Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya

    ༥. ཛིཎྞསུཏྟཾ

    5. Jiṇṇasuttaṃ

    ༡༤༨. ཨེཝཾ མེ སུཏཾ…པེ॰… རཱཛགཧེ ཝེལུ༹ཝནེ། ཨཐ ཁོ ཨཱཡསྨཱ མཧཱཀསྶཔོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨཱཡསྨནྟཾ མཧཱཀསྶཔཾ བྷགཝཱ ཨེཏདཝོཙ – ‘‘ཛིཎྞོསི དཱནི ཏྭཾ, ཀསྶཔ, གརུཀཱནི ཙ ཏེ ཨིམཱནི སཱཎཱནི པཾསུཀཱུལཱནི ནིབྦསནཱནི། ཏསྨཱཏིཧ ཏྭཾ, ཀསྶཔ, གཧཔཏཱནི 1 ཙེཝ ཙཱིཝརཱནི དྷཱརེཧི, ནིམནྟནཱནི ཙ བྷུཉྫཱཧི, མམ ཙ སནྟིཀེ ཝིཧརཱཧཱི’’ཏི།

    148. Evaṃ me sutaṃ…pe… rājagahe veḷuvane. Atha kho āyasmā mahākassapo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ mahākassapaṃ bhagavā etadavoca – ‘‘jiṇṇosi dāni tvaṃ, kassapa, garukāni ca te imāni sāṇāni paṃsukūlāni nibbasanāni. Tasmātiha tvaṃ, kassapa, gahapatāni 2 ceva cīvarāni dhārehi, nimantanāni ca bhuñjāhi, mama ca santike viharāhī’’ti.

    ‘‘ཨཧཾ ཁོ, བྷནྟེ, དཱིགྷརཏྟཾ ཨཱརཉྙིཀོ ཙེཝ ཨཱརཉྙིཀཏྟསྶ ཙ ཝཎྞཝཱདཱི, པིཎྜཔཱཏིཀོ ཙེཝ པིཎྜཔཱཏིཀཏྟསྶ ཙ ཝཎྞཝཱདཱི, པཾསུཀཱུལིཀོ ཙེཝ པཾསུཀཱུལིཀཏྟསྶ ཙ ཝཎྞཝཱདཱི, ཏེཙཱིཝརིཀོ ཙེཝ ཏེཙཱིཝརིཀཏྟསྶ ཙ ཝཎྞཝཱདཱི, ཨཔྤིཙྪོ ཙེཝ ཨཔྤིཙྪཏཱཡ ཙ ཝཎྞཝཱདཱི, སནྟུཊྛོ ཙེཝ སནྟུཊྛིཡཱ ཙ ཝཎྞཝཱདཱི, པཝིཝིཏྟོ ཙེཝ པཝིཝེཀསྶ ཙ ཝཎྞཝཱདཱི, ཨསཾསཊྛོ ཙེཝ ཨསཾསགྒསྶ ཙ ཝཎྞཝཱདཱི, ཨཱརདྡྷཝཱིརིཡོ ཙེཝ ཝཱིརིཡཱརམྦྷསྶ 3 ཙ ཝཎྞཝཱདཱི’’ཏི།

    ‘‘Ahaṃ kho, bhante, dīgharattaṃ āraññiko ceva āraññikattassa ca vaṇṇavādī, piṇḍapātiko ceva piṇḍapātikattassa ca vaṇṇavādī, paṃsukūliko ceva paṃsukūlikattassa ca vaṇṇavādī, tecīvariko ceva tecīvarikattassa ca vaṇṇavādī, appiccho ceva appicchatāya ca vaṇṇavādī, santuṭṭho ceva santuṭṭhiyā ca vaṇṇavādī, pavivitto ceva pavivekassa ca vaṇṇavādī, asaṃsaṭṭho ceva asaṃsaggassa ca vaṇṇavādī, āraddhavīriyo ceva vīriyārambhassa 4 ca vaṇṇavādī’’ti.

    ‘‘ཀིཾ 5 པན ཏྭཾ, ཀསྶཔ, ཨཏྠཝསཾ སམྤསྶམཱནོ དཱིགྷརཏྟཾ ཨཱརཉྙིཀོ ཙེཝ ཨཱརཉྙིཀཏྟསྶ ཙ ཝཎྞཝཱདཱི, པིཎྜཔཱཏིཀོ ཙེཝ…པེ॰… པཾསུཀཱུལིཀོ ཙེཝ… ཏེཙཱིཝརིཀོ ཙེཝ… ཨཔྤིཙྪོ ཙེཝ… སནྟུཊྛོ ཙེཝ… པཝིཝིཏྟོ ཙེཝ… ཨསཾསཊྛོ ཙེཝ… ཨཱརདྡྷཝཱིརིཡོ ཙེཝ ཝཱིརིཡཱརམྦྷསྶ ཙ ཝཎྞཝཱདཱི’’ཏི?

    ‘‘Kiṃ 6 pana tvaṃ, kassapa, atthavasaṃ sampassamāno dīgharattaṃ āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī’’ti?

    ‘‘དྭེ ཁྭཱཧཾ, བྷནྟེ, ཨཏྠཝསེ སམྤསྶམཱནོ དཱིགྷརཏྟཾ ཨཱརཉྙིཀོ ཙེཝ ཨཱརཉྙིཀཏྟསྶ ཙ ཝཎྞཝཱདཱི, པིཎྜཔཱཏིཀོ ཙེཝ…པེ॰… པཾསུཀཱུལིཀོ ཙེཝ… ཏེཙཱིཝརིཀོ ཙེཝ… ཨཔྤིཙྪོ ཙེཝ… སནྟུཊྛོ ཙེཝ… པཝིཝིཏྟོ ཙེཝ… ཨསཾསཊྛོ ཙེཝ… ཨཱརདྡྷཝཱིརིཡོ ཙེཝ ཝཱིརིཡཱརམྦྷསྶ ཙ ཝཎྞཝཱདཱི། ཨཏྟནོ ཙ དིཊྛདྷམྨསུཁཝིཧཱརཾ སམྤསྶམཱནོ, པཙྪིམཉྩ ཛནཏཾ ཨནུཀམྤམཱནོ – ‘ཨཔྤེཝ ནཱམ པཙྪིམཱ ཛནཏཱ དིཊྛཱནུགཏིཾ ཨཱཔཛྫེཡྻུཾ’ 7། ‘ཡེ ཀིར ཏེ ཨཧེསུཾ བུདྡྷཱནུབུདྡྷསཱཝཀཱ ཏེ དཱིགྷརཏྟཾ ཨཱརཉྙིཀཱ ཙེཝ ཨཧེསུཾ ཨཱརཉྙིཀཏྟསྶ ཙ ཝཎྞཝཱདིནོ…པེ॰… པིཎྜཔཱཏིཀཱ ཙེཝ ཨཧེསུཾ …པེ॰… པཾསུཀཱུལིཀཱ ཙེཝ ཨཧེསུཾ… ཏེཙཱིཝརིཀཱ ཙེཝ ཨཧེསུཾ… ཨཔྤིཙྪཱ ཙེཝ ཨཧེསུཾ… སནྟུཊྛཱ ཙེཝ ཨཧེསུཾ… པཝིཝིཏྟཱ ཙེཝ ཨཧེསུཾ… ཨསཾསཊྛཱ ཙེཝ ཨཧེསུཾ… ཨཱརདྡྷཝཱིརིཡཱ ཙེཝ ཨཧེསུཾ ཝཱིརིཡཱརམྦྷསྶ ཙ ཝཎྞཝཱདིནོ’ཏི། ཏེ ཏཐཏྟཱཡ པཊིཔཛྫིསྶནྟི, ཏེསཾ ཏཾ བྷཝིསྶཏི དཱིགྷརཏྟཾ ཧིཏཱཡ སུཁཱཡ།

    ‘‘Dve khvāhaṃ, bhante, atthavase sampassamāno dīgharattaṃ āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī. Attano ca diṭṭhadhammasukhavihāraṃ sampassamāno, pacchimañca janataṃ anukampamāno – ‘appeva nāma pacchimā janatā diṭṭhānugatiṃ āpajjeyyuṃ’ 8. ‘Ye kira te ahesuṃ buddhānubuddhasāvakā te dīgharattaṃ āraññikā ceva ahesuṃ āraññikattassa ca vaṇṇavādino…pe… piṇḍapātikā ceva ahesuṃ …pe… paṃsukūlikā ceva ahesuṃ… tecīvarikā ceva ahesuṃ… appicchā ceva ahesuṃ… santuṭṭhā ceva ahesuṃ… pavivittā ceva ahesuṃ… asaṃsaṭṭhā ceva ahesuṃ… āraddhavīriyā ceva ahesuṃ vīriyārambhassa ca vaṇṇavādino’ti. Te tathattāya paṭipajjissanti, tesaṃ taṃ bhavissati dīgharattaṃ hitāya sukhāya.

    ‘‘ཨིམེ ཁྭཱཧཾ, བྷནྟེ, དྭེ ཨཏྠཝསེ སམྤསྶམཱནོ དཱིགྷརཏྟཾ ཨཱརཉྙིཀོ ཙེཝ ཨཱརཉྙིཀཏྟསྶ ཙ ཝཎྞཝཱདཱི, པིཎྜཔཱཏིཀོ ཙེཝ…པེ॰… པཾསུཀཱུལིཀོ ཙེཝ… ཏེཙཱིཝརིཀོ ཙེཝ… ཨཔྤིཙྪོ ཙེཝ… སནྟུཊྛོ ཙེཝ… པཝིཝིཏྟོ ཙེཝ… ཨསཾསཊྛོ ཙེཝ… ཨཱརདྡྷཝཱིརིཡོ ཙེཝ ཝཱིརིཡཱརམྦྷསྶ ཙ ཝཎྞཝཱདཱི’’ཏི།

    ‘‘Ime khvāhaṃ, bhante, dve atthavase sampassamāno dīgharattaṃ āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī’’ti.

    ‘‘སཱདྷུ སཱདྷུ, ཀསྶཔ། བཧུཛནཧིཏཱཡ ཀིར ཏྭཾ, ཀསྶཔ, པཊིཔནྣོ བཧུཛནསུཁཱཡ ལོཀཱནུཀམྤཱཡ ཨཏྠཱཡ ཧིཏཱཡ སུཁཱཡ དེཝམནུསྶཱནཾ། ཏསྨཱཏིཧ ཏྭཾ, ཀསྶཔ, སཱཎཱནི ཙེཝ པཾསུཀཱུལཱནི དྷཱརེཧི ནིབྦསནཱནི, པིཎྜཱཡ ཙ ཙརཱཧི, ཨརཉྙེ ཙ ཝིཧརཱཧཱི’’ཏི། པཉྩམཾ།

    ‘‘Sādhu sādhu, kassapa. Bahujanahitāya kira tvaṃ, kassapa, paṭipanno bahujanasukhāya lokānukampāya atthāya hitāya sukhāya devamanussānaṃ. Tasmātiha tvaṃ, kassapa, sāṇāni ceva paṃsukūlāni dhārehi nibbasanāni, piṇḍāya ca carāhi, araññe ca viharāhī’’ti. Pañcamaṃ.




    Next: ༦. ཨོཝཱདསུཏྟཾ • 6. Ovādasuttaṃ




    Footnotes:
    1. གཧཔཏིཀཱནི (སཱི॰)
    2. gahapatikāni (sī.)
    3. ཝཱིརིཡཱརབྦྷསྶ (ཀ॰)
    4. vīriyārabbhassa (ka.)
    5. ཀཾ (ཀ॰)
    6. kaṃ (ka.)
    7. ཨཱཔཛྫེཡྻ (སཱི॰ སྱཱ॰ ཀཾ॰)
    8. āpajjeyya (sī. syā. kaṃ.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༥. ཛིཎྞསུཏྟཝཎྞནཱ • 5. Jiṇṇasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༥. ཛིཎྞསུཏྟཝཎྞནཱ • 5. Jiṇṇasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact