| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
7. ඣානන්‌තරිකකථාවණ්‌ණනා
7. Jhānantarikakathāvaṇṇanā
817-818. ඉදානි ඣානන්‌තරිකකථා නාම හොති. තත්‌ථ යෙසං සමයෙ ‘‘පඤ්‌චකනයෙ පඤ්‌ච ඣානානි විභත්‌තානි, කෙවලං තයො සමාධී උද්‌දිට්‌ඨා’’ති අවිතක්‌කවිචාරමත්‌තස්‌ස සමාධිනො ඔකාසං අජානන්‌තානං ‘‘පඨමස්‌ස ච දුතියස්‌ස ච ඣානස්‌ස අන්‌තරෙ ඣානන්‌තරිකා නාම එසා’’ති ලද්‌ධි, සෙය්‍යථාපි සම්‌මිතියානඤ්‌චෙව එකච්‌චානඤ්‌ච අන්‌ධකානං; තෙ සන්‌ධාය පුච්‌ඡා සකවාදිස්‌ස, පටිඤ්‌ඤා ඉතරස්‌ස. අථ නං ‘‘ඣානම්‌පි චෙතසිකා ධම්‌මා, ඵස්‌සාදයොපි, තස්‌මා යදි ඣානන්‌තරිකා නාම භවෙය්‍ය, ඵස්‌සන්‌තරිකාදීහිපි භවිතබ්‌බ’’න්‌ති චොදනත්‌ථං අත්‌ථි ඵස්‌සන්‌තරිකාතිආදිමාහ .
817-818. Idāni jhānantarikakathā nāma hoti. Tattha yesaṃ samaye ‘‘pañcakanaye pañca jhānāni vibhattāni, kevalaṃ tayo samādhī uddiṭṭhā’’ti avitakkavicāramattassa samādhino okāsaṃ ajānantānaṃ ‘‘paṭhamassa ca dutiyassa ca jhānassa antare jhānantarikā nāma esā’’ti laddhi, seyyathāpi sammitiyānañceva ekaccānañca andhakānaṃ; te sandhāya pucchā sakavādissa, paṭiññā itarassa. Atha naṃ ‘‘jhānampi cetasikā dhammā, phassādayopi, tasmā yadi jhānantarikā nāma bhaveyya, phassantarikādīhipi bhavitabba’’nti codanatthaṃ atthi phassantarikātiādimāha .
දුතියස්‌ස ච ඣානස්‌සාති ‘‘යදි ඣානන්‌තරිකා නාම භවෙය්‍ය, දුතියතතියාදීනිපි ඣානානෙව, තෙසම්‌පි අන්‌තරිකාය භවිතබ්‌බ’’න්‌ති චොදනත්‌ථං වුත්‌තං. සො කෙවලං ලද්‌ධියා අභාවෙන පටික්‌ඛිපති චෙව පටිජානාති ච. පඨමස්‌ස චාති පුට්‌ඨො ලද්‌ධිවසෙන පටිජානාති.
Dutiyassa ca jhānassāti ‘‘yadi jhānantarikā nāma bhaveyya, dutiyatatiyādīnipi jhānāneva, tesampi antarikāya bhavitabba’’nti codanatthaṃ vuttaṃ. So kevalaṃ laddhiyā abhāvena paṭikkhipati ceva paṭijānāti ca. Paṭhamassa cāti puṭṭho laddhivasena paṭijānāti.
819. සවිතක්‌කො සවිචාරොතිආදි ‘‘තිණ්‌ණම්‌පි සමාධීනං සමාධිභාවෙ සමානෙ අවිතක්‌කො විචාරමත්‌තොව සමාධි ඣානන්‌තරිකො, න ඉතරොති කො එත්‌ථ විසෙසහෙතූ’’ති චොදනත්‌ථං වුත්‌තං.
819. Savitakko savicārotiādi ‘‘tiṇṇampi samādhīnaṃ samādhibhāve samāne avitakko vicāramattova samādhi jhānantariko, na itaroti ko ettha visesahetū’’ti codanatthaṃ vuttaṃ.
820-822. ද්‌වින්‌නං ඣානානං පටුප්‌පන්‌නානන්‌ති පඨමදුතියානි සන්‌ධාය පුච්‌ඡති. ඉතරො ‘‘තෙසං පච්‌චුප්‌පන්‌නානංයෙව අන්‌තරෙ අවිතක්‌කො විචාරමත්‌තො සමාධි ඣානන්‌තරිකො නාම හොතී’’ති ලද්‌ධියා පටිජානාති. පඨමං ඣානං නිරුද්‌ධන්‌ති පුට්‌ඨො තිණ්‌ණං එකක්‌ඛණෙ පවත්‌ති න යුත්‌තාති පටිජානාති . අවිතක්‌කො විචාරමත්‌තො සමාධි පඨමං ඣානන්‌ති චතුක්‌කනයවසෙන පුච්‌ඡති. සකවාදී තස්‌මිං නයෙ තස්‌ස අභාවා පටික්‌ඛිපති. නනු තයො සමාධීති එත්‌ථායමධිප්‌පායො – යථා තෙසු තීසු සමාධීසු ද්‌වෙ සමාධී ඣානානෙව, න ඣානන්‌තරිකා, එවං ඉතරෙනපි ඣානෙනෙව භවිතබ්‌බං, න ඣානන්‌තරිකායාති.
820-822. Dvinnaṃ jhānānaṃ paṭuppannānanti paṭhamadutiyāni sandhāya pucchati. Itaro ‘‘tesaṃ paccuppannānaṃyeva antare avitakko vicāramatto samādhi jhānantariko nāma hotī’’ti laddhiyā paṭijānāti. Paṭhamaṃ jhānaṃ niruddhanti puṭṭho tiṇṇaṃ ekakkhaṇe pavatti na yuttāti paṭijānāti . Avitakko vicāramatto samādhi paṭhamaṃ jhānanti catukkanayavasena pucchati. Sakavādī tasmiṃ naye tassa abhāvā paṭikkhipati. Nanu tayo samādhīti etthāyamadhippāyo – yathā tesu tīsu samādhīsu dve samādhī jhānāneva, na jhānantarikā, evaṃ itarenapi jhāneneva bhavitabbaṃ, na jhānantarikāyāti.
ඣානන්‌තරිකකථාවණ්‌ණනා.
Jhānantarikakathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (183) 7. ඣානන්‌තරිකකථා • (183) 7. Jhānantarikakathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 7. ඣානන්‌තරිකකථාවණ්‌ණනා • 7. Jhānantarikakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 7. ඣානන්‌තරිකකථාවණ්‌ණනා • 7. Jhānantarikakathāvaṇṇanā
