| Library / Tipiṭaka / திபிடக • Tipiṭaka / தே²ரீகா³தா²-அட்ட²கதா² • Therīgāthā-aṭṭhakathā |
2. ஜெந்தாதே²ரீகா³தா²வண்ணனா
2. Jentātherīgāthāvaṇṇanā
யே இமே ஸத்த பொ³ஜ்ஜ²ங்கா³திஆதி³கா ஜெந்தாய தே²ரியா கா³தா². தஸ்ஸா அதீதங் பச்சுப்பன்னஞ்ச வத்து² அபி⁴ரூபனந்தா³வத்து²ஸதி³ஸங். அயங் பன வேஸாலியங் லிச்ச²விராஜகுலே நிப்³ப³த்தீதி அயமேவ விஸேஸோ. ஸத்தா²ரா தே³ஸிதங் த⁴ம்மங் ஸுத்வா தே³ஸனாபரியோஸானே அரஹத்தங் பத்வா அத்தனா அதி⁴க³தங் விஸேஸங் பச்சவெக்கி²த்வா பீதிவஸேன –
Yeime satta bojjhaṅgātiādikā jentāya theriyā gāthā. Tassā atītaṃ paccuppannañca vatthu abhirūpanandāvatthusadisaṃ. Ayaṃ pana vesāliyaṃ licchavirājakule nibbattīti ayameva viseso. Satthārā desitaṃ dhammaṃ sutvā desanāpariyosāne arahattaṃ patvā attanā adhigataṃ visesaṃ paccavekkhitvā pītivasena –
21.
21.
‘‘யே இமே ஸத்த பொ³ஜ்ஜ²ங்கா³, மக்³கா³ நிப்³பா³னபத்தியா;
‘‘Ye ime satta bojjhaṅgā, maggā nibbānapattiyā;
பா⁴விதா தே மயா ஸப்³பே³, யதா² பு³த்³தே⁴ன தே³ஸிதா.
Bhāvitā te mayā sabbe, yathā buddhena desitā.
22.
22.
‘‘தி³ட்டோ² ஹி மே ஸோ ப⁴க³வா, அந்திமோயங் ஸமுஸ்ஸயோ;
‘‘Diṭṭho hi me so bhagavā, antimoyaṃ samussayo;
விக்கீ²ணோ ஜாதிஸங்ஸாரோ, நத்தி² தா³னி புனப்³ப⁴வோ’’தி. –
Vikkhīṇo jātisaṃsāro, natthi dāni punabbhavo’’ti. –
இமா த்³வே கா³தா² அபா⁴ஸி.
Imā dve gāthā abhāsi.
தத்த² யே இமே ஸத்த பொ³ஜ்ஜ²ங்கா³தி யே இமே ஸதித⁴ம்மவிசயவீரியபீதிபஸ்ஸத்³தி⁴ஸமாதி⁴உபெக்கா²ஸங்கா²தா போ³தி⁴யா யதா²வுத்தாய த⁴ம்மஸாமக்³கி³யா , போ³தி⁴ஸ்ஸ வா பு³ஜ்ஜ²னகஸ்ஸ தங்ஸமங்கி³னோ புக்³க³லஸ்ஸ அங்க³பூ⁴தத்தா ‘‘பொ³ஜ்ஜ²ங்கா³’’தி லத்³த⁴னாமா ஸத்த த⁴ம்மா. மக்³கா³ நிப்³பா³னபத்தியாதி நிப்³பா³னாதி⁴க³மஸ்ஸ உபாயபூ⁴தா. பா⁴விதா தே மயா ஸப்³பே³, யதா² பு³த்³தே⁴ன தே³ஸிதாதி தே ஸத்ததிங்ஸ போ³தி⁴பக்கி²யத⁴ம்மா ஸப்³பே³பி மயா யதா² பு³த்³தே⁴ன ப⁴க³வதா தே³ஸிதா, ததா² மயா உப்பாதி³தா ச வட்³டி⁴தா ச.
Tattha ye ime satta bojjhaṅgāti ye ime satidhammavicayavīriyapītipassaddhisamādhiupekkhāsaṅkhātā bodhiyā yathāvuttāya dhammasāmaggiyā , bodhissa vā bujjhanakassa taṃsamaṅgino puggalassa aṅgabhūtattā ‘‘bojjhaṅgā’’ti laddhanāmā satta dhammā. Maggā nibbānapattiyāti nibbānādhigamassa upāyabhūtā. Bhāvitā te mayā sabbe, yathā buddhena desitāti te sattatiṃsa bodhipakkhiyadhammā sabbepi mayā yathā buddhena bhagavatā desitā, tathā mayā uppāditā ca vaḍḍhitā ca.
தி³ட்டோ² ஹி மே ஸோ ப⁴க³வாதி ஹி-ஸத்³தோ³ ஹேதுஅத்தோ². யஸ்மா ஸோ ப⁴க³வா த⁴ம்மகாயோ ஸம்மாஸம்பு³த்³தோ⁴ அத்தனா அதி⁴க³தஅரியத⁴ம்மத³ஸ்ஸனேன தி³ட்டோ², தஸ்மா அந்திமோயங் ஸமுஸ்ஸயோதி யோஜனா. அரியத⁴ம்மத³ஸ்ஸனேன ஹி பு³த்³தா⁴ ப⁴க³வந்தோ அஞ்ஞே ச அரியா தி³ட்டா² நாம ஹொந்தி, ந ரூபகாயத³ஸ்ஸனமத்தேன. யதா²ஹ – ‘‘யோ கோ², வக்கலி, த⁴ம்மங் பஸ்ஸதி, ஸோ மங் பஸ்ஸதீ’’தி (ஸங்॰ நி॰ 3.87) ச ‘‘ஸுதவா ச கோ², பி⁴க்க²வே, அரியஸாவகோ அரியானங் த³ஸ்ஸாவீ’’தி (ம॰ நி॰ 1.20; ஸங்॰ நி॰ 3.1) ச ஆதி³. ஸேஸங் வுத்தனயமேவ.
Diṭṭho hi me so bhagavāti hi-saddo hetuattho. Yasmā so bhagavā dhammakāyo sammāsambuddho attanā adhigataariyadhammadassanena diṭṭho, tasmā antimoyaṃ samussayoti yojanā. Ariyadhammadassanena hi buddhā bhagavanto aññe ca ariyā diṭṭhā nāma honti, na rūpakāyadassanamattena. Yathāha – ‘‘yo kho, vakkali, dhammaṃ passati, so maṃ passatī’’ti (saṃ. ni. 3.87) ca ‘‘sutavā ca kho, bhikkhave, ariyasāvako ariyānaṃ dassāvī’’ti (ma. ni. 1.20; saṃ. ni. 3.1) ca ādi. Sesaṃ vuttanayameva.
ஜெந்தாதே²ரீகா³தா²வண்ணனா நிட்டி²தா.
Jentātherīgāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரீகா³தா²பாளி • Therīgāthāpāḷi / 2. ஜெந்தாதே²ரீகா³தா² • 2. Jentātherīgāthā
