| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৫. জিণ্ণসুত্তৰণ্ণনা
5. Jiṇṇasuttavaṇṇanā
১৪৮. ছিন্নভিন্নট্ঠানে ছিদ্দস্স অপুথুলত্তা অগ্গল়ং অদত্ৰাৰ সুত্তেন সংসিব্বনমত্তেন অগ্গল়দানেন চ ছিদ্দে পুথুলে। নিব্বসনানীতি চিরনিসেৰিতৰসনকিচ্চানি, পরিভোগজিণ্ণানীতি অত্থো। তেনাহ ‘‘পুব্বে…পে॰… লদ্ধনামানী’’তি, সঞ্ঞাপুব্বকো ৰিধি অনিচ্চোতি ‘‘গহপতানী’’তি ৰুত্তং যথা ‘‘ৰীরিয’’ন্তি।
148.Chinnabhinnaṭṭhāne chiddassa aputhulattā aggaḷaṃ adatvāva suttena saṃsibbanamattena aggaḷadānena ca chidde puthule. Nibbasanānīti ciranisevitavasanakiccāni, paribhogajiṇṇānīti attho. Tenāha ‘‘pubbe…pe… laddhanāmānī’’ti, saññāpubbako vidhi aniccoti ‘‘gahapatānī’’ti vuttaṃ yathā ‘‘vīriya’’nti.
সেনাপতিন্তি সেনাপতিভাৰিনং, সেনাপচ্চারহন্তি অত্থো। অত্তনো কম্মেনাতি অত্তনা কাতব্বকম্মেন। সোতি সত্থা। তস্মিন্তি মহাকস্সপত্থেরে করোতীতি সম্বন্ধো। ন করোতীতি ৰুত্তমত্থং ৰিৰরন্তো ‘‘কস্মা’’তিআদিমাহ। যদি সত্থা ধুতঙ্গানি ন ৰিস্সজ্জাপেতুকামো, অথ কস্মা ‘‘জিণ্ণোসি দানি ত্ৰ’’ন্তিআদিমৰোচাতি আহ ‘‘যথা পনা’’তিআদি।
Senāpatinti senāpatibhāvinaṃ, senāpaccārahanti attho. Attano kammenāti attanā kātabbakammena. Soti satthā. Tasminti mahākassapatthere karotīti sambandho. Na karotīti vuttamatthaṃ vivaranto ‘‘kasmā’’tiādimāha. Yadi satthā dhutaṅgāni na vissajjāpetukāmo, atha kasmā ‘‘jiṇṇosi dāni tva’’ntiādimavocāti āha ‘‘yathā panā’’tiādi.
দিট্ঠধম্মসুখৰিহারন্তি ইমস্মিংযেৰ অত্তভাৰে ফাসুৰিহারং। অমানুসিকা সৰনরতীতি অতিক্কন্তমানুসিকায অরঞ্ঞসদ্দুপ্পত্তিযা অরঞ্ঞেহং ৰসামীতি ৰিৰেকৰাসূপনিস্সযাধীনসদ্দসৰনপচ্চযা ধম্মরতি উপ্পজ্জতি। অপরোতি অঞ্ঞো, দুতিযোতি অত্থো। তত্থেৰাতি তস্মিংযেৰ একস্স ৰিহরণট্ঠানে ৰিহরণসমযে চ ফাসু ভৰতি চিত্তৰিৰেকসম্ভৰতো। তেনাহ ‘‘একস্স রমতো ৰনে’’তি।
Diṭṭhadhammasukhavihāranti imasmiṃyeva attabhāve phāsuvihāraṃ. Amānusikā savanaratīti atikkantamānusikāya araññasadduppattiyā araññehaṃ vasāmīti vivekavāsūpanissayādhīnasaddasavanapaccayā dhammarati uppajjati. Aparoti añño, dutiyoti attho. Tatthevāti tasmiṃyeva ekassa viharaṇaṭṭhāne viharaṇasamaye ca phāsu bhavati cittavivekasambhavato. Tenāha ‘‘ekassa ramato vane’’ti.
তথাতি যথা আরঞ্ঞিকস্স রতি, তথা পিণ্ডপাতিকস্স লব্ভতি দিট্ঠধম্মসুখৰিহারো। এস নযো সেসেসু। অপিণ্ডপাতিকাধীনো ইতরস্স ৰিসেসজোতকোতি তমেৰস্স ৰিসেসং দস্সেতুং ‘‘অকালচারী’’তিআদি ৰুত্তং।
Tathāti yathā āraññikassa rati, tathā piṇḍapātikassa labbhati diṭṭhadhammasukhavihāro. Esa nayo sesesu. Apiṇḍapātikādhīno itarassa visesajotakoti tamevassa visesaṃ dassetuṃ ‘‘akālacārī’’tiādi vuttaṃ.
অম্হাকং সলাকং গহেত্ৰা ভত্তত্থায গেহং অনাগচ্ছন্তস্স সত্তাহং ন পাতেতব্বন্তি সামিকেহি দিন্নত্তা সত্তাহং সলাকং ন লভতি, ন কতিকৰসেন। পিণ্ডচারিকৰত্তে অৰত্তনতো ‘‘যস্স চেসা’’তিআদি ৰুত্তং।
Amhākaṃ salākaṃ gahetvā bhattatthāya gehaṃ anāgacchantassa sattāhaṃ na pātetabbanti sāmikehi dinnattā sattāhaṃ salākaṃ na labhati, na katikavasena. Piṇḍacārikavatte avattanato ‘‘yassa cesā’’tiādi vuttaṃ.
পঠমতরং কাতব্বং যং, তং ৰত্তং, ইতরং পটিৰত্তং। মহন্তং ৰা ৰত্তং, খুদ্দকং পটিৰত্তং। কেচি ‘‘ৰত্তপটিপত্তি’’ন্তি পঠন্তি, ৰত্তস্স করণন্তি অত্থো। উদ্ধরণ-অতিহরণ-ৰীতিহরণৰোস্সজ্জন-সন্নিক্খেপন-সন্নিরুম্ভনানং ৰসেন ছ কোট্ঠাসে। গরুভাৰেনাতি থিরভাৰেন।
Paṭhamataraṃ kātabbaṃ yaṃ, taṃ vattaṃ, itaraṃ paṭivattaṃ. Mahantaṃ vā vattaṃ, khuddakaṃ paṭivattaṃ. Keci ‘‘vattapaṭipatti’’nti paṭhanti, vattassa karaṇanti attho. Uddharaṇa-atiharaṇa-vītiharaṇavossajjana-sannikkhepana-sannirumbhanānaṃ vasena cha koṭṭhāse. Garubhāvenāti thirabhāvena.
‘‘অমুকস্মিং সেনাসনে ৰসন্তা বহুং ৰস্সৰাসিকং লভন্তী’’তি তথা ন ৰস্সৰাসিকং পরিযেসন্তো চরতি ৰস্সৰাসিকস্সেৰ অগ্গহণতো। তস্মা সেনাসনফাসুকংযেৰ চিন্তেতি। তেন বহুপরিক্খারভাৰেন ফাসুৰিহারো নত্থি পরিক্খারানং রক্খণপটিজগ্গনাদিদুক্খবহুলতায। অপ্পিচ্ছাদীনন্তি অপ্পিচ্ছসন্তুট্ঠাদীনংযেৰ লব্ভতি দিট্ঠধম্মসুখৰিহারো।
‘‘Amukasmiṃ senāsane vasantā bahuṃ vassavāsikaṃ labhantī’’ti tathā na vassavāsikaṃ pariyesanto carati vassavāsikasseva aggahaṇato. Tasmā senāsanaphāsukaṃyeva cinteti. Tena bahuparikkhārabhāvena phāsuvihāro natthi parikkhārānaṃ rakkhaṇapaṭijagganādidukkhabahulatāya. Appicchādīnanti appicchasantuṭṭhādīnaṃyeva labbhati diṭṭhadhammasukhavihāro.
জিণ্ণসুত্তৰণ্ণনা নিট্ঠিতা।
Jiṇṇasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. জিণ্ণসুত্তং • 5. Jiṇṇasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. জিণ্ণসুত্তৰণ্ণনা • 5. Jiṇṇasuttavaṇṇanā
