| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. ஜேதவனஸுத்தவண்ணனா
8. Jetavanasuttavaṇṇanā
48. அட்ட²மே இத³ங் ஹி தங் ஜேதவனந்தி அனாத²பிண்டி³கோ தே³வபுத்தோ ஜேதவனஸ்ஸ சேவ பு³த்³தா⁴தீ³னஞ்ச வண்ணப⁴ணனத்த²ங் ஆக³தோ ஏவமாஹ. இஸிஸங்க⁴னிஸேவிதந்தி பி⁴க்கு²ஸங்க⁴னிஸேவிதங்.
48. Aṭṭhame idaṃ hi taṃ jetavananti anāthapiṇḍiko devaputto jetavanassa ceva buddhādīnañca vaṇṇabhaṇanatthaṃ āgato evamāha. Isisaṅghanisevitanti bhikkhusaṅghanisevitaṃ.
ஏவங் பட²மகா³தா²ய ஜேதவனஸ்ஸ வண்ணங் கதெ²த்வா இதா³னி அரியமக்³க³ஸ்ஸ கதெ²ந்தோ கம்மங் விஜ்ஜாதிஆதி³மாஹ. தத்த² கம்மந்தி மக்³க³சேதனா. விஜ்ஜாதி மக்³க³பஞ்ஞா. த⁴ம்மோதி ஸமாதி⁴பக்கி²கா த⁴ம்மா. ஸீலங் ஜீவிதமுத்தமந்தி ஸீலே பதிட்டி²தஸ்ஸ ஜீவிதங் உத்தமந்தி த³ஸ்ஸேதி. அத² வா விஜ்ஜாதி தி³ட்டி²ஸங்கப்பா. த⁴ம்மோதி வாயாமஸதிஸமாத⁴யோ. ஸீலந்தி வாசாகம்மந்தாஜீவா. ஜீவிதமுத்தமந்தி ஏதஸ்மிங் ஸீலே டி²தஸ்ஸ ஜீவிதங் நாம உத்தமங். ஏதேன மச்சா ஸுஜ்ஜ²ந்தீதி ஏதேன அட்ட²ங்கி³கமக்³கே³ன ஸத்தா விஸுஜ்ஜ²ந்தி.
Evaṃ paṭhamagāthāya jetavanassa vaṇṇaṃ kathetvā idāni ariyamaggassa kathento kammaṃ vijjātiādimāha. Tattha kammanti maggacetanā. Vijjāti maggapaññā. Dhammoti samādhipakkhikā dhammā. Sīlaṃ jīvitamuttamanti sīle patiṭṭhitassa jīvitaṃ uttamanti dasseti. Atha vā vijjāti diṭṭhisaṅkappā. Dhammoti vāyāmasatisamādhayo. Sīlanti vācākammantājīvā. Jīvitamuttamanti etasmiṃ sīle ṭhitassa jīvitaṃ nāma uttamaṃ. Etena maccā sujjhantīti etena aṭṭhaṅgikamaggena sattā visujjhanti.
தஸ்மாதி யஸ்மா மக்³கே³ன ஸுஜ்ஜ²ந்தி, ந கொ³த்தத⁴னேஹி, தஸ்மா. யோனிஸோ விசினே த⁴ம்மந்தி உபாயேன ஸமாதி⁴பக்கி²யத⁴ம்மங் விசினெய்ய. ஏவங் தத்த² விஸுஜ்ஜ²தீதி ஏவங் தஸ்மிங் அரியமக்³கே³ விஸுஜ்ஜ²தி. அத² வா யோனிஸோ விசினே த⁴ம்மந்தி உபாயேன பஞ்சக்க²ந்த⁴த⁴ம்மங் விசினெய்ய. ஏவங் தத்த² விஸுஜ்ஜ²தீதி ஏவங் தேஸு சதூஸு ஸச்சேஸு விஸுஜ்ஜ²தி.
Tasmāti yasmā maggena sujjhanti, na gottadhanehi, tasmā. Yoniso vicine dhammanti upāyena samādhipakkhiyadhammaṃ vicineyya. Evaṃ tattha visujjhatīti evaṃ tasmiṃ ariyamagge visujjhati. Atha vā yoniso vicine dhammanti upāyena pañcakkhandhadhammaṃ vicineyya. Evaṃ tattha visujjhatīti evaṃ tesu catūsu saccesu visujjhati.
இதா³னி ஸாரிபுத்தத்தே²ரஸ்ஸ வண்ணங் கதெ²ந்தோ ஸாரிபுத்தோவாதிஆதி³மாஹ. தத்த² ஸாரிபுத்தோவாதி அவதா⁴ரணவசனங், ஏதேஹி பஞ்ஞாதீ³ஹி ஸாரிபுத்தோவ ஸெய்யோதி வத³தி. உபஸமேனாதி கிலேஸஉபஸமேன . பாரங் க³தோதி நிப்³பா³னங் க³தோ. யோ கோசி நிப்³பா³னங் பத்தோ பி⁴க்கு², ஸோ ஏதாவபரமோ ஸியா, ந தே²ரேன உத்தரிதரோ நாம அத்தீ²தி வத³தி. ஸேஸங் உத்தானமேவாதி. அட்ட²மங்.
Idāni sāriputtattherassa vaṇṇaṃ kathento sāriputtovātiādimāha. Tattha sāriputtovāti avadhāraṇavacanaṃ, etehi paññādīhi sāriputtova seyyoti vadati. Upasamenāti kilesaupasamena . Pāraṃ gatoti nibbānaṃ gato. Yo koci nibbānaṃ patto bhikkhu, so etāvaparamo siyā, na therena uttaritaro nāma atthīti vadati. Sesaṃ uttānamevāti. Aṭṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. ஜேதவனஸுத்தங் • 8. Jetavanasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. ஜேதவனஸுத்தவண்ணனா • 8. Jetavanasuttavaṇṇanā
