷugumbaṃ vijaṭeyya, evamevaṃ sīle patiṭṭhāya samādhisilāyaṃ sunisitaṃ vipassanāpaññāsatthaṃ vīriyabalapaggahitena pārihāriyapaññāhatthena ukkhipitvā sabbampi taṃ attano santāne patitaṃ taṇhājaṭaṃ vijaṭeyya sañchindeyya sampadāleyyāti.
எத்தாவதா ஸேக²பூ⁴மிங் கதெ²த்வா இதா³னி ஜடங் விஜடெத்வா டி²தங் மஹாகீ²ணாஸவங் த³ஸ்ஸெந்தோ யேஸந்திஆதி³மாஹ. ஏவங் ஜடங் விஜடெத்வா டி²தங் கீ²ணாஸவங் த³ஸ்ஸெத்வா புன ஜடாய விஜடனோகாஸங் த³ஸ்ஸெந்தோ யத்த² நாமஞ்சாதிஆதி³மாஹ. தத்த² நாமந்தி சத்தாரோ அரூபினோ க²ந்தா⁴. படிக⁴ங் ரூபஸஞ்ஞா சாதி எத்த² படிக⁴ஸஞ்ஞாவஸேன காமப⁴வோ க³ஹிதோ, ரூபஸஞ்ஞாவஸேன ரூபப⁴வோ. தேஸு த்³வீஸு க³ஹிதேஸு அரூபப⁴வோ க³ஹிதோவ ஹோதி ப⁴வஸங்கே²பேனாதி. எத்தே²ஸா சி²ஜ்ஜதே ஜடாதி எத்த² தேபூ⁴மகவட்டஸ்ஸ பரியாதி³யனட்டா²னே ஏஸா ஜடா சி²ஜ்ஜதி, நிப்³பா³னங் ஆக³ம்ம சி²ஜ்ஜதி நிருஜ்ஜ²தீதி அயங் அத்தோ² த³ஸ்ஸிதோ ஹோதி. ததியங்.
Ettāvatā sekhabhūmiṃ kathetvā idāni jaṭaṃ vijaṭetvā ṭhitaṃ mahākhīṇāsavaṃ dassento yesantiādimāha. Evaṃ jaṭaṃ vijaṭetvā ṭhitaṃ khīṇāsavaṃ dassetvā puna jaṭāya vijaṭanokāsaṃ dassento yattha nāmañcātiādimāha. Tattha nāmanti cattāro arūpino khandhā. Paṭighaṃ rūpasaññā cāti ettha paṭighasaññāvasena kāmabhavo gahito, rūpasaññāvasena rūpabhavo. Tesu dvīsu gahitesu arūpabhavo gahitova hoti bhavasaṅkhepenāti. Etthesā chijjate jaṭāti ettha tebhūmakavaṭṭassa pariyādiyanaṭṭhāne esā jaṭā chijjati, nibbānaṃ āgamma chijjati nirujjhatīti ayaṃ attho dassito hoti. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. ஜடாஸுத்தங் • 3. Jaṭāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. ஜடாஸுத்தவண்ணனா • 3. Jaṭāsuttavaṇṇanā
