| Library / Tipiṭaka / д̇ибидага • Tipiṭaka / вибхан̇г̇а-анудийгаа • Vibhaṅga-anuṭīkā |
12. жхаанавибхан̇г̇о
12. Jhānavibhaṅgo
1. суд̇д̇анд̇абхааж̇анийяам̣
1. Suttantabhājanīyaṃ
маад̇игааван̣н̣анаа
Mātikāvaṇṇanā
508. баад̇имогкасам̣вараад̣̇ийд̇и аад̣̇и-сад̣̇д̣̇зна инд̣̇риязсу г̇уд̇д̇ад̣̇ваарад̇аа, бхож̇анз мад̇д̇ан̃н̃уд̇аа, сад̇исамбаж̇ан̃н̃ам̣, ж̇ааг̇арияаануяог̇од̇и звамаад̣̇игз сан̇г̇ан̣хаад̇и. асубхаануссад̇ияод̇и асубхажхаанаани, ануссад̇ижхаанаани жа. сад̇и саман̣абхаавагарабуб̣б̣абхааг̇агаран̣ийяасамбад̇д̇ияам̣ саман̣абхаавоби сид̣̇д̇хоязва ход̇ийд̇и ааха ‘‘сун̃н̃аа…бз… д̣̇ассзд̇ий’’д̇и. гааран̣з хи сид̣̇д̇хз паламби сид̣̇д̇хамзва ход̇ийд̇и. сигкаабад̣̇аанам̣ саруубам̣, сигкид̇аб̣б̣аагаарам̣, сан̇кзбад̇о вибхааг̇ан̃жа д̣̇ассзд̇ум̣ ‘‘сигкаабад̣̇зсуу’’д̇иаад̣̇и вуд̇д̇ам̣. д̇ад̇т̇а наамагааяаад̣̇ивасзнаад̇и наамагааяабад̣̇агааяаб̣яан̃ж̇анагааяавасзна вуд̇д̇зсу. иминаа сигкаабад̣̇аанам̣ сигкааяа ад̇хиг̇амуубааяабхууд̇абан̃н̃ад̇д̇исабхаавад̇ам̣ д̣̇ассзд̇и. д̇зсу сигкид̇аб̣б̣аагааро сад̇т̇уаан̣аанад̇иггамоязваад̇и ааха ‘‘важа…бз… д̇аб̣б̣зсуу’’д̇и. сигкаагодтаасзсууд̇и вуд̇д̇аббабхзд̣̇зсу ад̇хисийласигкаабхааг̇зсу. д̇зсу самаад̣̇аанамзва сигкид̇аб̣б̣аагаарод̇и вуд̇д̇ам̣ ‘‘барибууран̣авасзна сигкид̇аб̣б̣зсуу’’д̇и. сигкаабад̣̇згад̣̇зсабхууд̇аад̇и сигкаабад̣̇асамуд̣̇ааяасса аваяавабхууд̇аа. бхигкусигкаа хи ид̇хаад̇хиббзд̇аа ‘‘ид̇ха бхигкуу’’д̇и вуд̇д̇ад̇д̇аа. д̇ат̇аа хи вагкад̇и ‘‘сзсасигкаа бана ад̇т̇уд̣̇д̇хааравасзна сигкаасад̣̇д̣̇асса ад̇т̇ад̣̇ассанад̇т̇ам̣ вуд̇д̇аа’’д̇и (вибха. адта. 516).
508. Pātimokkhasaṃvarādīti ādi-saddena indriyesu guttadvāratā, bhojane mattaññutā, satisampajaññaṃ, jāgariyānuyogoti evamādike saṅgaṇhāti. Asubhānussatiyoti asubhajhānāni, anussatijhānāni ca. Sati samaṇabhāvakarapubbabhāgakaraṇīyasampattiyaṃ samaṇabhāvopi siddhoyeva hotīti āha ‘‘suññā…pe… dassetī’’ti. Kāraṇe hi siddhe phalampi siddhameva hotīti. Sikkhāpadānaṃ sarūpaṃ, sikkhitabbākāraṃ, saṅkhepato vibhāgañca dassetuṃ ‘‘sikkhāpadesū’’tiādi vuttaṃ. Tattha nāmakāyādivasenāti nāmakāyapadakāyabyañjanakāyavasena vuttesu. Iminā sikkhāpadānaṃ sikkhāya adhigamūpāyabhūtapaññattisabhāvataṃ dasseti. Tesu sikkhitabbākāro satthuāṇānatikkamoyevāti āha ‘‘vaca…pe… tabbesū’’ti. Sikkhākoṭṭhāsesūti vuttappabhedesu adhisīlasikkhābhāgesu. Tesu samādānameva sikkhitabbākāroti vuttaṃ ‘‘paripūraṇavasena sikkhitabbesū’’ti. Sikkhāpadekadesabhūtāti sikkhāpadasamudāyassa avayavabhūtā. Bhikkhusikkhā hi idhādhippetā ‘‘idha bhikkhū’’ti vuttattā. Tathā hi vakkhati ‘‘sesasikkhā pana atthuddhāravasena sikkhāsaddassa atthadassanatthaṃ vuttā’’ti (vibha. aṭṭha. 516).
маад̇игааван̣н̣анаа нидтид̇аа.
Mātikāvaṇṇanā niṭṭhitā.
нид̣̇д̣̇зсаван̣н̣анаа
Niddesavaṇṇanā
509. д̣̇идтад̇д̇аад̇и саяамбхуун̃аан̣зна сажчигад̇ад̇д̇аа. канд̇иаад̣̇ийсуби зсзва наяо. саяамбхуун̃аан̣зна сажчигаран̣авасзнзва хи бхаг̇авад̇о каманаружжанаад̣̇аяо, на ан̃н̃зсам̣ вияа ануссаваагаарабаривид̇аггаад̣̇имукзна. авибарийд̇адто зганд̇анияяаанадтзна взд̣̇ид̇аб̣б̣о. сигкияамаанод̇и сигкааяа бадибаж̇ж̇ияамаано . сигкид̇аб̣б̣аани сигкаабад̣̇аанийд̇и сигкаабад̣̇абаал̣им̣ вад̣̇ад̇и. канд̇хад̇д̇аяанд̇и сийлаад̣̇игканд̇хад̇д̇аяам̣. ‘‘саб̣б̣абаабасса…бз… б̣уд̣̇д̇хаана саасана’’нд̇и (д̇ха. ба. 183; д̣̇ий. ни. 1.90; нзд̇д̇и. 30) важанад̇о ааха ‘‘анусаасанад̣̇аанабхууд̇ам̣ сигкад̇д̇аяа’’нд̇и.
509. Diṭṭhattāti sayambhūñāṇena sacchikatattā. Khantiādīsupi eseva nayo. Sayambhūñāṇena sacchikaraṇavaseneva hi bhagavato khamanaruccanādayo, na aññesaṃ viya anussavākāraparivitakkādimukhena. Aviparītaṭṭho ekantaniyyānaṭṭhena veditabbo. Sikkhiyamānoti sikkhāya paṭipajjiyamāno . Sikkhitabbāni sikkhāpadānīti sikkhāpadapāḷiṃ vadati. Khandhattayanti sīlādikkhandhattayaṃ. ‘‘Sabbapāpassa…pe… buddhāna sāsana’’nti (dha. pa. 183; dī. ni. 1.90; netti. 30) vacanato āha ‘‘anusāsanadānabhūtaṃ sikkhattaya’’nti.
саммаад̣̇идтияаа бажжаяад̇д̇аад̇и маг̇г̇асаммаад̣̇идтияаа зганд̇ахзд̇убхаавад̇о. зд̇т̇а жа саммаад̣̇идтийд̇и гаммассагад̇аасаммаад̣̇идти, гаммабат̇асаммаад̣̇идти жа. палагааран̣обажаарзхийд̇и палуубажаарзна саммаад̣̇идтибажжаяад̇д̇аа, гааран̣уубажаарзна саммаад̣̇идтибуб̣б̣ан̇г̇амад̇д̇аа. гусалад̇хаммзхи ад̇д̇ано згад̣̇зсабхууд̇зхийд̇и саммаад̣̇идтид̇хаммз санд̇хааяааха. гусалабан̃н̃аавин̃н̃аан̣аанам̣ ваа баж̇аананавиж̇аананавасзна д̣̇ассанам̣ д̣̇идтийд̇и. д̇зна аваяавад̇хаммзна самуд̣̇ааяасса убажарид̇ад̇ам̣ д̣̇ассзд̇и. винаяанагирияад̇д̇аад̇и д̣̇зсанаабхууд̇ам̣ сигкад̇д̇аяамааха. д̇хаммзнаад̇и д̇хаммад̇о анабзд̇зна. ависамасабхаавзнаад̇и ависамзна сабхаавзна, самзнаад̇и ад̇т̇о.
Sammādiṭṭhiyā paccayattāti maggasammādiṭṭhiyā ekantahetubhāvato. Ettha ca sammādiṭṭhīti kammassakatāsammādiṭṭhi, kammapathasammādiṭṭhi ca. Phalakāraṇopacārehīti phalūpacārena sammādiṭṭhipaccayattā, kāraṇūpacārena sammādiṭṭhipubbaṅgamattā. Kusaladhammehi attano ekadesabhūtehīti sammādiṭṭhidhamme sandhāyāha. Kusalapaññāviññāṇānaṃ vā pajānanavijānanavasena dassanaṃ diṭṭhīti. Tena avayavadhammena samudāyassa upacaritataṃ dasseti. Vinayanakiriyattāti desanābhūtaṃ sikkhattayamāha. Dhammenāti dhammato anapetena. Avisamasabhāvenāti avisamena sabhāvena, samenāti attho.
510. анан̃н̃ад̇т̇знаад̇и г̇арахаад̣̇иан̃н̃ад̇т̇арахид̇зна сагад̇т̇зна. бхиннабадад̇харзд̇и бхигкусааруббавасзна бан̃жакан̣д̣аад̣̇инаа чзд̣̇зна чиннажийварад̇харз.
510. Anaññatthenāti garahādiaññattharahitena sakatthena. Bhinnapaṭadhareti bhikkhusāruppavasena pañcakhaṇḍādinā chedena chinnacīvaradhare.
бхзд̣̇анабарияааяавасзна вуд̇д̇ам̣, д̇асмаа гилзсаанам̣ бахаанаа гилзсаанам̣ бхзд̣̇аа бхигкууд̇и вуд̇д̇ам̣ ход̇и.
Bhedanapariyāyavasena vuttaṃ, tasmā kilesānaṃ pahānā kilesānaṃ bhedā bhikkhūti vuttaṃ hoti.
г̇ун̣авасзнаад̇и сзгкад̇хаммаад̣̇иг̇ун̣аанам̣ васзна. д̇зна бхаавад̇т̇ад̇о бхигкусад̣̇д̣̇о д̣̇ассид̇о ход̇и.
Guṇavasenāti sekkhadhammādiguṇānaṃ vasena. Tena bhāvatthato bhikkhusaddo dassito hoti.
ид̣̇ам̣ д̣̇ваяанд̇и ‘‘зд̇т̇а жаа’’д̇иаад̣̇инаа барад̇о сан̇г̇ахад̣̇ассанавасзна вуд̇д̇ам̣ ‘‘сзгко’’д̇иаад̣̇игам̣ важанад̣̇ваяам̣. иминаад̇и ‘‘сзгко бхигку бхиннад̇д̇аа баабагаана’’нд̇и бад̣̇аанам̣ ад̇т̇ад̣̇ассанзна. на самзд̇и сзгкаасзгкабут̇уж̇ж̇анаасзгкад̣̇ийбанад̇о. д̇ад̣̇ид̣̇анд̇и батамад̣̇ваяам̣. ниббарияааяад̣̇ассанам̣ арияаанам̣ , асзгкаанам̣язва жа сзгкабхиннагилзсабхаавад̣̇ийбанад̇о. вуд̇д̇од̇и бадин̃н̃ааважанам̣, сажжам̣ вуд̇д̇од̇и ад̇т̇о. на бана ид̇хаад̇хиббзд̇о ад̇т̇уд̣̇д̇хааравасзна д̣̇ассид̇ад̇д̇аа.
Idaṃ dvayanti ‘‘ettha cā’’tiādinā parato saṅgahadassanavasena vuttaṃ ‘‘sekkho’’tiādikaṃ vacanadvayaṃ. Imināti ‘‘sekkho bhikkhu bhinnattā pāpakāna’’nti padānaṃ atthadassanena. Na sameti sekkhaasekkhaputhujjanāsekkhadīpanato. Tadidanti paṭhamadvayaṃ. Nippariyāyadassanaṃ ariyānaṃ , asekkhānaṃyeva ca sekkhabhinnakilesabhāvadīpanato. Vuttoti paṭiññāvacanaṃ, saccaṃ vuttoti attho. Na pana idhādhippeto atthuddhāravasena dassitattā.
бхаг̇авад̇о важананд̇и убасамбад̣̇аагаммаваажамааха. д̇ад̣̇ануруубанд̇и д̇ад̣̇анужчавигам̣, яат̇аавуд̇д̇анд̇и ад̇т̇о. барисаавад̇т̇усиймаасамбад̇д̇ияо ‘‘самаг̇г̇зна сан̇гхзна агуббзнаа’’д̇и (вибха. 510) иминаа багаасид̇аад̇и ‘‘таанаараха’’нд̇и бад̣̇асса ‘‘анууна…бз… авуд̇д̇а’’нд̇и зд̇д̇агамзва ад̇т̇амааха.
Bhagavato vacananti upasampadākammavācamāha. Tadanurūpanti tadanucchavikaṃ, yathāvuttanti attho. Parisāvatthusīmāsampattiyo ‘‘samaggena saṅghena akuppenā’’ti (vibha. 510) iminā pakāsitāti ‘‘ṭhānāraha’’nti padassa ‘‘anūna…pe… avutta’’nti ettakameva atthamāha.
511. авийд̇иггаманавирад̇ибхаавад̇од̇и авийд̇иггамасамаад̣̇аанабхууд̇аа вирад̇ийд̇и гад̇ваа ваарид̇д̇асийлам̣ бад̇ваа вирад̇и зва бад̇хаананд̇и жзд̇анаасийлассаби барияааяад̇аа вуд̇д̇аа. ‘‘наг̇аравад̣дхагий вад̇т̇увиж̇ж̇аажарияо’’д̇и ид̣̇ам̣ ид̇хаад̇хиббзд̇анаг̇аравад̣дхагийд̣̇ассанам̣. вад̇т̇увиж̇ж̇аа, баасаад̣̇авиж̇ж̇аад̇и д̣̇увид̇хаа хи вад̣дхагийвиж̇ж̇аа. лзхид̇аб̣б̣анд̇и сааяид̇аб̣б̣ам̣. жуб̣ид̇аб̣б̣анд̇и баад̇аб̣б̣ам̣.
511. Avītikkamanaviratibhāvatoti avītikkamasamādānabhūtā viratīti katvā vārittasīlaṃ patvā virati eva padhānanti cetanāsīlassapi pariyāyatā vuttā. ‘‘Nagaravaḍḍhakī vatthuvijjācariyo’’ti idaṃ idhādhippetanagaravaḍḍhakīdassanaṃ. Vatthuvijjā, pāsādavijjāti duvidhā hi vaḍḍhakīvijjā. Lehitabbanti sāyitabbaṃ. Cubitabbanti pātabbaṃ.
инд̣̇рияасам̣вараахаарад̇д̇аад̇и инд̣̇рияасам̣варахзд̇угад̇д̇аа. баад̇имогкасийлам̣ сигкаабад̣̇асийлам̣ на багад̇исийлаад̣̇игзна г̇аяхад̇ийд̇и ааха ‘‘баад̇имогкад̇о ан̃н̃ам̣ сийлам̣ гааяигаавийд̇иггамаад̣̇иг̇г̇ахан̣зна г̇ахид̇а’’нд̇и. д̇ам̣ бана баад̇имогкасийлзна на сан̇г̇аяхад̇ийд̇и на саггаа вад̇д̇ум̣, гааяигаваажасигасам̣варасса д̇аб̣б̣инимуд̇д̇асса абхаавад̇од̇и д̣̇ассзнд̇о ‘‘иминаа ад̇хиббааязна вуд̇д̇а’’нд̇и ааха.
Indriyasaṃvarāhārattāti indriyasaṃvarahetukattā. Pātimokkhasīlaṃ sikkhāpadasīlaṃ na pakatisīlādikena gayhatīti āha ‘‘pātimokkhato aññaṃ sīlaṃ kāyikaavītikkamādiggahaṇena gahita’’nti. Taṃ pana pātimokkhasīlena na saṅgayhatīti na sakkā vattuṃ, kāyikavācasikasaṃvarassa tabbinimuttassa abhāvatoti dassento ‘‘iminā adhippāyena vutta’’nti āha.
д̇ад̇т̇а баад̇имогкасад̣̇д̣̇асса звам̣ ад̇т̇о взд̣̇ид̇аб̣б̣о – гилзсаанам̣ б̣алавабхаавад̇о, баабагирияааяа сугарабхаавад̇о, бун̃н̃агирияааяа жа д̣̇уггарабхаавад̇о б̣ахугкад̇д̇ум̣ абааязсу бад̇анасийлод̇и баад̇ий, бут̇уж̇ж̇ано, анижжад̇ааяа ваа бхаваад̣̇ийсу гаммавзг̇агкид̇д̇о гхадияанд̇ам̣ вияа анавадтаанзна бариб̣бхаманад̇о г̇аманасийлод̇и баад̇ий, маран̣авасзна ваа д̇амхи д̇амхи сад̇д̇анигааяз ад̇д̇абхаавасса баад̇анасийлод̇и баад̇ий, сад̇д̇асанд̇аано, жид̇д̇амзва ваа. д̇ам̣ баад̇инам̣ сам̣саарад̣̇угкад̇о могкзд̇ийд̇и баад̇имогкам̣. жид̇д̇асса хи вимогкзна сад̇д̇оби ‘‘вимуд̇д̇о’’д̇и вужжад̇и. вуд̇д̇ан̃хи ‘‘жид̇д̇авод̣̇аанаа висуж̇жханд̇ий’’д̇и (сам̣. ни. 3.100), ‘‘анубаад̣̇ааяа аасавзхи жид̇д̇ам̣ вимуд̇д̇а’’нд̇и (махаава. 28) жа. ат̇а ваа авиж̇ж̇аад̣̇инаа хзд̇унаа сам̣саарз бад̇ад̇и г̇ажчад̇и бавад̇д̇ад̇ийд̇и баад̇ий. ‘‘авиж̇ж̇аанийваран̣аанам̣ сад̇д̇аанам̣ д̇ан̣хаасам̣яож̇анаанам̣ санд̇хаавад̇ам̣ сам̣сарад̇а’’нд̇и (сам̣. ни. 2.124; 3.99; 5.520; гат̇аа. 75) хи вуд̇д̇ам̣. д̇асса баад̇ино сад̇д̇асса д̇ан̣хаад̣̇исам̣гилзсад̇д̇аяад̇о могко зд̇знаад̇и баад̇имогкам̣. ‘‘ган̣тзгаал̣о’’д̇иаад̣̇ийнам̣ вияа д̇асса самаасасид̣̇д̇хи взд̣̇ид̇аб̣б̣аа.
Tattha pātimokkhasaddassa evaṃ attho veditabbo – kilesānaṃ balavabhāvato, pāpakiriyāya sukarabhāvato, puññakiriyāya ca dukkarabhāvato bahukkhattuṃ apāyesu patanasīloti pātī, puthujjano, aniccatāya vā bhavādīsu kammavegakkhitto ghaṭiyantaṃ viya anavaṭṭhānena paribbhamanato gamanasīloti pātī, maraṇavasena vā tamhi tamhi sattanikāye attabhāvassa pātanasīloti pātī, sattasantāno, cittameva vā. Taṃ pātinaṃ saṃsāradukkhato mokkhetīti pātimokkhaṃ. Cittassa hi vimokkhena sattopi ‘‘vimutto’’ti vuccati. Vuttañhi ‘‘cittavodānā visujjhantī’’ti (saṃ. ni. 3.100), ‘‘anupādāya āsavehi cittaṃ vimutta’’nti (mahāva. 28) ca. Atha vā avijjādinā hetunā saṃsāre patati gacchati pavattatīti pātī. ‘‘Avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarata’’nti (saṃ. ni. 2.124; 3.99; 5.520; kathā. 75) hi vuttaṃ. Tassa pātino sattassa taṇhādisaṃkilesattayato mokkho etenāti pātimokkhaṃ. ‘‘Kaṇṭhekāḷo’’tiādīnaṃ viya tassa samāsasiddhi veditabbā.
ат̇а ваа баад̇зд̇и винибаад̇зд̇и д̣̇угкзд̇и баад̇и, жид̇д̇ам̣. вуд̇д̇ан̃хи ‘‘жид̇д̇зна нийяад̇и лого, жид̇д̇зна баригассад̇ий’’д̇и (сам̣. ни. 1.62). д̇асса баад̇ино могко зд̇знаад̇и баад̇имогкам̣. бад̇ад̇и ваа зд̇зна абааяад̣̇угкз ваа сам̣саарад̣̇угкз ваад̇и баад̇ий, д̇ан̣хаад̣̇исам̣гилзсо. вуд̇д̇ан̃хи ‘‘д̇ан̣хаа ж̇анзд̇и бурисам̣ (сам̣. ни. 1.55-57), д̇ан̣хаад̣̇уд̇ияо бурисо’’д̇и (ид̇иву. 15; махаани. 191; жуул̣ани. баарааяанаануг̇ийд̇иг̇аат̇аа нид̣̇д̣̇зса 107) жа аад̣̇и. д̇ад̇о могкод̇и баад̇имогкам̣.
Atha vā pāteti vinipāteti dukkheti pāti, cittaṃ. Vuttañhi ‘‘cittena nīyati loko, cittena parikassatī’’ti (saṃ. ni. 1.62). Tassa pātino mokkho etenāti pātimokkhaṃ. Patati vā etena apāyadukkhe vā saṃsāradukkhe vāti pātī, taṇhādisaṃkileso. Vuttañhi ‘‘taṇhā janeti purisaṃ (saṃ. ni. 1.55-57), taṇhādutiyo puriso’’ti (itivu. 15; mahāni. 191; cūḷani. pārāyanānugītigāthā niddesa 107) ca ādi. Tato mokkhoti pātimokkhaṃ.
ат̇а ваа бад̇ад̇и зд̇т̇аад̇и баад̇ийни, ча аж̇жхад̇д̇игаб̣аахираани ааяад̇анаани. вуд̇д̇ан̃хи ‘‘часу лого самуббанно, часу губ̣б̣ад̇и сант̇ава’’нд̇и (сам̣. ни. 1.70; су. ни. 171). д̇ад̇о чааж̇жхад̇д̇игаб̣аахирааяад̇анасан̇каад̇ад̇о баад̇ид̇о могкод̇и баад̇имогкам̣.
Atha vā patati etthāti pātīni, cha ajjhattikabāhirāni āyatanāni. Vuttañhi ‘‘chasu loko samuppanno, chasu kubbati santhava’’nti (saṃ. ni. 1.70; su. ni. 171). Tato chaajjhattikabāhirāyatanasaṅkhātato pātito mokkhoti pātimokkhaṃ.
ат̇а ваа баад̇о винибаад̇о асса ад̇т̇ийд̇и баад̇ий, сам̣сааро, д̇ад̇о могкод̇и баад̇имогкам̣.
Atha vā pāto vinipāto assa atthīti pātī, saṃsāro, tato mokkhoti pātimokkhaṃ.
ат̇а ваа саб̣б̣алогаад̇хибад̇ибхаавад̇о д̇хаммиссаро бхаг̇аваа ‘‘бад̇ий’’д̇и вужжад̇и, мужжад̇и зд̇знаад̇и могко, бад̇ино могко д̇зна бан̃н̃ад̇д̇ад̇д̇аад̇и бад̇имогко, бад̇имогко зва баад̇имогкам̣. саб̣б̣аг̇ун̣аанам̣ ваа муулабхаавад̇о уд̇д̇амадтзна бад̇и жа со яат̇аавуд̇д̇знад̇т̇зна могко жаад̇и бад̇имогко, бад̇имогко зва баад̇имогкам̣. д̇ат̇аа хи вуд̇д̇ам̣ ‘‘баад̇имогканд̇и мукамзд̇ам̣ бамукамзд̇а’’нд̇и (махаава. 135) вид̇т̇ааро.
Atha vā sabbalokādhipatibhāvato dhammissaro bhagavā ‘‘patī’’ti vuccati, muccati etenāti mokkho, patino mokkho tena paññattattāti patimokkho, patimokkho eva pātimokkhaṃ. Sabbaguṇānaṃ vā mūlabhāvato uttamaṭṭhena pati ca so yathāvuttenatthena mokkho cāti patimokkho, patimokkho eva pātimokkhaṃ. Tathā hi vuttaṃ ‘‘pātimokkhanti mukhametaṃ pamukhameta’’nti (mahāva. 135) vitthāro.
ат̇а ваа ба-ид̇и багаарз, ад̇ийд̇и ажжанд̇ад̇т̇з нибаад̇о, д̇асмаа багаарзхи ажжанд̇ам̣ могкзд̇ийд̇и баад̇имогкам̣. ид̣̇ан̃хи сийлам̣ саяам̣ д̇ад̣̇ан̇г̇авасзна, самаад̇хисахид̇ам̣ бан̃н̃аасахид̇ан̃жа вигкамбханавасзна самужчзд̣̇авасзна жа ажжанд̇ам̣ могкзд̇и можзд̇ийд̇и баад̇имогкам̣. бад̇и бад̇и могкод̇и ваа бад̇имогко, д̇амхаа д̇амхаа вийд̇иггамад̣̇осад̇о бажжзгам̣ могкод̇и ад̇т̇о, бад̇имогкоязва баад̇имогкам̣. могко ваа ниб̣б̣аанам̣, д̇асса могкасса бадиб̣имб̣абхууд̇од̇и бад̇имогкам̣. сийласам̣варо хи ниб̣б̣зд̇хабхааг̇ияо суурияасса арун̣уг̇г̇аманам̣ вияа ниб̣б̣аанасса уд̣̇аяабхууд̇о д̇аббадибхааг̇о вияа ход̇и яат̇аарахам̣ гилзсаниб̣б̣аабанад̇од̇и бад̇имогкам̣, бад̇имогкам̣язва баад̇имогкам̣.
Atha vā pa-iti pakāre, atīti accantatthe nipāto, tasmā pakārehi accantaṃ mokkhetīti pātimokkhaṃ. Idañhi sīlaṃ sayaṃ tadaṅgavasena, samādhisahitaṃ paññāsahitañca vikkhambhanavasena samucchedavasena ca accantaṃ mokkheti mocetīti pātimokkhaṃ. Pati pati mokkhoti vā patimokkho, tamhā tamhā vītikkamadosato paccekaṃ mokkhoti attho, patimokkhoyeva pātimokkhaṃ. Mokkho vā nibbānaṃ, tassa mokkhassa paṭibimbabhūtoti patimokkhaṃ. Sīlasaṃvaro hi nibbedhabhāgiyo sūriyassa aruṇuggamanaṃ viya nibbānassa udayabhūto tappaṭibhāgo viya hoti yathārahaṃ kilesanibbāpanatoti patimokkhaṃ, patimokkhaṃyeva pātimokkhaṃ.
ат̇а ваа могкам̣ бад̇и вад̇д̇ад̇и, могкаабхимуканд̇и ваа бад̇имогкам̣, бад̇имогкам̣язва баад̇имогканд̇и. ид̣̇амби баад̇имогкасад̣̇д̣̇асса мукамад̇д̇ад̣̇ассанамзва. саб̣б̣аагааарзна бана ж̇инабаад̇имогко бхаг̇аваава анаваж̇ж̇абад̇имогкам̣ баад̇имогкам̣ сам̣ван̣н̣зяяа.
Atha vā mokkhaṃ pati vattati, mokkhābhimukhanti vā patimokkhaṃ, patimokkhaṃyeva pātimokkhanti. Idampi pātimokkhasaddassa mukhamattadassanameva. Sabbākaārena pana jinapātimokkho bhagavāva anavajjapatimokkhaṃ pātimokkhaṃ saṃvaṇṇeyya.
513. г̇арубхан̣д̣ависсаж̇ж̇анагаран̣абхууд̇ам̣ зд̇асса ад̇т̇ийд̇и г̇арубхан̣д̣ависсаж̇ж̇анам̣. г̇арубхан̣д̣анд̇арабхууд̇ам̣ т̇аавараад̣̇и. уунагам̣ на ваддад̇ийд̇и паад̇игаммам̣ вуд̇д̇ам̣. ад̇ирзгаг̇гханагам̣, д̇ад̣̇аг̇гханагамзва ваа ваддад̇ийд̇и. яат̇аавуд̇д̇анд̇и богкаран̣ид̇о бам̣сууд̣̇д̇харан̣аад̣̇ит̇ааварагаммам̣.
513. Garubhaṇḍavissajjanakaraṇabhūtaṃ etassa atthīti garubhaṇḍavissajjanaṃ. Garubhaṇḍantarabhūtaṃ thāvarādi. Ūnakaṃ na vaṭṭatīti phātikammaṃ vuttaṃ. Atirekagghanakaṃ, tadagghanakameva vā vaṭṭatīti. Yathāvuttanti pokkharaṇito paṃsuuddharaṇādithāvarakammaṃ.
д̇хаарзд̇и, босзд̇и ваа барзсам̣ д̣̇аарагз.
Dhāreti, poseti vā paresaṃ dārake.
г̇ихийнам̣ гарияамаанам̣ вуд̇д̇ам̣, на сан̇гхасса, г̇ан̣асса ваад̇и ад̇т̇о. бин̣д̣абадибин̣д̣анд̇и уд̇д̇арабад̣̇алобам̣, буримабад̣̇з уд̇д̇арабад̣̇алобан̃жа гад̇ваа нид̣̇д̣̇зсод̇и ааха ‘‘бин̣д̣ад̇т̇а’’нд̇иаад̣̇и. аяонисо вижааран̣ам̣ аяаат̇аавабадибад̇д̇и.
Gihīnaṃ kariyamānaṃ vuttaṃ, na saṅghassa, gaṇassa vāti attho. Piṇḍapaṭipiṇḍanti uttarapadalopaṃ, purimapade uttarapadalopañca katvā niddesoti āha ‘‘piṇḍattha’’ntiādi. Ayoniso vicāraṇaṃ ayāthāvapaṭipatti.
514. г̇ажчанд̇и яат̇аасагам̣ висаяз бавад̇д̇анд̇ийд̇и г̇ааво, жагкаад̣̇ийни инд̣̇рияаани.
514. Gacchanti yathāsakaṃ visaye pavattantīti gāvo, cakkhādīni indriyāni.
вид̇хунанам̣ бабподанам̣, баваахананд̇и ад̇т̇о.
Vidhunanaṃ papphoṭanaṃ, pavāhananti attho.
515. яат̇аа гаран̣ад̇т̇о гаран̣ийяасад̣̇д̣̇о, звам̣ вигиран̣ад̇т̇оби ход̇ийд̇и ааха ‘‘вигкибид̇аб̣б̣ааний’’д̇и, вид̣̇д̇хам̣сид̇аб̣б̣аанийд̇и ад̇т̇о. сам̣яаманийяаани ваа сам̣яамагаран̣ийяаани, ‘‘на буна звам̣ гаромий’’д̇и ад̇д̇ано д̣̇аханам̣ манасаа ад̇хидтаанам̣ сам̣яаманам̣, сам̣яаманагаран̣ийяаани сам̣варагаран̣ийяаанийд̇и жид̇д̇амад̇д̇ааяад̇д̇аа зва сам̣яамасам̣вараа аажариязна ад̇хиббзд̇аад̇и ааха ‘‘анаабад̇д̇иг̇аманийяааний’’д̇и . анд̇зваасигад̇т̇зро бана д̣̇зсанааби жид̇д̇уббаад̣̇аманасигаарзхи винаа на ход̇ийд̇и д̣̇зсанаависуд̣̇д̇хим̣ ниссаран̣ам̣ вад̣̇ад̇и.
515. Yathā karaṇattho karaṇīyasaddo, evaṃ vikiraṇatthopi hotīti āha ‘‘vikkhipitabbānī’’ti, viddhaṃsitabbānīti attho. Saṃyamanīyāni vā saṃyamakaraṇīyāni, ‘‘na puna evaṃ karomī’’ti attano dahanaṃ manasā adhiṭṭhānaṃ saṃyamanaṃ, saṃyamanakaraṇīyāni saṃvarakaraṇīyānīti cittamattāyattā eva saṃyamasaṃvarā ācariyena adhippetāti āha ‘‘anāpattigamanīyānī’’ti . Antevāsikatthero pana desanāpi cittuppādamanasikārehi vinā na hotīti desanāvisuddhiṃ nissaraṇaṃ vadati.
516. ‘‘алан̇гад̇о жзби…бз… са бхигкуу’’д̇иаад̣̇ийсу (д̇ха. ба. 142) вияа ид̇хааби г̇ун̣ад̇о бхигку ад̇хиббзд̇о. д̇ат̇аа жа вуд̇д̇ам̣ ‘‘ид̇ха бхигкууд̇и бадибад̇д̇ияаа бхигкубхаавад̣̇ассанад̇о звамаахаа’’д̇и (вибха. адта. 355). яад̇д̇агам̣ згзна буг̇г̇алзна асзсзд̇ваа самаад̣̇аад̇ум̣ саггаа, д̇ам̣ санд̇хааяааха ‘‘язна самаад̣̇аанзна саб̣б̣ааби сигкаа самаад̣̇иннаа хонд̇ий’’д̇и яат̇аа убасамбад̣̇аабаарибуурияаа асзсам̣ убасамбаннасигкаасамаад̣̇аанам̣. д̇анд̇и самаад̣̇аанам̣. анзгзсууд̇и висум̣ висум̣ самаад̣̇аанзсу. яат̇аа самаад̣̇иннааяа сигкааяа саб̣б̣зна саб̣б̣ам̣ авийд̇иггаманам̣ сигкид̇аб̣б̣аагааро, звам̣ сад̇и вийд̇иггамз д̣̇зсанааг̇ааминияаа д̣̇зсанаа, вудтаанаг̇ааминияаа вудтаанам̣ д̇ад̣̇убааяабхууд̇ам̣ баариваасигавад̇д̇ажаран̣аад̣̇ийд̇и вуд̇д̇ам̣ ‘‘авийд̇и…бз… аагаарзнаа’’д̇и. яам̣ сигкаабад̣̇ам̣ бамаад̣̇зна вийд̇игганд̇ам̣, д̇ам̣ сигкияамаанам̣ на ход̇ийд̇и сзсид̇ам̣ наама ход̇ийд̇и ааха ‘‘вийд̇иггаманавасзна сзсассаа’’д̇и.
516. ‘‘Alaṅkato cepi…pe… sa bhikkhū’’tiādīsu (dha. pa. 142) viya idhāpi guṇato bhikkhu adhippeto. Tathā ca vuttaṃ ‘‘idha bhikkhūti paṭipattiyā bhikkhubhāvadassanato evamāhā’’ti (vibha. aṭṭha. 355). Yattakaṃ ekena puggalena asesetvā samādātuṃ sakkā, taṃ sandhāyāha ‘‘yena samādānena sabbāpi sikkhā samādinnā hontī’’ti yathā upasampadāpāripūriyā asesaṃ upasampannasikkhāsamādānaṃ. Tanti samādānaṃ. Anekesūti visuṃ visuṃ samādānesu. Yathā samādinnāya sikkhāya sabbena sabbaṃ avītikkamanaṃ sikkhitabbākāro, evaṃ sati vītikkame desanāgāminiyā desanā, vuṭṭhānagāminiyā vuṭṭhānaṃ tadupāyabhūtaṃ pārivāsikavattacaraṇādīti vuttaṃ ‘‘avīti…pe… ākārenā’’ti. Yaṃ sikkhāpadaṃ pamādena vītikkantaṃ, taṃ sikkhiyamānaṃ na hotīti sesitaṃ nāma hotīti āha ‘‘vītikkamanavasena sesassā’’ti.
519. жид̇д̇абарисод̇ханабхааванаад̇и жид̇д̇асса барисод̇ханабхууд̇аа ааваран̣ийяад̇хаммавигкамбхигаа самаад̇хивибассанаабхааванаа жид̇д̇абарисод̇ханабхааванаа. суббабариг̇г̇аахаганд̇и нид̣̇д̣̇аабариг̇г̇аахагам̣. ид̣̇анд̇и ид̣̇ам̣ аб̣б̣огин̣н̣абхаван̇г̇од̇д̇аран̣асан̇каад̇ам̣ гирияамаяажид̇д̇аанам̣ аббавад̇д̇анам̣ суббам̣ наама. ид̇о бхаван̇г̇од̇д̇аран̣ад̇о. буб̣б̣з ид̇о гирияамаяажид̇д̇аббавад̇д̇ид̇о баран̃жа над̇т̇и. аяам̣ гааяагиламат̇о, т̇инамид̣̇д̇хан̃жа зд̇асса суд̇д̇асса бажжаяо.
519. Cittaparisodhanabhāvanāti cittassa parisodhanabhūtā āvaraṇīyadhammavikkhambhikā samādhivipassanābhāvanā cittaparisodhanabhāvanā. Suppapariggāhakanti niddāpariggāhakaṃ. Idanti idaṃ abbokiṇṇabhavaṅgottaraṇasaṅkhātaṃ kiriyamayacittānaṃ appavattanaṃ suppaṃ nāma. Ito bhavaṅgottaraṇato. Pubbe ito kiriyamayacittappavattito parañca natthi. Ayaṃ kāyakilamatho, thinamiddhañca etassa suttassa paccayo.
522. сад̇ибадтаанаад̣̇аяод̇и сад̇ибадтаанасаммаббад̇хаанаид̣̇д̇хибаад̣̇аа, згажжз жа маг̇г̇ад̇хаммаа саха на бавад̇д̇анд̇и, д̇асмаа баал̣ияам̣ на вуд̇д̇аад̇и ад̇хиббааяо. зд̇з д̇аава згасмим̣ аарамман̣з саха на бавад̇д̇анд̇ийд̇и на г̇ан̣хзяяум̣, инд̣̇рияаб̣алаани гасмаа на г̇ахид̇аанийд̇и ааха ‘‘бавад̇д̇а…бз… хонд̇ий’’д̇и. звамби сад̣̇д̇хинд̣̇рияаб̣алаани б̣ож̇жхан̇г̇зхи на сан̇г̇аяханд̇ийд̇и гат̇ам̣ д̇зсам̣ д̇ад̣̇анд̇ог̇ад̇хад̇аад̇и жод̣̇анам̣ санд̇хааяааха ‘‘бийд̇и…бз… вуд̇д̇ад̇д̇аа’’д̇и.
522. Satipaṭṭhānādayoti satipaṭṭhānasammappadhānaiddhipādā, ekacce ca maggadhammā saha na pavattanti, tasmā pāḷiyaṃ na vuttāti adhippāyo. Ete tāva ekasmiṃ ārammaṇe saha na pavattantīti na gaṇheyyuṃ, indriyabalāni kasmā na gahitānīti āha ‘‘pavatta…pe… hontī’’ti. Evampi saddhindriyabalāni bojjhaṅgehi na saṅgayhantīti kathaṃ tesaṃ tadantogadhatāti codanaṃ sandhāyāha ‘‘pīti…pe… vuttattā’’ti.
523. саманд̇ад̇од̇и саб̣б̣абхааг̇зсу саб̣б̣зсу абхиггамаад̣̇ийсу, саб̣б̣абхааг̇ад̇о ваа д̇зсу зва абхиггамаад̣̇ийсу ад̇т̇аанад̇т̇аад̣̇исаб̣б̣абхааг̇ад̇о саб̣б̣аагаарад̇о. саммаад̇и авибарийд̇ам̣ яонисо. саманд̇и ависамам̣, идтаад̣̇иаарамман̣з рааг̇аад̣̇ивисамарахид̇ам̣ гад̇ваад̇и ад̇т̇о.
523. Samantatoti sabbabhāgesu sabbesu abhikkamādīsu, sabbabhāgato vā tesu eva abhikkamādīsu atthānatthādisabbabhāgato sabbākārato. Sammāti aviparītaṃ yoniso. Samanti avisamaṃ, iṭṭhādiārammaṇe rāgādivisamarahitaṃ katvāti attho.
бхигкаа жарийяад̇и зд̇т̇аад̇и бхигкаажааро, бхигкааяа жаран̣адтаанам̣, со зва г̇ожаро, бхигкааяа жаран̣амзва ваа самбаж̇ан̃н̃асса висаяабхаавад̇о г̇ожаро, д̇асмим̣ бхигкаажаараг̇ожарз. со бана абхиггамаад̣̇ибхзд̣̇абхиннанд̇и висзсанавасзна вуд̇д̇ам̣ ‘‘абхиггамаад̣̇ийсу банаа’’д̇и. гаммадтаанасан̇каад̇зд̇и яог̇агаммасса бхааванааяа бавад̇д̇идтаанасан̇каад̇з аарамман̣з, бхааванаагаммзязва ваа, яог̇ино сукависзсахзд̇уд̇ааяа ваа гаммадтаанасан̇каад̇з самбаж̇ан̃н̃асса висаяабхаавзна г̇ожарз. абхиггамаад̣̇ийсууд̇и абхиггамабадиггамаад̣̇ийсу жзва жийварабаарубанаад̣̇ийсу жа. асаммуяханам̣ жид̇д̇агирияаавааяод̇хаад̇увибпааравасзнзва д̇зсам̣ бавад̇д̇и, на ан̃н̃ат̇аад̇и яаат̇аавад̇о ж̇аананам̣.
Bhikkhā carīyati etthāti bhikkhācāro, bhikkhāya caraṇaṭṭhānaṃ, so eva gocaro, bhikkhāya caraṇameva vā sampajaññassa visayabhāvato gocaro, tasmiṃ bhikkhācāragocare. So pana abhikkamādibhedabhinnanti visesanavasena vuttaṃ ‘‘abhikkamādīsu panā’’ti. Kammaṭṭhānasaṅkhāteti yogakammassa bhāvanāya pavattiṭṭhānasaṅkhāte ārammaṇe, bhāvanākammeyeva vā, yogino sukhavisesahetutāya vā kammaṭṭhānasaṅkhāte sampajaññassa visayabhāvena gocare. Abhikkamādīsūti abhikkamapaṭikkamādīsu ceva cīvarapārupanādīsu ca. Asammuyhanaṃ cittakiriyāvāyodhātuvipphāravaseneva tesaṃ pavatti, na aññathāti yāthāvato jānanaṃ.
гаммадтаанам̣ бад̇хаанам̣ гад̇ваад̇и жийварабаарубанаад̣̇исарийрабарихаран̣агижжагаалзби гаммадтаанаманасигаарамзва бад̇хаанам̣ гад̇ваа.
Kammaṭṭhānaṃ padhānaṃ katvāti cīvarapārupanādisarīrapariharaṇakiccakālepi kammaṭṭhānamanasikārameva padhānaṃ katvā.
д̇асмаад̇и яасмаа уссуггаж̇аад̇о худ̇ваа ад̇ивияа мам̣ яаажаси, яасмаа жа ж̇ийвид̇анд̇арааяаанам̣ д̣̇уж̇ж̇аанад̇ам̣ вад̣̇аси, инд̣̇рияаани жа д̇з барибаагам̣ г̇ад̇аани, д̇асмаа. д̇ихаад̇и нибаад̇амад̇д̇ам̣. д̇з д̇аяаа. званд̇и ид̣̇аани вад̇д̇аб̣б̣аагаарам̣ вад̣̇ад̇и. сигкид̇аб̣б̣анд̇и ад̇хисийласигкаад̣̇ийнам̣ д̇иссаннамби сигкаанам̣ васзна сигканам̣ гаад̇аб̣б̣ам̣. яат̇аа бана сигкид̇аб̣б̣ам̣, д̇ам̣ д̣̇ассзнд̇о ‘‘д̣̇идтз д̣̇идтамад̇д̇ам̣ бхависсад̇ий’’д̇иаад̣̇имааха.
Tasmāti yasmā ussukkajāto hutvā ativiya maṃ yācasi, yasmā ca jīvitantarāyānaṃ dujjānataṃ vadasi, indriyāni ca te paripākaṃ gatāni, tasmā. Tihāti nipātamattaṃ. Te tayā. Evanti idāni vattabbākāraṃ vadati. Sikkhitabbanti adhisīlasikkhādīnaṃ tissannampi sikkhānaṃ vasena sikkhanaṃ kātabbaṃ. Yathā pana sikkhitabbaṃ, taṃ dassento ‘‘diṭṭhe diṭṭhamattaṃ bhavissatī’’tiādimāha.
д̇ад̇т̇а д̣̇идтз д̣̇идтамад̇д̇анд̇и руубааяад̇анз жагкувин̃н̃аан̣зна д̣̇идтамад̇д̇ам̣. яат̇аа хи жагкувин̃н̃аан̣ам̣ руубз руубамад̇д̇амзва бассад̇и, на нижжаад̣̇исабхаавам̣, звам̣ сзсад̇ам̣д̣̇вааригавин̃н̃аан̣зхиби мз зд̇т̇а д̣̇идтамад̇д̇амзва бхависсад̇ийд̇и сигкид̇аб̣б̣анд̇и ад̇т̇о. ат̇а ваа д̣̇идтз д̣̇идтам̣ наама жагкувин̃н̃аан̣ам̣, руубз руубавиж̇аанананд̇и ад̇т̇о. мад̇д̇аад̇и бамаан̣ам̣. д̣̇идтам̣ мад̇д̇аа зд̇ассаад̇и д̣̇идтамад̇д̇ам̣, жагкувин̃н̃аан̣амад̇д̇амзва мз жид̇д̇ам̣ бхависсад̇ийд̇и ад̇т̇о. ид̣̇ам̣ вуд̇д̇ам̣ ход̇и – яат̇аа аабаат̇аг̇ад̇з руубз жагкувин̃н̃аан̣ам̣ на раж̇ж̇ад̇и на д̣̇уссад̇и на муяхад̇и, звам̣ рааг̇аад̣̇ивирахзна жагкувин̃н̃аан̣амад̇д̇амзва мз ж̇аванам̣ бхависсад̇и, жагкувин̃н̃аан̣аббамаан̣знзва нам̣ табзссаамийд̇и. ат̇а ваа д̣̇идтам̣ наама жагкувин̃н̃аан̣зна д̣̇идтаруубам̣. д̣̇идтз д̣̇идтам̣ наама д̇ад̇т̇зва уббаннам̣ самбадижчанасанд̇ийран̣аводтаб̣б̣анасан̇каад̇ам̣ жид̇д̇ад̇д̇аяам̣. яат̇аа д̇ам̣ на раж̇ж̇ад̇и на д̣̇уссад̇и на муяхад̇и, звам̣ аабаат̇аг̇ад̇з руубз д̇знзва самбадижчанаад̣̇иббамаан̣зна ж̇аванам̣ уббаад̣̇зссаами, наасса д̇ам̣ бамаан̣ам̣ ад̇иггамид̇ваа раж̇ж̇анаад̣̇ивасзна уббаж̇ж̇ид̇ум̣ д̣̇ассаамийд̇и звамзд̇т̇а ад̇т̇о д̣̇адтаб̣б̣о. зса наяо суд̇амуд̇зсу. муд̇анд̇и жа д̇ад̣̇аарамман̣авин̃н̃аан̣зхи сад̣̇д̇хим̣ г̇анд̇харасаподтаб̣б̣ааяад̇анам̣ взд̣̇ид̇аб̣б̣ам̣. вин̃н̃аад̇з вин̃н̃аад̇амад̇д̇анд̇и зд̇т̇а бана вин̃н̃аад̇ам̣ наама манод̣̇ваарааваж̇ж̇анзна вин̃н̃аад̇аарамман̣ам̣, д̇асмим̣ вин̃н̃аад̇з. вин̃н̃аад̇амад̇д̇анд̇и ааваж̇ж̇анаббамаан̣ам̣. яат̇аа ааваж̇ж̇анам̣ на раж̇ж̇ад̇и на д̣̇уссад̇и на муяхад̇и, звам̣ раж̇ж̇анаад̣̇ивасзна уббаж̇ж̇ид̇ум̣ ад̣̇ад̇ваа ааваж̇ж̇анаббамаан̣знзва жид̇д̇ам̣ табзссаамийд̇и аяамзд̇т̇а ад̇т̇о. зван̃хи д̇з б̣аахияа сигкид̇аб̣б̣анд̇и звам̣ имааяа бадибад̣̇ааяа д̇аяаа б̣аахияа д̇иссаннам̣ сигкаанам̣ анубавад̇д̇анавасзна сигкид̇аб̣б̣ам̣. ид̇и бхаг̇аваа б̣аахияасса сам̣кид̇д̇аружид̇ааяа чахи вин̃н̃аан̣агааязхи сад̣̇д̇хим̣ чал̣аарамман̣абхзд̣̇абхиннам̣ вибассанаависаяам̣ д̣̇идтаад̣̇ийхи жад̇уухи годтаасзхи вибхаж̇ид̇ваа д̇ад̇т̇асса н̃аад̇ад̇ийран̣абарин̃н̃ам̣ д̣̇ассзд̇и.
Tattha diṭṭhe diṭṭhamattanti rūpāyatane cakkhuviññāṇena diṭṭhamattaṃ. Yathā hi cakkhuviññāṇaṃ rūpe rūpamattameva passati, na niccādisabhāvaṃ, evaṃ sesataṃdvārikaviññāṇehipi me ettha diṭṭhamattameva bhavissatīti sikkhitabbanti attho. Atha vā diṭṭhe diṭṭhaṃ nāma cakkhuviññāṇaṃ, rūpe rūpavijānananti attho. Mattāti pamāṇaṃ. Diṭṭhaṃ mattā etassāti diṭṭhamattaṃ, cakkhuviññāṇamattameva me cittaṃ bhavissatīti attho. Idaṃ vuttaṃ hoti – yathā āpāthagate rūpe cakkhuviññāṇaṃ na rajjati na dussati na muyhati, evaṃ rāgādivirahena cakkhuviññāṇamattameva me javanaṃ bhavissati, cakkhuviññāṇappamāṇeneva naṃ ṭhapessāmīti. Atha vā diṭṭhaṃ nāma cakkhuviññāṇena diṭṭharūpaṃ. Diṭṭhe diṭṭhaṃ nāma tattheva uppannaṃ sampaṭicchanasantīraṇavoṭṭhabbanasaṅkhātaṃ cittattayaṃ. Yathā taṃ na rajjati na dussati na muyhati, evaṃ āpāthagate rūpe teneva sampaṭicchanādippamāṇena javanaṃ uppādessāmi, nāssa taṃ pamāṇaṃ atikkamitvā rajjanādivasena uppajjituṃ dassāmīti evamettha attho daṭṭhabbo. Esa nayo sutamutesu. Mutanti ca tadārammaṇaviññāṇehi saddhiṃ gandharasaphoṭṭhabbāyatanaṃ veditabbaṃ. Viññāte viññātamattanti ettha pana viññātaṃ nāma manodvārāvajjanena viññātārammaṇaṃ, tasmiṃ viññāte. Viññātamattanti āvajjanappamāṇaṃ. Yathā āvajjanaṃ na rajjati na dussati na muyhati, evaṃ rajjanādivasena uppajjituṃ adatvā āvajjanappamāṇeneva cittaṃ ṭhapessāmīti ayamettha attho. Evañhi te bāhiya sikkhitabbanti evaṃ imāya paṭipadāya tayā bāhiya tissannaṃ sikkhānaṃ anupavattanavasena sikkhitabbaṃ. Iti bhagavā bāhiyassa saṃkhittarucitāya chahi viññāṇakāyehi saddhiṃ chaḷārammaṇabhedabhinnaṃ vipassanāvisayaṃ diṭṭhādīhi catūhi koṭṭhāsehi vibhajitvā tatthassa ñātatīraṇapariññaṃ dasseti.
гат̇ам̣? зд̇т̇а хи руубааяад̇анам̣ бассид̇аб̣б̣адтзна д̣̇идтам̣ наама, жагкувин̃н̃аан̣ам̣ бана сад̣̇д̇хим̣ д̇ам̣д̣̇вааригавин̃н̃аан̣зхи д̣̇ассанадтзна, д̇ад̣̇убхаяамби яат̇аабажжаяам̣ бавад̇д̇амаанам̣ д̇хаммамад̇д̇амзва, на зд̇т̇а гожи гад̇д̇аа ваа гаарзд̇аа ваа. яад̇о д̇ам̣ худ̇ваа абхаавадтзна анижжам̣, уд̣̇аяаб̣б̣аяабадибийл̣анадтзна д̣̇угкам̣, авасавад̇д̇анадтзна анад̇д̇аад̇и гуд̇о д̇ад̇т̇а бан̣д̣ид̇асса раж̇ж̇анаад̣̇ийнам̣ огаасод̇и аяан̃хзд̇т̇а ад̇хиббааяо. зса наяо суд̇аад̣̇ийсуби.
Kathaṃ? Ettha hi rūpāyatanaṃ passitabbaṭṭhena diṭṭhaṃ nāma, cakkhuviññāṇaṃ pana saddhiṃ taṃdvārikaviññāṇehi dassanaṭṭhena, tadubhayampi yathāpaccayaṃ pavattamānaṃ dhammamattameva, na ettha koci kattā vā kāretā vā. Yato taṃ hutvā abhāvaṭṭhena aniccaṃ, udayabbayapaṭipīḷanaṭṭhena dukkhaṃ, avasavattanaṭṭhena anattāti kuto tattha paṇḍitassa rajjanādīnaṃ okāsoti ayañhettha adhippāyo. Esa nayo sutādīsupi.
ид̣̇аани н̃аад̇ад̇ийран̣абарин̃н̃аасу бад̇идтид̇асса убари саха палзна бахаанабарин̃н̃ам̣ д̣̇ассзд̇ум̣ ‘‘яад̇о ко д̇з б̣аахияаа’’д̇иаад̣̇и аарад̣̇д̇хам̣. д̇ад̇т̇а яад̇од̇и яад̣̇аа, яасмаа ваа. д̇зд̇и д̇ава. д̇ад̇од̇и д̇ад̣̇аа, д̇асмаа ваа. д̇знаад̇и д̇зна д̣̇идтаад̣̇инаа, д̣̇идтаад̣̇ибадиб̣ад̣̇д̇хзна ваа рааг̇аад̣̇инаа. ид̣̇ам̣ вуд̇д̇ам̣ ход̇и – б̣аахияа, д̇ава яасмим̣ гаалз, язна ваа гааран̣зна д̣̇идтаад̣̇ийсу маяаа вуд̇д̇авид̇хим̣ бадибаж̇ж̇анд̇асса авибарийд̇асабхаавааваб̣од̇хзна д̣̇идтаад̣̇имад̇д̇ам̣ бхависсад̇и, д̇асмим̣ гаалз, д̇зна ваа гааран̣зна д̇вам̣ д̇зна д̣̇идтаад̣̇ибадиб̣ад̣̇д̇хзна рааг̇аад̣̇инаа саха на бхависсаси, рад̇д̇о ваа д̣̇удто ваа муул̣хо ваа на бхависсаси бахийнарааг̇аад̣̇игад̇д̇аа, д̇зна ваа д̣̇идтаад̣̇инаа саха бадиб̣ад̣̇д̇хо на бхависсасийд̇и. д̇ад̇о д̇вам̣, б̣аахияа, на д̇ад̇т̇аад̇и яад̣̇аа, яасмаа ваа д̇вам̣ д̇зна рааг̇зна ваа рад̇д̇о, д̣̇осзна ваа д̣̇удто, мохзна ваа муул̣хо на бхависсаси, д̇ад̣̇аа, д̇асмаа ваа д̇вам̣ д̇ад̇т̇а д̣̇идтаад̣̇игз на бхависсаси, д̇асмим̣ д̣̇идтз ваа суд̇амуд̇авин̃н̃аад̇з ваа ‘‘зд̇ам̣ мама, зсохамасми, зсо мз ад̇д̇аа’’д̇и (махаава. 21) д̇ан̣хаамаанад̣̇идтийхи аллийно бад̇идтид̇о на бхависсаси. зд̇д̇аавад̇аа бахаанабарин̃н̃ам̣ мад̇т̇агам̣ баабзд̇ваа кийн̣аасавабхууми д̣̇ассид̇аа. д̇ад̇о д̇вам̣, б̣аахияа, нзвид̇ха, на хурам̣, на убхаяаманд̇арзнаад̇и яад̣̇аа д̇вам̣, б̣аахияа, д̇зна рааг̇аад̣̇инаа д̇ад̇т̇а д̣̇идтаад̣̇ийсу бадиб̣ад̣̇д̇хо на бхависсаси, д̇ад̣̇аа д̇вам̣ нзва ид̇ха логз, на баралогз, на убхаяад̇т̇а хоси. зсзванд̇о д̣̇угкассаад̇и гилзсад̣̇угкасса, ваддад̣̇угкасса жа аяамзва анд̇о аяам̣ барижчзд̣̇о баривадумабхаавод̇и аяамзва хи зд̇т̇а ад̇т̇о . яз бана ‘‘убхаяаманд̇арзнаа’’д̇и бад̣̇ам̣ г̇ахзд̇ваа анд̇араабхавам̣ наама ижчанд̇и, д̇зсам̣ д̇ам̣ мижчаа. д̇ад̇т̇а яам̣ вад̇д̇аб̣б̣ам̣, д̇ам̣ барад̇о анд̇араабхавагат̇ааяам̣ (гат̇аа. 505 аад̣̇аяо ) аави бхависсад̇и.
Idāni ñātatīraṇapariññāsu patiṭṭhitassa upari saha phalena pahānapariññaṃ dassetuṃ ‘‘yato kho te bāhiyā’’tiādi āraddhaṃ. Tattha yatoti yadā, yasmā vā. Teti tava. Tatoti tadā, tasmā vā. Tenāti tena diṭṭhādinā, diṭṭhādipaṭibaddhena vā rāgādinā. Idaṃ vuttaṃ hoti – bāhiya, tava yasmiṃ kāle, yena vā kāraṇena diṭṭhādīsu mayā vuttavidhiṃ paṭipajjantassa aviparītasabhāvāvabodhena diṭṭhādimattaṃ bhavissati, tasmiṃ kāle, tena vā kāraṇena tvaṃ tena diṭṭhādipaṭibaddhena rāgādinā saha na bhavissasi, ratto vā duṭṭho vā mūḷho vā na bhavissasi pahīnarāgādikattā, tena vā diṭṭhādinā saha paṭibaddho na bhavissasīti. Tato tvaṃ, bāhiya, na tatthāti yadā, yasmā vā tvaṃ tena rāgena vā ratto, dosena vā duṭṭho, mohena vā mūḷho na bhavissasi, tadā, tasmā vā tvaṃ tattha diṭṭhādike na bhavissasi, tasmiṃ diṭṭhe vā sutamutaviññāte vā ‘‘etaṃ mama, esohamasmi, eso me attā’’ti (mahāva. 21) taṇhāmānadiṭṭhīhi allīno patiṭṭhito na bhavissasi. Ettāvatā pahānapariññaṃ matthakaṃ pāpetvā khīṇāsavabhūmi dassitā. Tato tvaṃ, bāhiya, nevidha, na huraṃ, na ubhayamantarenāti yadā tvaṃ, bāhiya, tena rāgādinā tattha diṭṭhādīsu paṭibaddho na bhavissasi, tadā tvaṃ neva idha loke, na paraloke, na ubhayattha hosi. Esevanto dukkhassāti kilesadukkhassa, vaṭṭadukkhassa ca ayameva anto ayaṃ paricchedo parivaṭumabhāvoti ayameva hi ettha attho . Ye pana ‘‘ubhayamantarenā’’ti padaṃ gahetvā antarābhavaṃ nāma icchanti, tesaṃ taṃ micchā. Tattha yaṃ vattabbaṃ, taṃ parato antarābhavakathāyaṃ (kathā. 505 ādayo ) āvi bhavissati.
зд̇зсанд̇и ад̇ихаран̣авийд̇ихаран̣аанам̣.
Etesanti atiharaṇavītiharaṇānaṃ.
‘‘д̇ад̇т̇а хий’’д̇иаад̣̇инаа бан̃жавин̃н̃аан̣авийт̇ияам̣ бурзд̇арам̣ бавад̇д̇ааяонисоманасигааравасзна ааваж̇ж̇анаад̣̇ийнам̣ аяонисо ааваж̇ж̇анаад̣̇инаа идтаад̣̇иаарамман̣з лобхаад̣̇иббавад̇д̇имад̇д̇ам̣ ход̇и, на бана ид̇т̇ибурисаад̣̇ивигаббаг̇аахо, манод̣̇ваарзязва бана со ход̇ийд̇и д̣̇ассзд̇и. д̇ассаад̇и ‘‘ид̇т̇ий, бурисо’’д̇и раж̇ж̇анаад̣̇игасса. бхаван̇г̇аад̣̇ийд̇и бхаван̇г̇аааваж̇ж̇анад̣̇ассанаани, самбадижчанасанд̇ийран̣аводтаб̣б̣анабан̃жад̣̇вааригаж̇аванан̃жа. абуб̣б̣ад̇ид̇д̇арад̇аавасзнаад̇и абуб̣б̣ад̇ааид̇д̇арабхааваанам̣ васзна.
‘‘Tattha hī’’tiādinā pañcaviññāṇavīthiyaṃ puretaraṃ pavattaayonisomanasikāravasena āvajjanādīnaṃ ayoniso āvajjanādinā iṭṭhādiārammaṇe lobhādippavattimattaṃ hoti, na pana itthipurisādivikappagāho, manodvāreyeva pana so hotīti dasseti. Tassāti ‘‘itthī, puriso’’ti rajjanādikassa. Bhavaṅgādīti bhavaṅgaāvajjanadassanāni, sampaṭicchanasantīraṇavoṭṭhabbanapañcadvārikajavanañca. Apubbatittaratāvasenāti apubbatāittarabhāvānaṃ vasena.
ад̇ихарад̇ийд̇и мукад̣̇ваарам̣ ад̇иггамид̇ваа харад̇и. д̇ам̣д̇ам̣виж̇аанананибпаад̣̇агод̇и д̇асса д̇асса бариязсанаад̣̇ивисаяасса, виж̇аананасса жа нибпаад̣̇аго. язна хи баяог̇зна бариязсанаад̣̇и нибпаж̇ж̇ад̇и, со д̇аб̣б̣исаяам̣ виж̇аананамби нибпаад̣̇зд̇и наама ход̇и. саммаабадибад̇д̇инд̇и д̇хаммзсу авибарийд̇абадибад̇д̇им̣ яат̇аабхууд̇ааваб̣од̇хам̣.
Atiharatīti mukhadvāraṃ atikkamitvā harati. Taṃtaṃvijānananipphādakoti tassa tassa pariyesanādivisayassa, vijānanassa ca nipphādako. Yena hi payogena pariyesanādi nipphajjati, so tabbisayaṃ vijānanampi nipphādeti nāma hoti. Sammāpaṭipattinti dhammesu aviparītapaṭipattiṃ yathābhūtāvabodhaṃ.
г̇аманзбийд̇и г̇аманабаяог̇зби. ад̇ихаран̣ам̣ яат̇аатид̇ассзва гааяасса ижчид̇ад̣̇зсаабхимукагаран̣ам̣. г̇аманам̣ д̣̇зсанд̇аруббад̇д̇и. вагкамаанод̇и ‘‘абхигганд̇з бадигганд̇зд̇и…бз… ад̣̇д̇хааг̇аманавасзна гат̇ид̇о. г̇ад̇з тид̇з нисиннзд̇и зд̇т̇а вихаарз жун̣н̣игабаад̣̇уд̣̇д̇хаараирияаабат̇авасзна гат̇ид̇о’’д̇и (вибха. адта. 523) вагкамаано висзсо.
Gamanepīti gamanapayogepi. Atiharaṇaṃ yathāṭhitasseva kāyassa icchitadesābhimukhakaraṇaṃ. Gamanaṃ desantaruppatti. Vakkhamānoti ‘‘abhikkante paṭikkanteti…pe… addhāgamanavasena kathito. Gate ṭhite nisinneti ettha vihāre cuṇṇikapāduddhārairiyāpathavasena kathito’’ti (vibha. aṭṭha. 523) vakkhamāno viseso.
бавад̇д̇зд̇и жан̇гамаад̣̇ийсу бавад̇д̇з руубааруубад̇хаммз. бариг̇г̇ан̣ханд̇асса анижжаад̣̇ид̇о.
Pavatteti caṅkamādīsu pavatte rūpārūpadhamme. Pariggaṇhantassa aniccādito.
гааяигагирияаад̣̇иниб̣б̣ад̇д̇агаж̇аванам̣ палуубажаарзна ‘‘гааяаад̣̇игирияаамаяа’’нд̇и вуд̇д̇ам̣. гирияаасамудтид̇ад̇д̇аад̇и бана гааран̣уубажаарзна.
Kāyikakiriyādinibbattakajavanaṃ phalūpacārena ‘‘kāyādikiriyāmaya’’nti vuttaṃ. Kiriyāsamuṭṭhitattāti pana kāraṇūpacārena.
526. гаммадтаанаубаасанассаад̇и гаммадтаанабхааванааяа. яог̇абат̇анд̇и бхааванааяог̇г̇агирияааяа бавад̇д̇анамаг̇г̇ам̣.
526. Kammaṭṭhānaupāsanassāti kammaṭṭhānabhāvanāya. Yogapathanti bhāvanāyoggakiriyāya pavattanamaggaṃ.
537. гааяаад̣̇ийсууд̇и гааяавзд̣̇анаажид̇д̇ад̇хаммзсу. судту бавад̇д̇ияаад̇и асубхаанубассанаад̣̇ивасзна бавад̇д̇ияаа. нияяаанасабхааво саммаасад̇ид̇аа зва . убадтаананд̇и сад̇им̣ гижжад̇о д̣̇ассзд̇и. зд̇т̇а жа яат̇аавуд̇д̇о бариг̇г̇ахо ж̇аад̇о зд̇иссаад̇и бариг̇г̇ахид̇аа, д̇ам̣ бариг̇г̇ахид̇ам̣ нияяаанабхууд̇ам̣ сад̇им̣ гад̇ваад̇и ад̇т̇о взд̣̇ид̇аб̣б̣о.
537. Kāyādīsūti kāyavedanācittadhammesu. Suṭṭhu pavattiyāti asubhānupassanādivasena pavattiyā. Niyyānasabhāvo sammāsatitā eva . Upaṭṭhānanti satiṃ kiccato dasseti. Ettha ca yathāvutto pariggaho jāto etissāti pariggahitā, taṃ pariggahitaṃ niyyānabhūtaṃ satiṃ katvāti attho veditabbo.
542-3. багуббанам̣ ид̇ха вигаараабад̇д̇ибхааво.
542-3. Pakuppanaṃ idha vikārāpattibhāvo.
550. д̇аббадибагкасан̃н̃аад̇и т̇инамид̣̇д̇хабадибагкасан̃н̃аа. саа ад̇т̇ад̇о д̇ад̣̇ан̇г̇аад̣̇ивасзна т̇инамид̣̇д̇хавинод̣̇анаагаараббавад̇д̇аа гусалавид̇аггасамбаяуд̇д̇асан̃н̃аа, д̇ат̇аабхууд̇о ваа жид̇д̇уббаад̣̇о сан̃н̃аасийсзна вуд̇д̇од̇и взд̣̇ид̇аб̣б̣о.
550. Tappaṭipakkhasaññāti thinamiddhapaṭipakkhasaññā. Sā atthato tadaṅgādivasena thinamiddhavinodanākārappavattā kusalavitakkasampayuttasaññā, tathābhūto vā cittuppādo saññāsīsena vuttoti veditabbo.
553. саарамбханд̇и аарамбхаванд̇ам̣, сахаарамбханд̇и ад̇т̇о. нирааваран̣аабхог̇аа т̇инамид̣̇д̇ханд̇хагааравиг̇амзна нирааваран̣асаманнаахаарасан̃н̃аа. вивадаа аббадижчаад̣̇анаа.
553. Sārambhanti ārambhavantaṃ, sahārambhanti attho. Nirāvaraṇābhogā thinamiddhandhakāravigamena nirāvaraṇasamannāhārasaññā. Vivaṭā appaṭicchādanā.
564. д̇ад̇т̇а д̇ад̇т̇аад̇и ‘‘иминаа баад̇имогкасам̣варзна убзд̇о ход̇ий’’д̇иаад̣̇ийсу (вибха. 511).
564. Tattha tatthāti ‘‘iminā pātimokkhasaṃvarena upeto hotī’’tiādīsu (vibha. 511).
588. яат̇аа гзнажи ниггуж̇ж̇ид̇ам̣ ‘‘ид̣̇ам̣ наамзд̇а’’нд̇и багад̇ин̃аан̣зна на н̃ааяад̇и, звам̣ саб̣б̣аббагаарзна авид̣̇ид̇ам̣ ниггуж̇ж̇ид̇ам̣ вияа ход̇ийд̇и ааха ‘‘саб̣б̣ат̇аа ан̃н̃аад̇ад̇аа ниггуж̇ж̇ид̇абхааво’’д̇и. ниравасзсабарижчинд̣̇анаабхаавод̇и д̣̇увин̃н̃зяяад̇ааяа ниравасзсад̇о барижчинд̣̇ид̇аб̣б̣ад̇аабхааво, барижчинд̣̇игаабхааво ваа. згад̣̇зсзнзва хи г̇амбхийрам̣ н̃ааяад̇и.
588. Yathā kenaci nikkujjitaṃ ‘‘idaṃ nāmeta’’nti pakatiñāṇena na ñāyati, evaṃ sabbappakārena aviditaṃ nikkujjitaṃ viya hotīti āha ‘‘sabbathā aññātatā nikkujjitabhāvo’’ti. Niravasesaparicchindanābhāvoti duviññeyyatāya niravasesato paricchinditabbatābhāvo, paricchindikābhāvo vā. Ekadeseneva hi gambhīraṃ ñāyati.
аажигканд̇ийд̇иаад̣̇ид̇о бариб̣яад̇д̇ам̣ гат̇знд̇и. д̣̇зсзнд̇ийд̇и убад̣̇исанавасзна вад̣̇анд̇и, баб̣од̇хзнд̇и ваа. бан̃н̃аабзнд̇ийд̇и баж̇аанаабзнд̇и, сам̣багаасзнд̇ийд̇и ад̇т̇о. бадтабзнд̇ийд̇и багаарзхи асан̇гарад̇о табзнд̇и. виваранд̇ийд̇и вивадам̣ гаронд̇и. вибхаж̇анд̇ийд̇и вибхад̇д̇ам̣ гаронд̇и. уд̇д̇аанийгаронд̇ийд̇и ануд̇д̇аанам̣ г̇амбхийрам̣ уд̇д̇аанам̣ баагадам̣ гаронд̇и. зд̇т̇а жа ‘‘бан̃н̃аабзнд̇ий’’д̇иаад̣̇ийхи чахи бад̣̇зхи ад̇т̇абад̣̇аани д̣̇ассид̇аани. ‘‘аажигканд̇и д̣̇зсзнд̇ий’’д̇и бана д̣̇вийхи бад̣̇зхи б̣яан̃ж̇анабад̣̇аанийд̇и звам̣ ад̇т̇аб̣яан̃ж̇анабад̣̇асамбаннааяа ул̣аарааяа басам̣сааяа басам̣санам̣ д̣̇ассзд̇и. яам̣ банзд̇зсу ад̇т̇аб̣яан̃ж̇анабад̣̇зсу вад̇д̇аб̣б̣ам̣, д̇ам̣ нзд̇д̇иадтагат̇ааяам̣ (нзд̇д̇и. адта. 23 аад̣̇аяо) вид̇т̇аарад̇о вуд̇д̇амзва, д̇асмаа д̇ад̇т̇а вуд̇д̇анаязнзва взд̣̇ид̇аб̣б̣ам̣.
Ācikkhantītiādito paribyattaṃ kathenti. Desentīti upadisanavasena vadanti, pabodhenti vā. Paññāpentīti pajānāpenti, saṃpakāsentīti attho. Paṭṭhapentīti pakārehi asaṅkarato ṭhapenti. Vivarantīti vivaṭaṃ karonti. Vibhajantīti vibhattaṃ karonti. Uttānīkarontīti anuttānaṃ gambhīraṃ uttānaṃ pākaṭaṃ karonti. Ettha ca ‘‘paññāpentī’’tiādīhi chahi padehi atthapadāni dassitāni. ‘‘Ācikkhanti desentī’’ti pana dvīhi padehi byañjanapadānīti evaṃ atthabyañjanapadasampannāya uḷārāya pasaṃsāya pasaṃsanaṃ dasseti. Yaṃ panetesu atthabyañjanapadesu vattabbaṃ, taṃ nettiaṭṭhakathāyaṃ (netti. aṭṭha. 23 ādayo) vitthārato vuttameva, tasmā tattha vuttanayeneva veditabbaṃ.
602. зд̇т̇зва яож̇зд̇аб̣б̣ам̣ д̇асса хздтаабхуумисамад̇иггаманамукзна бхуумивисзсаад̇хиг̇амубааяад̣̇ийбанад̇о. саб̣б̣ад̇т̇аабийд̇и ‘‘руубасан̃н̃аанам̣ самад̇иггамаа, аагаасаанан̃жааяад̇анам̣ самад̇иггаммаа’’д̇и саб̣б̣зсуби самад̇иггамаважанзсу.
602. Etthevayojetabbaṃ tassa heṭṭhābhūmisamatikkamanamukhena bhūmivisesādhigamupāyadīpanato. Sabbatthāpīti ‘‘rūpasaññānaṃ samatikkamā, ākāsānañcāyatanaṃ samatikkammā’’ti sabbesupi samatikkamavacanesu.
610. д̇ам̣язва аагаасам̣ пудам̣ вин̃н̃аан̣анд̇и д̇ам̣язва гасин̣уг̇гхаадимаагаасам̣ ‘‘ананд̇а’’нд̇и манасигаарзна пудам̣ парид̇ваа тид̇ам̣ батамааруббавин̃н̃аан̣ам̣ ‘‘ананд̇ам̣ вин̃н̃аан̣а’’нд̇и манаси гарод̇ийд̇и ад̇т̇о. д̣̇уд̇ияавигаббз бана сааман̃н̃аж̇од̇анаа висзсз д̇идтад̇ийд̇и ‘‘пуда’’нд̇и иминаа вин̃н̃аан̣амзва вуд̇д̇анд̇и пудам̣ вин̃н̃аан̣анд̇и батамааруббавин̃н̃аан̣амааха. д̇ан̃хи аагаасасса сапаран̣агавин̃н̃аан̣ам̣. вин̃н̃аан̣знаад̇и жа гаран̣ад̇т̇з гаран̣аважанам̣, д̇ан̃жа д̣̇уд̇ияааруббавин̃н̃аан̣ам̣ вад̣̇ад̇ийд̇и ааха ‘‘вин̃н̃аан̣ан̃жааяад̇анавин̃н̃аан̣зна манаси гарод̇ий’’д̇и. д̇знаад̇и батамааруббавин̃н̃аан̣зна. г̇ахид̇аагааранд̇и ананд̇апаран̣авасзна г̇ахид̇аагаарам̣. манаси гарод̇ийд̇и д̣̇уд̇ияааруббабаригаммаманасигаарзна манаси гарод̇и. званд̇и яат̇аавуд̇д̇аагаарам̣ гасин̣уг̇гхаадимаагаасз батамааруббавин̃н̃аан̣зна ананд̇апаран̣авасзна яо г̇ахид̇аагааро, д̇ам̣ манаси гаронд̇ам̣язва. д̇ам̣ вин̃н̃аан̣анд̇и д̇ам̣ д̣̇уд̇ияааруббавин̃н̃аан̣ам̣. ананд̇ам̣ парад̇ийд̇и ‘‘ананд̇а’’нд̇и парад̇и, д̇асмаа д̣̇уд̇ияоязвад̇т̇о яуд̇д̇од̇и. ‘‘яан̃хий’’д̇иаад̣̇инаа яат̇аавуд̇д̇амад̇т̇ам̣ баагадам̣ гарод̇и. д̇ам̣паран̣аагаарасахид̇анд̇и д̇асмим̣ аагаасз паран̣аагаарасахид̇ам̣. вин̃н̃аан̣анд̇и батамааруббавин̃н̃аан̣ам̣.
610. Taṃyeva ākāsaṃ phuṭaṃ viññāṇanti taṃyeva kasiṇugghāṭimākāsaṃ ‘‘ananta’’nti manasikārena phuṭaṃ pharitvā ṭhitaṃ paṭhamāruppaviññāṇaṃ ‘‘anantaṃ viññāṇa’’nti manasi karotīti attho. Dutiyavikappe pana sāmaññajotanā visese tiṭṭhatīti ‘‘phuṭa’’nti iminā viññāṇameva vuttanti phuṭaṃ viññāṇanti paṭhamāruppaviññāṇamāha. Tañhi ākāsassa sapharaṇakaviññāṇaṃ. Viññāṇenāti ca karaṇatthe karaṇavacanaṃ, tañca dutiyāruppaviññāṇaṃ vadatīti āha ‘‘viññāṇañcāyatanaviññāṇena manasi karotī’’ti. Tenāti paṭhamāruppaviññāṇena. Gahitākāranti anantapharaṇavasena gahitākāraṃ. Manasi karotīti dutiyāruppaparikammamanasikārena manasi karoti. Evanti yathāvuttākāraṃ kasiṇugghāṭimākāse paṭhamāruppaviññāṇena anantapharaṇavasena yo gahitākāro, taṃ manasi karontaṃyeva. Taṃ viññāṇanti taṃ dutiyāruppaviññāṇaṃ. Anantaṃ pharatīti ‘‘ananta’’nti pharati, tasmā dutiyoyevattho yuttoti. ‘‘Yañhī’’tiādinā yathāvuttamatthaṃ pākaṭaṃ karoti. Taṃpharaṇākārasahitanti tasmiṃ ākāse pharaṇākārasahitaṃ. Viññāṇanti paṭhamāruppaviññāṇaṃ.
615. буб̣б̣зд̇и д̣̇уд̇ияааруббабаригаммагаалз. яам̣ ‘‘ананд̇ам̣ вин̃н̃аан̣а’’нд̇и манаси гад̇ам̣, д̇ам̣язва батамааруббавин̃н̃аан̣амзва. д̇ам̣язва хи абхаавзд̇и. аарамман̣аад̇иггамавасзна хи зд̇аа самаабад̇д̇ияо лад̣̇д̇хаб̣б̣аад̇и.
615. Pubbeti dutiyāruppaparikammakāle. Yaṃ ‘‘anantaṃ viññāṇa’’nti manasi kataṃ, taṃyeva paṭhamāruppaviññāṇameva. Taṃyeva hi abhāveti. Ārammaṇātikkamavasena hi etā samāpattiyo laddhabbāti.
нид̣̇д̣̇зсаван̣н̣анаа нидтид̇аа.
Niddesavaṇṇanā niṭṭhitā.
суд̇д̇анд̇абхааж̇анийяаван̣н̣анаа нидтид̇аа.
Suttantabhājanīyavaṇṇanā niṭṭhitā.
2. абхид̇хаммабхааж̇анийяаван̣н̣анаа
2. Abhidhammabhājanīyavaṇṇanā
623. жад̇угганаяз д̣̇уд̇ияаж̇жхаанамзва язсам̣ вижааро ол̣ааригад̇о на убадтаад̇и, язсан̃жа убадтаад̇и, д̇зсам̣ васзна д̣̇вид̇хаа бхинд̣̇ид̇ваа д̣̇зсид̇анд̇и жад̇угганаяад̇о бан̃жаганаяо нийхад̇од̇и ааха ‘‘уд̣̇д̇хадаанам̣язва жад̇уннам̣…бз… д̣̇ассанад̇о жаа’’д̇и.
623. Catukkanaye dutiyajjhānameva yesaṃ vicāro oḷārikato na upaṭṭhāti, yesañca upaṭṭhāti, tesaṃ vasena dvidhā bhinditvā desitanti catukkanayato pañcakanayo nīhatoti āha ‘‘uddhaṭānaṃyeva catunnaṃ…pe… dassanato cā’’ti.
абхид̇хаммабхааж̇анийяаван̣н̣анаа нидтид̇аа.
Abhidhammabhājanīyavaṇṇanā niṭṭhitā.
3. бан̃хабужчагаван̣н̣анаа
3. Pañhapucchakavaṇṇanā
640. д̇ийсууд̇и батамаад̣̇ийсу д̇ийсу. жад̇угганаязна хи д̇ам̣ вуд̇д̇ам̣. звам̣годтаасигаад̇и аббамаан̣аад̇и вуд̇д̇аа. д̇знааха ‘‘логуд̇д̇арабхууд̇аа зваад̇и ад̇хиббааяо’’д̇и. барижчиннаагааса…бз… жад̇уд̇т̇аанам̣ ваддавибассанаабаад̣̇агад̇д̇аа ‘‘саб̣б̣ад̇т̇абаад̣̇агажад̇уд̇т̇з сан̇г̇ахид̇ааний’’д̇и вуд̇д̇ам̣.
640. Tīsūti paṭhamādīsu tīsu. Catukkanayena hi taṃ vuttaṃ. Evaṃkoṭṭhāsikāti appamāṇāti vuttā. Tenāha ‘‘lokuttarabhūtā evāti adhippāyo’’ti. Paricchinnākāsa…pe… catutthānaṃ vaṭṭavipassanāpādakattā ‘‘sabbatthapādakacatutthe saṅgahitānī’’ti vuttaṃ.
аяам̣ гат̇аад̇и барид̇д̇аарамман̣аад̣̇игат̇аа. хздтимо арияо убаримасса арияасса логуд̇д̇аражид̇д̇аани бадивиж̇жхид̇ум̣ на саггод̇ийд̇и вуд̇д̇ам̣ ‘‘на жа…бз… саггод̇ий’’д̇и.
Ayaṃ kathāti parittārammaṇādikathā. Heṭṭhimo ariyo uparimassa ariyassa lokuttaracittāni paṭivijjhituṃ na sakkotīti vuttaṃ ‘‘na ca…pe… sakkotī’’ti.
‘‘гирияад̇о д̣̇ваад̣̇асанна’’нд̇и жа баато ад̇т̇и. саха вад̣̇ад̇и логуд̇д̇арапалажад̇уд̇т̇ад̇аасааман̃н̃знаад̇и ад̇хиббааяо. ид̇ха саб̣б̣асад̣̇д̣̇асса бад̣̇зсасаб̣б̣аваажибхаавад̇о згад̣̇зсасса асамбхавзби саб̣б̣ад̇т̇абаад̣̇агад̇аа зва взд̣̇ид̇аб̣б̣аад̇и д̣̇ассзд̇ум̣ ‘‘саб̣б̣ад̇т̇а…бз… д̣̇адтаб̣б̣а’’нд̇и ааха. барижчиннаагаасагасин̣ажад̇уд̇т̇аад̣̇ийнийд̇и аад̣̇и-сад̣̇д̣̇зна аанаабаанажад̇уд̇т̇аад̣̇аяо сан̇г̇ахид̇аа. навад̇д̇аб̣б̣ад̇ааяаад̇и навад̇д̇аб̣б̣аарамман̣ад̇ааяа.
‘‘Kiriyato dvādasanna’’nti ca pāṭho atthi. Saha vadati lokuttaraphalacatutthatāsāmaññenāti adhippāyo. Idha sabbasaddassa padesasabbavācibhāvato ekadesassa asambhavepi sabbatthapādakatā eva veditabbāti dassetuṃ ‘‘sabbattha…pe… daṭṭhabba’’nti āha. Paricchinnākāsakasiṇacatutthādīnīti ādi-saddena ānāpānacatutthādayo saṅgahitā. Navattabbatāyāti navattabbārammaṇatāya.
ниб̣б̣аанан̃жаад̇и вад̇д̇аб̣б̣ам̣ д̇ад̣̇аарамман̣ассааби б̣ахид̣̇д̇хаарамман̣абхаавад̇о.
Nibbānañcāti vattabbaṃ tadārammaṇassāpi bahiddhārammaṇabhāvato.
‘‘сасанд̇аанаг̇ад̇амбий’’д̇и ид̣̇ам̣ рууба-сад̣̇д̣̇зна, гамма-сад̣̇д̣̇зна жа самб̣анд̇хид̇аб̣б̣ам̣ ‘‘сасанд̇аанаг̇ад̇амби абаагадам̣ руубам̣ д̣̇иб̣б̣ажагку вияа сасанд̇аанаг̇ад̇амби абаагадам̣ гаммам̣ вибхаавзд̇ий’’д̇и. баагадз бана сасанд̇аанаг̇ад̇з руубз, гаммз жа абхин̃н̃аан̃аан̣зна баяож̇анам̣ над̇т̇ийд̇и ‘‘абаагада’’нд̇и висзсзд̇ваа вуд̇д̇ам̣.
‘‘Sasantānagatampī’’ti idaṃ rūpa-saddena, kamma-saddena ca sambandhitabbaṃ ‘‘sasantānagatampi apākaṭaṃ rūpaṃ dibbacakkhu viya sasantānagatampi apākaṭaṃ kammaṃ vibhāvetī’’ti. Pākaṭe pana sasantānagate rūpe, kamme ca abhiññāñāṇena payojanaṃ natthīti ‘‘apākaṭa’’nti visesetvā vuttaṃ.
бан̃хабужчагаван̣н̣анаа нидтид̇аа.
Pañhapucchakavaṇṇanā niṭṭhitā.
жхаанавибхан̇г̇аван̣н̣анаа нидтид̇аа.
Jhānavibhaṅgavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / вибхан̇г̇абаал̣и • Vibhaṅgapāḷi / 12. жхаанавибхан̇г̇о • 12. Jhānavibhaṅgo
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / саммохавинод̣̇аний-адтагат̇аа • Sammohavinodanī-aṭṭhakathā
1. суд̇д̇анд̇абхааж̇анийяам̣ • 1. Suttantabhājanīyaṃ
2. абхид̇хаммабхааж̇анийяаван̣н̣анаа • 2. Abhidhammabhājanīyavaṇṇanā
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-мууладийгаа • Vibhaṅga-mūlaṭīkā / 12. жхаанавибхан̇г̇о • 12. Jhānavibhaṅgo
