| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[134] 4. ஜா²னஸோத⁴னஜாதகவண்ணனா
[134] 4. Jhānasodhanajātakavaṇṇanā
யே ஸஞ்ஞினோதி இத³ங் ஸத்தா² ஜேதவனே விஹரந்தோ ஸங்கஸ்ஸனக³ரத்³வாரே அத்தனா ஸங்கி²த்தேன புச்சி²தபஞ்ஹஸ்ஸ த⁴ம்மஸேனாபதினோ வித்தா²ரப்³யாகரணங் ஆரப்³ப⁴ கதே²ஸி. தத்ரித³ங் அதீதவத்து² – அதீதே கிர பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ அரஞ்ஞாயதனே காலங் கரொந்தோ அந்தேவாஸிகேஹி புச்சி²தோ ‘‘நேவஸஞ்ஞீனாஸஞ்ஞீ’’தி ஆஹ…பே॰… தாபஸா ஜெட்ட²ந்தேவாஸிகஸ்ஸ கத²ங் ந க³ண்ஹிங்ஸு. போ³தி⁴ஸத்தோ ஆப⁴ஸ்ஸரதோ ஆக³ந்த்வா ஆகாஸே ட²த்வா இமங் கா³த²மாஹ –
Yesaññinoti idaṃ satthā jetavane viharanto saṅkassanagaradvāre attanā saṃkhittena pucchitapañhassa dhammasenāpatino vitthārabyākaraṇaṃ ārabbha kathesi. Tatridaṃ atītavatthu – atīte kira bārāṇasiyaṃ brahmadatte rajjaṃ kārente bodhisatto araññāyatane kālaṃ karonto antevāsikehi pucchito ‘‘nevasaññīnāsaññī’’ti āha…pe… tāpasā jeṭṭhantevāsikassa kathaṃ na gaṇhiṃsu. Bodhisatto ābhassarato āgantvā ākāse ṭhatvā imaṃ gāthamāha –
134.
134.
‘‘யே ஸஞ்ஞினோ தேபி து³க்³க³தா, யேபி அஸஞ்ஞினோ தேபி து³க்³க³தா;
‘‘Ye saññino tepi duggatā, yepi asaññino tepi duggatā;
ஏதங் உப⁴யங் விவஜ்ஜய, தங் ஸமாபத்திஸுக²ங் அனங்க³ண’’ந்தி.
Etaṃ ubhayaṃ vivajjaya, taṃ samāpattisukhaṃ anaṅgaṇa’’nti.
தத்த² யே ஸஞ்ஞினோதி ட²பெத்வா நேவஸஞ்ஞானாஸஞ்ஞாயதனலாபி⁴னோ அவஸேஸே ஸசித்தகஸத்தே த³ஸ்ஸேதி. தேபி து³க்³க³தாதி தஸ்ஸா ஸமாபத்தியா அலாப⁴தோ தேபி து³க்³க³தா நாம. யேபி அஸஞ்ஞினோதி அஸஞ்ஞப⁴வே நிப்³ப³த்தே அசித்தகஸத்தே த³ஸ்ஸேதி. தேபி து³க்³க³தாதி தேபி இமிஸ்ஸாயேவ ஸமாபத்தியா அலாப⁴தோ து³க்³க³தாயேவ நாம. ஏதங் உப⁴யங் விவஜ்ஜயாதி ஏதங் உப⁴யம்பி ஸஞ்ஞிப⁴வஞ்ச அஸஞ்ஞிப⁴வஞ்ச விவஜ்ஜய பஜஹாதி அந்தேவாஸிகங் ஓவத³தி. தங் ஸமாபத்திஸுக²ங் அனங்க³ணந்தி தங் நேவஸஞ்ஞானாஸஞ்ஞாயதனஸமாபத்திலாபி⁴னோ ஸந்தட்டே²ன ‘‘ஸுக²’’ந்தி ஸங்க²ங் க³தங் ஜா²னஸுக²ங் அனங்க³ணங் நித்³தோ³ஸங் ப³லவசித்தேகக்³க³தாஸபா⁴வேனபி தங் அனங்க³ணங் நாம ஜாதங்.
Tattha ye saññinoti ṭhapetvā nevasaññānāsaññāyatanalābhino avasese sacittakasatte dasseti. Tepi duggatāti tassā samāpattiyā alābhato tepi duggatā nāma. Yepi asaññinoti asaññabhave nibbatte acittakasatte dasseti. Tepi duggatāti tepi imissāyeva samāpattiyā alābhato duggatāyeva nāma. Etaṃ ubhayaṃ vivajjayāti etaṃ ubhayampi saññibhavañca asaññibhavañca vivajjaya pajahāti antevāsikaṃ ovadati. Taṃ samāpattisukhaṃ anaṅgaṇanti taṃ nevasaññānāsaññāyatanasamāpattilābhino santaṭṭhena ‘‘sukha’’nti saṅkhaṃ gataṃ jhānasukhaṃ anaṅgaṇaṃ niddosaṃ balavacittekaggatāsabhāvenapi taṃ anaṅgaṇaṃ nāma jātaṃ.
ஏவங் போ³தி⁴ஸத்தோ த⁴ம்மங் தே³ஸெத்வா அந்தேவாஸிகஸ்ஸ கு³ணங் கதெ²த்வா ப்³ரஹ்மலோகமேவ அக³மாஸி. ததா³ ஸேஸதாபஸா ஜெட்ட²ந்தேவாஸிகஸ்ஸ ஸத்³த³ஹிங்ஸு.
Evaṃ bodhisatto dhammaṃ desetvā antevāsikassa guṇaṃ kathetvā brahmalokameva agamāsi. Tadā sesatāpasā jeṭṭhantevāsikassa saddahiṃsu.
ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ ஜெட்ட²ந்தேவாஸிகோ ஸாரிபுத்தோ, மஹாப்³ரஹ்மா பன அஹமேவ அஹோஸி’’ந்தி.
Satthā imaṃ dhammadesanaṃ āharitvā jātakaṃ samodhānesi – ‘‘tadā jeṭṭhantevāsiko sāriputto, mahābrahmā pana ahameva ahosi’’nti.
ஜா²னஸோத⁴னஜாதகவண்ணனா சதுத்தா².
Jhānasodhanajātakavaṇṇanā catutthā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 134. ஜா²னஸோத⁴னஜாதகங் • 134. Jhānasodhanajātakaṃ
