| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
11. ஜதுகண்ணிஸுத்தவண்ணனா
11. Jatukaṇṇisuttavaṇṇanā
1103-4. ஸுத்வானஹந்தி ஜதுகண்ணிஸுத்தங். தத்த² ஸுத்வானஹங் வீரமகாமகாமிந்தி அஹங் ‘‘இதிபி ஸோ ப⁴க³வா’’திஆதி³னா நயேன வீரங் காமானங் அகாமனதோ அகாமகாமிங் பு³த்³த⁴ங் ஸுத்வா. அகாமமாக³மந்தி நிக்காமங் ப⁴க³வந்தங் புச்சி²துங் ஆக³தொம்ஹி. ஸஹஜனெத்தாதி ஸஹஜாதஸப்³ப³ஞ்ஞுதஞ்ஞாணசக்கு². யதா²தச்ச²ந்தி யதா²தத²ங். ப்³ரூஹி மேதி புன யாசந்தோ ப⁴ணதி. யாசந்தோ ஹி ஸஹஸ்ஸக்க²த்தும்பி ப⁴ணெய்ய, கோ பன வாதோ³ த்³விக்க²த்துங். தேஜீ தேஜஸாதி தேஜேன ஸமன்னாக³தோ தேஜஸா அபி⁴பு⁴ய்ய. யமஹங் விஜஞ்ஞங் ஜாதிஜராய இத⁴ விப்பஹானந்தி யமஹங் ஜாதிஜரானங் பஹானபூ⁴தங் த⁴ம்மங் இதே⁴வ ஜானெய்யங்.
1103-4.Sutvānahanti jatukaṇṇisuttaṃ. Tattha sutvānahaṃ vīramakāmakāminti ahaṃ ‘‘itipi so bhagavā’’tiādinā nayena vīraṃ kāmānaṃ akāmanato akāmakāmiṃ buddhaṃ sutvā. Akāmamāgamanti nikkāmaṃ bhagavantaṃ pucchituṃ āgatomhi. Sahajanettāti sahajātasabbaññutaññāṇacakkhu. Yathātacchanti yathātathaṃ. Brūhi meti puna yācanto bhaṇati. Yācanto hi sahassakkhattumpi bhaṇeyya, ko pana vādo dvikkhattuṃ. Tejī tejasāti tejena samannāgato tejasā abhibhuyya. Yamahaṃ vijaññaṃ jātijarāya idha vippahānanti yamahaṃ jātijarānaṃ pahānabhūtaṃ dhammaṃ idheva jāneyyaṃ.
1105-7. அத²ஸ்ஸ ப⁴க³வா தங் த⁴ம்மமாசிக்க²ந்தோ திஸ்ஸோ கா³தா²யோ அபா⁴ஸி. தத்த² நெக்க²ம்மங் த³ட்டு² கே²மதோதி நிப்³பா³னஞ்ச நிப்³பா³னகா³மினிஞ்ச படிபத³ங் ‘‘கே²ம’’ந்தி தி³ஸ்வா. உக்³க³ஹிதந்தி தண்ஹாதி³ட்டி²வஸேன க³ஹிதங். நிரத்தங் வாதி நிரஸ்ஸிதப்³ப³ங் வா, முஞ்சிதப்³ப³ந்தி வுத்தங் ஹோதி. மா தே விஜ்ஜித்தா²தி மா தே அஹோஸி. கிஞ்சனந்தி ராகா³தி³கிஞ்சனங் வாபி தே மா விஜ்ஜித்த². புப்³பே³தி அதீதே ஸங்கா²ரே ஆரப்³ப⁴ உப்பன்னகிலேஸா. ப்³ராஹ்மணாதி ப⁴க³வா ஜதுகண்ணிங் ஆலபதி. ஸேஸங் ஸப்³ப³த்த² பாகடமேவ.
1105-7. Athassa bhagavā taṃ dhammamācikkhanto tisso gāthāyo abhāsi. Tattha nekkhammaṃ daṭṭhu khematoti nibbānañca nibbānagāminiñca paṭipadaṃ ‘‘khema’’nti disvā. Uggahitanti taṇhādiṭṭhivasena gahitaṃ. Nirattaṃ vāti nirassitabbaṃ vā, muñcitabbanti vuttaṃ hoti. Mā te vijjitthāti mā te ahosi. Kiñcananti rāgādikiñcanaṃ vāpi te mā vijjittha. Pubbeti atīte saṅkhāre ārabbha uppannakilesā. Brāhmaṇāti bhagavā jatukaṇṇiṃ ālapati. Sesaṃ sabbattha pākaṭameva.
ஏவங் ப⁴க³வா இமம்பி ஸுத்தங் அரஹத்தனிகூடேனேவ தே³ஸேஸி. தே³ஸனாபரியோஸானே ச புப்³ப³ஸதி³ஸோ ஏவ த⁴ம்மாபி⁴ஸமயோ அஹோஸீதி.
Evaṃ bhagavā imampi suttaṃ arahattanikūṭeneva desesi. Desanāpariyosāne ca pubbasadiso eva dhammābhisamayo ahosīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய ஜதுகண்ணிஸுத்தவண்ணனா நிட்டி²தா.
Suttanipāta-aṭṭhakathāya jatukaṇṇisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 11. ஜதுகண்ணிமாணவபுச்சா² • 11. Jatukaṇṇimāṇavapucchā
