| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. ஜா²னஸுத்தவண்ணனா
5. Jhānasuttavaṇṇanā
36. பஞ்சமே ஆஸவானங் க²யந்தி அரஹத்தங். யதே³வ தத்த² ஹோதி ரூபக³தந்தி தஸ்மிங் பட²மஜ்ஜா²னக்க²ணே வத்து²வஸேன வா சித்தஸமுட்டா²னிகாதி³வஸேன வா யங் ரூபங் நாம பவத்ததி. வேத³னாக³தாதீ³னி ஸம்பயுத்தவேத³னாதீ³னங் வஸேன வேதி³தப்³பா³னி . தே த⁴ம்மேதி தே ரூபாத³யோ பஞ்சக்க²ந்த⁴த⁴ம்மே. அனிச்சதோதிஆதீ³ஸு ஹுத்வா அபா⁴வாகாரேன அனிச்சதோ, படிபீளனாகாரேன து³க்க²தோ, ருஜ்ஜனாகாரேன ரோக³தோ, அந்தோது³ஸ்ஸனட்டே²ன க³ண்ட³தோ, அனுபவிட்ட²ட்டே²ன அனுகந்தனட்டே²ன ச ஸல்லதோ, து³க்க²ட்டே²ன அக⁴தோ, ஆபா³த⁴னட்டே²ன ஆபா³த⁴தோ, அஸகட்டே²ன பரதோ, பலுஜ்ஜனட்டே²ன பலோகதோ, அஸ்ஸாமிகட்டே²ன ஸுஞ்ஞதோ, அவஸவத்தனட்டே²ன அனத்ததோ. ஸமனுபஸ்ஸதீதி ப³லவவிபஸ்ஸனாபஞ்ஞாய பஸ்ஸதி.
36. Pañcame āsavānaṃ khayanti arahattaṃ. Yadeva tattha hoti rūpagatanti tasmiṃ paṭhamajjhānakkhaṇe vatthuvasena vā cittasamuṭṭhānikādivasena vā yaṃ rūpaṃ nāma pavattati. Vedanāgatādīni sampayuttavedanādīnaṃ vasena veditabbāni . Te dhammeti te rūpādayo pañcakkhandhadhamme. Aniccatotiādīsu hutvā abhāvākārena aniccato, paṭipīḷanākārena dukkhato, rujjanākārena rogato, antodussanaṭṭhena gaṇḍato, anupaviṭṭhaṭṭhena anukantanaṭṭhena ca sallato, dukkhaṭṭhena aghato, ābādhanaṭṭhena ābādhato, asakaṭṭhena parato, palujjanaṭṭhena palokato, assāmikaṭṭhena suññato, avasavattanaṭṭhena anattato. Samanupassatīti balavavipassanāpaññāya passati.
தேஹி த⁴ம்மேஹீதி தேஹி பஞ்சக்க²ந்த⁴த⁴ம்மேஹி. படிவாபேதீதி நிப்³பா³னவஸேன நிவத்தேதி. அமதாய தா⁴துயாதி நிப்³பா³னதா⁴துயா. சித்தங் உபஸங்ஹரதீதி ஞாணேன ஆனிஸங்ஸங் தி³ஸ்வா ஓதாரேதி. ஸந்தந்தி பச்சனீகஸந்ததாய ஸந்தங். பணீதந்தி அதப்பகங். ஸோ தத்த² டி²தோ ஆஸவானங் க²யங் பாபுணாதீதி ஸோ தஸ்மிங் பட²மஜ்ஜா²னே டி²தோ தங் ப³லவவிபஸ்ஸனங் வட்³டெ⁴த்வா அரஹத்தங் பாபுணாதி. அபரோ நயோ – ஸோ தேஹி த⁴ம்மேஹீதி யஸ்மா அனிச்சதோதிஆதீ³ஸு அனிச்சதோ பலோகதோதி த்³வீஹி பதே³ஹி அனிச்சலக்க²ணங் கதி²தங், து³க்க²தோதிஆதீ³ஹி ச²ஹி து³க்க²லக்க²ணங், பரதோ, ஸுஞ்ஞதோ, அனத்ததோதி தீஹி அனத்தலக்க²ணங். தஸ்மா ஸோ தேஹி ஏவங் திலக்க²ணங் ஆரோபெத்வா தி³ட்டே²ஹி அந்தோஸமாபத்தியங் பஞ்சக்க²ந்த⁴த⁴ம்மேஹி. சித்தங் படிவாபேதீதி சித்தங் படிஸங்ஹரதி மோசேதி அபனேதி. உபஸங்ஹரதீதி விபஸ்ஸனாசித்தங் தாவ ஸவனவஸேன து²திவஸேன பரியத்திவஸேன பஞ்ஞத்திவஸேன ச ஸந்தங் நிப்³பா³னந்தி ஏவங் அஸங்க²தாய அமதாய தா⁴துயா உபஸங்ஹரதி. மக்³க³சித்தங் நிப்³பா³னங் ஆரம்மணகரணவஸேனேவ ‘‘ஏதங் ஸந்தங் ஏதங் பணீத’’ந்தி ந ஏவங் வத³தி. இமினா பனாகாரேன தங் படிவிஜ்ஜ²ந்தோ தத்த² சித்தங் உபஸங்ஹரதீதி அத்தோ².
Tehi dhammehīti tehi pañcakkhandhadhammehi. Paṭivāpetīti nibbānavasena nivatteti. Amatāyadhātuyāti nibbānadhātuyā. Cittaṃ upasaṃharatīti ñāṇena ānisaṃsaṃ disvā otāreti. Santanti paccanīkasantatāya santaṃ. Paṇītanti atappakaṃ. So tattha ṭhito āsavānaṃ khayaṃ pāpuṇātīti so tasmiṃ paṭhamajjhāne ṭhito taṃ balavavipassanaṃ vaḍḍhetvā arahattaṃ pāpuṇāti. Aparo nayo – so tehi dhammehīti yasmā aniccatotiādīsu aniccato palokatoti dvīhi padehi aniccalakkhaṇaṃ kathitaṃ, dukkhatotiādīhi chahi dukkhalakkhaṇaṃ, parato, suññato, anattatoti tīhi anattalakkhaṇaṃ. Tasmā so tehi evaṃ tilakkhaṇaṃ āropetvā diṭṭhehi antosamāpattiyaṃ pañcakkhandhadhammehi. Cittaṃ paṭivāpetīti cittaṃ paṭisaṃharati moceti apaneti. Upasaṃharatīti vipassanācittaṃ tāva savanavasena thutivasena pariyattivasena paññattivasena ca santaṃ nibbānanti evaṃ asaṅkhatāya amatāya dhātuyā upasaṃharati. Maggacittaṃ nibbānaṃ ārammaṇakaraṇavaseneva ‘‘etaṃ santaṃ etaṃ paṇīta’’nti na evaṃ vadati. Iminā panākārena taṃ paṭivijjhanto tattha cittaṃ upasaṃharatīti attho.
ஸோ தத்த² டி²தோதி தஸ்ஸா திலக்க²ணாரம்மணாய விபஸ்ஸனாய டி²தோ. ஆஸவானங் க²யங் பாபுணாதீதி அனுக்கமேன சத்தாரோ மக்³கே³ பா⁴வெத்வா அரஹத்தங் பாபுணாதி. தேனேவ த⁴ம்மராகே³னாதி ஸமத²விபஸ்ஸனாத⁴ம்மே ச²ந்த³ராகே³ன. த⁴ம்மனந்தி³யாதி தஸ்ஸேவ வேவசனங். ஸமத²விபஸ்ஸனாஸு ஹி ஸப்³ப³ஸோ ச²ந்த³ராக³ங் பரியாதா³துங் ஸக்கொந்தோ அரஹத்தங் பாபுணாதி, அஸக்கொந்தோ அனாகா³மீ ஹோதி.
So tattha ṭhitoti tassā tilakkhaṇārammaṇāya vipassanāya ṭhito. Āsavānaṃ khayaṃ pāpuṇātīti anukkamena cattāro magge bhāvetvā arahattaṃ pāpuṇāti. Teneva dhammarāgenāti samathavipassanādhamme chandarāgena. Dhammanandiyāti tasseva vevacanaṃ. Samathavipassanāsu hi sabbaso chandarāgaṃ pariyādātuṃ sakkonto arahattaṃ pāpuṇāti, asakkonto anāgāmī hoti.
திணபுரிஸரூபகே வாதி திணபொத்த²கரூபே வா. தூ³ரே கண்டே³ பாதேதீதி தூ³ரேபாதீ. அவிராதி⁴தங் விஜ்ஜ²தீதி அக்க²ணவேதீ⁴. யதே³வ தத்த² ஹோதி வேத³னாக³தந்தி இத⁴ ரூபங் ந க³ஹிதங். கஸ்மா? ஸமதிக்கந்தத்தா. அயஞ்ஹி ஹெட்டா² ரூபாவசரஜ்ஜா²னங் ஸமாபஜ்ஜித்வா ரூபங் அதிக்கமித்வா அரூபாவசரஸமாபத்திங் ஸமாபன்னோதி ஸமத²வஸேனாபி அனேன ரூபங் ஸமதிக்கந்தங், ஹெட்டா² ரூபங் ஸம்மஸித்வா தங் அதிக்கம்ம இதா³னி அரூபங் ஸம்மஸதீதி விபஸ்ஸனாவஸேனாபி அனேன ரூபங் அதிக்கந்தங். ஆருப்பே பன ஸப்³ப³ஸோபி ரூபங் நத்தீ²தி தங் ஸந்தா⁴யபி ரூபங் ந க³ஹிதங். அத² நேவஸஞ்ஞானாஸஞ்ஞாயதனங் கஸ்மா ந க³ஹிதந்தி? ஸுகு²மத்தா. தஸ்மிஞ்ஹி சத்தாரோபி அரூபக்க²ந்தா⁴ ஸுகு²மா ந ஸம்மஸனூபகா³. தேனேவாஹ – ‘‘இதி கோ², பி⁴க்க²வே, யாவதா ஸஞ்ஞாஸமாபத்தி தாவதா அஞ்ஞாபடிவேதோ⁴’’தி. இத³ங் வுத்தங் ஹோதி – யாவதா ஸசித்தகஸமாபத்தி நாம அத்தி², தாவதா ஓளாரிகே த⁴ம்மே ஸம்மஸதோ அஞ்ஞாபடிவேதோ⁴ ஹோதி, அரஹத்தங் ஸம்பஜ்ஜதி. நேவஸஞ்ஞானாஸஞ்ஞாயதனங் பன ஸுகு²மத்தா ஸஞ்ஞாஸமாபத்தீதி ந வுச்சதி. ஜா²யீஹேதேதி ஜா²யீஹி ஜா²னாபி⁴ரதேஹி ஏதானி. வுட்ட²ஹித்வாதி ததோ ஸமாபத்திதோ வுட்டா²ய. ஸமக்கா²தப்³பா³னீதி ஸம்மா அக்கா²தப்³பா³னி, ‘‘ஸந்தானி பணீதானீ’’தி ஏவங் கேவலங் ஆசிக்கி²தப்³பா³னி தோ²மேதப்³பா³னி வண்ணேதப்³பா³னீதி.
Tiṇapurisarūpakevāti tiṇapotthakarūpe vā. Dūre kaṇḍe pātetīti dūrepātī. Avirādhitaṃ vijjhatīti akkhaṇavedhī. Yadeva tattha hoti vedanāgatanti idha rūpaṃ na gahitaṃ. Kasmā? Samatikkantattā. Ayañhi heṭṭhā rūpāvacarajjhānaṃ samāpajjitvā rūpaṃ atikkamitvā arūpāvacarasamāpattiṃ samāpannoti samathavasenāpi anena rūpaṃ samatikkantaṃ, heṭṭhā rūpaṃ sammasitvā taṃ atikkamma idāni arūpaṃ sammasatīti vipassanāvasenāpi anena rūpaṃ atikkantaṃ. Āruppe pana sabbasopi rūpaṃ natthīti taṃ sandhāyapi rūpaṃ na gahitaṃ. Atha nevasaññānāsaññāyatanaṃ kasmā na gahitanti? Sukhumattā. Tasmiñhi cattāropi arūpakkhandhā sukhumā na sammasanūpagā. Tenevāha – ‘‘iti kho, bhikkhave, yāvatā saññāsamāpatti tāvatā aññāpaṭivedho’’ti. Idaṃ vuttaṃ hoti – yāvatā sacittakasamāpatti nāma atthi, tāvatā oḷārike dhamme sammasato aññāpaṭivedho hoti, arahattaṃ sampajjati. Nevasaññānāsaññāyatanaṃ pana sukhumattā saññāsamāpattīti na vuccati. Jhāyīheteti jhāyīhi jhānābhiratehi etāni. Vuṭṭhahitvāti tato samāpattito vuṭṭhāya. Samakkhātabbānīti sammā akkhātabbāni, ‘‘santāni paṇītānī’’ti evaṃ kevalaṃ ācikkhitabbāni thometabbāni vaṇṇetabbānīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. ஜா²னஸுத்தங் • 5. Jhānasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. ஜா²னஸுத்தவண்ணனா • 5. Jhānasuttavaṇṇanā
