| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
११. जतुकण्णिमाणवपुच्छा
11. Jatukaṇṇimāṇavapucchā
११०२.
1102.
‘‘सुत्वानहं वीरमकामकामिं, (इच्चायस्मा जतुकण्णि)
‘‘Sutvānahaṃ vīramakāmakāmiṃ, (iccāyasmā jatukaṇṇi)
ओघातिगं पुट्ठुमकाममागमं।
Oghātigaṃ puṭṭhumakāmamāgamaṃ;
सन्तिपदं ब्रूहि सहजनेत्त, यथातच्छं भगवा ब्रूहि मे तं॥
Santipadaṃ brūhi sahajanetta, yathātacchaṃ bhagavā brūhi me taṃ.
११०३.
1103.
‘‘भगवा हि कामे अभिभुय्य इरियति, आदिच्चोव पथविं तेजी तेजसा।
‘‘Bhagavā hi kāme abhibhuyya iriyati, ādiccova pathaviṃ tejī tejasā;
परित्तपञ्ञस्स मे भूरिपञ्ञ, आचिक्ख धम्मं यमहं विजञ्ञं।
Parittapaññassa me bhūripañña, ācikkha dhammaṃ yamahaṃ vijaññaṃ;
जातिजराय इध विप्पहानं’’॥
Jātijarāya idha vippahānaṃ’’.
११०४.
1104.
‘‘कामेसु विनय गेधं, (जतुकण्णीति भगवा) नेक्खम्मं दट्ठु खेमतो।
‘‘Kāmesu vinaya gedhaṃ, (jatukaṇṇīti bhagavā) nekkhammaṃ daṭṭhu khemato;
उग्गहीतं निरत्तं वा, मा ते विज्जित्थ किञ्चनं॥
Uggahītaṃ nirattaṃ vā, mā te vijjittha kiñcanaṃ.
११०५.
1105.
‘‘यं पुब्बे तं विसोसेहि, पच्छा ते माहु किञ्चनं।
‘‘Yaṃ pubbe taṃ visosehi, pacchā te māhu kiñcanaṃ;
मज्झे चे नो गहेस्ससि, उपसन्तो चरिस्ससि॥
Majjhe ce no gahessasi, upasanto carissasi.
११०६.
1106.
‘‘सब्बसो नामरूपस्मिं, वीतगेधस्स ब्राह्मण।
‘‘Sabbaso nāmarūpasmiṃ, vītagedhassa brāhmaṇa;
आसवास्स न विज्जन्ति, येहि मच्चुवसं वजे’’ति॥
Āsavāssa na vijjanti, yehi maccuvasaṃ vaje’’ti.
जतुकण्णिमाणवपुच्छा एकादसमा निट्ठिता।
Jatukaṇṇimāṇavapucchā ekādasamā niṭṭhitā.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / ११. जतुकण्णिसुत्तवण्णना • 11. Jatukaṇṇisuttavaṇṇanā
