| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೧೦. ಜಾತಿಪೂಜಕತ್ಥೇರಅಪದಾನವಣ್ಣನಾ
10. Jātipūjakattheraapadānavaṇṇanā
ಜಾಯಂ ತಸ್ಸ ವಿಪಸ್ಸಿಸ್ಸಾತಿಆದಿಕಂ ಆಯಸ್ಮತೋ ಜಾತಿಪೂಜಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ವಿಪಸ್ಸಿಸ್ಸ ಭಗವತೋ ಕಾಲೇ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ತೋ ನಕ್ಖತ್ತಪಾಠಕೇಹಿ ವಿಪಸ್ಸಿಬೋಧಿಸತ್ತಸ್ಸ ವುತ್ತಲಕ್ಖಣನಿಮಿತ್ತಂ ಸುತ್ವಾ ‘‘ಅಯಂ ಕಿರ ಕುಮಾರೋ ಬುದ್ಧೋ ಹುತ್ವಾ ಸಕಲಲೋಕಸ್ಸ ಅಗ್ಗೋ ಸೇಟ್ಠೋ ಸುತ್ವಾ ಸಬ್ಬಸತ್ತೇ ಸಂಸಾರತೋ ಉದ್ಧರಿಸ್ಸತೀ’’ತಿ ಸುತ್ವಾ ತಂ ಭಗವನ್ತಂ ಕುಮಾರಕಾಲೇಯೇವ ಬುದ್ಧಸ್ಸ ವಿಯ ಮಹಾಪೂಜಮಕಾಸಿ। ಪಚ್ಛಾ ಕಮೇನ ಕುಮಾರಕಾಲಂ ರಾಜಕುಮಾರಕಾಲಂ ರಜ್ಜಕಾಲನ್ತಿ ಕಾಲತ್ತಯಮತಿಕ್ಕಮ್ಮ ಬುದ್ಧೇ ಜಾತೇಪಿ ಮಹಾಪೂಜಂ ಕತ್ವಾ ತತೋ ಚುತೋ ತುಸಿತಾದೀಸು ನಿಬ್ಬತ್ತೋ ದಿಬ್ಬಸುಖಮನುಭವಿತ್ವಾ ಪಚ್ಛಾ ಮನುಸ್ಸೇಸು ಚಕ್ಕವತ್ತಾದಿಮನುಸ್ಸಸುಖಮನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಕುಲಗೇಹೇ ನಿಬ್ಬತ್ತೋ ಸತ್ತಟ್ಠವಸ್ಸಕಾಲೇಯೇವ ಭಗವತಿ ಪಸನ್ನೋ ಪಬ್ಬಜಿತ್ವಾ ವಿಪಸ್ಸನಂ ವಡ್ಢೇತ್ವಾ ನಚಿರಸ್ಸೇವ ಅರಹಾ ಅಹೋಸಿ।
Jāyaṃ tassa vipassissātiādikaṃ āyasmato jātipūjakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle kulagehe nibbatto viññutaṃ patto nakkhattapāṭhakehi vipassibodhisattassa vuttalakkhaṇanimittaṃ sutvā ‘‘ayaṃ kira kumāro buddho hutvā sakalalokassa aggo seṭṭho sutvā sabbasatte saṃsārato uddharissatī’’ti sutvā taṃ bhagavantaṃ kumārakāleyeva buddhassa viya mahāpūjamakāsi. Pacchā kamena kumārakālaṃ rājakumārakālaṃ rajjakālanti kālattayamatikkamma buddhe jātepi mahāpūjaṃ katvā tato cuto tusitādīsu nibbatto dibbasukhamanubhavitvā pacchā manussesu cakkavattādimanussasukhamanubhavitvā imasmiṃ buddhuppāde kulagehe nibbatto sattaṭṭhavassakāleyeva bhagavati pasanno pabbajitvā vipassanaṃ vaḍḍhetvā nacirasseva arahā ahosi.
೮೨. ಸೋ ಅಪರಭಾಗೇ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಜಾಯಂ ತಸ್ಸ ವಿಪಸ್ಸಿಸ್ಸಾತಿಆದಿಮಾಹ। ತಂ ಹೇಟ್ಠಾ ವುತ್ತತ್ಥಮೇವ।
82. So aparabhāge attano pubbakammaṃ saritvā somanassajāto pubbacaritāpadānaṃ pakāsento jāyaṃ tassa vipassissātiādimāha. Taṃ heṭṭhā vuttatthameva.
೮೪. ನೇಮಿತ್ತಾನಂ ಸುಣಿತ್ವಾನಾತಿ ಏತ್ಥ ನಿಮಿತ್ತಂ ಕಾರಣಂ ಸುಖದುಕ್ಖಪ್ಪತ್ತಿಹೇತುಂ ಜಾನನ್ತೀತಿ ನೇಮಿತ್ತಾ, ತೇಸಂ ನೇಮಿತ್ತಾನಂ ನಕ್ಖತ್ತಪಾಠಕಾನಂ ವಚನಂ ಸುಣಿತ್ವಾತಿ ಅತ್ಥೋ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
84.Nemittānaṃ suṇitvānāti ettha nimittaṃ kāraṇaṃ sukhadukkhappattihetuṃ jānantīti nemittā, tesaṃ nemittānaṃ nakkhattapāṭhakānaṃ vacanaṃ suṇitvāti attho. Sesaṃ sabbattha uttānamevāti.
ಜಾತಿಪೂಜಕತ್ಥೇರಅಪದಾನವಣ್ಣನಾ ಸಮತ್ತಾ।
Jātipūjakattheraapadānavaṇṇanā samattā.
ದ್ವಾದಸಮವಗ್ಗವಣ್ಣನಾ ಸಮತ್ತಾ।
Dvādasamavaggavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೧೦. ಜಾತಿಪೂಜಕತ್ಥೇರಅಪದಾನಂ • 10. Jātipūjakattheraapadānaṃ
