| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
১৭. ঝানপচ্চযনিদ্দেসৰণ্ণনা
17. Jhānapaccayaniddesavaṇṇanā
১৭. ঝানপচ্চযনিদ্দেসে ঝানঙ্গানীতি দ্ৰিপঞ্চৰিঞ্ঞাণৰজ্জেসু সেসচিত্তেসু উপ্পন্নানি ৰিতক্কৰিচারপীতিসোমনস্সদোমনস্সুপেক্খাচিত্তেকগ্গতাসঙ্খাতানি সত্ত অঙ্গানি। পঞ্চন্নং পন ৰিঞ্ঞাণকাযানং অভিনিপাতমত্তত্তা তেসু ৰিজ্জমানানিপি উপেক্খাসুখদুক্খানি উপনিজ্ঝানাকারস্স অভাৰতো ঝানঙ্গানীতি ন উদ্ধটানি। তত্থ পচ্ছিন্নত্তা পন সেসাহেতুকেসুপি ঝানঙ্গং ন উদ্ধটমেৰ। তংসমুট্ঠানানন্তি ইধাপি কটত্তারূপং সঙ্গহিতন্তি ৰেদিতব্বং। ৰুত্তঞ্হেতং পঞ্হাৰারে – ‘‘পটিসন্ধিক্খণে ৰিপাকাব্যাকতানি ঝানঙ্গানি সম্পযুত্তকানং খন্ধানং কটত্তা চ রূপানং ঝানপচ্চযেন পচ্চযো’’তি। অযং তাৰেত্থ পাল়িৰণ্ণনা। অযং পন ঝানপচ্চযো সত্তন্নং ঝানঙ্গানং ৰসেন ঠিতোপি জাতিভেদতো কুসলাকুসলৰিপাককিরিযৰসেন চতুধা ভিজ্জতি, পুন ভূমিৰসেন চতুধা; একধা, চতুধা, তিধাতি দ্ৰাদসধা ভিজ্জতীতি এৰমেত্থ নানপ্পকারভেদতো ৰিঞ্ঞাতব্বো ৰিনিচ্ছযো।
17. Jhānapaccayaniddese jhānaṅgānīti dvipañcaviññāṇavajjesu sesacittesu uppannāni vitakkavicārapītisomanassadomanassupekkhācittekaggatāsaṅkhātāni satta aṅgāni. Pañcannaṃ pana viññāṇakāyānaṃ abhinipātamattattā tesu vijjamānānipi upekkhāsukhadukkhāni upanijjhānākārassa abhāvato jhānaṅgānīti na uddhaṭāni. Tattha pacchinnattā pana sesāhetukesupi jhānaṅgaṃ na uddhaṭameva. Taṃsamuṭṭhānānanti idhāpi kaṭattārūpaṃ saṅgahitanti veditabbaṃ. Vuttañhetaṃ pañhāvāre – ‘‘paṭisandhikkhaṇe vipākābyākatāni jhānaṅgāni sampayuttakānaṃ khandhānaṃ kaṭattā ca rūpānaṃ jhānapaccayena paccayo’’ti. Ayaṃ tāvettha pāḷivaṇṇanā. Ayaṃ pana jhānapaccayo sattannaṃ jhānaṅgānaṃ vasena ṭhitopi jātibhedato kusalākusalavipākakiriyavasena catudhā bhijjati, puna bhūmivasena catudhā; ekadhā, catudhā, tidhāti dvādasadhā bhijjatīti evamettha nānappakārabhedato viññātabbo vinicchayo.
এৰং ভিন্নে পনেত্থ চতুভূমকম্পি কুসলঝানঙ্গং পঞ্চৰোকারে সম্পযুত্তধম্মানঞ্চেৰ চিত্তসমুট্ঠানরূপস্স চ, ঠপেত্ৰা রূপাৰচরং অৰসেসং আরুপ্পে সম্পযুত্তধম্মানঞ্ঞেৰ ঝানপচ্চযেন পচ্চযো। অকুসলেপি এসেৰ নযো। কামাৰচররূপাৰচরৰিপাকং পৰত্তে সম্পযুত্তধম্মানঞ্চেৰ চিত্তসমুট্ঠানরূপস্স চ, পটিসন্ধিযং সম্পযুত্তধম্মানঞ্চেৰ কটত্তারূপস্স চ, আরুপ্পৰিপাকং সম্পযুত্তধম্মানঞ্ঞেৰ, যঞ্চ আরুপ্পে লোকুত্তরৰিপাকং উপ্পজ্জতি, তঞ্চ। পঞ্চৰোকারে পন তং চিত্তসমুট্ঠানরূপস্সপি ঝানপচ্চযেন পচ্চযো হোতি। তেভূমকম্পি কিরিযঝানঙ্গং পঞ্চৰোকারে সম্পযুত্তধম্মানঞ্চেৰ চিত্তসমুট্ঠানরূপস্স চ। যং পনেত্থ আরুপ্পে উপ্পজ্জতি, তং সম্পযুত্তধম্মানঞ্ঞেৰ ঝানপচ্চযেন পচ্চযোতি এৰমেত্থ পচ্চযুপ্পন্নতোপি ৰিঞ্ঞাতব্বো ৰিনিচ্ছযোতি।
Evaṃ bhinne panettha catubhūmakampi kusalajhānaṅgaṃ pañcavokāre sampayuttadhammānañceva cittasamuṭṭhānarūpassa ca, ṭhapetvā rūpāvacaraṃ avasesaṃ āruppe sampayuttadhammānaññeva jhānapaccayena paccayo. Akusalepi eseva nayo. Kāmāvacararūpāvacaravipākaṃ pavatte sampayuttadhammānañceva cittasamuṭṭhānarūpassa ca, paṭisandhiyaṃ sampayuttadhammānañceva kaṭattārūpassa ca, āruppavipākaṃ sampayuttadhammānaññeva, yañca āruppe lokuttaravipākaṃ uppajjati, tañca. Pañcavokāre pana taṃ cittasamuṭṭhānarūpassapi jhānapaccayena paccayo hoti. Tebhūmakampi kiriyajhānaṅgaṃ pañcavokāre sampayuttadhammānañceva cittasamuṭṭhānarūpassa ca. Yaṃ panettha āruppe uppajjati, taṃ sampayuttadhammānaññeva jhānapaccayena paccayoti evamettha paccayuppannatopi viññātabbo vinicchayoti.
ঝানপচ্চযনিদ্দেসৰণ্ণনা।
Jhānapaccayaniddesavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi / (২) পচ্চযনিদ্দেসো • (2) Paccayaniddeso
