| Library / Tipiṭaka / ཏིཔིཊཀ • Tipiṭaka / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā |
༡༧. ཛྷཱནཔཙྩཡནིདྡེསཝཎྞནཱ
17. Jhānapaccayaniddesavaṇṇanā
༡༧. ཝིཏཀྐཝིཙཱརཔཱིཏིསོམནསྶདོམནསྶུཔེཀྑཱཙིཏྟེཀགྒཏཱསངྑཱཏཱནཱིཏི ཨེཏྠ ཡདིཔི སོམནསྶདོམནསྶསངྑཱཏཱནི ཛྷཱནངྒཱནི ནཏྠི, སུཁདུཀྑསངྑཱཏཱནི པན སོམནསྶདོམནསྶབྷཱུཏཱནེཝ ཛྷཱནངྒཱནི, ན ཀཱཡིཀསུཁདུཀྑབྷཱུཏཱནཱིཏི ཨིམསྶ དསྶནཏྠཾ སོམནསྶདོམནསྶགྒཧཎཾ ཀཏཾ། ནནུ ཙ ‘‘དྭིཔཉྩཝིཉྙཱཎཝཛྫེསཱུ’’ཏི ཝཙནེནེཝ ཀཱཡིཀསུཁདུཀྑཱནི ཝཛྫིཏཱནཱིཏི སུཁདུཀྑགྒཧཎམེཝ ཀཏྟབྦནྟི? ན, ཛྷཱནངྒསུཁདུཀྑཱནཾ ཛྷཱནངྒབྷཱཝཝིསེསནཏོ། ‘‘དྭིཔཉྩཝིཉྙཱཎཝཛྫེསུ སུཁདུཀྑུཔེཀྑཱཙིཏྟེཀགྒཏཱསངྑཱཏཱནཱི’’ཏི ཧི ཝུཏྟེ དྭིཔཉྩཝིཉྙཱཎེསུ ཨུཔེཀྑཱཙིཏྟེཀགྒཏཱཧི སདྡྷིཾ ཀཱཡིཀསུཁདུཀྑཱནིཔི ཝཛྫིཏཱནཱིཏི ཨེཏྟཀམེཝ ཝིཉྙཱཡཏི, ན པན ཡཱནི སུཁདུཀྑཱནི ཛྷཱནངྒཱནི ཧོནྟི, ཏེསཾ ཛྷཱནངྒབྷཱུཏོ སུཁབྷཱཝོ དུཀྑབྷཱཝོ ཙ ཝིསེསིཏོ, ཏསྨཱ སོམནསྶདོམནསྶབྷཱཝཝིསིཊྛོཡེཝ སུཁདུཀྑབྷཱཝོ སུཁདུཀྑཱནཾ ཛྷཱནངྒབྷཱཝོཏི དསྶནཏྠཾ སོམནསྶདོམནསྶགྒཧཎཾ ཀརོཏི། ཏེན ‘‘དྭིཔཉྩཝིཉྙཱཎཝཛྫེསཱུ’’ཏི ཝཙནེན ཝཛྫིཡམཱནཱནམྤི སུཁདུཀྑཱནཾ སོམནསྶདོམནསྶབྷཱཝཱབྷཱཝཏོ ཛྷཱནངྒབྷཱཝཱབྷཱཝོཏི དསྶིཏཾ ཧོཏི། ཡཐཱཝཛྫིཏཱ པན སུཁདུཀྑོཔེཀྑེཀགྒཏཱ ཀསྨཱ ཝཛྫིཏཱཏི? ཡཏྠ ཛྷཱནངྒཱནི ཨུདྡྷརཱིཡནྟི ཙིཏྟུཔྤཱདཀཎྜེ, ཏཏྠ ཙ ཛྷཱནངྒནྟི ཨནུདྡྷཊཏྟཱ། ཀསྨཱ པན ན ཨུདྡྷཊཱཏི ཏཾ དསྶེཏུཾ ‘‘པཉྩནྣཾ པན ཝིཉྙཱཎཀཱཡཱན’’ནྟིཨཱདིམཱཧ།
17. Vitakkavicārapītisomanassadomanassupekkhācittekaggatāsaṅkhātānīti ettha yadipi somanassadomanassasaṅkhātāni jhānaṅgāni natthi, sukhadukkhasaṅkhātāni pana somanassadomanassabhūtāneva jhānaṅgāni, na kāyikasukhadukkhabhūtānīti imassa dassanatthaṃ somanassadomanassaggahaṇaṃ kataṃ. Nanu ca ‘‘dvipañcaviññāṇavajjesū’’ti vacaneneva kāyikasukhadukkhāni vajjitānīti sukhadukkhaggahaṇameva kattabbanti? Na, jhānaṅgasukhadukkhānaṃ jhānaṅgabhāvavisesanato. ‘‘Dvipañcaviññāṇavajjesu sukhadukkhupekkhācittekaggatāsaṅkhātānī’’ti hi vutte dvipañcaviññāṇesu upekkhācittekaggatāhi saddhiṃ kāyikasukhadukkhānipi vajjitānīti ettakameva viññāyati, na pana yāni sukhadukkhāni jhānaṅgāni honti, tesaṃ jhānaṅgabhūto sukhabhāvo dukkhabhāvo ca visesito, tasmā somanassadomanassabhāvavisiṭṭhoyeva sukhadukkhabhāvo sukhadukkhānaṃ jhānaṅgabhāvoti dassanatthaṃ somanassadomanassaggahaṇaṃ karoti. Tena ‘‘dvipañcaviññāṇavajjesū’’ti vacanena vajjiyamānānampi sukhadukkhānaṃ somanassadomanassabhāvābhāvato jhānaṅgabhāvābhāvoti dassitaṃ hoti. Yathāvajjitā pana sukhadukkhopekkhekaggatā kasmā vajjitāti? Yattha jhānaṅgāni uddharīyanti cittuppādakaṇḍe, tattha ca jhānaṅganti anuddhaṭattā. Kasmā pana na uddhaṭāti taṃ dassetuṃ ‘‘pañcannaṃ pana viññāṇakāyāna’’ntiādimāha.
ཨབྷིནིཔཱཏམཏྟཏྟཱཏི ཨེཏེན ཨཱཝཛྫནསམྤཊིཙྪནམཏྟཱཡཔི ཙིནྟནཱཔཝཏྟིཡཱ ཨབྷཱཝཾ དསྶེཏི། ‘‘ཏེསུ ཝིཛྫམཱནཱནིཔི ཨུཔེཀྑཱསུཁདུཀྑཱནཱི’’ཏི པོརཱཎཔཱཋོ། ཏཏྠ ཨུཔེཀྑཱསུཁདུཀྑེཧེཝ ཏཾསམཱནལཀྑཎཱཡ ཙིཏྟེཀགྒཏཱཡཔི ཡཐཱཝུཏྟེནེཝ ཀཱརཎེན ཨནུདྡྷཊབྷཱཝོ དསྶིཏོཏི དཊྛབྦོ། པུབྦེ པན སཏྟ ཨངྒཱནི དསྶེནྟེན ཙཏྟཱརི ཨངྒཱནི ཝཛྫིཏཱནཱིཏི ཏེསཾ ཝཛྫནེ ཀཱརཎཾ དསྶེནྟེན ན སམཱནལཀྑཎེན ལེསེན དསྶེཏབྦཾ། ཨཊྛཀཐཱ ཧེསཱཏི། ཡདི ཙ ལེསེན དསྶེཏབྦཾ, ཡཐཱཝུཏྟེསུཔི ཏཱིསུ ཨེཀམེཝ ཝཏྟབྦཾ སིཡཱ, ཏིཎྞཾ པན ཝཙནེན ཏཏོ ཨཉྙསྶ ཛྷཱནངྒནྟི ཨུདྡྷཊབྷཱཝོ ཨཱཔཛྫཏི, ཡཐཱཝུཏྟཀཱརཎཏོ ཨཉྙེན ཀཱརཎེན ཨནུདྡྷཊབྷཱཝོ ཝཱ, ཏསྨཱ ཏཾདོསཔརིཧརཎཏྠཾ ‘‘ཨུཔེཀྑཱཙིཏྟེཀགྒཏཱསུཁདུཀྑཱནཱི’’ཏི པཋནྟི། ཡེ པན ‘‘ཛྷཱནངྒབྷཱུཏེཧི སོམནསྶཱདཱིཧི སུཁདུཀྑེན ཨཝིབྷཱུཏབྷཱཝེན པཱཀཊཏཱཡ ཨིནྡྲིཡཀིཙྩཡུཏྟཏཱཡ ཙ སམཱནཱནཾ སུཁཱདཱིནཾ ཛྷཱནངྒནྟི ཨནུདྡྷཊབྷཱཝེ ཀཱརཎཾ ཝཏྟབྦཾ, ན ཙིཏྟེཀགྒཏཱཡཱཏི སཱ ཨེཏྠ ན གཧིཏཱ’’ཏི ཝདནྟི, ཏེསཾ ཏཾ རུཙིམཏྟཾ། ཡདི ཛྷཱནངྒསམཱནཱནཾ ཛྷཱནངྒནྟི ཨནུདྡྷཊབྷཱཝེ ཀཱརཎཾ ཝཏྟབྦཾ, ཙིཏྟེཀགྒཏཱ ཙེཏྠ ཛྷཱནངྒབྷཱུཏཱཡ ཝིཙིཀིཙྪཱཡུཏྟམནོདྷཱཏུཨཱདཱིསུ ཙིཏྟེཀགྒཏཱཡ སམཱནཱཏི ཏསྶཱ ཨནུདྡྷཊབྷཱཝེ ཀཱརཎཾ ཝཏྟབྦམེཝཱཏི། སེསཱཧེཏུཀེསུཔི ཛྷཱནངྒཾ ཨུདྡྷཊམེཝ ཨུདྡྷརཎཊྛཱནེ ཙིཏྟུཔྤཱདཀཎྜེཏི ཨདྷིཔྤཱཡོ།
Abhinipātamattattāti etena āvajjanasampaṭicchanamattāyapi cintanāpavattiyā abhāvaṃ dasseti. ‘‘Tesu vijjamānānipi upekkhāsukhadukkhānī’’ti porāṇapāṭho. Tattha upekkhāsukhadukkheheva taṃsamānalakkhaṇāya cittekaggatāyapi yathāvutteneva kāraṇena anuddhaṭabhāvo dassitoti daṭṭhabbo. Pubbe pana satta aṅgāni dassentena cattāri aṅgāni vajjitānīti tesaṃ vajjane kāraṇaṃ dassentena na samānalakkhaṇena lesena dassetabbaṃ. Aṭṭhakathā hesāti. Yadi ca lesena dassetabbaṃ, yathāvuttesupi tīsu ekameva vattabbaṃ siyā, tiṇṇaṃ pana vacanena tato aññassa jhānaṅganti uddhaṭabhāvo āpajjati, yathāvuttakāraṇato aññena kāraṇena anuddhaṭabhāvo vā, tasmā taṃdosapariharaṇatthaṃ ‘‘upekkhācittekaggatāsukhadukkhānī’’ti paṭhanti. Ye pana ‘‘jhānaṅgabhūtehi somanassādīhi sukhadukkhena avibhūtabhāvena pākaṭatāya indriyakiccayuttatāya ca samānānaṃ sukhādīnaṃ jhānaṅganti anuddhaṭabhāve kāraṇaṃ vattabbaṃ, na cittekaggatāyāti sā ettha na gahitā’’ti vadanti, tesaṃ taṃ rucimattaṃ. Yadi jhānaṅgasamānānaṃ jhānaṅganti anuddhaṭabhāve kāraṇaṃ vattabbaṃ, cittekaggatā cettha jhānaṅgabhūtāya vicikicchāyuttamanodhātuādīsu cittekaggatāya samānāti tassā anuddhaṭabhāve kāraṇaṃ vattabbamevāti. Sesāhetukesupi jhānaṅgaṃ uddhaṭameva uddharaṇaṭṭhāne cittuppādakaṇḍeti adhippāyo.
ཛྷཱནཔཙྩཡནིདྡེསཝཎྞནཱ ནིཊྛིཏཱ།
Jhānapaccayaniddesavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / པཊྛཱནཔཱལི༹ • Paṭṭhānapāḷi / (༢) པཙྩཡནིདྡེསོ • (2) Paccayaniddeso
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༡༧. ཛྷཱནཔཙྩཡནིདྡེསཝཎྞནཱ • 17. Jhānapaccayaniddesavaṇṇanā
