| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
१०. जातिपूजकत्थेरअपदानवण्णना
10. Jātipūjakattheraapadānavaṇṇanā
जायं तस्स विपस्सिस्सातिआदिकं आयस्मतो जातिपूजकत्थेरस्स अपदानं। अयम्पि पुरिमबुद्धेसु कताधिकारो तत्थ तत्थ भवे विवट्टूपनिस्सयानि पुञ्ञानि उपचिनन्तो विपस्सिस्स भगवतो काले कुलगेहे निब्बत्तो विञ्ञुतं पत्तो नक्खत्तपाठकेहि विपस्सिबोधिसत्तस्स वुत्तलक्खणनिमित्तं सुत्वा ‘‘अयं किर कुमारो बुद्धो हुत्वा सकललोकस्स अग्गो सेट्ठो सुत्वा सब्बसत्ते संसारतो उद्धरिस्सती’’ति सुत्वा तं भगवन्तं कुमारकालेयेव बुद्धस्स विय महापूजमकासि। पच्छा कमेन कुमारकालं राजकुमारकालं रज्जकालन्ति कालत्तयमतिक्कम्म बुद्धे जातेपि महापूजं कत्वा ततो चुतो तुसितादीसु निब्बत्तो दिब्बसुखमनुभवित्वा पच्छा मनुस्सेसु चक्कवत्तादिमनुस्ससुखमनुभवित्वा इमस्मिं बुद्धुप्पादे कुलगेहे निब्बत्तो सत्तट्ठवस्सकालेयेव भगवति पसन्नो पब्बजित्वा विपस्सनं वड्ढेत्वा नचिरस्सेव अरहा अहोसि।
Jāyaṃ tassa vipassissātiādikaṃ āyasmato jātipūjakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle kulagehe nibbatto viññutaṃ patto nakkhattapāṭhakehi vipassibodhisattassa vuttalakkhaṇanimittaṃ sutvā ‘‘ayaṃ kira kumāro buddho hutvā sakalalokassa aggo seṭṭho sutvā sabbasatte saṃsārato uddharissatī’’ti sutvā taṃ bhagavantaṃ kumārakāleyeva buddhassa viya mahāpūjamakāsi. Pacchā kamena kumārakālaṃ rājakumārakālaṃ rajjakālanti kālattayamatikkamma buddhe jātepi mahāpūjaṃ katvā tato cuto tusitādīsu nibbatto dibbasukhamanubhavitvā pacchā manussesu cakkavattādimanussasukhamanubhavitvā imasmiṃ buddhuppāde kulagehe nibbatto sattaṭṭhavassakāleyeva bhagavati pasanno pabbajitvā vipassanaṃ vaḍḍhetvā nacirasseva arahā ahosi.
८२. सो अपरभागे अत्तनो पुब्बकम्मं सरित्वा सोमनस्सजातो पुब्बचरितापदानं पकासेन्तो जायं तस्स विपस्सिस्सातिआदिमाह। तं हेट्ठा वुत्तत्थमेव।
82. So aparabhāge attano pubbakammaṃ saritvā somanassajāto pubbacaritāpadānaṃ pakāsento jāyaṃ tassa vipassissātiādimāha. Taṃ heṭṭhā vuttatthameva.
८४. नेमित्तानं सुणित्वानाति एत्थ निमित्तं कारणं सुखदुक्खप्पत्तिहेतुं जानन्तीति नेमित्ता, तेसं नेमित्तानं नक्खत्तपाठकानं वचनं सुणित्वाति अत्थो। सेसं सब्बत्थ उत्तानमेवाति।
84.Nemittānaṃ suṇitvānāti ettha nimittaṃ kāraṇaṃ sukhadukkhappattihetuṃ jānantīti nemittā, tesaṃ nemittānaṃ nakkhattapāṭhakānaṃ vacanaṃ suṇitvāti attho. Sesaṃ sabbattha uttānamevāti.
जातिपूजकत्थेरअपदानवण्णना समत्ता।
Jātipūjakattheraapadānavaṇṇanā samattā.
द्वादसमवग्गवण्णना समत्ता।
Dvādasamavaggavaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi / १०. जातिपूजकत्थेरअपदानं • 10. Jātipūjakattheraapadānaṃ
