| Library / Tipiṭaka / তিপিটক • Tipiṭaka / থেরীগাথা-অট্ঠকথা • Therīgāthā-aṭṭhakathā |
২. জেন্তাথেরীগাথাৰণ্ণনা
2. Jentātherīgāthāvaṇṇanā
যে ইমে সত্ত বোজ্ঝঙ্গাতিআদিকা জেন্তায থেরিযা গাথা। তস্সা অতীতং পচ্চুপ্পন্নঞ্চ ৰত্থু অভিরূপনন্দাৰত্থুসদিসং। অযং পন ৰেসালিযং লিচ্ছৰিরাজকুলে নিব্বত্তীতি অযমেৰ ৰিসেসো। সত্থারা দেসিতং ধম্মং সুত্ৰা দেসনাপরিযোসানে অরহত্তং পত্ৰা অত্তনা অধিগতং ৰিসেসং পচ্চৰেক্খিত্ৰা পীতিৰসেন –
Yeime satta bojjhaṅgātiādikā jentāya theriyā gāthā. Tassā atītaṃ paccuppannañca vatthu abhirūpanandāvatthusadisaṃ. Ayaṃ pana vesāliyaṃ licchavirājakule nibbattīti ayameva viseso. Satthārā desitaṃ dhammaṃ sutvā desanāpariyosāne arahattaṃ patvā attanā adhigataṃ visesaṃ paccavekkhitvā pītivasena –
২১.
21.
‘‘যে ইমে সত্ত বোজ্ঝঙ্গা, মগ্গা নিব্বানপত্তিযা।
‘‘Ye ime satta bojjhaṅgā, maggā nibbānapattiyā;
ভাৰিতা তে মযা সব্বে, যথা বুদ্ধেন দেসিতা॥
Bhāvitā te mayā sabbe, yathā buddhena desitā.
২২.
22.
‘‘দিট্ঠো হি মে সো ভগৰা, অন্তিমোযং সমুস্সযো।
‘‘Diṭṭho hi me so bhagavā, antimoyaṃ samussayo;
ৰিক্খীণো জাতিসংসারো, নত্থি দানি পুনব্ভৰো’’তি॥ –
Vikkhīṇo jātisaṃsāro, natthi dāni punabbhavo’’ti. –
ইমা দ্ৰে গাথা অভাসি।
Imā dve gāthā abhāsi.
তত্থ যে ইমে সত্ত বোজ্ঝঙ্গাতি যে ইমে সতিধম্মৰিচযৰীরিযপীতিপস্সদ্ধিসমাধিউপেক্খাসঙ্খাতা বোধিযা যথাৰুত্তায ধম্মসামগ্গিযা , বোধিস্স ৰা বুজ্ঝনকস্স তংসমঙ্গিনো পুগ্গলস্স অঙ্গভূতত্তা ‘‘বোজ্ঝঙ্গা’’তি লদ্ধনামা সত্ত ধম্মা। মগ্গা নিব্বানপত্তিযাতি নিব্বানাধিগমস্স উপাযভূতা। ভাৰিতা তে মযা সব্বে, যথা বুদ্ধেন দেসিতাতি তে সত্ততিংস বোধিপক্খিযধম্মা সব্বেপি মযা যথা বুদ্ধেন ভগৰতা দেসিতা, তথা মযা উপ্পাদিতা চ ৰড্ঢিতা চ।
Tattha ye ime satta bojjhaṅgāti ye ime satidhammavicayavīriyapītipassaddhisamādhiupekkhāsaṅkhātā bodhiyā yathāvuttāya dhammasāmaggiyā , bodhissa vā bujjhanakassa taṃsamaṅgino puggalassa aṅgabhūtattā ‘‘bojjhaṅgā’’ti laddhanāmā satta dhammā. Maggā nibbānapattiyāti nibbānādhigamassa upāyabhūtā. Bhāvitā te mayā sabbe, yathā buddhena desitāti te sattatiṃsa bodhipakkhiyadhammā sabbepi mayā yathā buddhena bhagavatā desitā, tathā mayā uppāditā ca vaḍḍhitā ca.
দিট্ঠো হি মে সো ভগৰাতি হি-সদ্দো হেতুঅত্থো। যস্মা সো ভগৰা ধম্মকাযো সম্মাসম্বুদ্ধো অত্তনা অধিগতঅরিযধম্মদস্সনেন দিট্ঠো, তস্মা অন্তিমোযং সমুস্সযোতি যোজনা। অরিযধম্মদস্সনেন হি বুদ্ধা ভগৰন্তো অঞ্ঞে চ অরিযা দিট্ঠা নাম হোন্তি, ন রূপকাযদস্সনমত্তেন। যথাহ – ‘‘যো খো, ৰক্কলি, ধম্মং পস্সতি, সো মং পস্সতী’’তি (সং॰ নি॰ ৩.৮৭) চ ‘‘সুতৰা চ খো, ভিক্খৰে, অরিযসাৰকো অরিযানং দস্সাৰী’’তি (ম॰ নি॰ ১.২০; সং॰ নি॰ ৩.১) চ আদি। সেসং ৰুত্তনযমেৰ।
Diṭṭho hi me so bhagavāti hi-saddo hetuattho. Yasmā so bhagavā dhammakāyo sammāsambuddho attanā adhigataariyadhammadassanena diṭṭho, tasmā antimoyaṃ samussayoti yojanā. Ariyadhammadassanena hi buddhā bhagavanto aññe ca ariyā diṭṭhā nāma honti, na rūpakāyadassanamattena. Yathāha – ‘‘yo kho, vakkali, dhammaṃ passati, so maṃ passatī’’ti (saṃ. ni. 3.87) ca ‘‘sutavā ca kho, bhikkhave, ariyasāvako ariyānaṃ dassāvī’’ti (ma. ni. 1.20; saṃ. ni. 3.1) ca ādi. Sesaṃ vuttanayameva.
জেন্তাথেরীগাথাৰণ্ণনা নিট্ঠিতা।
Jentātherīgāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরীগাথাপাল়ি • Therīgāthāpāḷi / ২. জেন্তাথেরীগাথা • 2. Jentātherīgāthā
