| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੩. ਜਟਾਸੁਤ੍ਤવਣ੍ਣਨਾ
3. Jaṭāsuttavaṇṇanā
੨੩. ਤਤਿਯੇ ਅਨ੍ਤੋਜਟਾਤਿ ਗਾਥਾਯਂ ਜਟਾਤਿ ਤਣ੍ਹਾਯ ਜਾਲਿਨਿਯਾ ਅਧਿવਚਨਂ। ਸਾ ਹਿ ਰੂਪਾਦੀਸੁ ਆਰਮ੍ਮਣੇਸੁ ਹੇਟ੍ਠੁਪਰਿਯવਸੇਨ ਪੁਨਪ੍ਪੁਨਂ ਉਪ੍ਪਜ੍ਜਨਤੋ ਸਂਸਿਬ੍ਬਨਟ੍ਠੇਨ વੇਲ਼ੁਗੁਮ੍ਬਾਦੀਨਂ ਸਾਖਾਜਾਲਸਙ੍ਖਾਤਾ ਜਟਾ વਿਯਾਤਿ ਜਟਾ। ਸਾ ਪਨੇਸਾ ਸਕਪਰਿਕ੍ਖਾਰਪਰਪਰਿਕ੍ਖਾਰੇਸੁ ਸਕਅਤ੍ਤਭਾવ-ਪਰਅਤ੍ਤਭਾવੇਸੁ ਅਜ੍ਝਤ੍ਤਿਕਾਯਤਨ-ਬਾਹਿਰਾਯਤਨੇਸੁ ਚ ਉਪ੍ਪਜ੍ਜਨਤੋ ਅਨ੍ਤੋਜਟਾ ਬਹਿਜਟਾਤਿ વੁਚ੍ਚਤਿ। ਤਾਯ ਏવਂ ਉਪ੍ਪਜ੍ਜਮਾਨਾਯ ਜਟਾਯ ਜਟਿਤਾ ਪਜਾ। ਯਥਾ ਨਾਮ વੇਲ਼ੁਜਟਾਦੀਹਿ વੇਲ਼ੁਆਦਯੋ, ਏવਂ ਤਾਯ ਤਣ੍ਹਾਜਟਾਯ ਸਬ੍ਬਾਪਿ ਅਯਂ ਸਤ੍ਤਨਿਕਾਯਸਙ੍ਖਾਤਾ ਪਜਾ ਜਟਿਤਾ વਿਨਦ੍ਧਾ, ਸਂਸਿਬ੍ਬਿਤਾਤਿ ਅਤ੍ਥੋ। ਯਸ੍ਮਾ ਚ ਏવਂ ਜਟਿਤਾ, ਤਂ ਤਂ ਗੋਤਮ ਪੁਚ੍ਛਾਮੀਤਿ ਤਸ੍ਮਾ ਤਂ ਪੁਚ੍ਛਾਮਿ। ਗੋਤਮਾਤਿ ਭਗવਨ੍ਤਂ ਗੋਤ੍ਤੇਨ ਆਲਪਤਿ। ਕੋ ਇਮਂ વਿਜਟਯੇ ਜਟਨ੍ਤਿ ਇਮਂ ਏવਂ ਤੇਧਾਤੁਕਂ ਜਟੇਤ੍વਾ ਠਿਤਂ ਜਟਂ ਕੋ વਿਜਟੇਯ੍ਯ, વਿਜਟੇਤੁਂ ਕੋ ਸਮਤ੍ਥੋਤਿ ਪੁਚ੍ਛਤਿ।
23. Tatiye antojaṭāti gāthāyaṃ jaṭāti taṇhāya jāliniyā adhivacanaṃ. Sā hi rūpādīsu ārammaṇesu heṭṭhupariyavasena punappunaṃ uppajjanato saṃsibbanaṭṭhena veḷugumbādīnaṃ sākhājālasaṅkhātā jaṭā viyāti jaṭā. Sā panesā sakaparikkhāraparaparikkhāresu sakaattabhāva-paraattabhāvesu ajjhattikāyatana-bāhirāyatanesu ca uppajjanato antojaṭā bahijaṭāti vuccati. Tāya evaṃ uppajjamānāya jaṭāya jaṭitā pajā. Yathā nāma veḷujaṭādīhi veḷuādayo, evaṃ tāya taṇhājaṭāya sabbāpi ayaṃ sattanikāyasaṅkhātā pajā jaṭitā vinaddhā, saṃsibbitāti attho. Yasmā ca evaṃ jaṭitā, taṃ taṃ gotama pucchāmīti tasmā taṃ pucchāmi. Gotamāti bhagavantaṃ gottena ālapati. Ko imaṃ vijaṭaye jaṭanti imaṃ evaṃ tedhātukaṃ jaṭetvā ṭhitaṃ jaṭaṃ ko vijaṭeyya, vijaṭetuṃ ko samatthoti pucchati.
ਅਥਸ੍ਸ ਭਗવਾ ਤਮਤ੍ਥਂ વਿਸ੍ਸਜ੍ਜੇਨ੍ਤੋ ਸੀਲੇ ਪਤਿਟ੍ਠਾਯਾਤਿਆਦਿਮਾਹ। ਤਤ੍ਥ ਸੀਲੇ ਪਤਿਟ੍ਠਾਯਾਤਿ ਚਤੁਪਾਰਿਸੁਦ੍ਧਿਸੀਲੇ ਠਤ੍વਾ। ਏਤ੍ਥ ਚ ਭਗવਾ ਜਟਾવਿਜਟਨਂ ਪੁਚ੍ਛਿਤੋ ਸੀਲਂ ਆਰਭਨ੍ਤੋ ਨ ‘‘ਅਞ੍ਞਂ ਪੁਟ੍ਠੋ ਅਞ੍ਞਂ ਕਥੇਤੀ’’ਤਿ વੇਦਿਤਬ੍ਬੋ। ਜਟਾવਿਜਟਕਸ੍ਸ ਹਿ ਪਤਿਟ੍ਠਾਦਸ੍ਸਨਤ੍ਥਮੇਤ੍ਥ ਸੀਲਂ ਕਥਿਤਂ।
Athassa bhagavā tamatthaṃ vissajjento sīle patiṭṭhāyātiādimāha. Tattha sīle patiṭṭhāyāti catupārisuddhisīle ṭhatvā. Ettha ca bhagavā jaṭāvijaṭanaṃ pucchito sīlaṃ ārabhanto na ‘‘aññaṃ puṭṭho aññaṃ kathetī’’ti veditabbo. Jaṭāvijaṭakassa hi patiṭṭhādassanatthamettha sīlaṃ kathitaṃ.
ਨਰੋਤਿ ਸਤ੍ਤੋ। ਸਪਞ੍ਞੋਤਿ ਕਮ੍ਮਜਤਿਹੇਤੁਕਪਟਿਸਨ੍ਧਿਪਞ੍ਞਾਯ ਪਞ੍ਞવਾ। ਚਿਤ੍ਤਂ ਪਞ੍ਞਞ੍ਚ ਭਾવਯਨ੍ਤਿ ਸਮਾਧਿਞ੍ਚੇવ વਿਪਸ੍ਸਨਞ੍ਚ ਭਾવਯਮਾਨੋ। ਚਿਤ੍ਤਸੀਸੇਨ ਹੇਤ੍ਥ ਅਟ੍ਠ ਸਮਾਪਤ੍ਤਿਯੋ ਕਥਿਤਾ, ਪਞ੍ਞਾਨਾਮੇਨ વਿਪਸ੍ਸਨਾ। ਆਤਾਪੀਤਿ વੀਰਿਯવਾ। વੀਰਿਯਞ੍ਹਿ ਕਿਲੇਸਾਨਂ ਆਤਾਪਨਪਰਿਤਾਪਨਟ੍ਠੇਨ ‘‘ਆਤਾਪੋ’’ਤਿ વੁਚ੍ਚਤਿ, ਤਦਸ੍ਸ ਅਤ੍ਥੀਤਿ ਆਤਾਪੀ। ਨਿਪਕੋਤਿ ਨੇਪਕ੍ਕਂ વੁਚ੍ਚਤਿ ਪਞ੍ਞਾ, ਤਾਯ ਸਮਨ੍ਨਾਗਤੋਤਿ ਅਤ੍ਥੋ। ਇਮਿਨਾ ਪਦੇਨ ਪਾਰਿਹਾਰਿਯਪਞ੍ਞਂ ਦਸ੍ਸੇਤਿ। ਪਾਰਿਹਾਰਿਯਪਞ੍ਞਾ ਨਾਮ ‘‘ਅਯਂ ਕਾਲੋ ਉਦ੍ਦੇਸਸ੍ਸ, ਅਯਂ ਕਾਲੋ ਪਰਿਪੁਚ੍ਛਾਯਾ’’ਤਿਆਦਿਨਾ ਨਯੇਨ ਸਬ੍ਬਤ੍ਥ ਕਾਰਾਪਿਤਾ ਪਰਿਹਰਿਤਬ੍ਬਪਞ੍ਞਾ। ਇਮਸ੍ਮਿਞ੍ਹਿ ਪਞ੍ਹਾਬ੍ਯਾਕਰਣੇ ਤਿਕ੍ਖਤ੍ਤੁਂ ਪਞ੍ਞਾ ਆਗਤਾ। ਤਤ੍ਥ ਪਠਮਾ ਜਾਤਿਪਞ੍ਞਾ, ਦੁਤਿਯਾ વਿਪਸ੍ਸਨਾਪਞ੍ਞਾ, ਤਤਿਯਾ ਸਬ੍ਬਕਿਚ੍ਚਪਰਿਣਾਯਿਕਾ ਪਾਰਿਹਾਰਿਯਪਞ੍ਞਾ।
Naroti satto. Sapaññoti kammajatihetukapaṭisandhipaññāya paññavā. Cittaṃ paññañca bhāvayanti samādhiñceva vipassanañca bhāvayamāno. Cittasīsena hettha aṭṭha samāpattiyo kathitā, paññānāmena vipassanā. Ātāpīti vīriyavā. Vīriyañhi kilesānaṃ ātāpanaparitāpanaṭṭhena ‘‘ātāpo’’ti vuccati, tadassa atthīti ātāpī. Nipakoti nepakkaṃ vuccati paññā, tāya samannāgatoti attho. Iminā padena pārihāriyapaññaṃ dasseti. Pārihāriyapaññā nāma ‘‘ayaṃ kālo uddesassa, ayaṃ kālo paripucchāyā’’tiādinā nayena sabbattha kārāpitā pariharitabbapaññā. Imasmiñhi pañhābyākaraṇe tikkhattuṃ paññā āgatā. Tattha paṭhamā jātipaññā, dutiyā vipassanāpaññā, tatiyā sabbakiccapariṇāyikā pārihāriyapaññā.
ਸੋ ਇਮਂ વਿਜਟਯੇ ਜਟਨ੍ਤਿ ਸੋ ਇਮੇਹਿ ਸੀਲਾਦੀਹਿ ਸਮਨ੍ਨਾਗਤੋ ਭਿਕ੍ਖੁ। ਯਥਾ ਨਾਮ ਪੁਰਿਸੋ ਪਥવਿਯਂ ਪਤਿਟ੍ਠਾਯ ਸੁਨਿਸਿਤਂ ਸਤ੍ਥਂ ਉਕ੍ਖਿਪਿਤ੍વਾ ਮਹਨ੍ਤਂ વੇਲ਼ੁਗੁਮ੍ਬਂ વਿਜਟੇਯ੍ਯ, ਏવਮੇવਂ ਸੀਲੇ ਪਤਿਟ੍ਠਾਯ ਸਮਾਧਿਸਿਲਾਯਂ ਸੁਨਿਸਿਤਂ વਿਪਸ੍ਸਨਾਪਞ੍ਞਾਸਤ੍ਥਂ વੀਰਿਯਬਲਪਗ੍ਗਹਿਤੇਨ ਪਾਰਿਹਾਰਿਯਪਞ੍ਞਾਹਤ੍ਥੇਨ ਉਕ੍ਖਿਪਿਤ੍વਾ ਸਬ੍ਬਮ੍ਪਿ ਤਂ ਅਤ੍ਤਨੋ ਸਨ੍ਤਾਨੇ ਪਤਿਤਂ ਤਣ੍ਹਾਜਟਂ વਿਜਟੇਯ੍ਯ ਸਞ੍ਛਿਨ੍ਦੇਯ੍ਯ ਸਮ੍ਪਦਾਲੇਯ੍ਯਾਤਿ।
Soimaṃ vijaṭaye jaṭanti so imehi sīlādīhi samannāgato bhikkhu. Yathā nāma puriso pathaviyaṃ patiṭṭhāya sunisitaṃ satthaṃ ukkhipitvā mahantaṃ veḷugumbaṃ vijaṭeyya, evamevaṃ sīle patiṭṭhāya samādhisilāyaṃ sunisitaṃ vipassanāpaññāsatthaṃ vīriyabalapaggahitena pārihāriyapaññāhatthena ukkhipitvā sabbampi taṃ attano santāne patitaṃ taṇhājaṭaṃ vijaṭeyya sañchindeyya sampadāleyyāti.
ਏਤ੍ਤਾવਤਾ ਸੇਖਭੂਮਿਂ ਕਥੇਤ੍વਾ ਇਦਾਨਿ ਜਟਂ વਿਜਟੇਤ੍વਾ ਠਿਤਂ ਮਹਾਖੀਣਾਸવਂ ਦਸ੍ਸੇਨ੍ਤੋ ਯੇਸਨ੍ਤਿਆਦਿਮਾਹ। ਏવਂ ਜਟਂ વਿਜਟੇਤ੍વਾ ਠਿਤਂ ਖੀਣਾਸવਂ ਦਸ੍ਸੇਤ੍વਾ ਪੁਨ ਜਟਾਯ વਿਜਟਨੋਕਾਸਂ ਦਸ੍ਸੇਨ੍ਤੋ ਯਤ੍ਥ ਨਾਮਞ੍ਚਾਤਿਆਦਿਮਾਹ। ਤਤ੍ਥ ਨਾਮਨ੍ਤਿ ਚਤ੍ਤਾਰੋ ਅਰੂਪਿਨੋ ਖਨ੍ਧਾ। ਪਟਿਘਂ ਰੂਪਸਞ੍ਞਾ ਚਾਤਿ ਏਤ੍ਥ ਪਟਿਘਸਞ੍ਞਾવਸੇਨ ਕਾਮਭવੋ ਗਹਿਤੋ, ਰੂਪਸਞ੍ਞਾવਸੇਨ ਰੂਪਭવੋ। ਤੇਸੁ ਦ੍વੀਸੁ ਗਹਿਤੇਸੁ ਅਰੂਪਭવੋ ਗਹਿਤੋવ ਹੋਤਿ ਭવਸਙ੍ਖੇਪੇਨਾਤਿ। ਏਤ੍ਥੇਸਾ ਛਿਜ੍ਜਤੇ ਜਟਾਤਿ ਏਤ੍ਥ ਤੇਭੂਮਕવਟ੍ਟਸ੍ਸ ਪਰਿਯਾਦਿਯਨਟ੍ਠਾਨੇ ਏਸਾ ਜਟਾ ਛਿਜ੍ਜਤਿ, ਨਿਬ੍ਬਾਨਂ ਆਗਮ੍ਮ ਛਿਜ੍ਜਤਿ ਨਿਰੁਜ੍ਝਤੀਤਿ ਅਯਂ ਅਤ੍ਥੋ ਦਸ੍ਸਿਤੋ ਹੋਤਿ। ਤਤਿਯਂ।
Ettāvatā sekhabhūmiṃ kathetvā idāni jaṭaṃ vijaṭetvā ṭhitaṃ mahākhīṇāsavaṃ dassento yesantiādimāha. Evaṃ jaṭaṃ vijaṭetvā ṭhitaṃ khīṇāsavaṃ dassetvā puna jaṭāya vijaṭanokāsaṃ dassento yattha nāmañcātiādimāha. Tattha nāmanti cattāro arūpino khandhā. Paṭighaṃ rūpasaññā cāti ettha paṭighasaññāvasena kāmabhavo gahito, rūpasaññāvasena rūpabhavo. Tesu dvīsu gahitesu arūpabhavo gahitova hoti bhavasaṅkhepenāti. Etthesā chijjate jaṭāti ettha tebhūmakavaṭṭassa pariyādiyanaṭṭhāne esā jaṭā chijjati, nibbānaṃ āgamma chijjati nirujjhatīti ayaṃ attho dassito hoti. Tatiyaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੩. ਜਟਾਸੁਤ੍ਤਂ • 3. Jaṭāsuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੩. ਜਟਾਸੁਤ੍ਤવਣ੍ਣਨਾ • 3. Jaṭāsuttavaṇṇanā
