| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. ஜிண்ணஸுத்தங்
5. Jiṇṇasuttaṃ
148. ஏவங் மே ஸுதங்…பே॰… ராஜக³ஹே வேளுவனே. அத² கோ² ஆயஸ்மா மஹாகஸ்ஸபோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் மஹாகஸ்ஸபங் ப⁴க³வா ஏதத³வோச – ‘‘ஜிண்ணோஸி தா³னி த்வங், கஸ்ஸப, க³ருகானி ச தே இமானி ஸாணானி பங்ஸுகூலானி நிப்³ப³ஸனானி. தஸ்மாதிஹ த்வங், கஸ்ஸப, க³ஹபதானி 1 சேவ சீவரானி தா⁴ரேஹி, நிமந்தனானி ச பு⁴ஞ்ஜாஹி, மம ச ஸந்திகே விஹராஹீ’’தி.
148. Evaṃ me sutaṃ…pe… rājagahe veḷuvane. Atha kho āyasmā mahākassapo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ mahākassapaṃ bhagavā etadavoca – ‘‘jiṇṇosi dāni tvaṃ, kassapa, garukāni ca te imāni sāṇāni paṃsukūlāni nibbasanāni. Tasmātiha tvaṃ, kassapa, gahapatāni 2 ceva cīvarāni dhārehi, nimantanāni ca bhuñjāhi, mama ca santike viharāhī’’ti.
‘‘அஹங் கோ², ப⁴ந்தே, தீ³க⁴ரத்தங் ஆரஞ்ஞிகோ சேவ ஆரஞ்ஞிகத்தஸ்ஸ ச வண்ணவாதீ³, பிண்ட³பாதிகோ சேவ பிண்ட³பாதிகத்தஸ்ஸ ச வண்ணவாதீ³, பங்ஸுகூலிகோ சேவ பங்ஸுகூலிகத்தஸ்ஸ ச வண்ணவாதீ³, தேசீவரிகோ சேவ தேசீவரிகத்தஸ்ஸ ச வண்ணவாதீ³, அப்பிச்சோ² சேவ அப்பிச்ச²தாய ச வண்ணவாதீ³, ஸந்துட்டோ² சேவ ஸந்துட்டி²யா ச வண்ணவாதீ³, பவிவித்தோ சேவ பவிவேகஸ்ஸ ச வண்ணவாதீ³, அஸங்ஸட்டோ² சேவ அஸங்ஸக்³க³ஸ்ஸ ச வண்ணவாதீ³, ஆரத்³த⁴வீரியோ சேவ வீரியாரம்ப⁴ஸ்ஸ 3 ச வண்ணவாதீ³’’தி.
‘‘Ahaṃ kho, bhante, dīgharattaṃ āraññiko ceva āraññikattassa ca vaṇṇavādī, piṇḍapātiko ceva piṇḍapātikattassa ca vaṇṇavādī, paṃsukūliko ceva paṃsukūlikattassa ca vaṇṇavādī, tecīvariko ceva tecīvarikattassa ca vaṇṇavādī, appiccho ceva appicchatāya ca vaṇṇavādī, santuṭṭho ceva santuṭṭhiyā ca vaṇṇavādī, pavivitto ceva pavivekassa ca vaṇṇavādī, asaṃsaṭṭho ceva asaṃsaggassa ca vaṇṇavādī, āraddhavīriyo ceva vīriyārambhassa 4 ca vaṇṇavādī’’ti.
‘‘கிங் 5 பன த்வங், கஸ்ஸப, அத்த²வஸங் ஸம்பஸ்ஸமானோ தீ³க⁴ரத்தங் ஆரஞ்ஞிகோ சேவ ஆரஞ்ஞிகத்தஸ்ஸ ச வண்ணவாதீ³, பிண்ட³பாதிகோ சேவ…பே॰… பங்ஸுகூலிகோ சேவ… தேசீவரிகோ சேவ… அப்பிச்சோ² சேவ… ஸந்துட்டோ² சேவ… பவிவித்தோ சேவ… அஸங்ஸட்டோ² சேவ… ஆரத்³த⁴வீரியோ சேவ வீரியாரம்ப⁴ஸ்ஸ ச வண்ணவாதீ³’’தி?
‘‘Kiṃ 6 pana tvaṃ, kassapa, atthavasaṃ sampassamāno dīgharattaṃ āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī’’ti?
‘‘த்³வே க்²வாஹங், ப⁴ந்தே, அத்த²வஸே ஸம்பஸ்ஸமானோ தீ³க⁴ரத்தங் ஆரஞ்ஞிகோ சேவ ஆரஞ்ஞிகத்தஸ்ஸ ச வண்ணவாதீ³, பிண்ட³பாதிகோ சேவ…பே॰… பங்ஸுகூலிகோ சேவ… தேசீவரிகோ சேவ… அப்பிச்சோ² சேவ… ஸந்துட்டோ² சேவ… பவிவித்தோ சேவ… அஸங்ஸட்டோ² சேவ… ஆரத்³த⁴வீரியோ சேவ வீரியாரம்ப⁴ஸ்ஸ ச வண்ணவாதீ³. அத்தனோ ச தி³ட்ட²த⁴ம்மஸுக²விஹாரங் ஸம்பஸ்ஸமானோ, பச்சி²மஞ்ச ஜனதங் அனுகம்பமானோ – ‘அப்பேவ நாம பச்சி²மா ஜனதா தி³ட்டா²னுக³திங் ஆபஜ்ஜெய்யுங்’ 7. ‘யே கிர தே அஹேஸுங் பு³த்³தா⁴னுபு³த்³த⁴ஸாவகா தே தீ³க⁴ரத்தங் ஆரஞ்ஞிகா சேவ அஹேஸுங் ஆரஞ்ஞிகத்தஸ்ஸ ச வண்ணவாதி³னோ…பே॰… பிண்ட³பாதிகா சேவ அஹேஸுங் …பே॰… பங்ஸுகூலிகா சேவ அஹேஸுங்… தேசீவரிகா சேவ அஹேஸுங்… அப்பிச்சா² சேவ அஹேஸுங்… ஸந்துட்டா² சேவ அஹேஸுங்… பவிவித்தா சேவ அஹேஸுங்… அஸங்ஸட்டா² சேவ அஹேஸுங்… ஆரத்³த⁴வீரியா சேவ அஹேஸுங் வீரியாரம்ப⁴ஸ்ஸ ச வண்ணவாதி³னோ’தி. தே தத²த்தாய படிபஜ்ஜிஸ்ஸந்தி, தேஸங் தங் ப⁴விஸ்ஸதி தீ³க⁴ரத்தங் ஹிதாய ஸுகா²ய.
‘‘Dve khvāhaṃ, bhante, atthavase sampassamāno dīgharattaṃ āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī. Attano ca diṭṭhadhammasukhavihāraṃ sampassamāno, pacchimañca janataṃ anukampamāno – ‘appeva nāma pacchimā janatā diṭṭhānugatiṃ āpajjeyyuṃ’ 8. ‘Ye kira te ahesuṃ buddhānubuddhasāvakā te dīgharattaṃ āraññikā ceva ahesuṃ āraññikattassa ca vaṇṇavādino…pe… piṇḍapātikā ceva ahesuṃ …pe… paṃsukūlikā ceva ahesuṃ… tecīvarikā ceva ahesuṃ… appicchā ceva ahesuṃ… santuṭṭhā ceva ahesuṃ… pavivittā ceva ahesuṃ… asaṃsaṭṭhā ceva ahesuṃ… āraddhavīriyā ceva ahesuṃ vīriyārambhassa ca vaṇṇavādino’ti. Te tathattāya paṭipajjissanti, tesaṃ taṃ bhavissati dīgharattaṃ hitāya sukhāya.
‘‘இமே க்²வாஹங், ப⁴ந்தே, த்³வே அத்த²வஸே ஸம்பஸ்ஸமானோ தீ³க⁴ரத்தங் ஆரஞ்ஞிகோ சேவ ஆரஞ்ஞிகத்தஸ்ஸ ச வண்ணவாதீ³, பிண்ட³பாதிகோ சேவ…பே॰… பங்ஸுகூலிகோ சேவ… தேசீவரிகோ சேவ… அப்பிச்சோ² சேவ… ஸந்துட்டோ² சேவ… பவிவித்தோ சேவ… அஸங்ஸட்டோ² சேவ… ஆரத்³த⁴வீரியோ சேவ வீரியாரம்ப⁴ஸ்ஸ ச வண்ணவாதீ³’’தி.
‘‘Ime khvāhaṃ, bhante, dve atthavase sampassamāno dīgharattaṃ āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī’’ti.
‘‘ஸாது⁴ ஸாது⁴, கஸ்ஸப. ப³ஹுஜனஹிதாய கிர த்வங், கஸ்ஸப, படிபன்னோ ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸானங். தஸ்மாதிஹ த்வங், கஸ்ஸப, ஸாணானி சேவ பங்ஸுகூலானி தா⁴ரேஹி நிப்³ப³ஸனானி, பிண்டா³ய ச சராஹி, அரஞ்ஞே ச விஹராஹீ’’தி. பஞ்சமங்.
‘‘Sādhu sādhu, kassapa. Bahujanahitāya kira tvaṃ, kassapa, paṭipanno bahujanasukhāya lokānukampāya atthāya hitāya sukhāya devamanussānaṃ. Tasmātiha tvaṃ, kassapa, sāṇāni ceva paṃsukūlāni dhārehi nibbasanāni, piṇḍāya ca carāhi, araññe ca viharāhī’’ti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. ஜிண்ணஸுத்தவண்ணனா • 5. Jiṇṇasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. ஜிண்ணஸுத்தவண்ணனா • 5. Jiṇṇasuttavaṇṇanā
