| Library / Tipiṭaka / д̇ибидага • Tipiṭaka / д̇хаммасан̇г̇ан̣и-адтагат̇аа • Dhammasaṅgaṇi-aṭṭhakathā |
д̇хаммуд̣̇д̣̇зсавааро
Dhammuddesavāro
жхаанан̇г̇араасиван̣н̣анаа
Jhānaṅgarāsivaṇṇanā
вид̇аггзд̇ийд̇и вид̇агго; вид̇агганам̣ ваа вид̇агго; уухананд̇и вуд̇д̇ам̣ ход̇и. свааяам̣ аарамман̣з жид̇д̇асса абхиниробаналагкан̣о. со хи аарамман̣з жид̇д̇ам̣ ааробзд̇и. яат̇аа хи гожи рааж̇аваллабхам̣ н̃аад̇им̣ ваа мид̇д̇ам̣ ваа ниссааяа рааж̇аг̇зхам̣ аарохад̇и, звам̣ вид̇аггам̣ ниссааяа жид̇д̇ам̣ аарамман̣ам̣ аарохад̇и. д̇асмаа со аарамман̣з жид̇д̇асса абхиниробаналагкан̣од̇и вуд̇д̇о. нааг̇асзнад̇т̇зро банааха – аагоданалагкан̣о вид̇агго. ‘‘яат̇аа, махаарааж̇а, бхзрий аагодид̇аа ат̇а бажчаа ануравад̇и анусад̣̇д̣̇ааяад̇и, звамзва ко, махаарааж̇а, яат̇аа аагоданаа звам̣ вид̇агго д̣̇адтаб̣б̣о. яат̇аа бажчаа анураванаа анусад̣̇д̣̇ааяанаа звам̣ вижааро д̣̇адтаб̣б̣о’’д̇и (ми. ба. 2.3.14 т̇огам̣ висад̣̇исам̣). свааяам̣ аахананабарияаахананарасо. д̇ат̇аа хи д̇зна яог̇ааважаро аарамман̣ам̣ вид̇аггаахад̇ам̣ вид̇аггабарияаахад̇ам̣ гарод̇ийд̇и вужжад̇и. аарамман̣з жид̇д̇асса аанаяанабажжубадтаано.
Vitakketīti vitakko; vitakkanaṃ vā vitakko; ūhananti vuttaṃ hoti. Svāyaṃ ārammaṇe cittassa abhiniropanalakkhaṇo. So hi ārammaṇe cittaṃ āropeti. Yathā hi koci rājavallabhaṃ ñātiṃ vā mittaṃ vā nissāya rājagehaṃ ārohati, evaṃ vitakkaṃ nissāya cittaṃ ārammaṇaṃ ārohati. Tasmā so ārammaṇe cittassa abhiniropanalakkhaṇoti vutto. Nāgasenatthero panāha – ākoṭanalakkhaṇo vitakko. ‘‘Yathā, mahārāja, bherī ākoṭitā atha pacchā anuravati anusaddāyati, evameva kho, mahārāja, yathā ākoṭanā evaṃ vitakko daṭṭhabbo. Yathā pacchā anuravanā anusaddāyanā evaṃ vicāro daṭṭhabbo’’ti (mi. pa. 2.3.14 thokaṃ visadisaṃ). Svāyaṃ āhananapariyāhananaraso. Tathā hi tena yogāvacaro ārammaṇaṃ vitakkāhataṃ vitakkapariyāhataṃ karotīti vuccati. Ārammaṇe cittassa ānayanapaccupaṭṭhāno.
аарамман̣з д̇зна жид̇д̇ам̣ вижарад̇ийд̇и вижааро; вижаран̣ам̣ ваа вижааро. анусан̃жаран̣анд̇и вуд̇д̇ам̣ ход̇и. свааяам̣ аарамман̣аанумаж̇ж̇аналагкан̣о. д̇ад̇т̇а сахаж̇аад̇аануяож̇анарасо. жид̇д̇асса ануббаб̣анд̇хабажжубадтаано. санд̇зби жа нзсам̣ гад̇т̇ажи авияог̇з ол̣ааригадтзна буб̣б̣ан̇г̇амадтзна жа гхан̣даабхигхаад̇о вияа абхиниробанадтзна жа жзд̇асо батамаабхинибаад̇о вид̇агго . сукумадтзна анумаж̇ж̇анасабхаавадтзна жа гхан̣даанураво вияа ануббаб̣анд̇хо вижааро. вибпаараваа жзд̇т̇а вид̇агго, батамуббад̇д̇игаалз барибпанд̣̇абхууд̇о жид̇д̇асса. аагаасз уббад̇ид̇угаамасса багкино багкавигкзбо вияа. бад̣̇умаабхимукабаад̇о вияа жа г̇анд̇хаануб̣ад̣̇д̇хажзд̇асо бхамарасса. санд̇авуд̇д̇и вижааро наад̇ибарибпанд̣̇анабхааво жид̇д̇асса, аагаасз уббад̇ид̇асса багкино багкаббасааран̣ам̣ вияа, бариб̣бхаманам̣ вияа жа бад̣̇умаабхимукабад̇ид̇асса бхамарасса бад̣̇умасса убарибхааг̇з.
Ārammaṇe tena cittaṃ vicaratīti vicāro; vicaraṇaṃ vā vicāro. Anusañcaraṇanti vuttaṃ hoti. Svāyaṃ ārammaṇānumajjanalakkhaṇo. Tattha sahajātānuyojanaraso. Cittassa anuppabandhapaccupaṭṭhāno. Santepi ca nesaṃ katthaci aviyoge oḷārikaṭṭhena pubbaṅgamaṭṭhena ca ghaṇṭābhighāto viya abhiniropanaṭṭhena ca cetaso paṭhamābhinipāto vitakko . Sukhumaṭṭhena anumajjanasabhāvaṭṭhena ca ghaṇṭānuravo viya anuppabandho vicāro. Vipphāravā cettha vitakko, paṭhamuppattikāle paripphandabhūto cittassa. Ākāse uppatitukāmassa pakkhino pakkhavikkhepo viya. Padumābhimukhapāto viya ca gandhānubaddhacetaso bhamarassa. Santavutti vicāro nātiparipphandanabhāvo cittassa, ākāse uppatitassa pakkhino pakkhappasāraṇaṃ viya, paribbhamanaṃ viya ca padumābhimukhapatitassa bhamarassa padumassa uparibhāge.
адтагат̇ааяам̣ бана ‘‘аагаасз г̇ажчад̇о махаасагун̣асса убхохи багкзхи ваад̇ам̣ г̇ахзд̇ваа багкз саннисийд̣̇аабзд̇ваа г̇аманам̣ вияа аарамман̣з жзд̇асо абхиниробанабхаавзна бавад̇д̇о вид̇агго. со хи згаг̇г̇о худ̇ваа аббзд̇и ваад̇аг̇г̇ахан̣ад̇т̇ам̣ багкз панд̣̇аабаяамаанасса г̇аманам̣ вияа. анумаж̇ж̇абхаавзна бавад̇д̇о вижааро. со хи аарамман̣ам̣ анумаж̇ж̇ад̇ийд̇и вуд̇д̇ам̣, д̇ам̣ ануббаб̣анд̇ханзна бавад̇д̇ияам̣ ад̇ивияа яуж̇ж̇ад̇и. со бана нзсам̣ висзсо батамад̣̇уд̇ияаж̇жхаанзсу баагадо ход̇и. абижа малаг̇г̇ахид̇ам̣ гам̣сабхааж̇анам̣ згзна хад̇т̇зна д̣̇ал̣хам̣ г̇ахзд̇ваа ид̇арзна хад̇т̇зна жун̣н̣ад̇злаваалан̣д̣убагзна баримаж̇ж̇анд̇асса д̣̇ал̣хаг̇г̇ахан̣ахад̇т̇о вияа вид̇агго, баримаж̇ж̇анахад̇т̇о вияа вижааро. д̇ат̇аа гумбхагаарасса д̣̇ан̣д̣аббахаарзна жаггам̣ бхамаяид̇ваа бхааж̇анам̣ гаронд̇асса уббийл̣анахад̇т̇о вияа вид̇агго, ид̇о жид̇о жа сан̃жаран̣ахад̇т̇о вияа вижааро. д̇ат̇аа ман̣д̣алам̣ гаронд̇асса маж̇жхз саннирумбхид̇ваа тид̇аган̣даго вияа абхиниробано вид̇агго, б̣ахибариб̣бхаманаган̣даго вияа анумаж̇ж̇амаано вижааро.
Aṭṭhakathāyaṃ pana ‘‘ākāse gacchato mahāsakuṇassa ubhohi pakkhehi vātaṃ gahetvā pakkhe sannisīdāpetvā gamanaṃ viya ārammaṇe cetaso abhiniropanabhāvena pavatto vitakko. So hi ekaggo hutvā appeti vātaggahaṇatthaṃ pakkhe phandāpayamānassa gamanaṃ viya. Anumajjabhāvena pavatto vicāro. So hi ārammaṇaṃ anumajjatīti vuttaṃ, taṃ anuppabandhanena pavattiyaṃ ativiya yujjati. So pana nesaṃ viseso paṭhamadutiyajjhānesu pākaṭo hoti. Apica malaggahitaṃ kaṃsabhājanaṃ ekena hatthena daḷhaṃ gahetvā itarena hatthena cuṇṇatelavālaṇḍupakena parimajjantassa daḷhaggahaṇahattho viya vitakko, parimajjanahattho viya vicāro. Tathā kumbhakārassa daṇḍappahārena cakkaṃ bhamayitvā bhājanaṃ karontassa uppīḷanahattho viya vitakko, ito cito ca sañcaraṇahattho viya vicāro. Tathā maṇḍalaṃ karontassa majjhe sannirumbhitvā ṭhitakaṇṭako viya abhiniropano vitakko, bahiparibbhamanakaṇṭako viya anumajjamāno vicāro.
бин̣аяад̇ийд̇и бийд̇и. саа самбияааяаналагкан̣аа. гааяажид̇д̇абийн̣анарасаа, паран̣арасаа ваа. од̣̇аг̇яабажжубадтаанаа. саа банзсаа куд̣̇д̣̇игаабийд̇и, кан̣игаабийд̇и, огганд̇игаабийд̇и, уб̣б̣зг̇аабийд̇и, паран̣аабийд̇ийд̇и бан̃жавид̇хаа ход̇и.
Piṇayatīti pīti. Sā sampiyāyanalakkhaṇā. Kāyacittapīṇanarasā, pharaṇarasā vā. Odagyapaccupaṭṭhānā. Sā panesā khuddikāpīti, khaṇikāpīti, okkantikāpīti, ubbegāpīti, pharaṇāpītīti pañcavidhā hoti.
д̇ад̇т̇а куд̣̇д̣̇игаабийд̇и сарийрз ломахам̣самад̇д̇амзва гаад̇ум̣ саггод̇и. кан̣игаабийд̇и кан̣з кан̣з виж̇ж̇уббаад̣̇асад̣̇исаа ход̇и. огганд̇игаабийд̇и , самуд̣̇д̣̇ад̇ийрам̣ вийжи вияа, гааяам̣ оггамид̇ваа оггамид̇ваа бхиж̇ж̇ад̇и. уб̣б̣зг̇аабийд̇и б̣алавад̇ий ход̇и, гааяам̣ уд̣̇д̇хаг̇г̇ам̣ гад̇ваа аагаасз лан̇гхаабанаббамаан̣аббад̇д̇аа. д̇ат̇аа хи бун̣н̣аваллигаваасий махаад̇иссад̇т̇зро бун̣н̣амад̣̇ивасз сааяам̣ жзд̇ияан̇г̇ан̣ам̣ г̇анд̇ваа жанд̣̇аалогам̣ д̣̇исваа махаажзд̇ияаабхимуко худ̇ваа ‘имааяа вад̇а взлааяа жад̇ассо барисаа махаажзд̇ияам̣ ванд̣̇анд̇ий’д̇и багад̇ияаа д̣̇идтаарамман̣авасзна б̣уд̣̇д̇хаарамман̣ам̣ уб̣б̣зг̇ам̣ бийд̇им̣ уббаад̣̇зд̇ваа суд̇хаад̇алз бахадажид̇раг̇зн̣д̣уго вияа аагаасз уббад̇ид̇ваа махаажзд̇ияан̇г̇ан̣зязва адтааси.
Tattha khuddikāpīti sarīre lomahaṃsamattameva kātuṃ sakkoti. Khaṇikāpīti khaṇe khaṇe vijjuppādasadisā hoti. Okkantikāpīti , samuddatīraṃ vīci viya, kāyaṃ okkamitvā okkamitvā bhijjati. Ubbegāpīti balavatī hoti, kāyaṃ uddhaggaṃ katvā ākāse laṅghāpanappamāṇappattā. Tathā hi puṇṇavallikavāsī mahātissatthero puṇṇamadivase sāyaṃ cetiyaṅgaṇaṃ gantvā candālokaṃ disvā mahācetiyābhimukho hutvā ‘imāya vata velāya catasso parisā mahācetiyaṃ vandantī’ti pakatiyā diṭṭhārammaṇavasena buddhārammaṇaṃ ubbegaṃ pītiṃ uppādetvā sudhātale pahaṭacitrageṇḍuko viya ākāse uppatitvā mahācetiyaṅgaṇeyeva aṭṭhāsi.
д̇ат̇аа г̇ириган̣д̣агавихаарасса убаниссаяз вад̇д̇агаалагаг̇аамз згаа гулад̇хийд̇ааби б̣алаваб̣уд̣̇д̇хаарамман̣ааяа уб̣б̣зг̇ааяа бийд̇ияаа аагаасз лан̇гхзси. д̇ассаа гира маад̇аабид̇аро сааяам̣ д̇хаммасаванад̇т̇ааяа вихаарам̣ г̇ажчанд̇аа ‘амма, д̇вам̣ г̇арубхаараа, агаалз вижарид̇ум̣ на саггоси, маяам̣ д̇уяхам̣ бад̇д̇им̣ гад̇ваа д̇хаммам̣ соссаамаа’д̇и аг̇амам̣су. саа г̇анд̇угаамааби д̇зсам̣ важанам̣ бадиб̣аахид̇ум̣ асаггонд̇ий гхарз охийяид̇ваа гхарад̣̇ваарз тад̇ваа жанд̣̇аалогзна г̇ириган̣д̣агз аагаасажзд̇ияан̇г̇ан̣ам̣ ологзнд̇ий жзд̇ияасса д̣̇ийбабууж̇ам̣ ад̣̇д̣̇аса. жад̇ассо жа барисаа маалааг̇анд̇хаад̣̇ийхи жзд̇ияабууж̇ам̣ гад̇ваа бад̣̇агкин̣ам̣ гаронд̇ияо бхигкусан̇гхасса жа г̇ан̣асаж̇жхааяасад̣̇д̣̇ам̣ ассоси. ат̇ассаа ‘д̇хан̃н̃аа вад̇имз мануссаа яз вихаарам̣ г̇анд̇ваа зваруубз жзд̇ияан̇г̇ан̣з анусан̃жарид̇ум̣ зваруубан̃жа мад̇хурам̣ д̇хаммагат̇ам̣ сод̇ум̣ лабханд̇ий’д̇и муд̇д̇араасисад̣̇исам̣ жзд̇ияам̣ бассанд̇ияаа зва уб̣б̣зг̇аабийд̇и уд̣̇абаад̣̇и. саа аагаасз лан̇гхид̇ваа маад̇аабид̇уунам̣ буримад̇арам̣язва аагаасад̇о жзд̇ияан̇г̇ан̣з оруяха жзд̇ияам̣ ванд̣̇ид̇ваа д̇хаммам̣ сун̣амаанаа адтааси. ат̇а нам̣ маад̇аабид̇аро ааг̇анд̇ваа ‘амма, д̇вам̣ гад̇арзна маг̇г̇зна ааг̇ад̇аасий’д̇и бужчим̣су. саа ‘аагаасзна ааг̇ад̇аамхи, на маг̇г̇знаа’д̇и вад̇ваа ‘амма, аагаасзна наама кийн̣аасаваа сан̃жаранд̇и, д̇вам̣ гат̇ам̣ ааг̇ад̇аа’д̇и будтаа ааха – ‘маяхам̣ жанд̣̇аалогзна жзд̇ияам̣ ологзнд̇ияаа тид̇ааяа б̣уд̣̇д̇хаарамман̣аа б̣алавабийд̇и уббаж̇ж̇ад̇и, ат̇аахам̣ нзва ад̇д̇ано тид̇абхаавам̣ на нисиннабхаавам̣ ан̃н̃аасим̣, г̇ахид̇анимид̇д̇знзва бана аагаасам̣ лан̇гхид̇ваа жзд̇ияан̇г̇ан̣з бад̇идтид̇аамхий’д̇и. звам̣ уб̣б̣зг̇аабийд̇и аагаасз лан̇гхаабанаббамаан̣аа ход̇и.
Tathā girikaṇḍakavihārassa upanissaye vattakālakagāme ekā kuladhītāpi balavabuddhārammaṇāya ubbegāya pītiyā ākāse laṅghesi. Tassā kira mātāpitaro sāyaṃ dhammasavanatthāya vihāraṃ gacchantā ‘amma, tvaṃ garubhārā, akāle vicarituṃ na sakkosi, mayaṃ tuyhaṃ pattiṃ katvā dhammaṃ sossāmā’ti agamaṃsu. Sā gantukāmāpi tesaṃ vacanaṃ paṭibāhituṃ asakkontī ghare ohīyitvā gharadvāre ṭhatvā candālokena girikaṇḍake ākāsacetiyaṅgaṇaṃ olokentī cetiyassa dīpapūjaṃ addasa. Catasso ca parisā mālāgandhādīhi cetiyapūjaṃ katvā padakkhiṇaṃ karontiyo bhikkhusaṅghassa ca gaṇasajjhāyasaddaṃ assosi. Athassā ‘dhaññā vatime manussā ye vihāraṃ gantvā evarūpe cetiyaṅgaṇe anusañcarituṃ evarūpañca madhuraṃ dhammakathaṃ sotuṃ labhantī’ti muttarāsisadisaṃ cetiyaṃ passantiyā eva ubbegāpīti udapādi. Sā ākāse laṅghitvā mātāpitūnaṃ purimataraṃyeva ākāsato cetiyaṅgaṇe oruyha cetiyaṃ vanditvā dhammaṃ suṇamānā aṭṭhāsi. Atha naṃ mātāpitaro āgantvā ‘amma, tvaṃ katarena maggena āgatāsī’ti pucchiṃsu. Sā ‘ākāsena āgatāmhi, na maggenā’ti vatvā ‘amma, ākāsena nāma khīṇāsavā sañcaranti, tvaṃ kathaṃ āgatā’ti puṭṭhā āha – ‘mayhaṃ candālokena cetiyaṃ olokentiyā ṭhitāya buddhārammaṇā balavapīti uppajjati, athāhaṃ neva attano ṭhitabhāvaṃ na nisinnabhāvaṃ aññāsiṃ, gahitanimitteneva pana ākāsaṃ laṅghitvā cetiyaṅgaṇe patiṭṭhitāmhī’ti. Evaṃ ubbegāpīti ākāse laṅghāpanappamāṇā hoti.
паран̣абийд̇ияаа бана уббаннааяа сагаласарийрам̣ д̇хамид̇ваа буурид̇авад̇т̇и вияа, махад̇аа уд̣̇агогхзна багканд̣̇абаб̣б̣ад̇агужчи вияа жа анубарибпудам̣ ход̇и. саа банзсаа бан̃жавид̇хаа бийд̇и г̇аб̣бхам̣ г̇ан̣ханд̇ий барибаагам̣ г̇ажчанд̇ий д̣̇увид̇хам̣ бассад̣̇д̇хим̣ барибуурзд̇и – гааяабассад̣̇д̇хин̃жа жид̇д̇абассад̣̇д̇хин̃жа. бассад̣̇д̇хи г̇аб̣бхам̣ г̇ан̣ханд̇ий барибаагам̣ г̇ажчанд̇ий д̣̇увид̇хам̣ сукам̣ барибуурзд̇и – гааяигам̣ жзд̇асиган̃жа. сукам̣ г̇аб̣бхам̣ г̇ан̣ханд̇ам̣ барибаагам̣ г̇ажчанд̇ам̣ д̇ивид̇хам̣ самаад̇хим̣ барибуурзд̇и – кан̣игасамаад̇хим̣ убажаарасамаад̇хим̣ аббанаасамаад̇хинд̇и. д̇аасу табзд̇ваа аббанаасамаад̇хибууригам̣ ид̇араа д̣̇взби ид̇ха яуж̇ж̇анд̇и.
Pharaṇapītiyā pana uppannāya sakalasarīraṃ dhamitvā pūritavatthi viya, mahatā udakoghena pakkhandapabbatakucchi viya ca anuparipphuṭaṃ hoti. Sā panesā pañcavidhā pīti gabbhaṃ gaṇhantī paripākaṃ gacchantī duvidhaṃ passaddhiṃ paripūreti – kāyapassaddhiñca cittapassaddhiñca. Passaddhi gabbhaṃ gaṇhantī paripākaṃ gacchantī duvidhaṃ sukhaṃ paripūreti – kāyikaṃ cetasikañca. Sukhaṃ gabbhaṃ gaṇhantaṃ paripākaṃ gacchantaṃ tividhaṃ samādhiṃ paripūreti – khaṇikasamādhiṃ upacārasamādhiṃ appanāsamādhinti. Tāsu ṭhapetvā appanāsamādhipūrikaṃ itarā dvepi idha yujjanti.
сукаяад̇ийд̇и сукам̣; яасса уббаж̇ж̇ад̇и д̇ам̣ сукид̇ам̣ гарод̇ийд̇и ад̇т̇о. судту ваа каад̣̇ад̇и, канад̇и жа гааяажид̇д̇ааб̣аад̇ханд̇и сукам̣. соманассавзд̣̇анааязд̇ам̣ наамам̣. д̇асса лагкан̣аад̣̇ийни взд̣̇анаабад̣̇з вуд̇д̇анаязнзва взд̣̇ид̇аб̣б̣аани.
Sukhayatīti sukhaṃ; yassa uppajjati taṃ sukhitaṃ karotīti attho. Suṭṭhu vā khādati, khanati ca kāyacittābādhanti sukhaṃ. Somanassavedanāyetaṃ nāmaṃ. Tassa lakkhaṇādīni vedanāpade vuttanayeneva veditabbāni.
абаро наяо – саад̇алагкан̣ам̣ сукам̣, самбаяуд̇д̇аанам̣ убаб̣рууханарасам̣, ануг̇г̇ахан̣абажжубадтаанам̣. сад̇иби жа нзсам̣ бийд̇исукаанам̣ гад̇т̇ажи авиббаяог̇з, идтаарамман̣абадилаабхад̇удти бийд̇и; бадилад̣̇д̇харасаанубхаванам̣ сукам̣. яад̇т̇а бийд̇и д̇ад̇т̇а сукам̣. яад̇т̇а сукам̣ д̇ад̇т̇а на нияамад̇о бийд̇и. сан̇каарагканд̇хасан̇г̇ахид̇аа бийд̇и, взд̣̇анаагканд̇хасан̇г̇ахид̇ам̣ сукам̣. ганд̇ааракиннасса вананд̇од̣̇агад̣̇ассанасаванзсу вияа бийд̇и. ванажчааяаабавзсанауд̣̇агабарибхог̇зсу вияа сукам̣.
Aparo nayo – sātalakkhaṇaṃ sukhaṃ, sampayuttānaṃ upabrūhanarasaṃ, anuggahaṇapaccupaṭṭhānaṃ. Satipi ca nesaṃ pītisukhānaṃ katthaci avippayoge, iṭṭhārammaṇapaṭilābhatuṭṭhi pīti; paṭiladdharasānubhavanaṃ sukhaṃ. Yattha pīti tattha sukhaṃ. Yattha sukhaṃ tattha na niyamato pīti. Saṅkhārakkhandhasaṅgahitā pīti, vedanākkhandhasaṅgahitaṃ sukhaṃ. Kantārakhinnassa vanantodakadassanasavanesu viya pīti. Vanacchāyāpavesanaudakaparibhogesu viya sukhaṃ.
яат̇аа хи бурисо махааганд̇аарамаг̇г̇ам̣ бадибанно гхаммабарзд̇о д̇асид̇о бибаасид̇о бадибат̇з бурисам̣ д̣̇исваа ‘гад̇т̇а баанийяам̣ ад̇т̇ий’д̇и бужчзяяа. со ‘адавим̣ уд̇д̇арид̇ваа ж̇аад̇ассараванасан̣д̣о ад̇т̇и, д̇ад̇т̇а г̇анд̇ваа лабхиссасий’д̇и вад̣̇зяяа. со д̇асса гат̇ам̣ суд̇ваа хадтабахадто бхавзяяа. д̇ад̇о г̇ажчанд̇о бхуумияам̣ бад̇ид̇аани уббалад̣̇аланаалабад̇д̇аад̣̇ийни д̣̇исваа судтуд̇арам̣ хадтабахадто худ̇ваа г̇ажчанд̇о аллавад̇т̇з аллагзсз бурисз бассзяяа, ванагуггудамораад̣̇ийнам̣ сад̣̇д̣̇ам̣ сун̣зяяа, ж̇аад̇ассарабарияанд̇з ж̇аад̇ам̣ ман̣иж̇ааласад̣̇исам̣ нийлаванасан̣д̣ам̣ бассзяяа, сарз ж̇аад̇аани уббалабад̣̇умагумуд̣̇аад̣̇ийни бассзяяа, ажчам̣ виббасаннам̣ уд̣̇агам̣ бассзяяа. со бхияяо бхияяо хадтабахадто худ̇ваа ж̇аад̇ассарам̣ од̇арид̇ваа яат̇ааружи нхад̇ваа жа бивид̇ваа жа бадиббассад̣̇д̇хад̣̇арат̇о бхисамул̣аалабогкараад̣̇ийни каад̣̇ид̇ваа нийлуббалаад̣̇ийни бил̣анд̇хид̇ваа манд̣̇аалагамуулаани канд̇хз гарид̇ваа уд̇д̇арид̇ваа саадагам̣ ниваасзд̇ваа, уд̣̇агасаадагам̣ аад̇абз гад̇ваа, сийд̇ажчааяааяа манд̣̇аманд̣̇з ваад̇з бахаранд̇з нибанно ‘ахо сукам̣, ахо сука’нд̇и вад̣̇зяяа. звам̣самбад̣̇амид̣̇ам̣ д̣̇адтаб̣б̣ам̣.
Yathā hi puriso mahākantāramaggaṃ paṭipanno ghammapareto tasito pipāsito paṭipathe purisaṃ disvā ‘kattha pānīyaṃ atthī’ti puccheyya. So ‘aṭaviṃ uttaritvā jātassaravanasaṇḍo atthi, tattha gantvā labhissasī’ti vadeyya. So tassa kathaṃ sutvā haṭṭhapahaṭṭho bhaveyya. Tato gacchanto bhūmiyaṃ patitāni uppaladalanālapattādīni disvā suṭṭhutaraṃ haṭṭhapahaṭṭho hutvā gacchanto allavatthe allakese purise passeyya, vanakukkuṭamorādīnaṃ saddaṃ suṇeyya, jātassarapariyante jātaṃ maṇijālasadisaṃ nīlavanasaṇḍaṃ passeyya, sare jātāni uppalapadumakumudādīni passeyya, acchaṃ vippasannaṃ udakaṃ passeyya. So bhiyyo bhiyyo haṭṭhapahaṭṭho hutvā jātassaraṃ otaritvā yathāruci nhatvā ca pivitvā ca paṭippassaddhadaratho bhisamuḷālapokkharādīni khāditvā nīluppalādīni piḷandhitvā mandālakamūlāni khandhe karitvā uttaritvā sāṭakaṃ nivāsetvā, udakasāṭakaṃ ātape katvā, sītacchāyāya mandamande vāte paharante nipanno ‘aho sukhaṃ, aho sukha’nti vadeyya. Evaṃsampadamidaṃ daṭṭhabbaṃ.
д̇асса хи бурисасса ж̇аад̇ассараванасан̣д̣асаванад̇о бадтааяа яаава уд̣̇агад̣̇ассанаа хадтабахадтагаало вияа буб̣б̣абхааг̇аарамман̣з хадтабахадтаагаараа бийд̇и. нхад̇ваа жа бивид̇ваа жа сийд̇ажчааяааяа манд̣̇аманд̣̇з ваад̇з бахаранд̇з ‘ахо сукам̣, ахо сука’нд̇и вад̣̇ад̇о нибаннагаало вияа б̣алаваббад̇д̇ам̣ аарамман̣арасаанубхаванаагаарасан̣тид̇ам̣ сукам̣. д̇асмим̣ д̇асмим̣ самаяз баагадабхаавад̇о жзд̇ам̣ вуд̇д̇анд̇и взд̣̇ид̇аб̣б̣ам̣. яад̇т̇а бана бийд̇и сукамби д̇ад̇т̇а ад̇т̇ийд̇и вуд̇д̇амзвзд̇ам̣.
Tassa hi purisassa jātassaravanasaṇḍasavanato paṭṭhāya yāva udakadassanā haṭṭhapahaṭṭhakālo viya pubbabhāgārammaṇe haṭṭhapahaṭṭhākārā pīti. Nhatvā ca pivitvā ca sītacchāyāya mandamande vāte paharante ‘aho sukhaṃ, aho sukha’nti vadato nipannakālo viya balavappattaṃ ārammaṇarasānubhavanākārasaṇṭhitaṃ sukhaṃ. Tasmiṃ tasmiṃ samaye pākaṭabhāvato cetaṃ vuttanti veditabbaṃ. Yattha pana pīti sukhampi tattha atthīti vuttamevetaṃ.
жид̇д̇ассзгаг̇г̇ад̇аад̇и жид̇д̇асса згаг̇г̇абхааво; самаад̇хиссзд̇ам̣ наамам̣. лагкан̣аад̣̇ийсу банасса адтагат̇ааяам̣ д̇аава вуд̇д̇ам̣ – ‘‘баамогкалагкан̣о жа самаад̇хи авигкзбалагкан̣о жа’’. яат̇аа хи гуудааг̇аараган̣н̣игаа сзсад̣̇аб̣б̣асамбхаараанам̣ ааб̣анд̇ханад̇о бамукаа ход̇и звамзва саб̣б̣агусалад̇хаммаанам̣ самаад̇хижид̇д̇зна иж̇жханад̇о саб̣б̣зсамби д̇зсам̣ д̇хаммаанам̣ самаад̇хи баамогко ход̇и. д̇зна вуд̇д̇ам̣ –
Cittassekaggatāti cittassa ekaggabhāvo; samādhissetaṃ nāmaṃ. Lakkhaṇādīsu panassa aṭṭhakathāyaṃ tāva vuttaṃ – ‘‘pāmokkhalakkhaṇo ca samādhi avikkhepalakkhaṇo ca’’. Yathā hi kūṭāgārakaṇṇikā sesadabbasambhārānaṃ ābandhanato pamukhā hoti evameva sabbakusaladhammānaṃ samādhicittena ijjhanato sabbesampi tesaṃ dhammānaṃ samādhi pāmokkho hoti. Tena vuttaṃ –
‘‘яат̇аа, махаарааж̇а, гуудааг̇аарасса яаа гаажи г̇обаанасияо саб̣б̣аа д̇аа гуудан̇г̇амаа хонд̇и, гууданиннаа гуудасамосаран̣аа, гуудам̣ д̇аасам̣ аг̇г̇амагкааяад̇и, звамзва ко, махаарааж̇а, яз гзжи гусалаа д̇хаммаа саб̣б̣з д̇з самаад̇хининнаа хонд̇и, самаад̇хибон̣аа, самаад̇хибаб̣бхаараа, самаад̇хи д̇зсам̣ аг̇г̇амагкааяад̇ий’’д̇и (ми. ба. 2.1.14).
‘‘Yathā, mahārāja, kūṭāgārassa yā kāci gopānasiyo sabbā tā kūṭaṅgamā honti, kūṭaninnā kūṭasamosaraṇā, kūṭaṃ tāsaṃ aggamakkhāyati, evameva kho, mahārāja, ye keci kusalā dhammā sabbe te samādhininnā honti, samādhipoṇā, samādhipabbhārā, samādhi tesaṃ aggamakkhāyatī’’ti (mi. pa. 2.1.14).
яат̇аа жа сзнан̇г̇ам̣ бад̇ваа рааж̇аа наама яад̇т̇а яад̇т̇а сзнаа осийд̣̇ад̇и д̇ам̣ д̇ам̣ таанам̣ г̇ажчад̇и, д̇асса г̇ад̇аг̇ад̇адтаанз сзнаа барибуурад̇и, барасзнаа бхиж̇ж̇ид̇ваа рааж̇аанамзва анувад̇д̇ад̇и, звамзва сахаж̇аад̇ад̇хаммаанам̣ вигкибид̇ум̣ виббагирид̇ум̣ аббад̣̇аанад̇о самаад̇хи авигкзбалагкан̣о наама ход̇ийд̇и.
Yathā ca senaṅgaṃ patvā rājā nāma yattha yattha senā osīdati taṃ taṃ ṭhānaṃ gacchati, tassa gatagataṭṭhāne senā paripūrati, parasenā bhijjitvā rājānameva anuvattati, evameva sahajātadhammānaṃ vikkhipituṃ vippakirituṃ appadānato samādhi avikkhepalakkhaṇo nāma hotīti.
абаро бана наяо – аяам̣ жид̇д̇ассзгаг̇г̇ад̇аасан̇каад̇о самаад̇хи наама ависааралагкан̣о ваа авигкзбалагкан̣о ваа, сахаж̇аад̇ад̇хаммаанам̣, самбин̣д̣анарасо нхаанияажун̣н̣аанам̣ уд̣̇агам̣ вияа, убасамабажжубадтаано н̃аан̣абажжубадтаано ваа. ‘‘самаахид̇о яат̇аабхууд̇ам̣ ж̇аанаад̇и бассад̇ий’’д̇и хи вуд̇д̇ам̣. висзсад̇о сукабад̣̇адтаано, ниваад̇з д̣̇ийбажжийнам̣ тид̇и вияа жзд̇асо тид̇ийд̇и д̣̇адтаб̣б̣о.
Aparo pana nayo – ayaṃ cittassekaggatāsaṅkhāto samādhi nāma avisāralakkhaṇo vā avikkhepalakkhaṇo vā, sahajātadhammānaṃ, sampiṇḍanaraso nhāniyacuṇṇānaṃ udakaṃ viya, upasamapaccupaṭṭhāno ñāṇapaccupaṭṭhāno vā. ‘‘Samāhito yathābhūtaṃ jānāti passatī’’ti hi vuttaṃ. Visesato sukhapadaṭṭhāno, nivāte dīpaccīnaṃ ṭhiti viya cetaso ṭhitīti daṭṭhabbo.
